ກຽມຈັດແຂ່ງຂັນເຕະບານຊາຍຢູ-18 ຊີງຂັນ ສຕລ 2019

554 16 ກ.ຍ. 2019 ວົງຈອນກີລາ
ກຽມຈັດແຂ່ງຂັນເຕະບານຊາຍຢູ-18 ຊີງຂັນ ສຕລ 2019

    ສະ­ຫະ­ພັນ​ກິ­ລາ​ບານ­ເຕະ​ແຫ່ງ​ຊາດ​ລາວ (ສຕລ) ມີ​ຄວາມ​ຍິນ​ດີ​ແຈ້ງ​ມາ​ຍັງ​ບັນ­ດາ​ສະ­ໂມ­ສອນ ທີ່​ເຂົ້າ​ຮ່ວມ​ການ​ແຂ່ງ­ຂັນ​ເຕະ­ບານ​ສາຍ ກ ແລະ ເປບ​ຊີ​ລາວ​ພຣີ​ເມຍ​ລີກ​ປີ 2019 ເພື່ອ​ເປັນ​ການ​ພັດ­ທະ­ນາ​ກີ­ລາ​ບານ­ເຕະ​ໃຫ້​ມີ​ການ­ເຄື່ອນ­ໄຫວ​ຢ່າງ​ເປັນ​ປົກ­ກະ­ຕິ ແລະ ຕໍ່​ເນື່ອງ ພ້ອມ​ທັງ​ປະ­ຕິ­ບັດ​ຕາມ​ແຜນ­ການ​ຈັດ​ແຂ່ງ­ຂັນ​ປີ 2019 ໃຫ້​ບັນ­ລຸ​ເປົ້າ​ໝາຍ ສຕລ ຈະ​ໄດ້​ເປີດ​ການ​ແຂ່ງ­ຂັນ​ເຕະ­ບານ​ເຍົາ­ວະ​ຊົນ​ຊາຍ​ຮຸ່ນ​ອາ­ຍຸ​ບໍ່​ເກີນ 18 ປີ ຊີງ​ຂັນ ສຕລ ປີ 2019 ໃນ​ຕົ້ນ​ເດືອນ​ຕຸ­ລາ​ນີ້​ໂດຍ​ຈະ​ຮັບ​ທັງ​ໝົດ 16 ທີມ ແບ່ງ​ອອກ​ເປັນ 2 ກຸ່ມ ແຂ່ງ­ຂັນ​ແບບ​ພົບ​ກັນ​ໝົດ​ຮອບ​ດຽວ ທີມ​ທີ່​ມີ​ຄະ­ແນນ​ເປັນ​ອັນ​ດັບ 1-2 ຂອງ​ແຕ່​ລະ​ກຸ່ມ​ຈະ​ຜ່ານ​ເຂົ້າ​ຮອບ​ຮອງ​ຊະ­ນະ​ເລີດ​ຕໍ່​ໄປ.

