ນະຄອນຫຼວງ ຍົກລະດັບວຽກງານ ປກຊ-ປກສ ໃຫ້ພະນັກງານ

269 11 ກ.ຍ. 2019 ຂ່າວໜ້າ​ໜຶ່ງ
ນະຄອນຫຼວງ ຍົກລະດັບວຽກງານ ປກຊ-ປກສ ໃຫ້ພະນັກງານ

    ຊຸດ​ອົບ­ຮົມ​ວຽກ​ງານ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ ໃຫ້​ພະ­ນັກ­ງານ​ການ​ນຳ​ຂັ້ນ ນວ (ເປົ້າ​ໝາຍ 3) ຊຸດ​ທີ 1 ດຳ­ເນີນ​ມາ​ເປັນ​ເວ­ລາ 20 ວັນ ຮອດ​ວັນ​ທີ 6 ກັນ­ຍາ 2019 ໄດ້​ສຳ­ເລັດ ແລະ ຈັດ​ພິ­ທີ​ປິດ​ຂຶ້ນ​ທີ່​ກອງ​ບັນ­ຊາ​ການ​ທະ­ຫານ​ນະ­ຄອນ­ຫຼວງ​ວຽງ​ຈັນ (ນວ) ມີ​ທ່ານ ສີ​ຫຸນ ສິດ­ທິ​ລື​ໄຊ ຮອງ​ເຈົ້າ​ຄອງ ນວ ທັງ​ເປັນ​ຮອງ​ປະ­ທານ​ຄະ­ນະ​ກຳ­ມະ­ການ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ ນວ ທ່ານ ພົ​ຈວ ສີ​ພອນ ຈັນ​ສົມ​ວົງ ຫົວ­ໜ້າ​ການ­ເມືອງ​ກອງ​ບັນ­ຊາ​ການ​ທະ­ຫານ ນວ ທ່ານ ພົ​ຈວ ບຸບ­ຜາ ສີ​ພົມ­ມາ ຫົວ­ໜ້າ​ກອງ​ບັນ­ຊາ​ການ ປກສ ນວ ພ້ອມ​ດ້ວຍ​ຜູ້­ຕາງ­ໜ້າ​ຈາກ​ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ທ່ານ ພັນ​ເອກ ສີ ທະ­ວີ​ໄຊ ຫົວ­ໜ້າ​ການ​ທະ­ຫານ​ກອງ​ບັນ­ຊາ​ການ​ທະ­ຫານ ນວ ໄດ້​ຂຶ້ນ​ສະ­ຫຼຸບ​ຕີ​ລາ­ຄາ​ຜົນ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ອົບ­ຮົມ​ຜ່ານ​ມາ ປະ­ກອບ​ມີ 9 ບົດ​ຄື: ບາງ​ບັນ­ຫາ​ກ່ຽວ​ກັບ​ການ​ສະ­ກັດ​ກັ້ນ-ຕ້ານ​ຍຸດ​ທະ​ສາດ​ຫັນ­ປ່ຽນ​ໂດຍ​ສັນ­ຕິ-ກໍ່​ກະ­ບົດ​ລຸກ​ຮື້​ຂຶ້ນ​ຂອງ​ອິດ​ທິ​ກຳ­ລັງ​ປໍ​ລະ​ປັກ ວາງ​ທັດ­ສະ­ນະ​ພື້ນ­ຖານ​ຂອງ​ພັກ​ຕໍ່​ວຽກ​ງານ​ການ​ທະ­ຫານ​ທ້ອງ­ຖິ່ນ​ໃນ​ໄລ­ຍະ​ໃໝ່ ບົດ­ບາດ​ທີ່​ເປັນ​ເສ­ນາ​ທິ​ການ​ຂອງ​ບັນ­ດາ​ອົງ­ການ ພະ­ແນກ­ການ ອົງ​ການ­ຈັດ­ຕັ້ງ​ມະ­ຫາ­ຊົນ​ຂັ້ນ​ເມືອງ​ຕໍ່​ວຽກ​ງານ​ປ້ອງ​ກັນ​ຊາດ ສົງ­ຄາມ​ປະ­ຊາ­ຊົນ​ປົກ​ປັກ​ຮັກ­ສາ​ປະ­ເທດ​ຊາດ ພັດ­ທະ­ນາ​ເສດ­ຖະ­ກິດ-ສັງ­ຄົມ​ຕິດ​ພັນ​ກັບ​ວຽກ​ງານ​ປ້ອງ​ກັນ​ຊາດ​ປ້ອງ​ກັນ​ຄວາມ​ສະ­ຫງົບ ກໍ່­ສ້າງ​ທ່າ​ສະ­ໜາມ​ສົງ­ຄາມ​ປະ­ຊາ­ຊົນ 3 ຂັ້ນ ກໍ່­ສ້າງ​ທ່າ​ສະ­ໜາມ​ສູ້​ຮົບ​ປ້ອງ​ກັນ​ບໍ­ລິ­ເວນ​ເມືອງ ນະ­ຄອນ ວຽກ​ງານ​ປ້ອງ​ກັນ​ຄວາມ​ສະ­ຫງົບ​ປະ­ກອບ​ມີ 2 ບົດ​ຄວາມ​ຮູ້​ລວມ​ກ່ຽວ​ກັບ​ຄວາມ​ສະ­ຫງົບ ແລະ ວຽກ​ງານ​ປ້ອງ​ກັນ​ຄວາມ​ສະ­ຫງົບ​ຂອງ​ຊາດ ແລະ ວຽກ​ງານ​ຕ້ານ​ອາ​ສະ​ຍາ​ກຳ (ຕ້ານ​ການ​ລັກ​ສັບ​ພົນ­ລະ­ເມືອງ).

