ຂ່າວຫຼ້າສຸດ

ລາວດວງເດືອນ ສະເໜີຜົນງານໃໝ່ “ສືບທາວລາວມະໂຫລີ”

123 10 ກ.ຍ. 2019 ຂ່າວໜ້າ​ໜຶ່ງ
ລາວດວງເດືອນ ສະເໜີຜົນງານໃໝ່ “ສືບທາວລາວມະໂຫລີ”

    ສຳ­ນັກ​ພິມ ລາວ​ດວງ​ເດືອນ ຈັດ​ງານ​ແນະ­ນຳ​ປຶ້ມ​ຫົວ​ໃໝ່ ຊື່­ວ່າ: “ສືບ​ທາວ​ລາວ​ມະ­ໂຫ­ລີ” ຜົນ­ງານ​ຂອງ​ທ່ານ ປັນ­ຍາ ພັນ­ທະ​ພາ­ນິດ ນັກ​ຄົ້ນ­ຄວ້າ ນັກ​ປະ­ພັນ ນັກ​ວິ­ຈານ​ບັນ­ເທີງ ເພື່ອ​ເຜີຍ­ແຜ່​ສູ່​ສັງ­ຄົມ ກໍ​ຄື​ຜູ້​ອ່ານ ຈັດ​ຂຶ້ນ​ວັນ​ທີ 6 ກັນ­ຍາ 2019 ທີ່​ຮ້ານ​ບ່ອນ​ນີ້​ກາ­ເຟ ນະ­ຄອນ­ຫຼວງ​ວຽງ​ຈັນ ໂດຍ​ການ​ເປັນ​ກຽດ​ເຂົ້າ​ຮ່ວມ​ຂອງ​ທ່ານ ສະ­ຫວັນ​ຄອນ ຣາ​ຊ​ມຸນ­ຕີ ຮອງ​ລັດ­ຖະ­ມົນ­ຕີ ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ພ້ອມ​ດ້ວຍ​ບັນ­ດາ​ຫົວ­ໜ້າ​ກົມ​ກ່ຽວ­ຂ້ອງ ນັກ​ປະ­ພັນ ນັກ​ກະ­ວີ ຕົວ​ແທນ​ຮ້ານ​ຂາຍ​ປຶ້ມ ແລະ ແຂກ​ຖືກ​ເຊີນ​ຫຼາຍ​ທ່ານ​ເຂົ້າ​ຮ່ວມ.

    ໃນ​ງານ​ຄັ້ງ​ນີ້ ທ່ານ ບຸນ​ທະ​ນອງ ຊົມ​ໄຊ​ຜົນ ອຳ­ນວຍ​ການ​ສຳ­ນັກ​ພິມ​ລາວ​ດວງ​ເດືອນ ກ່າວ​ວ່າ: ປຶ້ມ “ສືບ​ທາວ​ລາວ​ມະ­ໂຫ­ລີ” ເປັນ​ປຶ້ມ​ຫົວ​ໜຶ່ງ​ທີ່​ຄຸນ­ຄ່າ​ສູງ​ທາງ​ດ້ານ​ປະ­ຫວັດ­ສາດ ສິ­ລະ​ປະ​ມະ­ໂຫ­ລີ​ດົນ​ຕຣີ ຂັບ​ລຳ​ເພງ​ລາວ ທີ່​ຜູ້​ຂຽນ​ໂດຍ ປັນ­ຍາ ພັນ­ທະ​ພາ­ນິດ ໃຊ້​ເວ­ລາ​ເກັບ​ກຳ​ຂໍ້​ມູນ ແລະ ຄົ້ນ­ຄວ້າ​ມາ​ດົນ​ນານ​ກວ່າ 10 ປີ ເຊິ່ງ​ເນື້ອ​ໃນ​ຊີ້​ໃຫ້​ເຫັນ​ປະ­ຫວັດ​ຄວາມ​ເປັນ​ມາ​ຂອງ​ຊາດ​ພັນ ແລະ ດົນ​ຕຣີ​ມະ­ໂຫ­ລີ​ລາວ​ເຮົາ ຕັ້ງ­ແຕ່​ຍຸກ​ດຶກ​ດຳ​ບັນ ໂດຍ​ຜ່ານ​ແຕ່​ລະ​ຍຸກ​ສະ­ໄໝ​ຈົນ​ເຖິງ​ຍຸກ​ຮາ­ວີ​ຮຸກ​ຮານ​ຂອງ​ສັກ​ດີ​ນາ​ຕ່າງ​ດ້າວ ແຕ່​ດົນ​ຕຣີ​ລາວ ກໍ​ຍັງ​ຄົງ​ພະ­ລັງ​ອັນ​ເຂັ້ມ­ແຂງ​ມາ​ເຖິງ​ການ​ປ່ຽນ­ແປງ​ຖ່າຍ ເມື່ອ​ລາວ​ຕົກ​ເປັນ​ອາ­ນາ​ນິ­ຄົມ​ຂອງ​ຈັກ­ກະ­ພັດ​ລ່າ​ເມືອງ​ຂຶ້ນ​ດ້ວຍ​ຄວາມ​ຮັກ​ຊາດ​ໃນ​ເອ­ກະ­ລາດ ສິ­ລະ​ປິນ​ລາວ​ໄດ້​ຮ່ວມ​ກັນ​ສ້າງ­ສັນ​ຜົນ­ງານ​ດ້ວຍ​ນ້ຳ­ໃຈ​ຮັກ​ຊາດ ເຮັດ​ໃຫ້​ລາວ​ມີ​ເພງ​ຊາດ​ຂອງ​ຕົນ​ຄັ້ງ​ທຳ​ອິດ ກ້າວ​ເຂົ້າ​ສູ່​ຍຸກ​ຕໍ່­ສູ້​ກູ້​ຊາດ​ດົນ​ຕຣີ ບົດ​ເພງ​ໄດ້​ຖືກ​ນຳ​ໃຊ້​ໃຫ້​ເປັນ​ອາ­ວຸດ​ແຫຼມ​ຄົມ​ທັງ​ກ່າວ​ປະ­ນາມ ທັງ​ໃຫ້​ກຳ­ລັງ​ໃຈ​ທະ­ຫານ​ປົດ​ປ່ອຍ​ຈົນ​ສາ­ມາດ​ຍາດ​ໄດ້​ເອ­ກະ­ລາດ ແລະ ຜືນ​ແຜ່ນ­ດິນ​ອັນ​ຄົບ​ຖ້ວນ​ນັ້ນ ຈຶ່ງ​ຖື​ວ່າ​ດົນ​ຕຣີ​ເພງ​ມີ​ພະ­ລັງ​ແຮງ​ດ້ວຍ​ຈິດ​ອາ­ລົມ​ອັນ​ເປັນ​ມໍ­ລະ­ດົກ​ຕົກ​ທອດ​ຜ່ານ​ຮຸ້ນ​ສູ່​ຮຸ່ນ ຈົນ​ມາ​ເຖິງ​ຍຸກ​ປັດ­ຈຸ­ບັນ​ນີ້​ທີ່​ຄົນ​ຮຸ່ນ​ໃໝ່​ຄວນ​ໄດ້​ສຶກ​ສາ​ຮຽນ​ຮູ້​ດ້ວຍ​ສະ­ຕິ­ຊາດ​ອັນ​ສູງ​ສົ່ງ.

