ອັດຕະປື ຕ້ອງການເຂົ້າສານຫຼາຍໂຕນ ຊ່ວຍເຫຼືອຜູ້ປະສົບໄພ

222 13 ກ.ຍ. 2019 ຂ່າວໜ້າ​ໜຶ່ງ

    ວັນ​ທີ 12 ກັນ­ຍາ 2019 ທ່ານ ວຽງ​ໄຊ ໄຊ​ສົມ­ບັດ ຫົວ­ໜ້າ​ຫ້ອງ­ການ​ແຂວງ​ອັດ​ຕະ​ປື ໄດ້​ແຈ້ງ​ໃຫ້​ຮູ້​ວ່າ: ແຂວງ​ອັດ​ຕະ​ປື ໄດ້​ຮັບ​ຜົນ​ກະ­ທົບ​ຈາກ​ພາ­ຍຸ​ດີ​ເປັສ​ຊັນ ແຕ່​ວັນ​ທີ 3-5 ກັນ­ຍາ 2019 ເປັນ­ຕົ້ນ​ມາ ເຊິ່ງ​ເປັນ​ສາ­ເຫດ​ນ້ຳ​ເຊ​ກອງ ແລະ ແມ່­ນ້ຳ​ອື່ນໆ​ໄຫຼ​ນອງ​ຖ້ວມ​ບ້ານ​ເຮືອນ​ປະ­ຊາ­ຊົນ 5 ເມືອງ 86 ບ້ານ 13.323 ຄອບ­ຄົວ ໄດ້​ສ້າງ​ຄວາມ​ເສຍ​ຫາຍ​ຢ່າງ​ຫຼວງ­ຫຼາຍ​ຕໍ່​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ.

    ຕໍ່​ບັນ­ຫາ​ດັ່ງ­ກ່າວ ອົງ­ການ​ກາ­ແດງ​ແຂວງ​ອັດ​ຕະ​ປື​ກໍ​ບໍ່​ນິ້ງ​ນອນ​ໃຈ​ໄດ້​ປະ­ສານ​ສົມ­ທົບ​ກັບ​ຄະ­ນະ​ກຳ­ມະ­ການ​ໄພ ພິ­ບັດ​ຂັ້ນ​ແຂວງ ພະ​ແນກ​ແຮງ​ງານ ແລະ ສະ­ຫວັດ­ດີ​ການ​ແຂວງ ແລະ ໄດ້​ຈັດ​ສົ່ງ​ເຮືອ​ທ້ອງ​ແບນ​ໄປ​ຍົກ­ຍ້າຍ​ປະ­ຊາ­ຊົນ​ອອກ​ຈາກ​ເຂດ​ນ້ຳ​ຖ້ວມ​ມາ​ຢູ່​ທີ່​ເຂດ​ປອດ​ໄພ ແລະ ຂົນ​ເຄື່ອງ​ຂອງ​ໄດ້ 30 ຄອບ­ຄົວ ໃນ​ວັນ​ທີ 4-5 ກັນ­ຍາ 2019 ແລະ ເຝົ້າ​ລະ­ວັງ​ຕະ­ຫຼອດ 24 ຊົ່ວ­ໂມງ ຕັ້ງ​ຈຸດ​ຮັບ​ເຄື່ອງ​ບໍ­ລິ­ຈາກ​ນຳ​ປະ­ຊາ­ຊົນ ແມ່​ຄ້າ​ຊາວ​ຂາຍ ນັກ­ທຸ­ລະ­ກິດ ຮ່ວມ​ກັບ​ພະ​ແນກ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ​ແຂວງ​ໄດ້​ຈຳ­ນວນ​ຫຼວງ­ຫຼາຍ​ແຕ່​ບໍ່​ພຽງ­ພໍ ເກັບ​ກຳ​ຂໍ້​ມູນ​ຜົນ​ເສຍ​ຫາຍ​ຈາກ​ພະ­ແນກ­ການ​ກ່ຽວ­ຂ້ອງ​ແຂວງ​ເຊັ່ນ: ພະ​ແນກ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ​ແຂວງ ແລະ ໜ່ວຍ​ງານ​ອື່ນໆ ນອກ​ນັ້ນ ຍັງ​ເຂົ້າ​ຮ່ວມ​ປະ­ຊຸມ​ກັບ​ຄະ​ກຳ­ມະ­ການ​ໄພ­ພິ­ບັດ​ຂັ້ນ​ແຂວງ ເພື່ອ​ຕິດ­ຕາມ ແລະ ວາງ​ແຜນ​ຮັບ​ມື​ກັບ​ໄພ­ພິ­ບັດ

    ປັດ­ຈຸ­ບັນ ກາ­ແດງ​ແຂວງ​ອັດ​ຕະ​ປື​ມີ​ຄວາມ​ຕ້ອງ­ການ​ອັນ​ຮີບ​ດ່ວນ ແລະ ຈຳ­ເປັນ​ເພື່ອ​ແກ້​ໄຂ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ ສິ່ງ​ສຳ­ຄັນ​ເຂົ້າ­ສານ 150 ໂຕນ ອາ­ຫານ​ແຫ້ງ ມຸ້ງ ສາດ ຜ້າ­ຫົ່ມ ແລະ ອື່ນໆ ດັ່ງ­ນັ້ນ ຈຶ່ງ​ຮຽກ­ຮ້ອງ​ມາ​ຍັງ​ບັນ­ດາ​ບໍ­ລິ­ສັດ​ຫ້າງ​ຮ້ານ ນັກ­ທຸ­ລະ­ກິດ ແລະ ນິ­ຕິ­ບຸກ­ຄົນ​ຕ່າງໆ​ທີ່​ມີ​ເງື່ອນ­ໄຂ​ຈົ່ງ​ໃຫ້­ການ​ປະ­ກອບ­ສ່ວນ​ຊ່ວຍ­ເຫຼືອ​ເຊິ່ງ​ກັນ ແລະ ກັນ.

ຂ່າວທີ່ກ່ຽວຂ້ອງ