ຂ່າວຫຼ້າສຸດ

ເຊກອງ ໄດ້ຮັບຜົນກະທົບຈາກນ້ຳຖ້ວມ ມູນຄ່າເກືອບ 100 ຕື້ກີບ

305 12 ກ.ຍ. 2019 ຂ່າວໜ້າ​ໜຶ່ງ

    ຕາມ​ການ​ລາຍ​ງານ​ຈາກ​ທ່ານ ຖາ­ວອນ ພົມ​ມະ​ລົນ ຮອງ​ເຈົ້າ­ແຂວງ​ເຊ​ກອງ ປະ­ທານ​ຄະ­ນະ​ກຳ­ມະ­ການ​ປ້ອງ​ກັນ ແລະ ຄວບ​ຄຸມ​ໄພ­ພິ­ບັດ​ຂັ້ນ​ແຂວງ ໃຫ້​ຮູ້​ໃນ​ວັນ​ທີ 11 ກັນ­ຍາ 2019 ວ່າ: ແຂວງ​ເຊ​ກອງ​ມີ 4 ເມືອງ​ຄື: ເມືອງ​ລະ​ມາມ ທ່າ​ແຕງ ກະ​ລືມ ແລະ ເມືອງ​ດາກ​ຈຶງ ນັບ​ແຕ່​ທ້າຍ​ເດືອນ ສິງ­ຫາ ຫາ​ຕົ້ນ​ເດືອນ​ກັນ­ຍາ 2019 ມີ​ຝົນ­ຕົກ​ຕິດ­ຕໍ່​ກັນ​ຫຼາຍ​ວັນ ແລະ ມາ​ຮອດ​ວັນ​ທີ 2-3 ກັນ­ຍາ 2019 ໄດ້​ມີ​ພາ­ຍຸ​ດີ​ເປຼ​ເຊິນ​ເຂົ້າ​ພັດ​ຜ່ານ​ຢ່າງ​ຮ້າຍ​ແຮງ​ເຮັດ​ໃຫ້​ລະ­ດັບ​ນ້ຳ​ເຊ​ກອງ​ຂຶ້ນ​ສູງ​ຖ້ວມ​ພື້ນ­ຖານ​ໂຄງ​ລ່າງ ແລະ ເຮືອນ​ຢູ່​ອາ­ໄສ​ຂອງ​ປະ­ຊາ­ຊົນ​ໃນ​ວັນ​ທີ 3 ແລະ ບົກ​ແຫ້ງ​ລົງ​ວັນ​ທີ 4 ກັນ­ຍາ 2019 ເຊິ່ງ​ໄດ້​ສົ່ງ​ຜົນ​ເຮັດ​ໃຫ້​ຫຼາຍ​ບ້ານ​ໄດ້​ຮັບ​ຜົນ​ກະ­ທົບ​ຈາກ​ໄພ­ພິ­ບັດ​ທຳ​ມະ​ຊາດ ເປັນ­ຕົ້ນ ນ້ຳ​ຖ້ວມ​ຂັງ ນ້ຳ​ປ່າ​ໄຫຼ​ຫຼາກ ດິນ​ເຊາະ​ເຈື່ອນ​ຖົມ​ເສັ້ນ­ທາງ ລະ­ບົບ​ໄຟ­ຟ້າ-ນ້ຳ​ປະ­ປາ ໂທລະ​ຄົມ-ມະ​ນາ​ຄົມ​ຖືກ​ຕັດ­ຂາດ ນ້ຳ​ຖ້ວມ​ພື້ນ​ທີ່­ຢູ່​ອາ­ໄສ ນ້ຳ​ໄຫຼ­ຊຸ​ຖັ່ງ​ເຮືອນ ວິດ­ຖ່າຍ ເລົ້າ​ເຂົ້າ ວັດ­ຖຸ​ສິ່ງ​ຂອງ ເນື້ອ­ທີ່​ການ​ຜະ­ລິດ ສັດ­ລ້ຽງ​ປະ­ຊາ­ຊົນ ໂຮງ­ຮຽນ ສຸກ­ສາ­ລາ ຊົນ­ລະ­ປະ­ທານ ນ້ຳ​ລິນ  ເຮັດ​ໃຫ້​ປະ­ຊາ­ຊົນ​ມີ​ຄວາມ​ຫຍຸ້ງ­ຍາກ​ໃນ​ການ​ດຳ­ລົງ​ຊີ­ວິດ​ປະ­ຈຳ​ວັນ.

