ຂ່າວຫຼ້າສຸດ

ສະເໜີຜ່ານ ສສຊ ໃຫ້ພາກສ່ວນກ່ຽວຂ້ອງແກ້ໄຂ

337 11 ກ.ຍ. 2019 ຂ່າວໜ້າ​ໜຶ່ງ

    ທ່ານ​ນາງ ເກດ​ມະ­ນີ ບັນ­ດາ­ສັກ ປະ­ທານ​ຄະ­ນະ​ກຳ­ມະ­ການ​ວັດ­ທະ­ນະ­ທຳ-ສັງ­ຄົມ ແລະ ບັນ­ດາ­ເຜົ່າ ສະ­ພາ​ປະ­ຊາ­ຊົນ​ນະ­ຄອນ­ຫຼວງ​ວຽງ​ຈັນ (ນວ) ສະ­ມາ­ຊິກ​ສະ­ພາ​ແຫ່ງ​ຊາດ ຊຸດ​ທີ VIII  ປະ­ຈຳ​ເຂດ​ເລືອກ​ຕັ້ງ​ທີ 1 ນວ ທ່ານ​ນາງ ສົມ​ຈັນ ສິງ​ທະ​ບຸດ ນັກ­ທຸ­ລະ­ກິດ​ຍິງ ນວ ສະ­ມາ­ຊິກ​ສະ­ພາ​ແຫ່ງ​ຊາດ​ຊຸດ​ທີ VIII ປະ­ຈຳ​ເຂດ​ເລືອກ​ຕັ້ງ​ທີ 1 ນວ ສະ­ມາ­ຊິກ​ສະ­ພາ​ປະ­ຊາ­ຊົນ ນວ ຊຸດ​ທີ 1 ທ່ານ ນາງ ວາ­ລີ ເວດ​ສະ​ພົງ ຮອງ​ປະ­ທານ​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ ສະ­ມາ­ຊິກ​ສະ­ພາ​ແຫ່ງ​ຊາດ​ຊຸດ​ທີ VIII ປະ­ຈຳ​ເຂດ​ເລືອກ​ຕັ້ງ​ທີ 1 ນວ  ລົງ​ພົບ​ປະ​ຂະ­ແໜງ​ສຶກ​ສາ​ທິ​ການ ແລະ ກີ­ລາ ວັນ​ທີ 9 ກັນ­ຍາ 2019 ທີ່​ສະ​ຖາ​ບັນ​ຄົ້ນ­ຄວ້າ​ວິ­ທະ­ຍາ­ສາດ​ການ​ສຶກ​ສາ ມີ​ທ່ານ ບຸນ​ກອງ ແສງ​ມະ­ນີ ແລະ ທ່ານ​ນາງ ຂັນ​ທະ​ລີ ສີ​ຣິ​ພົງ­ພັນ ຮອງ​ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ ພ້ອມ​ດ້ວຍ​ພະ­ນັກ­ງານ ເຂົ້າ​ຮ່ວມ.

    ຈາກ​ນັ້ນ ຜູ້​ເຂົ້າ​ຮ່ວມ​ໄດ້​ຮັບ​ຟັງ​ເຜີຍ­ແຜ່​ຜົນ­ສຳ­ເລັດ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 7 ຂອງ​ສະ­ພາ​ແຫ່ງ​ຊາດ​ຊຸດ​ທີ 8 ແລະ ສະ­ພາ​ປະ­ຊາ­ຊົນ ນວ ຊຸດ​ທີ I ໄດ້​ສຸມ​ໃສ່​ພິ­ຈາ­ລະ­ນາ​ບັນ­ຫາ​ສຳ­ຄັນ​ພື້ນ­ຖານ​ຂອງ​ຊາດ ແລະ ຂອງ ນວ ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແຜນ​ງົບ­ປະ­ມານ 6 ເດືອນ​ຕົ້ນ​ປີ ແລະ ແຜນ​ດັດ­ແກ້​ງົບ­ປະ­ມານ 6 ເດືອນ​ທ້າຍ​ປີ 2019 ການ­ເຄື່ອນ­ໄຫວ​ວຽກ​ງານ 6 ເດືອນ​ຕົ້ນ​ປີ ແລະ ແຜນ​ວຽກ​ຈຸດ​ສຸມ 6 ເດືອນ​ທ້າຍ​ປີ 2019 ຂອງ​ຄະ­ນະ​ປະ­ຈຳ​ສະ­ພາ ພິ­ຈາ­ລະ­ນາ ແລະ ຮັບ­ຮອງ​ເອົາ​ບົດ​ລາຍ​ງານ​ຂອງ​ອົງ­ການ​ໄອ​ຍະ​ການ​ປະ­ຊາ­ຊົນ ສານ​ປະ­ຊາ­ຊົນ.

