ຂ່າວຫຼ້າສຸດ

ຄະນະພັກຮາກຖານ ລລທ ເອົາໃຈໃສ່ຊີ້ນຳວຽກງານວິຊາສະເພາະ

214 12 ກ.ຍ. 2019 ຂ່າວໜ້າ​ໜຶ່ງ
ຄະນະພັກຮາກຖານ ລລທ ເອົາໃຈໃສ່ຊີ້ນຳວຽກງານວິຊາສະເພາະ

    ກອງ​ປະ­ຊຸມ​ໃຫຍ່​ຄັ້ງ​ທີ V ຂອງ​ຄະ­ນະ​ພັກ​ຮາກ​ຖານ​ບໍ­ລິ­ສັດ ລາວ​ໂທລະ​ຄົມ­ມະ­ນາ­ຄົມ ມະ­ຫາ­ຊົນ (ລລທ) ໄດ້​ຈັດ​ຂຶ້ນ​ວັນ​ທີ 10 ກັນ­ຍາ 2019 ທີ່​ສຳ­ນັກ­ງານ​ໃຫຍ່​ບໍ­ລິ­ສັດ ເປັນ​ປະ­ທານ​ຂອງ​ສະ­ຫາຍ ຖາ­ວອນ ສົມ​ສະ­ກຸນ ຄະ­ນະ​ພັກ​ກະ­ຊວງ ເລ­ຂາ​ຄະ­ນະ​ພັກ​ຮາກ​ຖານ​ບໍ­ລິ­ສັດ ລາວ​ໂທລະ​ຄົມ­ມະ­ນາ­ຄົມ ມະ­ຫາ­ຊົນ ມີ​ສະ­ຫາຍ ທັນ​ສະ­ໄໝ ກົມ​ມະ​ສິດ ກຳ­ມະ­ການ​ສູນ​ກາງ​ພັກ ເລ­ຂາ​ຄະ­ນະ​ພັກ​ກະ­ຊວງ ລັດ­ຖະ­ມົນ­ຕີ​ກະ­ຊວງ​ໄປ­ສະ­ນີ ໂທລະ​ຄົມ­ມະ­ນາ­ຄົມ ແລະ ການ​ສື່­ສານ ບັນ­ດາ​ໜ່ວຍ​ພັກ ແລະ ຄະ­ນະ​ພັກ​ຮາກ​ຖານ​ທີ່​ຂຶ້ນ​ກັບ​ອົງ­ຄະ​ນະ​ພັກ​ກະ­ຊວງ ສະ­ມາ­ຊິກ​ພັກ ແລະ ແຂກ​ຖືກ​ເຊີນ ເຂົ້າ​ຮ່ວມ.

