ຂ່າວຫຼ້າສຸດ

ນາຍົກລົງຢ້ຽມຢາມ ແລະ ຊຸກຍູ້ການແກ້ໄຂໄພນ້ຳຖ້ວມ

468 10 ກ.ຍ. 2019 ຂ່າວໜ້າ​ໜຶ່ງ
ນາຍົກລົງຢ້ຽມຢາມ ແລະ ຊຸກຍູ້ການແກ້ໄຂໄພນ້ຳຖ້ວມ

    ວັນ​ທີ 7 ກັນ­ຍາ 2019 ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ພ້ອມ​ດ້ວຍ​ຄະ­ນະ ໄດ້​ລົງ​ເຄື່ອນ​ໄຫວ ຢ້ຽມ­ຢາມ ເພື່ອ​ພົບ​ປະ​ໂອ້​ລົມ ໃຫ້​ກຳ­ລັງ​ໃຈ​ພໍ່​ແມ່​ປະ­ຊາ­ຊົນ ແລະ ຊຸກ­ຍູ້​ການ​ແກ້​ໄຂ​ໄພ​ນ້ຳ​ຖ້ວມ ຢູ່​ແຂວງ​ສະ­ຫວັນ​ນະ​ເຂດ ສາ­ລະ​ວັນ ແລະ ຈຳ­ປາ​ສັກ.

    ການ­ເຄື່ອນ­ໄຫວ​ຂອງ​ທ່ານ​ນາ­ຍົກ­ລັດ­ຖະ­ມົນ­ຕີ ໄດ້​ເລີ່ມ​ຕົ້ນ​ດ້ວຍ​ການ​ໄປ​ຢ້ຽມ­ຢາມ ແລະ ພົບ​ປະ​ໂອ້​ລົມ​ກັບ​ພໍ່​ແມ່​ປະ­ຊາ­ຊົນ ທີ່​ໄດ້​ຮັບ​ຜົນ​ກະ­ທົບ​ຈາກ​ໄພ­ພິ­ບັດ​ນ້ຳ​ຖ້ວມ ຢູ່​ເມືອງ​ຈຳ​ພອນ ແຂວງ​ສະ­ຫວັນ​ນະ​ເຂດ ໃນ​ນັ້ນ ໄດ້​ຮັບ​ຟັງ​ການ​ລາຍ​ງານ​ສະ­ພາບ​ຜົນ​ກະ­ທົບ ແລະ ການ​ແກ້​ໄຂ​ໄພ­ພິ­ບັດ​ນ້ຳ​ຖ້ວມ ທີ່​ເກີດ​ຂຶ້ນ​ຢູ່​ພາຍ​ໃນ​ແຂວງ​ສະ­ຫວັນ​ນະ​ເຂດ ຈາກ​ທ່ານ ສັນ­ຕິ­ພາບ ພົມ­ວິ­ຫານ ເຈົ້າ­ແຂວງ ແຂວງ​ສະ­ຫວັນ​ນະ​ເຂດ ຊຶ່ງ​ເຫັນ​ວ່າ: ທົ່ວ​ແຂວງ ປະ­ສົບ​ໄພ​ນ້ຳ​ຖ້ວມ ມີ 9 ເມືອງ 86 ບ້ານ 29.000 ກວ່າ​ຄອບ­ຄົວ ນ້ຳ​ຖ້ວມ​ພື້ນ​ທີ່​ການ​ຜະ­ລິດ ປະ­ມານ 37.000 ເຮັກ­ຕາ ໜອງ​ປາ 446 ໜອງ ສັດ­ລ້ຽງ (ງົວ-ຄວາຍ) ຕາຍ 19 ໂຕ ລະ­ບົບ​ຊົນ­ລະ­ປະ­ທານ 26 ແຫ່ງ ເສັ້ນ­ທາງ 48 ເສັ້ນ ແລະ ອື່ນໆ.