    ຜ່ານ​ການ​ເຜີຍ­ແຜ່ ຜູ້​ເຂົ້າ​ຮ່ວມ​ໄດ້​ໃຫ້​ຄວາມ​ສົນ­ໃຈ​ຫຼາຍ​ບັນ­ຫາ ໂດຍ​ສະ­ເໜີ​ຜ່ານ​ສະ­ມາ­ຊິກ​ສະ­ພາ​ເພື່ອ​ໃຫ້​ພາກ­ສ່ວນ​ກ່ຽວ­ຂ້ອງ​ລົງ​ແກ້​ໄຂ ເປັນ­ຕົ້ນ ສະ­ເໜີ​ໃຫ້​ຕິດ­ຕາມ​ກວດ­ກາ ແລະ ຊຸກ­ຍູ້​ການ​ປະ­ຕິ­ບັດ​ມະ­ຕິ​ຂອງ​ສະ­ພາ​ແຫ່ງ​ຊາດ ໃນ​ການ​ຮັບ­ຮອງ​ເອົາ​ການ​ແບ່ງ­ປັນ​ງົບ­ປະ­ມານ​ໃຫ້​ຂະ­ແໜງ­ການ​ສຶກ​ສາ ສະ­ເໜີ​ໃຫ້​ພິ­ຈາ­ລະ­ນາ​ແບ່ງ­ປັນ​ໂກ​ຕາ​ລັດ­ຖະ­ກອນ​ໃຫ້​ຂະ­ແໜງ­ການ​ສຶກ​ສາ ໂດຍ​ສະ­ເພາະ​ໃຫ້​ເຂດ​ຊົນ­ນະ­ບົດ​ທີ່​ຄູ​ຍັງ​ບໍ່​ພຽງ­ພໍ ສະ­ເໜີ​ຕິດ­ຕາມ​ກວດ­ກາ ແລະ ແກ້​ໄຂ​ບັນ­ຫາ​ທີ່​ດິນ​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ 262 ເຮັກ­ຕາ ທີ່​ກະ­ຊວງ​ຊັບ­ພະ­ຍາ­ກອນ​ທຳ​ມະ ຊາດ ແລະ ສິ່ງ­ແວ­ດລ້ອມ​ມອບ​ໃຫ້ ມຊ ໃນ​ເດືອນ​ມີ­ນາ 2018 ມາ​ຮອດ​ປັດ­ຈຸ­ບັນ​ຍັງ​ບໍ່​ໄດ້​ອອກ​ໃບ​ຕາ­ດິນ​ຖາ­ວອນ ແລະ ສະ­ເໜີ​ໃຫ້ ສສຊ ມີ​ບົດ­ບາດ​ແຕ່​ຫົວ­ທີ​ໃນ​ການ​ກວດ​ສອບ​ກ່ອນ​ການ​ອະ­ນຸ­ມັດ​ໃຫ້​ສຳ​ປະ­ທານ​ໂຄງ­ການ​ໃດ​ໜຶ່ງ​ຂອງ​ລັດ​ເພື່ອ​ເປັນ​ການ​ແກ້​ໄຂ​ຢູ່​ຕົ້ນ​ເຫດ.

ຂ່າວທີ່ກ່ຽວຂ້ອງ