ຂ່າວຫຼ້າສຸດ

ເຈົ້າຄອງ ລົງຊຸກຍູ້ການຜະລິດກະສິກຳເປັນສິນຄ້າ ຢູ່ບ້ານຮ່ອງງົວ

415 12 ກ.ຍ. 2019 ຂ່າວໜ້າ​ໜຶ່ງ
ເຈົ້າຄອງ ລົງຊຸກຍູ້ການຜະລິດກະສິກຳເປັນສິນຄ້າ ຢູ່ບ້ານຮ່ອງງົວ

    ວັນ​ທີ 11 ກັນ­ຍາ 2019 ທ່ານ ສິນ​ລະ​ວົງ ຄຸດ​ໄພ​ພູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ (ນວ) ພ້ອມ​ຫົວ­ໜ້າ​ພະ​ແນ​ການ​ກ່ຽວ­ຂ້ອງ ໄດ້​ລົງ​ຢ້ຽມ­ຢາມ​ຊຸກ­ຍູ້​ການ​ຜະ­ລິດ​ກະ­ສິ­ກຳ​ຢູ່​ບ້ານ​ຮ່ອງ​ງົວ  ແລະ ລົງ​ຕິດ­ຕາມ​ເສັ້ນ­ທາງ 13   ເໜືອ ທີ່​ເປ່​ເພ​ຈາກ​ສະ­ພາບ​ນ້ຳ​ຖ້ວມ ເມືອງ​ນາ​ຊາຍ​ທອງ ຖືກ​ຕ້ອນ­ຮັບ​ຈາກ​ທ່ານ ວິ­ລະ​ສັກ   ນາມ​ມຸນ­ຕີ ເຈົ້າ­ເມືອງ​ນາ​ຊາຍ​ທອງ ພ້ອມ​ດ້ວຍ​ການ​ນຳ​ເມືອງ ອຳ­ນາດ​ການ​ປົກ­ຄອງ​ບ້ານ ແລະ ປະ­ຊາ­ຊົນ.