    ສະ­ຫາຍ ຖາ­ວອນ ສົມ​ສະ­ກຸນ ໄດ້​ສະ­ຫຼຸບ​ຕີ​ລາ­ຄາ​ຄືນ​ແຜນ­ການ­ເຄື່ອນ­ໄຫວ​ວຽກ​ງານ​ການ​ຊີ້​ນຳ-ນຳ­ພາ​ຂອງ​ຄະ­ນະ​ພັກ​ຮາກ​ຖານ ລລທ ໃນ​ໄລ­ຍະ​ຜ່ານ​ມາ (2014-2018) ແລະ ວາງ​ທິດ​ທາງ​ແຜນ­ການ​ທີ່​ຈະ​ຕ້ອງ​ສຸມ​ໃສ່​ໃນ­ຕໍ່­ໜ້າ (2019-2023) ວ່າ: ໃນ​ໄລ­ຍະ​ຜ່ານ​ມາ ຄະ­ນະ​ພັກ​ຮາກ​ຖານ​ໄດ້​ເອົາ­ໃຈ­ໃສ່​ນຳ­ພາ​ສະ­ມາ­ຊິກ​ພັກ-ພະ­ນັກ­ງານ​ປະ­ຕິ­ບັດ​ໜ້າ­ທີ່​ວຽກ​ງານ​ວິ­ຊາ​ສະ­ເພາະ​ທີ່​ຖືກ​ມອບ​ໝາຍ​ດ້ວຍ​ຄວາມ​ຕັ້ງ­ໜ້າ ແລະ ມີ​ຄວາມ​ຮັບ­ຜິດ­ຊອບ​ສູງ ສະ­ແດງ​ອອກ​ຈາກ​ຜົນ­ສຳ­ເລັດ​ອັນ​ພົ້ນ​ເດັ່ນ​ໃນ​ຫຼາຍ​ວຽກ​ງານ​ເຊັ່ນ: ວຽກ​ງານ​ຮັກ­ສາ​ຄວາມ​ປອດ​ໄພ​ພາຍ​ໃນ​ບໍ­ລິ­ສັດ ໂດຍ​ຫັນ​ເອົາ​ໄອ​ຊີ​ທີ​ທີ່​ທັນ​ສະ­ໄໝ​ມາ​ນຳ​ໃຊ້​ເຂົ້າ​ໃນ​ລະ­ບົບ​ປ້ອງ​ກັນ​ເຊັ່ນ: ລະ­ບົບ​ກ້ອງ​ວົງ​ຈອນ​ປິດ ລະ­ບົບ​ເຕືອນ​ໄພ ການ​ນຳ​ລະ­ຫັດ​ຜ່ານ​ເຂົ້າ-ອອກ​ປະ­ຕູ ການ​ຈ້ຳ​ໂປ້​ມື​ໃນ​ການ​ຄຸ້ມ​ຄອງ​ພະ­ນັກ­ງານ ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ການ​ຜະ­ລິດ​ທຸ­ລະ​ກິດ ແລະ ວິ­ຊາ​ສະ­ເພາະ ເອົາ­ໃຈ­ໃສ່​ບຳ­ລຸງ ກໍ່­ສ້າງ​ພະ­ນັກ­ງານ​ເປັນ​ລະ­ບົບ​ຄົບ​ຊຸດ ຮັບ­ປະ­ກັນ​ໃຫ້​ພະ­ນັກ­ງານ​ມີ​ຄວາມ​ຮູ້​ຄວາມ​ສາ­ມາດ​ທາງ​ດ້ານ​ເຕັກ­ນິກ​ວິ­ຊາ​ການ ການ​ບໍ­ລິ­ຫານ​ທຸ­ລະ​ກິດ ແລະ ທິດ​ສະ​ດີ​ການ­ເມືອງ-ການ​ປົກ­ຄອງ ເຮັດ​ໃຫ້​ການ­ຈັດ­ຕັ້ງ​ປະ­ຕິ­ບັດ​ໜ້າ­ທີ່​ການ­ເມືອງ​ໃນ​ໄລ­ຍະ​ໃໝ່​ມີ​ຄວາມ​ສະ­ດວກ ແລະ ມີ​ຜົນ­ສຳ­ເລັດ​ໄປ​ດ້ວຍ​ດີ ປັດ­ຈຸ­ບັນ​ຮາກ​ຖານ ລລທ ປະ­ກອບ​ມີ 9 ໜ່ວຍ​ພັກ ມີ​ສະ­ມາ­ຊິກ​ພັກ 294 ສະ­ຫາຍ ຍິງ 83 ສະ­ຫາຍ ສຳ­ຮອງ 20 ສະ­ຫາຍ ຍິງ 7 ສະ­ຫາຍ ເຊິ່ງ​ຕະ­ຫຼອດ​ໄລ­ຍະ 5 ປີ ຄະ­ນະ​ພັກ ແລະ ສະ­ມາ­ຊິກ​ພັກ​ໄດ້​ສຸມ​ໃສ່​ວຽກ​ງານ​ກໍ່­ສ້າງ​ໜ່ວຍ​ພັກ​ປອດ​ໃສ ເຂັ້ມ­ແຂງ ໜັກ​ແໜ້ນ ດ້ວຍ​ຄວາມ​ຮັບ­ຜິດ­ຊອບ​ສູງ ແລະ ມີ​ຜົນ­ສຳ­ເລັດ​ຕາມ​ທິດ​ທາງ​ທີ່​ວາງ​ໄວ້.