    ສຳ­ລັບ​ຜົນ​ກະ­ທົບ ແລະ ເສຍ​ຫາຍ​ຄື: ເມືອງ​ລະ​ມາມ ຊົນ­ລະ­ປະ­ທານ 7 ແຫ່ງ ເນື້ອ­ທີ່​ທຳ​ການ​ຜະ­ລິດ 108,32 ເຮັກ­ຕາ ເສັ້ນ­ທາງ​ເປ່​ເພ 6 ເສັ້ນ ຂົວ 6 ແຫ່ງ ນ້ຳ​ປະ­ປາ 2 ຈຸດ ຂົວ​ອູ່​ຂອງ​ປະ­ຊາ­ຊົນ 1 ແຫ່ງ ເສົາ​ໄຟ­ຟ້າ 12 ແມັດ​ເປ່​ເພ​ຫຼາຍ​ຕົ້ນ ຫຼັກ​ວັດ­ແທກ​ລະ­ດັບ​ນ້ຳ​ເປ່​ເພ ກຳ­ແພງ​ໂຮງ­ຮຽນ​ວິ­ຊາ​ຊີບ ໂຮງ­ຮຽນ​ປະ­ຖົມ​ສົມ­ບູນ 4 ຫຼັງ ວິດ­ຖ່າຍ 3   ໜ່ວຍ ນ້ຳ​ລິນ 2 ຈຸດ ແຫຼ່ງ​ທ່ອງ​ທ່ຽວ​ຕາດ​ເຮ້ຍ​ຖືກ​ນ້ຳ​ຊຸ​ໄຫຼ​ເສຍ​ຫາຍ 95% ເລົ້າ​ເຂົ້າ 3 ຫຼັງ ສະ­ໜອງ​ເຂົ້າ​ສຸກ​ເສີນ​ທີ່​ຖືກ​ຜົນ​ເສຍ​ຫາຍ 6 ບ້ານ 170 ຄອບ­ຄົວ 697 ຄົນ ເມືອງ​ທ່າ​ແຕງ ຊົນ­ລະ­ປະ­ທານ 8 ແຫ່ງ ເນື້ອ­ທີ່​ທຳ​ການ​ຜະ­ລິດ 783,70 ເຮັກ­ຕາ ເສັ້ນ­ທາງ 11 ເສັ້ນ ນ້ຳ​ປະ­ປາ 1 ຈຸດ ກຳ­ແພງ​ໂຮງ­ຮຽນ​ບ້ານ​ຫ້ວຍ​ຊາຍ ກຳ­ແພງ​ເຮືອນ​ຂອງ​ປະ­ຊາ­ຊົນ​ຕິດ​ກັບ​ຫ້ວຍ​ນ້ຳ​ໃສ ເມືອງ​ກະ­ລຶມ ຊົນ­ລະ­ປະ­ທານ 18 ແຫ່ງ ເນື້ອ­ທີ່​ທຳ​ການ​ຜະ­ລິດ 279 ເຮັກ­ຕາ ເສົາ​ໄຟ­ຟ້າ 12 ແມັດ​ຫຼາຍ​ຕົ້ນ ເສັ້ນ­ທາງ 14 ເສັ້ນ ຂົວ​ອູ່​ຂາດ 3 ແຫ່ງ ນ້ຳ​ປະ­ປາ 1 ຈຸດ ນ້ຳ​ລິນ 6 ບ້ານ ໂຮງ­ໝໍ​ຖືກ​ດິນ​ເຊາະ​ເຈື່ອນ ເມືອງ​ດາກ​ຈຶງ ຊົນ­ລະ­ປະ­ທານ 10 ແຫ່ງ ເນື້ອ­ທີ່​ທຳ​ການ​ຜະ­ລິດ 539,94 ເຮັກ­ຕາ ເສົາ​ໄຟ­ຟ້າ 12 ແມັດ​ຫຼາຍ​ຕົ້ນ ເສັ້ນ­ທາງ 7 ເສັ້ນ ຂົວ​ອູ່ 3 ແຫ່ງ ສຸກ­ສາ­ລາ 3 ຫຼັງ ນ້ຳ​ລິນ 3 ຈຸດ ວິດ­ຖ່າຍ 78   ໜ່ວຍ ເຮືອນ​ຢູ່​ອາ­ໄສ 9 ຫຼັງ ນອກ​ນີ້ ແຕ່​ລະ​ເມືອງ​ຍັງ​ມີ​ສັດ­ລ້ຽງ​ເສຍ​ຫາຍ.

    ໂດຍ​ລວມ​ແລ້ວ​ຜົນ​ເສຍ​ຫາຍ​ທົ່ວ​ແຂວງ 91,55 ຕື້​ກີບ ມີ 145 ບ້ານ 86.130 ຄົນ ໃນ​ນີ້: ຂະ­ແໜງ​ກະ­ສິ­ກຳ-ປ່າ­ໄມ້ 19,06 ຕື້​ກີບ ຂະ­ແໜງ​ໂຍ­ທາ​ທິ​ການ ແລະ ຂົນ­ສົ່ງ 61,69 ຕື້​ກີບ ຂະ­ແໜງ​ສຶກ​ສາ​ທິ​ການ ແລະ ກີ­ລາ ແລະ ຂະ­ແໜງ​ສາ­ທາ­ລະ­ນະ​ສຸກ 5,46 ຕື້​ກີບ ຂະ­ແໜງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ 1,40 ຕື້​ກີບ ຂະ­ແໜງ ພະ­ລັງ­ງານ ແລະ ບໍ່​ແຮ່ 2,50 ຕື້​ກີບ ພະ​ແນກ​ຊັບ­ພະ­ຍາ­ກອນ​ນ້ຳ ແລະ ສິ່ງ­ແວ­ດລ້ອມ 0,25 ຕື້​ກີບ ແລະ ຂະ­ແໜງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ 0,76 ຕື້​ກີບ.

ຂ່າວທີ່ກ່ຽວຂ້ອງ