    ທ່ານ ປັນ­ຍາ ພັນ­ທະ​ພາ­ນິດ ກ່າວ​ໂດຍ​ຫຍໍ້​ວ່າ: ປຶ້ມ​ຫົວ​ນີ້​ໂຮມ​ໄວ້ ເຊິ່ງ​ເປັນ​ຂະ​ບວນ​ວິ­ວັດ​ຂອງ​ດົນ​ຕຣີ​ຂັບ​ລຳ ແລະ ເພງ​ລາວ ກ້າວ​ເຖິງ​ທີ່​ໄປ​ທີ່​ມາ ແລະ ການ​ຂະ­ຫຍາຍ­ຕົວ ຜູ້​ອ່ານ​ຈະ​ໄດ້​ຮູ້​ເຖິງ​ຄວາມ​ເປັນ​ມາ​ຂອງ​ຊາດ​ພັນ​ລາວ ດົນ​ຕຣີ​ອັນ​ເປັນ​ຮາກ​ເຫງົ້າ​ຂອງ​ລາວ​ໂດຍ​ແທ້ ແລະ ການ​ປະ­ສົມ​ປະ­ສານ​ຂອງ​ດົນ​ຕຣີ​ຮ່ວມ​ສະ­ໄໝ ໃນ​ປຶ້ມ​ປະ­ກອບ​ມີ​ທັງ​ໝົດ 11 ບົດ​ໃຫຍ່ ແລະ ຫຼາຍໆ​ບົດ​ຍ່ອຍ ອັດ​ທ້າຍ​ດ້ວຍ​ບົດ​ວິ­ເຄາະ​ທ້າຍ​ເຫຼັ້ມ​ອີກ​ຈຳ­ນວນ​ໜຶ່ງ ກໍ​ຫວັງ​ວ່າ​ຈະ​ເປັນ​ປຶ້ມ​ຫົວ​ໜຶ່ງ ທີ່​ໃຫ້​ປະ­ໂຫຍດ​ແກ່​ນັກ​ອ່ານ ນັກ​ສຶກ​ສາ ປັນ­ຍາ​ຊົນ ລວມ​ເຖິງ​ນັກ​ສິ­ລະ​ປິນ​ໄວ້​ເປັນ​ບ່ອນ​ອີງ ເປັນ​ຖານ​ຂໍ້​ມູນ​ໃນ​ການ​ສຶກ​ສາ​ຄົ້ນ­ຄວ້າ​ເສີມ​ຂະ­ຫຍາຍ​ຕໍ່​ໄປ​ໃນ​ອະ­ນາ­ຄົດ.

    ປຶ້ມ ສືບ​ທາວ​ລາວ​ມະ­ໂຫ­ລີ ປັດ­ຈຸ­ບັນ​ເລີ່ມ​ວາງ​ຈຳ­ໜ່າຍ​ແລ້ວ​ທີ່​ຮ້ານ​ຂາຍ​ປຶ້ມ​ດອກ​ເກດ ຮ້ານ​ຂາຍ​ປຶ້ມ​ດີ​ບຸກ ສົນ­ໃຈ​ໂທ 020 97636007-020 99284384 ບໍ­ລິ­ການ​ຈັດ​ສົ່ງ​ທົ່ວ​ປະ­ເທດ.

ຂ່າວທີ່ກ່ຽວຂ້ອງ