ຂ່າວຫຼ້າສຸດ

ຄວາມຄືບໜ້າ ກຽມຈັດງານກີລາແຫ່ງຊາດ ຄັ້ງທີ XI

167 10 ກ.ຍ. 2019 ວົງຈອນກີລາ
ຄວາມຄືບໜ້າ ກຽມຈັດງານກີລາແຫ່ງຊາດ ຄັ້ງທີ XI

    ແຂວງ​ຊຽງ​ຂວາງ ຈັດ​ກອງ​ປະ­ຊຸມ​ວິ­ສາ­ມັນ ຄັ້ງ​ທີ IV ຂອງ​ຄະ­ນະ​ຮັບ­ຜິດ­ຊອບ​ລະ­ດັບ​ຊາດ ຈັດ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ XI ໃນ​ວັນ​ທີ 6 ກັນ­ຍາ 2019 ທີ່​ຫ້ອງ​ປະ­ຊຸມ​ຫ້ອງ​ວ່າ­ການ​ປົກ­ຄອງ​ແຂວງ ເປັນ​ປະ­ທານ​ຮ່ວມ​ຂອງ ທ່ານ​ນາງ ແສງ​ເດືອນ ຫຼ້າ​ຈັນ­ທະ​ບູນ ລັດ­ຖະ­ມົນ­ຕີ ກະ­ຊວງ​ສຶກ​ສາ​ທິ​ການ ແລະ ກີ­ລາ ທັງ​ເປັນ​ປະ­ທານ​ຄະ­ນະ​ກຳ­ມະ­ການ​ໂອ​ແລມ​ປິກ​ແຫ່ງ​ຊາດ​ລາວ ແລະ ທ່ານ ບຸນ​ຕົ້ນ ຈັນ­ທະ​ພອນ ເຈົ້າ­ແຂວງ​ຊຽງ​ຂວາງ ມີ​ບັນ­ດາ​ລັດ­ຖະ­ມົນ­ຕີ ຮອງ​ລັດ­ຖະ­ມົນ­ຕີ​ຈາກ​ກະ­ຊວງ​ທີ່​ກ່ຽວ­ຂ້ອງ ກຳ­ມະ­ການ ຄະ­ນະ​ກຳ­ມະ­ການ​ຮັບ­ຜິດ­ຊອບ​ລະ­ດັບ​ຊາດ ຈັດ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ XI ຈາກ​ຂັ້ນ​ສູນ​ກາງ ແລະ ຂັ້ນ​ແຂວງ​ເຂົ້າ​ຮ່ວມ.

    ໃນ​ກອງ​ປະ­ຊຸມ ຜູ້​ແທນ​ເຂົ້າ​ຮ່ວມ​ໄດ້​ພ້ອມ​ກັນ​ຄົ້ນ­ຄວ້າ​ຕີ​ລາ­ຄາ ປະ­ກອບ​ຄຳ​ຄິດ​ຄຳ​ເຫັນ​ໃສ່​ບັນ­ດາ​ໜ້າ​ວຽກ​ທີ່​ສຳ­ຄັນ ໃຫ້​ແກ່​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ XI ເປັນ­ຕົ້ນ​ແມ່ນ ຄວາມ​ຄືບ​ໜ້າ​ຂອງ​ແຕ່​ລະ​ໜ້າ​ວຽກ​ທີ່​ສຳ­ເລັດ ແລະ ບໍ່​ທັນ​ສຳ­ເລັດ ການ​ປັບ­ປຸງ​ຄະ­ນະ​ຮັບ­ຜິດ­ຊອບ​ບາງ​ອະ­ນຸ​ກຳ­ມະ­ການ ຄວາມ​ກຽມ­ພ້ອມ​ຂອງ​ແຕ່​ລະ​ໜ້າ​ວຽກ​ກຳ­ມະ­ການ​ເຕັກ­ນິກ ກຳ­ມະ­ການ​ເປີດ-ປິດ ກຳ­ມະ­ການ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ ກຳ­ມະ­ການ​ເສດ­ຖະ­ກິດ-ລະ­ດົມ​ທຶນ ແລະ ໜ້າ​ວຽກ​ສຳ­ຄັນ​ອື່ນໆ​ທີ່​ປິ່ນ​ອ້ອມ.