    ໃນ​ເວ­ລາ​ຕໍ່​ມາ ທ່ານ ນາ­ຍົກ ພ້ອມ​ດ້ວຍ​ຄະ­ນະ ໄດ້​ເດີນ­ທາງ​ຢ້ຽມ­ຢາມ ພົບ​ປະ​ໂອ້​ລົມ  ແລະ ໃຫ້​ກຳ­ລັງ​ໃຈ​ແກ່​ຜູ້​ໄດ້​ຮັບ​ຜົນ​ກະ­ທົບ​ຢູ່​ເມືອງ​ຄົງ​ເຊ​ໂດນ ແຂວງ​ສາ­ລະ​ວັນ ຊຶ່ງ​ເປັນ​ອີກ​ເມືອງ​ໜຶ່ງ​ທີ່​ໄດ້​ຮັບ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ​ໜັກ­ໜ່ວງ​ຫຼາຍ​ສົມ­ຄວນ ເຮັດ​ໃຫ້​ເສັ້ນ­ທາງ​ເຊື່ອມ​ຕໍ່​ຫາ​ແຂວງ​ຈຳ­ປາ​ສັກ ແລະ ເທ­ສະ​ບານ​ແຂວງ​ສາ­ລະ​ວັນ ຖືກ​ຕັດ­ຂາດ​ບໍ່​ສາ­ມາດ​ສັນ­ຈອນ​ໄປ​ມາ​ໄດ້ ເປັນ​ໄລ­ຍະ​ເວ­ລາ 2-3 ວັນ ມີ 71 ບ້ານ 10.147 ຄອບ­ຄົວ ຖືກ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ ເນື້ອ­ທີ່​ທຳ​ການ​ຜະ­ລິດ​ຖືກ​ນ້ຳ​ຖ້ວມ​ທັງ​ໝົດ 16.900 ເຮັກ­ຕາ ໃນ​ນີ້ ເນື້ອ­ທີ່​ກະ­ສິ­ກຳ​ເສຍ​ຫາຍ 15.300 ເຮັກ­ຕາ ເນື້ອ­ທີ່ ໜອງ​ປາ 52 ເຮັກ­ຕາ ເສັ້ນ­ທາງ​ຄົມ­ມະ­ນາ­ຄົມ​ຖືກ​ນ້ຳ​ຖ້ວມ 32 ກິ­ໂລ­ແມັດ ທາງ​ເຂົ້າ​ຫາ​ແຕ່​ລະ​ບ້ານ​ຖືກ​ຕັດ­ຂາດ ແລະ ອື່ນໆ.

ຫຼັງ​ຈາກ​ນັ້ນ ທ່ານ​ນາ­ຍົກ ພ້ອມ​ດ້ວຍ​ຄະ­ນະ ໄດ້​ສືບ­ຕໍ່​ເດີນ­ທາງ​ໄປ​ຢ້ຽມ­ຢາມ ແລະ ເຄື່ອນ​ໄຫວ ຕິດ­ຕາມ​ເບິ່ງ​ສະ­ພາບ​ນ້ຳ​ຖ້ວມ ແລະ ການ​ແກ້​ໄຂ​ຜົນ​ກະ­ທົບ​ທີ່​ເກີດ​ຂຶ້ນ ຢູ່​ແຂວງ​ຈຳ­ປາ​ສັກ ຊຶ່ງ​ເຫັນ​ວ່າ: ໃນ​ທົ່ວ​ແຂວງ ໄດ້​ຮັບ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ ຈຳ­ນວນ 396 ບ້ານ 37.662 ຄອບ­ຄົວ 176.685 ຄົນ ບ້ານ​ທີ່​ຖືກ​ນ້ຳ​ຖ້ວມ 104 ບ້ານ ປະ­ຊາ­ຊົນ​ຖືກ​ຍົກ­ຍ້າຍ​ຊົ່ວ­ຄາວ 6.466 ຄອບ­ຄົວ ລວມ 40.033 ຄົນ ເສັ້ນ­ທາງ 281 ກິ­ໂລ­ແມັດ ເນື້ອ­ທີ່​ນາ 34.327 ເຮັກ­ຕາ ເນື້ອ­ທີ່​ສວນ 3.017 ເຮັກ­ຕາ ລະ­ບົບ​ຊົນ­ລະ­ປະ­ທານ 46 ແຫ່ງ ແລະ ອື່ນໆ.

