ເປຕັງລາວ ຄວ້າ 2 ຫຼຽນທອງ ທີ່ປະເທດໄທ

592 11 ກ.ຍ. 2019 ວົງຈອນກີລາ
ເປຕັງລາວ ຄວ້າ 2 ຫຼຽນທອງ ທີ່ປະເທດໄທ

    ການ​ແຂ່ງ­ຂັນ​ເປ​ຕັງ ຊີງ​ແຊັມ​ປະ­ເທດ​ໄທ ຢູ່​ແຂວງ​ຣະ​ຍອງ ປະ­ເທດ​ໄທ ລະ­ຫວ່າງ​ວັນ​ທີ 7-10 ກັນ­ຍາ 2019 ລາຍ­ການ​ນີ້ ເປັນ​ການ​ອຸ່ນ​ເຄື່ອງ​ຂອງ​ນັກ­ກີ­ລາ​ເປ​ຕັງ​ທິມ​ຊາດ​ລາວ ກ່ອນ​ເຂົ້າ​ຮ່ວມ​ແຂ່ງ ຂັນ​ໃນ​ຊີ­ເກມ ຄັ້ງ​ທີ 30 ທີ່​ປະ­ເທດ​ຟີ​ລິບ​ປິນ ໃນ​ທ້າຍ​ປີ 2019  ໃນ​ວັນ​ທີ 7 ກັນ­ຍາ 2019 ໄດ້​ລົງ​ແຂ່ງ­ຂັນ​ປະ­ເພດ​ຊຸດ​ຕິ້ງ​ຍິງ-ຊາຍ ສາ­ມາດ​ຜ່ານ​ເຖິງ​ຮອບ​ຮອງ​ຊະ­ນະ​ເລີດ​ທັງ​ສອງ​ປະ­ເພດ ໂດຍ​ປະ­ເພດ ຍິງ ນາງ ມະ­ນີ​ວັນ ສຸ­ລິ­ຍາ ຈາກ​ແຂວງ​ຈຳ­ປາ​ສັກ ໃນ​ຮອບ 8 ຄົນ​ສຸດ​ທ້າຍ​ຜ່ານ​ນັກ­ກີ­ລາ​ຈາກ​ສິງ­ກະ­ໂປ​ຂາດ​ຮອຍ 43-21 ແຕ່​ມາ​ໃນ​ຮອບ​ຮອງ​ຊະ­ນະ​ເລີດ ເສຍ​ໃຫ້​ນັກ­ກີ­ລາ​ຈາກ​ເຈົ້າ­ພາບ​ໄທ ໄດ້​ຫຼຽນ​ທອງ ຫຼຽນ​ຄຳ ແລະ ຫຼຽນ​ເງິນ​ເປັນ​ຂອງ​ເຈົ້າ­ພາບ.

    ຂະ­ນະ​ທີ່ ປະ­ເພດ​ຊາຍ ທ້າວ ສຸ­ພະ​ກອນ ລັດ­ຕະ­ນະ​ບໍ​ວັນ ຈາກ​ແຂວງ​ຫຼວງ​ພະ​ບາງ ຮອບ​ຮອງ​ຊະ­ນະ​ເລີດ ມາ​ເສຍ​ໃຫ້​ນັກ­ກີ­ລາ​ຈາກ​ເຈົ້າ­ພາບ​ໄທ 33-49 ຄະ­ແນນ ໄດ້​ຫຼຽນ​ທອງ ຫຼຽນ​ຄຳ ແລະ ຫຼຽນ​ເງິນ​ເປັນ​ຂອງ​ເຈົ້າ­ພາບ.

    ທ່ານ ວຽງ​ທາ ເຂັມ​ວົງ­ສາ ຫົວ­ໜ້າ​ຄະ­ນະ​ນຳ­ພາ ທັງ​ເປັນ​ຄູ​ເຝິກ ໄດ້​ໃຫ້​ຮູ້​ວ່າ: ການ​ແຂ່ງ­ຂັນ​ຄັ້ງ​ນີ້ ເຫັນ​ວ່າ ນັກ­ກີ­ລາ​ເປ​ຕັງ​ລາວ​ເຮົາ ຍັງ​ບໍ່​ພ້ອມ​ເຕັມ​ຮ້ອຍ ເປັນ­ຕົ້ນ​ດ້ານ​ພະ­ລະ​ກຳ­ລັງ ເຫັນ​ວ່າ​ແຮງ​ຕົກ​ກາງ​ທາງ ເນື່ອງ​ຈາກ​ນັກ­ກີ­ລາ​ຊຸດ​ນີ້ ເກັບ​ຕົວ​ເຝິກ­ຊ້ອມ​ພຽງ 1 ອາ­ທິດ ຫຼັງ​ຈາກ​ຈົບ​ການ​ແຂ່ງ­ຂັນ​ຄັ້ງ​ນີ້ ສະ­ຫະ­ພັນ​ເປ​ຕັງ​ແຫ່ງ​ຊາດ​ລາວ ຈະ​ສືບ­ຕໍ່​ເກັບ​ຕົວ​ນັກ­ກີ­ລາ ແລະ ທົດ​ສອບ​ນັກ­ກີ­ລາ​ຫາກ​ມີ​ການ​ແຂ່ງ­ຂັນ​ລາຍ­ການ​ຕ່າງໆ​ທັງ​ພາຍ​ໃນ ແລະ ຕ່າງ ປະ­ເທດ ຕາມ​ສະ­ພາບ​ເງື່ອນ­ໄຂ ເພື່ອ​ກຽມ​ຄວາມ​ພ້ອມ​ສູ່​ການ​ແຂ່ງ­ຂັນ​ຊີ­ເກມ ຄັ້ງ​ທີ 30 ໃນ​ທ້າຍ​ປີ 2019 ທີ່​ປະ­ເທດ​ຟີ​ລິບ​ປິນ.

    ສຳ­ລັບ​ການ​ແຂ່ງ­ຂັນ​ຄັ້ງ​ນີ້ (Rayong Petanque International Invitation 2019) ມີ 9 ປະ­ເທດ​ເຂົ້າ​ຮ່ວມ​ເຊັ່ນ: ສປປ ລາວ ບຣູ​ໄນ ໄຕ້​ຫວັນ ອິນ​ເດຍ ສປ ຈີນ ປາ​ກິດ​ສະ­ຖານ ຄາ​ຊັກ​ສະ­ຖານ ສ ເກົາ­ຫຼີ ແລະ ໄທ​ເຈົ້າ­ພາບ.

ຂ່າວທີ່ກ່ຽວຂ້ອງ