    ພ້ອມ​ດຽວ​ກັນ​ນີ້ ຜູ້​ແທນ​ກອງ​ປະ­ຊຸມ​ຍັງ​ໄດ້​ຮັບ​ຟັງ​ການ​ລາຍ​ງານ​ຄວາມ​ຄືບ​ໜ້າ ການ​ກະ­ກຽມ​ຄວາມ​ພ້ອມ​ດ້ານ​ຕ່າງໆ ຈາກ​ທ່ານ ບົວ​ສອນ ສີ​ນວນ​ທອງ ຮອງ​ເຈົ້າ­ແຂວງ​ຊຽງ​ຂວາງ ເຊິ່ງ​ທ່ານ​ໄດ້​ຍົກ​ໃຫ້​ເຫັນ​ເຖິງ​ບາງ​ໜ້າ​ວຽກ​ທີ່​ສຳ­ເລັດ ແລະ ໃກ້​ຈະ​ສຳ­ເລັດ ໃນ​ນັ້ນ ໜ້າ​ວຽກ​ທີ່​ສຳ­ເລັດ​ແລ້ວ​ປະ­ກອບ​ມີ:  ການ​ຈັດ​ປະ­ມູນ​ການ​ປະ­ດັບ​ປະ­ດາ​ສະ­ໜາມ​ເປີດ-ປິດ ການ​ຈັດ​ປະ­ມູນ​ຊຸດ​ເຄື່ອງ­ນຸ່ງ​ຂອງ​ຄະ­ນະ​ນຳ ແລະ ກຳ­ມະ­ການ ຈັດ​ປະ­ມູນ​ເຄື່ອງ​ບ່ອນ​ນອນ​ຮັບ​ໃຊ້​ແກ່​ຄູ​ເຝິກ ແລະ ນັກ­ກີ­ລາ ຈັດ​ປະ­ມູນ​ເຄື່ອງ­ຮັບ​ໃຊ້​ຄົງ​ທີ່​ຫ້ອງ­ການ​ເຊັ່ນ: ຄອມ​ພິວ​ເຕີ ປຣິນ​ເຕີ ແລະ ການ​ຈັດ­ການ​ປະ­ມູນ​ເຄື່ອງ­ຮັບ​ໃຊ້​ຫ້ອງ­ການ ສຳ­ລັບ​ພື້ນ­ຖານ​ໂຄງ​ລ່າງ​ທາງ​ດ້ານ​ສະ­ໜາມ​ກີ­ລາ ສະ­ໜາມ​ກີ­ລາ​ເປີດ-ປິດ ສຳ­ເລັດ​ແລ້ວ 99% ສະ­ໜາມ​ບານ­ເຕະ ຕັ້ງ​ຢູ່​ບ້ານ​ໂພນ​ມີ​ໄຊ ສຳ­ເລັດ 100% ສະ​ໜາມ​ກ໊ອຟ ສຳ­ເລັດ 100% ສະ­ໜາມ​ໂບ​ລິ້ງ ສຳ­ເລັດ 100% ສະ­ໜາ​ສະ­ນຸກ​ເກີ​ສຳ­ເລັດ 100% ບຸ­ລະ­ນະ​ສ້ອມ­ແປງ​ບັນ­ດາ​ສະ­ໂມ­ສອນ​ຂອງ​ພະ­ແນກ­ການ ກົມ​ກອງ ແລະ ສະ­ຖານ­ທີ່​ຕ່າງໆ ຈຳ­ນວນ 11 ແຫ່ງ ທີ່​ໃຊ້​ເປັນ​ສະ­ໜາມ​ແຂ່ງ­ຂັນ​ປະ­ເພດ​ຕ່າງໆ ພ້ອມ​ກັບ​ການ​ສ້ອມ­ແປງ​ໂຮງ­ຮຽນ​ເປັນ​ທີ່​ພັກ​ຂອງ​ນັກ­ກີ­ລາ ແລະ ຄູ​ເຝິກ 27 ແຫ່ງ ກໍ່­ສ້າງ​ເສັ້ນ­ທາງ​ເຊື່ອມ​ຈອດ​ເຂົ້າ​ສູ່​ສະ­ໜາມ​ເປີດ-ປິດ ສຳ­ເລັດ 100% ຕິດ​ຕັ້ງ​ລະ­ບົບ​ນ້ຳ​ປະ­ປາ​ເຂົ້າ​ສູ່​ສະ­ໜາມ​ສຳ­ເລັດ 100% ແລະ ປູກ​ຕົ້ນ­ໄມ້​ປະ­ດັບ​ປະ­ດາ​ຕາມ​ສອງ​ຟາກ​ທາງ​ເຂົ້າ​ຫາ​ສະ­ໜາມ​ກີ­ລາ​ເປີດ-ປິດ ສຳ­ເລັດ​ໂດຍ​ພື້ນ­ຖານ ສຳ­ລັບ​ວຽກ​ທີ່​ຍັງ​ຈະ​ໄດ້​ສືບ­ຕໍ່​ກໍ່­ສ້າງ​ໃນ­ຕໍ່­ໜ້າ ກໍ​ຄື: ສະ­ໜາມ​ບານ­ສົ່ງ​ໃນ​ຮົ່ມ ສະ­ໜາມ​ຍິງ​ປືນ ສະ­ໜາມ​ບານ­ບ້ວງ ສະ­ໜາມ​ເທັນ​ນິ​ສ ສູນ​ເຝິກ ຫຼື ຫໍ​ພັກ​ນັກ­ກີ­ລາ ແລະ ລະ­ບົບ​ຕາ​ຂ່າຍ​ໄຟ­ຟ້າ​ເຂົ້າ​ສະ­ໜາມ​ກີ­ລາ​ເປີດ-ປິດ.