    ຜ່ານ​ການ­ຈັດ­ຕັ້ງ​ອົບ­ຮົມ ເຫັນ​ວ່າ​ພະ­ນັກ­ງານ​ການ​ນຳ​ແຕ່​ລະ​ທ່ານ​ໄດ້​ມີ​ຄວາມ​ຮັບ​ຮູ້​ທາງ​ດ້ານ​ພື້ນ­ຖານ​ທິດ​ສະ​ດີ​ຂອງ​ວຽກ​ງານ ປກຊ-ປກສ ໃນ​ໄລ­ຍະ​ໃໝ່ ສະ­ແດງ​ອອກ​ຕໍ່​ຄວາມ​ຮັບ​ຮູ້​ຕໍ່​ການ​ຍົກ​ລະ­ດັບ​ຄວາມ​ຮູ້​ເຂົ້າ­ໃຈ​ຕໍ່​ພາກ​ທິດ​ສະ​ດີ​ຫຼັກ­ການ ວິ­ທີ​ການ​ຊີ້​ນຳ-ນຳ­ພາ​ອົງ­ການ ຂະ­ແໜງ­ການ ແລະ ທ້ອງ­ຖິ່ນ​ຂອງ​ຕົນ ເພື່ອ​ປະ­ຕິ­ບັດ​ແນວ­ທາງ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ​ທົ່ວ​ປວງ​ຊົນ​ຮອບ­ດ້ານ​ຂອງ​ພັກ ຮັບ​ຮູ້​ກ່ຽວ​ກັບ​ບັນ­ຫາ​ລວມ​ໃນ​ການ​ຊີ້​ນຳ​ບັນ­ຊາ​ກຳ­ລັງ​ຢູ່​ຂັ້ນ​ຂອງ​ຕົນ ການ​ກະ­ກຽມ​ກຳ­ລັງ ການ​ວາງ​ແຜນ­ການ​ຕ່າງໆ ແຕ່​ຍາມ​ສັນ­ຕິ­ພາບ​ເປັນ​ພື້ນ­ຖານ ບ່ອນ​ອີງ​ໃຫ້​ແກ່​ການ​ຫັນ​ເອົາ​ພະ­ແນກ­ການ ຂະ­ແໜງ­ການ ແລະ ທ້ອງ­ຖິ່ນ​ຂອງ​ຕົນ ທັງ​ເສີມ​ຂະ­ຫຍາຍ​ບົດ­ບາດ​ໜ້າ­ທີ່​ການ​ນຳ­ພາ ເປັນ​ເສ­ນາ​ທິ​ການ​ໃຫ້​ແກ່​ອົງ­ຄະ​ນະ​ພັກ ແລະ ຄະ­ນະ​ພັກ​ເມືອງ ໂດຍ​ສະ­ເພາະ​ຕໍ່​ການ​ຊີ້​ນຳ-ນຳ­ພາ​ກຳ­ລັງ​ກອງ​ຫຼອນ ປກສ ບ້ານ ເຮັດ​ໜ້າ­ທີ່​ເຄື່ອນ​ໄຫວ​ປ້ອງ​ກັນ​ຂອບ​ເຂດ​ຮັບ­ຜິດ­ຊອບ​ຂອງ​ຕົນ​ໃຫ້​ມີ​ຄວາມ​ສະ­ຫງົບ​ປອດ​ໄພ​ໄດ້ 100%.

    ໂອ­ກາດ​ດຽວ​ກັນ​ນີ້ ທ່ານ ເພັດ​ສະ­ໄໝ ນັດ​ຜາ​ສຸກ ຮອງ​ເຈົ້າ­ເມືອງ​ຈັນ­ທະ​ບູ​ລີ ໄດ້​ຕາງ­ໜ້າ​ໃຫ້​ນັກ​ເຝິກ ອົບ­ຮົມ ຂຶ້ນ​ມອບ​ຄອມ​ພິວ​ເຕີ​ຕັ້ງ​ໂຕະ 2 ຊຸດ ແລະ ໂນດ​ບຸກ 1 ຊຸດ ພ້ອມ​ເຄື່ອງ­ຮັບ​ໃຊ້​ຫ້ອງ­ການ​ອີກ​ຈຳ­ນວນ​ໜຶ່ງ ລວມ​ມູນ​ຄ່າ​ທັງ​ໝົດ 30.820.000 ກີບ ໃຫ້​ກອງ​ບັນ­ຊາ​ການ​ທະ­ຫານ ນວ ເພື່ອ​ນຳ­ໄປ​ໝູນ​ໃຊ້​ໃນ​ວຽກ​ງານ​ຫ້ອງ­ການ​ໃຫ້​ມີ​ຄວາມ​ສະ­ດວກ​ວອ່ງ​ໄວ​ຂຶ້ນ ແລະ ທ່ານ​ຫົວ­ໜ້າ​ການ­ເມືອງ​ກອງ​ບັນ­ຊາ​ການ​ທະ­ຫານ ນວ ໄດ້​ມອບ​ໃບ​ກຽດ​ຕິ​ຄຸນ​ໃຫ້​ຄະ­ນະ​ນັກ​ເຝິກ­ອົບ­ຮົມ ພ້ອມ​ຮ່ວມ​ສ້າງ​ກິດ­ຈະ­ກຳ​ກີ­ລາ.

ຂ່າວທີ່ກ່ຽວຂ້ອງ