ຂຸນພົນນ້ອຍ ສະເໝີ ປາຍຟ້າ ມວຍນະຄອນຫຼວງກໍກຽດແດນຈຳປາ

1.000 13 ກ.ຍ. 2019 ວົງຈອນກີລາ
ຂຸນພົນນ້ອຍ ສະເໝີ ປາຍຟ້າ ມວຍນະຄອນຫຼວງກໍກຽດແດນຈຳປາ

    ການ​ແຂ່ງ­ຂັນ​ມວຍ ລາຍ­ການ​ນະ­ຄອນ­ຫຼວງ ກໍ​ກຽດ ແດນ​ຈຳ­ປາ ປະ­ຈຳ​ປີ 2019 ອາ­ທິດ​ທີ 4 ເປັນ​ການ​ຮ່ວມ​ກັນ​ລະ­ຫວ່າງ​ສະ­ຫະ­ພັນ​ມວຍ​ລາວ ນະ­ຄອນ­ຫຼວງ​ວຽງ​ຈັນ ສົມ­ທົບ​ກັບ​ບໍ­ລິ­ສັດ ກໍ​ກຽດ​ບ໋ອກ​ຊີງ​ກຣຸບ  ຈຳ­ກັດ ໃນ​ວັນ​ທີ 7 ກັນ­ຍາ 2019 ທີ່​ສະ­ໂມ­ສອນ​ກີ­ລາ​ໃນ​ຮົ່ມ​ສະ­ຫະ­ພັນ​ມວຍ​ລາວ​ນະ­ຄອນ­ຫຼວງ​ວຽງ​ຈັນ (ບຶງ​ຂະ​ຫຍອງ) ມີ​ການ​ແຂ່ງ­ຂັນ​ຕາມ​ປົກ­ກະ­ຕິ​ມວຍ 6 ຄູ່ ປົກ­ກະ­ຕິ ສຳ­ລັບ​ມວຍ​ຄູ່​ເອກ ລະ­ຫວ່າງ ຂຸນ​ພົນ ສະ­ໂມ­ສອນ ຄຳ​ເສັງ ແລະ ປາຍ​ຟ້າ ກຽດ​ສົມ​ນຶກ ຈາກ​ໄທ ຮຸ່ນ​ນ້ຳ­ໜັກ 65 ກິ​ໂລ ຂຶ້ນ​ຊົກ​ກັນ​ໃນ​ຄູ່​ທີ 4.

    ຜ່ານ​ການ​ແຂ່ງ­ຂັນ​ຜົນ​ປາ­ກົດ​ວ່າ ແຂ່ງ­ຂັນ​ຄົບ 5 ຍົກ ບໍ່​ມີ​ໃຜ​ນັອດ​ກັນ​ໄດ້ ແລະ ອອກ​ໝັດ​ໃສ່​ກັນ​ຢ່າງ​ສຸດ​ມ່ວນ ເຮັດ​ໃຫ້​ກຳ­ມະ­ການ​ຕັດ­ສິນ​ຍົກ​ມື​ໃຫ້​ສະ­ເໝີ​ກັນ​ໄປ ຂະ­ນະ​ທີ່​ຜົນ​ອີກ 5 ຄູ່ ປະ­ກອບ​ມີ ເພັດ​ບຸນ​ຄ້ຳ ຈາກ​ສະ­ໂມ­ສອນ ປກສ ເສຍ​ຄະ­ແນນ​ໃຫ້ ເກົ້າ​ແສນ ຂວັນ​ໃຈ​ສີ​ໂຄດ ຮຸ່ນ​ນ້ຳ­ໜັກ 56 ກິ​ໂລ ເພັດ​ສະ​ຄາດ ສິດ​ຈານ​ເພັງ ເສຍ​ນັອກ​ຍົກ 2 ໃຫ້ ສຸ­ລິ­ຍັນ​ເລັກ ກຽດ​ສົມ​ນຶກ ຈາກ​ປະ­ເທດ​ໄທ ຮຸ່ນ​ນ້ຳ­ໜັກ 57 ກິ​ໂລ ສອນ​ນາ­ລາຍ ຈາກ​ສະ­ໂມ­ສອນ ປກສ ຊະ­ນະ​ຄະ­ແນນ ເດດ​ພະ​ຍັກ ກຽດ​ສົມ​ນຶກ ຈາກ​ໄທ ເພັດ​ປະ­ກາຍ​ຟ້າ ຈາກ​ສະ­ໂມ­ສອນ ປກສ ເສຍ​ນັອກ​ໃຫ້ ຂຸນ​ກ້ອງ ສະ­ໂມ­ສອນ​ຄຳ​ເສັງ ຮຸ່ນ​ນ້ຳ­ໜັກ 52 ກິ​ໂລ ແລະ ກ້ອງ​ກັງ­ວານ ສິດ​ສົມ​ພອນ ເສຍ​ນັອກ​ໃຫ້ ທຸງ­ໄຊ ສິດ​ຈານ​ເພັງ ຮຸ່ນ​ນ້ຳ­ໜັກ 56 ກິ​ໂລ.

    ລາຍ­ການ​ນີ້ ຈັດ​ຂຶ້ນ​ເພື່ອ​ເປັນ​ການ​ເລືອກ­ເຟັ້ນ​ນັກ​ຊົກ​ຜູ້​ທີ່​ມີ​ພອນ​ສະ­ຫວັນ​ດີ­ເດັ່ນ ເພື່ອ​ກ້າວ​ສູ່​ການ​ເປັນ​ນັກ​ຊົກ​ຂອງ​ນະ­ຄອນ­ຫຼວງ ກຽມ​ເຂົ້າ​ຮ່ວມ​ລ່າ​ຫຼຽນ​ຄຳ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ Xl ຫຼື ຊຽງ​ຂວາງ ເກມ​ທີ່​ແຂວງ​ຊຽງ​ຂວາງ ຮັບ​ກຽດ​ເປັນ​ເຈົ້າ­ພາບ​ວັນ​ທີ 22 ມີ­ນາ ຫາ 1 ເມ­ສາ 2020.

ຂ່າວທີ່ກ່ຽວຂ້ອງ