    ການ​ຢ້ຽມ­ຢາມ ແລະ ພົບ​ປະ​ກັບ​ພາກ­ສ່ວນ​ທີ່​ກ່ຽວ­ຂ້ອງ​ຢູ່​ສະ­ຖານ­ທີ່​ຕ່າງໆ​ໃນ​ຄັ້ງ​ນີ້ ນາ­ຍົກ­ລັດ­ຖະ­ມົນ­ຕີ ໄດ້​ມີ​ຄວາມ​ເປັນ​ຫ່ວງ​ເປັນ​ໃຍ ຖາມ​ເຖິງ​ສະ­ພາບ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ ສະ­ພາບ​ນ້ຳ​ຖ້ວມ ແລະ ຜົນ​ເສຍ​ຫາຍ ການ​ຊ່ວຍ­ເຫຼືອ ແລະ ແກ້​ໄຂ​ບັນ­ຫາ​ຕ່າງໆ ຄວາມ​ຕ້ອງ­ການ​ອັນ​ຈຳ­ເປັນ ແລະ ອື່ນໆ ພ້ອມ​ທັງ​ສະ­ແດງ​ຄວາມ​ຊົມ­ເຊີຍ ຕໍ່​ຄວາມ​ເອົາ­ໃຈ­ໃສ່ ຄວາມ​ສາ­ມັກ­ຄີ​ຮັກ­ແພງ​ຂອງ​ອົງ­ການ​ປົກ­ຄອງ​ທ້ອງ­ຖິ່ນ ແລະ ພາກ­ສ່ວນ​ຕ່າງໆ ທີ່​ໄດ້​ໃຫ້­ການ​ຊ່ວຍ­ເຫຼືອ​ຜູ້​ປະ­ສົບ​ໄພ​ນ້ຳ​ຖ້ວມ​ໄດ້​ດີ ແລະ ທັນ​ການ ໂດຍ​ສະ­ເພາະ​ອ້າຍ​ເອື້ອຍ​ນ້ອງ​ທະ­ຫານ ເຈົ້າ​ໜ້າ­ທີ່​ຕຳ­ຫຼວດ ອາ­ສາ​ສະ­ໝັກ​ກູ້​ໄພ ປະ­ຊາ­ຊົນ​ດ້ວຍ​ກັນ ແລະ ອື່ນໆ ທີ່​ໄດ້​ປະ­ກອບ­ສ່ວນ​ເຫື່ອ­ແຮງ ແລະ ວັດ­ຖຸ​ສິ່ງ​ຂອງ​ເຂົ້າ​ໃນ​ການ​ຊ່ວຍ­ເຫຼືອ​ຍົກ­ຍ້າຍ​ປະ­ຊາ­ຊົນ ລຳ­ລຽງ​ວັດ­ຖຸ​ສິ່ງ​ຂອງ​ທີ່​ຈຳ­ເປັນ ສັດ­ລ້ຽງ​ໄປ​ສູ່​ເຂດ​ທີ່​ປອດ​ໄພ.