    ໃນ​ຕອນ​ທ້າຍ ຍັງ​ໄດ້​ຮັບ​ຟັງ​ການ​ໂອ້​ລົມ​ປະ­ກອບ​ຄຳ​ຄິດ​ຄຳ​ເຫັນ​ຈາກ ທ່ານ​ນາງ ແສງ​ເດືອນ ຫຼ້າ​ຈັນ­ທະ​ບູນ ເຊິ່ງ​ທ່ານ​ໄດ້​ຕີ​ລາ­ຄາ​ສູງ​ຕໍ່​ຄວາມ​ເອົາ­ໃຈ­ໃສ່​ຂອງ​ຄະ­ນະ​ກຳ­ມະ­ການ​ທຸກ​ຂັ້ນ ທີ່​ໄດ້​ຕັ້ງ­ໜ້າ​ປະ­ຕິ­ບັດ​ໜ້າ­ທີ່​ຢ່າງ​ຈິງ​ຈັງ​ຈົນ​ສຳ­ເລັດ​ໂດຍ​ພື້ນ­ຖານ ພ້ອມ​ທັງ​ໄດ້​ເນັ້ນ​ໜັກ​ໃຫ້​ຄະ­ນະ​ກຳ­ມະ­ການ​ຮັບ­ຜິດ­ຊອບ​ທຸກ​ຂັ້ນ ຈົ່ງ​ສືບ­ຕໍ່​ປະ­ຕິ­ບັດ​ໜ້າ­ທີ່​ດ້ວຍ​ຄວາມ​ຮັບ­ຜິດ­ຊອບ​ຕື່ມ​ເພື່ອ​ໃຫ້​ທັນ​ກັບ​ເວ­ລາ ເຮັດ​ແນວ­ໃດ​ໃຫ້​ງານ​ມະ­ຫາ​ກຳ​ກີ­ລາ ດັ່ງ­ກ່າວ ດຳ­ເນີນ​ໄປ​ດ້ວຍ​ບັນ​ຍາ ກາດ​ຄຶກ­ຄື້ນ​ມ່ວນ­ຊື່ນ ມີ​ຄວາມ​ໝາຍ ແລະ ປະ­ສົບ​ຜົນ­ສຳ­ເລັດ​ຢ່າງ​ຈົບ­ງາມ.

ຂ່າວທີ່ກ່ຽວຂ້ອງ