    ທ່ານ ວິ­ລະ​ສັກ ນາມ​ມຸນ­ຕີ ໄດ້​ລາຍ​ງານ​ສະ­ພາບ​ຂອງ​ເມືອງ​ນາ​ຊາຍ​ທອງ ໃນ​ໄລ­ຍະ​ຜ່ານ​ມາ​ວ່າ: ທົ່ວ​ເມືອງ​ມີ​ແຜນ​ປູກ​ເຂົ້າ­ນາ​ປີ 7.994 ເຮັກ­ຕາ ແລະ ນາ­ແຊງ 4.251 ເຮັກ­ຕາ ໃນ​ຜ່ານ​ມາ​ການ​ປູກ​ເຂົ້າ­ນາ­ແຊງ​ສາ­ມາດ​ປົດ​ປ່ອຍ​ແຮງ​ງານ​ຊາວ­ນາ​ອອກ​ຈາກ​ການ​ດຳ­ນາ ແລະ ກ່ຽວ​ເຂົ້າ​ໄດ້ 10% ຕໍ່​ປີ ຄື: ປົດ​ປ່ອຍ​ແຮງ​ງານ​ດຳ­ນາ​ໄດ້ 80% ແລະ ແຮງ​ງານ​ກ່ຽວ​ເຂົ້າ​ໄດ້ 85% ກຸ່ມ​ຜະ­ລິດ​ເຂົ້າ 5 ບ້ານ​ຈຸດ​ສຸມ​ເຂດ​ລຽບ​ຊົນ­ລະ­ປະ­ທານ​ຄື:ບ້ານ​ນ້ຳ​ຫຸມ ນາ​ໜາດ ຮ່ອງ​ງົວ ຫຸມ​ແບ່ງ ແລະ ບ້ານ​ເປິກ ລວມ​ທັງ​ໝົດ 69 ຄອບ­ຄົວ 124,3 ເຮັກ­ຕາ ໃນ​ນັ້ນ ມີ​ຄອບ­ຄົວ​ຕົວ​ແບບ​ປູກ​ເຂົ້າ​ພາຍ​ໃນ​ກຸ່ມ 22 ຄອບ­ຄົວ ແລະ ປີ 2019 ເມືອງ​ໄດ້​ຮັບ​ຜົນ​ກະ­ທົບ​ຈາກ​ນ້ຳ​ຖ້ວມ​ເນື້ອ­ທີ່​ທຳ​ການ​ຜະ­ລິດ 502 ເຮັກ­ຕາ ໃນ​ນັ້ນ ໄດ້​ຮັບ​ຜົນ​ເສຍ​ຫາຍ 17 ເຮັກ­ຕາ ໄດ້​ມີ​ແຜນ​ຟື້ນ​ຟູ ໂດຍ​ປຸກ­ລະ­ດົມ​ຊຸກ­ຍູ້​ຄອບ­ຄົວ​ທີ່​ໄດ້​ຮັບ​ຜົນ​ກະ­ທົບ​ປູກ​ພືດ​ສຳ­ຮອງ​ໃນ​ລະ­ດູ­ແລ້ງ ເຊັ່ນ: ໝາກ­ໂມ ໝາກ­ແຕງ ໝາກ­ຖົ່ວ ພືດ​ຜັກ​ກິນ​ໃບ ພ້ອມ​ນັ້ນ ໄດ້​ສົ່ງ­ເສີມ​ການ​ຜະ­ລິດ ແລະ ການ​ປູກ­ຝັງ​ສຸມ​ໃສ່​ຂະ­ຫຍາຍ​ການ​ຜະ­ລິດ​ສິນ­ຄ້າ​ກະ­ສິ­ກຳ​ຄຸນ​ນະ​ພາບ ແລະ ສະ­ບຽງ​ອາ­ຫານ​ປອດ​ສານ­ພິດ​ແບບ​ປະ­ສົມ​ປະ­ສານ ຊຸກ­ຍູ້​ປູກ​ເຂົ້າ​ເຕັກ­ນິກ​ໃໝ່​ເຂົ້າ​ໃນ​ການ​ຜະ­ລິດ​ຢ່າງ​ມີ​ຈຸດ​ສຸມ​ໂດຍ​ມີ​ການ­ຈັດ­ຕັ້ງ​ກຸ່ມ​ປູກ­ຝັງ-ລ້ຽງ­ສັດ​ແບບ​ເປັນ​ຟາມ​ເພື່ອ​ກ້າວ​ໄປ​ສູ່​ການ​ສ້າງ­ຕັ້ງ​ເປັນ​ສະ­ຫະ­ກອນ ເຮັດ​ໃຫ້­ການ​ຜະ­ລິດ​ເພີ່ມ​ຂຶ້ນ ຮັບ­ປະ­ກັນ​ການ​ຕອບ​ສະ­ໜອງ​ກັບ​ຄວາມ​ຕ້ອງ­ການ​ຂອງ​ຕະ­ຫຼາດ ແລະ ໃນ​ໂອ­ກາດ​ນີ້ ໄດ້​ສະ­ເໜີ​ໃຫ້​ພາກ­ສ່ວນ​ກ່ຽວ­ຂ້ອງ​ມີ​ການ​ເຝິກ­ອົບ­ຮົມ​ການ​ຄຸ້ມ​ຄອງ​ບໍ­ລິ­ຫານ​ສະ­ຫະ­ກອນ ດ້ານ​ເຕັກ­ນິກ​ວິ­ຊາ​ການ ການ​ເກັບ​ຮັກ­ສາ ແລະ ແປ​ຮູບ​ຜະ­ລິດ​ຕະ​ພັນ ການ​ດຳ­ເນີນ​ເອ­ກະ­ສານ​ຂໍ​ນຳ​ເຂົ້າ-ສົ່ງ​ອອກ​ຜະ­ລິດ​ຕະ​ພັນ​ກະ­ສິ­ກຳ ແລະ ໃຫ້​ພາກ​ລັດ​ປັບ­ປຸງ​ກົນ​ໄກ​ໃນ​ການ​ຄຸ້ມ​ຄອງ​ລາ­ຄາ​ຜະ­ລິດ​ຕະ​ພັນ​ກະ­ສິ­ກຳ​ໜ້າ​ຟາມ ແລະ ຄຸ້ມ​ຄອງ​ການ​ສະ­ໜອງ​ຜົນ​ຜະ­ລິດ​ໃຫ້​ດຸ່ນ​ດ່ຽງ​ກັບ​ຄວາມ​ຕ້ອງ­ການ​ຂອງ​ຕະ­ຫຼາດ ມີ​ມາດ​ຕະ­ການ​ປົກ​ປ້ອງ​ການ​ຜະ­ລິດ​ຂອງ​ຊາວ​ກະ­ສິ­ກອນ​ໃຫ້​ຊັດ​ເຈນ ຂໍ້​ຍົກ­ເວັ້ນ​ອາ­ກອນ​ນຳ​ເຂົ້າ​ເຊັ່ນ: ອາ­ຫານ ປາ ປັດ​ໄຈ​ຮັບ​ໃຊ້​ການ​ຜະ­ລິດ ແລະ ສະ­ເໜີ​ຂໍ​ກູ້​ຢືມ​ທຶນ​ດອກ​ເບ້ຍ​ຕ່ຳ​ໄລ­ຍະ​ຍາວ​ເພື່ອ​ສົ່ງ­ເສີມ​ການ​ຜະ­ລິດ​ພາຍ​ໃນ​ສະ­ຫະ­ກອນ.