    ຕອນ​ທ້າຍ​ກອງ​ປະ­ຊຸມ ໄດ້​ປ່ອນ​ບັດ​ຄັດ​ເລືອກ​ເອົາ​ຄະ­ນະ​ພັກ​ຮາກ​ຖານ​ຊຸດ​ໃໝ່ 9 ສະ­ຫາຍ ໃນ​ການ​ສືບ­ຕໍ່​ນຳ­ພາ​ສະ­ມາ­ຊິກ​ພັກ​ຈັດ​ຕັ້ງ​ປະ­ຕິ­ບັດ​ວຽກ​ງານ​ໃຫ້​ໄດ້​ຮັບ​ຜົນ­ສຳ­ເລັດ ພ້ອມ​ທັງ​ຮັບ​ຟັງ​ການ​ໂອ້​ລົມ​ຂອງ​ສະ­ຫາຍ ທັນ​ສະ­ໄໝ ກົມ​ມະ​ສິດ ທີ່​ໄດ້​ໃຫ້​ທິດ​ຊີ້​ນຳ​ໂດຍ​ໄດ້​ເນັ້ນ​ໃຫ້​ຄະ­ນະ​ພັກ ແລະ ສະ­ມາ­ຊິກ​ພັກ​ເອົາ­ໃຈ­ໃສ່​ຄົ້ນ­ຄວ້າ​ເຊື່ອມ​ຊຶມ​ແນວ­ທາງ​ນະ­ໂຍ­ບາຍ ກົດ​ລະ­ບຽບ​ຂອງ​ພັກ ແລະ ລະ­ບຽບ​ການ​ຕ່າງໆ​ຂອງ​ລັດ ກໍ່­ສ້າງ​ພັກ​ໃຫ້​ປອດ​ໃສ​ເຂັ້ມ­ແຂງ ໜັກ​ແໜ້ນ​ທາງ​ດ້ານ​ການ­ເມືອງ-ແນວ​ຄິດ ການ­ຈັດ­ຕັ້ງ ແບບ­ແຜນ​ວິ­ທີ​ການ​ນຳ­ພາ​ຊຸກ­ຍູ້​ຕິດ­ຕາມ ກວດ­ກາ​ບັນ­ດາ​ໜ່ວຍ​ພັກ ແລະ ກໍ່­ສ້າງ​ມະ­ຫາ­ຊົນ​ເພື່ອ​ຂະ­ຫຍາຍ​ເຂົ້າ​ເປັນ​ສະ­ມາ­ຊິກ​ພັກ ສຶກ​ສາ​ອົບ­ຮົມ​ການ­ເມືອງ-ແນວ​ຄິດ​ໃຫ້​ສະ­ມາ­ຊິກ​ພັກ ພະ­ນັກ­ງານ​ມະ­ຫາ­ຊົນ​ທີ່­ຢູ່​ໃນ​ຄວາມ​ຮັບ­ຜິດ­ຊອບ​ຂອງ​ຕົນ ຕິດ­ຕາມ​ກວດ­ກາ​ການ­ເຄື່ອນ­ໄຫວ​ຂອງ​ບັນ­ດາ​ໜ່ວຍ​ພັກ ສະ­ມາ­ຊິກ​ພັກ​ທີ່​ຂຶ້ນ​ກັບ​ຢ່າງ​ເປັນ​ປົກ­ກະ­ຕິ​ເພື່ອ​ເສີມ​ຂະ­ຫຍາຍ​ດ້ານ​ຕັ້ງ­ໜ້າ ແລະ ແກ້​ໄຂ​ດ້ານ​ອ່ອນ​ໃຫ້​ທັນ​ເວ­ລາ ພ້ອມ​ນັ້ນ ໄດ້​ເນັ້ນ​ຕື່ມ ໃຫ້​ບັນ­ດາ​ຄະ­ນະ​ພັກ​ຮາກ​ຖານ​ທີ່​ໄດ້​ຮັບ​ການ​ເລືອກ​ຕັ້ງ​ຈົ່ງ​ສຸມ​ສະ­ຕິ​ປັນ­ຍາ ກຳ­ລັງ­ວັງ­ຊາ ຄວາມ​ສາ­ມັກ­ຄີ​ເປັນ​ຈິດ​ໜຶ່ງ​ໃຈ​ດຽວ ເພື່ອ​ແບກ​ຫາບ​ພາ­ລະ­ກິດ​ອັນ​ສູງ​ສົ່ງ ແລະ ໜັກ­ໜ່ວງ​ທີ່​ກອງ​ປະ­ຊຸມ​ໄດ້​ມອບ​ໝາຍ​ໃຫ້​ປະ­ສົບ​ຜົນ­ສຳ­ເລັດ​ເປັນ​ຢ່າງ​ດີ.

ຂ່າວທີ່ກ່ຽວຂ້ອງ