    ສຳ­ລັບ​ເງື່ອນ­ໄຂ​ຂອງ​ນັກ­ກີ­ລາ​ຕ້ອງ​ມີ​ອາ­ຍຸ​ບໍ່​ເກີນ 18 ປີ ແລະ ບໍ່​ຕ່ຳ​ກວ່າ 16 ປີ ເພດ​ຊາຍ ສັນ­ຊາດ​ລາວ ແລະ ມີ​ເອ­ກະ­ສານ​ຢັ້ງ­ຢືນ​ຕົວ​ຕົນ​ຖືກ­ຕ້ອງ ປະ­ກອບ​ມີ: ປື້ມ​ສຳ­ມະ­ໂນ​ຄົວ ບັດ­ປະ­ຈຳ­ຕົວ ແລະ ໜັງ­ສື­ຜ່ານ­ແດນ ຈຶ່ງ​ສາ­ມາດ​ລົງ­ທະ­ບຽນ ແລະ ໄດ້​ຮັບ​ອະ­ນຸ­ຍາດ​ໃຫ້​ເຂົ້າ​ຮ່ວມ​ການ​ແຂ່ງ­ຂັນ​ໄດ້ ສະ­ໂມ­ສອນ​ຕ້ອງ​ມີ​ເອ­ກະ­ສານ​ສະ­ແດງ​ຄວາມ​ຜູກ​ພັນ​ດ້ານ​ກົດ­ໝາຍ (ສັນ­ຍາ​ວ່າ​ຈ້າງ) ຢ່າງ​ເປັນ​ລາຍ​ລັກ​ອັກ­ສອນ​ກັບ​ນັກ­ກີ­ລາ ແລະ ບຸກ​ຄະ­ລາ​ກອນ​ສະ­ໂມ­ສອນ ເພື່ອ​ໃຫ້​ສອດ­ຄ່ອງ​ກັບ​ກົດ​ລະ­ບຽບ​ການ​ແຂ່ງ ຂັນ ສະ­ໂມ­ສອນ​ໜຶ່ງ​ສາ­ມາດ​ລົງ­ທະ­ບຽນ​ຄະ­ນະ​ຄູ​ເຝິກ​ໄດ້​ສູງ​ສຸດ​ບໍ່​ເກີນ 15 ຄົນ ແລະ ນັກ­ກີ­ລາ​ສູງ​ສຸດ​ບໍ່​ເກີນ 30 ຄົນ ໃນ​ການ​ລົງ­ທະ­ບຽນ​ສະ­ໂມ­ສອນ​ຕ້ອງ​ກຽມ​ຮູບ​ຂະ­ໜາດ 3x4 ຈຳ­ນວນ 2 ໃບ ຫຼື ເປັນ​ຟາຍ​ຮູບ​ດີ​ຈິ​ຕອນ​ຂະ­ໜາດ​ບໍ່​ເກີນ 1MB ເອ­ກະ­ສານ​ສັນ­ຍາ​ວ່າ​ຈ້າງ ແລະ ເອ­ກະ­ສານ​ຢັ້ງ­ຢືນ​ຕົວ​ຕົນ (ປື້ມ​ສຳ­ມະ­ໂນ​ຄົວ ບັດ­ປະ­ຈຳ­ຕົວ ແລະ ໜັງ­ສື­ຜ່ານ­ແດນ).

    ນອກ​ນັ້ນ​ປີ​ນີ້​ທີມ​ທີ່​ເຂົ້າ​ຮ່ວມ​ການ​ແຂ່ງ­ຂັນ​ບໍ່​ຕ້ອງ​ເສຍ​ຄ່າ​ສະ­ໝັກ ແລະ ຈະ​ໄດ້​ຮັບ​ເງິນ​ອຸດ​ໜູນ​ທີມ​ລະ 3 ລ້ານ​ກີບ ພ້ອມ​ທັງ​ໄດ້​ຮັບ​ບານ​ສຳ­ລັບ​ການ​ເຝິກ­ຊ້ອມ 10 ໜ່ວຍ​ຕໍ່​ທີມ ໃນ​ການ​ເຂົ້າ​ຮ່ວມ​ການ​ແຂ່ງ­ຂັນ ທີມ​ຊະ­ນະ​ເລີດ​ຈະ​ໄດ້​ຮັບ​ເງິນ​ລາ­ງວັນ 15 ລ້ານ​ກີບ ພ້ອມ​ຂັນ​ລາ­ງວັນ​ຊະ­ນະ​ເລີດ ແລະ ຫຼຽນ​ລາ­ງວັນ ສ່ວນ​ອັນ​ດັບ 2 ແລະ 3 ຈະ​ໄດ້​ຮັບ​ຫຼຽນ​ລາ­ງວັນ ແລະ ເງິນ​ລາ­ງວັນ​ຕາມ​ກົດ​ລະ­ບຽບ​ຖ້າ​ຫາກ​ສະ­ໂມ­ສອນ​ໃດ​ສົນ­ໃຈ​ສາ­ມາດ​ພົວ­ພັນ​ເອົາ​ຮ່າງ​ເອ­ກະ­ສານ​ສະ­ໝັກ​ເຂົ້າ​ຮ່ວມ​ການ​ແຂ່ງ­ຂັນ​ນຳ​ພະ​ແນກ ຈັດ­ການ​ແຂ່ງ­ຂັນ ສຕລ ໄດ້​ນັບ​ແຕ່​ວັນ​ທີ 11 ກັນ­ຍາ 2019 ເປັນ­ຕົ້ນ​ໄປ ແລະ ຕ້ອງ​ສົ່ງ​ໃບ​ຕອບ​ຕົກ­ລົງ​ເຂົ້າ​ຮ່ວມ​ຊ້າ​ສຸດ​ບໍ່​ເກີນ​ວັນ​ທີ 28 ກັນ­ຍາ 2019 ທີ່​ເປັນ​ມື້​ສິ້ນ​ສຸດ​ການ​ຮັບ​ສະ­ໝັກ.

ຂ່າວທີ່ກ່ຽວຂ້ອງ