    ໂອ­ກາດ​ນີ້ ທ່ານ​ເຈົ້າ​ຄອງ ນວ ໄດ້​ເນັ້ນ​ໃຫ້​ອຳ­ນາດ​ການ​ປົກ­ຄອງ​ເມືອງ ແລະ ບ້ານ​ໃຫ້​ເອົາ­ໃຈ­ໃສ່​ຊີ້​ນຳ​ປະ­ຊາ­ຊົນ​ສືບ­ຕໍ່​ຈັດ​ຕັ້ງ​ປະ­ຕິ­ບັດ​ໂຄງ­ການ​ປົດ​ປ່ອຍ​ແຮງ​ງານ​ຂອງ​ຊາວ­ນາ​ອອກ​ຈາກ​ການ​ດຳ­ນາ-ກ່ຽວ​ເຂົ້າ ໂດຍ​ຫັນ​ມາ​ນຳ​ໃຊ້​ກົນ​ຈັກ​ເຂົ້າ​ໃນ​ການ​ຜະ­ລິດ​ກະ­ສິ­ກຳ​ໃຫ້​ໄດ້ 100% ໃນ​ສົກ​ປີ 2019-2020 ແລະ ໃຫ້​ກາຍ­ເປັນ​ຕົວ​ແບບ​ຂອງ​ບ້ານ ພ້ອມ​ນັ້ນ ສະ­ເໜີ​ໃຫ້​ບ້ານ​ເອົາ­ໃຈ­ໃສ່​ຊຸກ­ຍູ້​ສົ່ງ­ເສີມ​ການ​ຜະ­ລິດ​ເປັນ​ສິນ­ຄ້າ​ໂດຍ​ການ​ມີ​ສ່ວນ​ຮ່ວມ​ກັນ​ກັບ​ຊາວ​ກະ­ສິ­ກອນ​ໂດຍ​ໃຫ້​ຍົກ​ລະ­ດັບ​ການ​ຜະ­ລິດ​ໃຫ້​ໄດ້ 2 ລະ­ດູ ໂດຍ​ສະ­ເພາະ​ການ​ປູກ​ເຂົ້າ ຊອກ​ໃຫ້​ໄດ້​ພືດ​ຫຼັກ ແລະ ພືດ​ສຳ­ຮອງ ເພື່ອ​ຜະ­ລິດ​ເປັນ​ສິນ­ຄ້າ​ສ້າງ​ລາຍ​ຮັບ ພ້ອມ​ທັງ​ສະ­ເໜີ​ໃຫ້​ສ້າງ­ຕັ້ງ​ວິ​ສາ​ຫະ​ກິດ​ຂະ­ໜາດ​ນ້ອຍ​ຂອງ​ບ້ານ ໂດຍ​ໃຫ້​ອຳ­ນາດ​ການ​ປົກ­ຄອງ​ບ້ານ​ເປັນ​ຜູ້​ຊີ້​ນຳ ແລະ ບໍ­ລິ­ຫານ ເຊິ່ງ​ຕໍ່​ກັບ​ຂໍ້​ສະ­ເໜີ​ນີ້​ມອບ​ໃຫ້​ອຳ­ນາດ​ການ​ປົກ­ຄອງ​ບ້ານ​ຂຽນ​ເປັນ​ໂຄງ­ການ​ເພື່ອ​ນຳ​ມາ​ຜັນ​ຂະ­ຫຍາຍ​ຈັດ​ຕັ້ງ​ປະ­ຕິ­ບັດ ແລະ ໃຫ້​ກາຍ­ເປັນ​ຕົວ​ແບບ​ຂອງ​ບ້ານ ສຳ­ລັບ​ການ​ສ້າງ­ຕັ້ງ​ສະ­ຫະ­ກອນ​ມອບ​ໃຫ້​ເມືອງ​ເປັນ​ຜູ້​ຊີ້​ນຳ​ຈັດ​ຕັ້ງ​ປະ­ຕິ­ບັດ​ຢູ່​ຂັ້ນ​ເມືອງ.

    ໃນ​ການ​ລົງ​ຊຸກ­ຍູ້​ການ​ຜະ­ລິດ​ຢູ່​ເມືອງ​ນາ​ຊາຍ​ທອງ​ຄັ້ງ​ນີ້ ທ່ານ​ເຈົ້າ​ຄອງ ນວ ໄດ້​ມອບ​ແນວ​ພັນ​ເຂົ້າ 600 ກິ​ໂລ ພ້ອມ​ທັງ​ຝຸ່ນ​ຊີ­ວະ​ພາບ 3 ໂຕນ ລວມ​ມູນ​ຄ່າ 10 ລ້ານ​ກວ່າ​ກີບ ໃຫ້​ຊາວ​ກະ­ສິ­ກອນ​ບ້ານ​ຮ່ອງ​ງົວ​ຕື່ມ​ອີກ ເພື່ອ​ນຳ­ໄປ​ປູກ​ທົດ​ແທນ​ຜົນ​ເສຍ​ຫາຍ​ຈາກ​ໄພ­ພິ­ບັດ​ນ້ຳ​ຖ້ວມ.

ຂ່າວທີ່ກ່ຽວຂ້ອງ