    ອັນ​ສຳ­ຄັນ ທ່ານ​ນາ­ຍົກ­ລັດ­ຖະ­ມົນ­ຕີ ໄດ້​ເນັ້ນ​ໜັກ​ໃຫ້​ອົງ­ການ​ປົກ­ຄອງ​ທ້ອງ­ຖິ່ນ ແລະ ພາກ­ສ່ວນ​ທີ່​ກ່ຽວ­ຂ້ອງ ສືບ­ຕໍ່​ເອົາ­ໃຈ­ໃສ່​ຕື່ມ ເປັນ­ຕົ້ນ ໃຫ້​ເອົາ­ໃຈ­ໃສ່​ກອບ​ກູ້ ຍົກ­ຍ້າຍ​ປະ­ຊາ­ຊົນ ແລະ ວັດ­ຖຸ​ສິ່ງ​ຂອງ​ທີ່​ຈຳ­ເປັນ ໄປ​ຢູ່​ທີ່​ປອດ​ໄພ​ໃຫ້​ໄດ້​ທັງ​ໝົດ ໃຫ້​ເອົາ­ໃຈ­ໃສ່​ເບິ່ງ­ແຍງ​ດູ​ແລ​ສຸ­ຂະ­ພາບ ສຸ​ຂະ​ອະ­ນາ­ໄມ​ຂອງ​ປະ­ຊາ­ຊົນ​ໃຫ້​ດີ ມີ​ຫ້ອງ​ນ້ຳ ລວມ​ທັງ​ອຸ­ປະ­ກອນ​ການ​ແພດ ແລະ ຢາ​ປົວ​ພະ­ຍາດ​ທີ່​ພຽງ­ພໍ ໃຫ້​ມີ​ແພດ​ໝໍ​ບໍ­ລິ­ການ​ດ້ານ​ສາ​ທາ​ລະ​ນາ​ສຸກ​ຢ່າງ​ເປັນ​ປົກ­ກະ­ຕິ ແລະ ທົ່ວ​ເຖິງ ໃນ​ແຕ່​ລະ​ຈຸດ​ເຕົ້າ­ໂຮມ ໃຫ້​ສະ­ໜອງ​ເຄື່ອງ​ອຸ­ປະ­ໂພກ-ບໍ­ລິ­ໂພກ​ທີ່​ຈຳ­ເປັນ​ເຊັ່ນ: ອາ­ຫານ​ການ​ກິນ ນ້ຳ​ດື່ມ-ນ້ຳ​ໃຊ້ ທີ່​ສະ­ອາດ ເຄື່ອງ­ໃຊ້​ຂອງ​ສອຍ ແລະ ອື່ນໆ ໃຫ້​ແກ່​ຜູ້​ປະ­ສົບ​ໄພ​ຢ່າງ​ພຽງ­ພໍ ແລະ ທັນ​ການ ການ​ແກ້​ໄຂ​ໄພ­ພິ­ບັດ ຕ້ອງ​ມີ​ການ­ຈັດ­ຕັ້ງ​ບັນ­ຊາ ແບ່ງ​ຄວາມ​ຮັບ­ຜິດ­ຊອບ​ລະ­ອຽດ​ຈະ­ແຈ້ງ ລົງ​ເລິກ​ຊີ້​ນຳ​ໃຫ້​ແທດ​ຕົວ​ຈິງ ມີ​ລະ­ບົບ​ການ​ປະ­ສານ​ງານ​ທີ່​ສະ­ດວກ ວ່ອງ­ໄວ ມີ​ແຜນ­ການ​ແກ້​ໄຂ​ທີ່​ດີ ມີ​ການ​ຕິດ­ຕາມ-ກວດ­ກາ ຢ່າງ​ເປັນ​ປົກ­ກະ­ຕິ ເມື່ອ​ພົບ​ບັນ­ຫາ​ຫຍຸ້ງ­ຍາກ ໃຫ້​ມີ​ການ​ປຶກ­ສາ​ຫາ­ລື​ກັນ ຫຼື​ຂໍ​ທິດ​ຊີ້​ນຳ​ຈາກ​ຂັ້ນ​ເທິງ​ຢ່າງ​ທັນ​ການ.

ຂ່າວທີ່ກ່ຽວຂ້ອງ