ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 10-09-2019

241 10 ກ.ຍ. 2019 ຫົວຂໍ້ຂ່າວອື່ນໆ

    ມື້­ນີ້​ຂໍ​ພາ​ທ່ານ​ຜູ້​ອ່ານ​ໄປ​ຮູ້​ກັບ​ແຜນ­ການ​ພັດ­ທະ­ນາ​ກະ­ສິ­ກຳ ດ້ວຍ​ລະ­ບົບ​ໄຮ​ເທັກ ຢູ່​ສິງ­ກະ­ໂປ ຕໍ່​ໃສ່​ເລື່ອງ​ໂຈນ​ໃນ​ຍົນ​ຖ້ຽວ​ບິນ​ບາງ­ກອກ-ດູ່​ບາຍ.

    ທີ່ ສິງ­ກະ­ໂປ: ຍາກ​ທີ່​ຈະ​ມີ​ໃຜ​ຄິດ​ອອກ​ວ່າ ປະ­ເທດ​ທີ່​ມີ​ເນື້ອ­ທີ່​ນ້ອຍໆ ຄື​ສິງ­ກະ­ໂປ​ຈະ​ມີ​ແຜນ​ພັດ­ທະ­ນາ​ກະ­ສິ­ກຳ ເພື່ອ​ກຸ້ມ​ປາກ​ກຸ້ມ​ທ້ອງ​ເອົາ​ເອງ​ໄດ້ ແຕ່​ຄວາມ​ຈິງ​ໄດ້​ພິ­ສູດ​ວ່າ ສິງ­ກະ­ໂປ​ເຮັດ​ໄດ້​ດ້ວຍ​ການ​ນຳ​ໃຊ້​ນະ­ໂຍ­ບາຍ​ກະ​ຕຸ້ນ​ທີ່​ສຸດ​ແສນ​ຈູງ​ໃຈ ກ່ຽວ​ກັບ​ເລື່ອງ​ນີ້ ໜັງ­ສື­ພິມ​ວຽງ​ຈັນ​ທາມ (11 ພຶດ­ສະ­ພາ 2017) ໄດ້​ບອກ​ວ່າ ລັດ­ຖະ­ບານ​ສິງ­ກະ­ໂປ ມີ​ແຜນ​ໃຫ້​ຜູ້​ສົນ­ໃຈ ສາ­ມາດ​ເຊົ່າ​ທີ່​ດິນ​ຜະ­ລິດ​ກະ­ສິ­ກຳ​ດ້ວຍ​ລະ­ບົບ​ໄຮ​ເທັກ ເປັນ​ເວ­ລາ 20 ປີ ເພີ່ມ​ຈາກ​ທີ່​ປະ­ກາດ​ໄປ​ໃນ​ເມື່ອ​ກ່ອນ​ວ່າ ມີ​ພຽງ 10 ປີ​ທີ່​ຕ້ອງ​ເພີ່ມ​ຈາກ 10 ເປັນ 20 ປີ​ນັ້ນ ກໍ​ແມ່ນ​ເພື່ອ​ໃຫ້​ເໝາະ​ສົມ​ກັບ​ການ​ລົງ­ທຶນ​ຂອງ​ຊາວ​ກະ­ສິ­ກອນ ເຂົ້າ​ໃນ​ການ​ນຳ​ໃຊ້​ເຕັກ​ໂນ​ໂລ​ຊີ​ໃໝ່ໆ ທີ່​ຕ້ອງ­ການ​ໄລ­ຍະ​ຍາວ​ກວ່າ ໃນ​ການ​ອະ­ນຸ­ຍາດ​ໃຫ້​ເຊົ່າ​ດິນ​ເພື່ອ​ຜະ­ລິດ​ກະ­ສິ­ກຳ​ນັ້ນ ທາງ​ເບື້ອງ​ລັດ­ຖະ­ບານ​ເນັ້ນ​ມາດ­ຕະ­ຖານ ຄຸນ​ນະ​ພາບ ແລະ ປະ​ສິດ­ທິ​ຜົນ​ໃນ​ການ​ນຳ​ໃຊ້​ເນື້ອ­ທີ່​ດິນ ເລື່ອງ​ນີ້​ທາງ​ພາກ­ສ່ວນ​ຮັບ­ຜິດ­ຊອບ​ກະ­ສິ­ກຳ-ອາ­ຫານ ແລະ ປະ­ສຸ​ສັດ ເປັນ​ຜູ້​ຮັບ­ຜິດ­ຊອບ​ເຮັດ​ລາຍ​ລະ­ອຽດ​ກັບ​ບັນ­ດາ​ຜູ້​ເຊົ່າ​ດິນ​ສະ­ເພາະ ນອກ­ຈາກ​ນັ້ນ ທາງ​ເບື້ອງ​ລັດ­ຖະ­ບານ​ຍັງ​ມີ­ໜ້າ​ທີ່​ຊ່ວຍ­ເຫຼືອ​ຊາວ​ກະ­ສິ­ກອນ ເພື່ອ​ເລືອກ​ໃຊ້​ເຕັກ​ໂນ​ໂລ​ຊີ​ທີ່​ທັນ​ສະ­ໄໝ ທ່ານ ໂລ​ເຣັນ​ວອງ ລັດ­ຖະ­ມົນ­ຕີ​ກະ­ຊວງ​ພັດ­ທະ­ນາ​ແຫ່ງ​ຊາດ ໄດ້​ສະ­ແດງ​ຄວາມ​ໝັ້ນ​ໃຈ​ວ່າ ສິງ­ກະ­ໂປ ສາ­ມາດ​ຮັບ­ປະ­ກັນ​ຄວາມ​ໝັ້ນ­ຄົງ​ດ້ານ​ອາ­ຫານ​ດ້ວຍ​ການ​ຜະ­ລິດ​ສະ­ບຽງ​ອາ­ຫານ​ເອົາ​ເອງ ເຊິ່ງ​ຈະ​ສາ­ມາດ​ແກ້​ໄຂ​ບັນ­ຫາ ເພື່ອ​ການ​ສະ­ໜອງ​ຈາກ​ພາຍ​ນອກ​ບໍ່​ທ່ວງ​ທັນ ແຕ່​ຈະ​ໃຫ້​ຜະ­ລິດ​ອາ­ຫານ​ທຸກ​ຢ່າງ​ທີ່​ຕ້ອງ­ການ​ເອົາ​ເອງ​ນັ້ນ ຄົງ​ເຮັດ​ບໍ່​ໄດ້​ການ​ໃຊ້​ເຕັກ​ໂນ​ໂລ​ຊີ​ກ້າວ­ໜ້າ​ທັນ​ສະ­ໄໝ ເຂົ້າ​ໃນ​ຂະ­ແໜງ​ກະ­ສິ­ກຳ​ນີ້ ບໍ່​ພຽງ​ແຕ່​ຈະ​ຊ່ວຍ​ເພີ່ມ​ຜົນ​ຜະ­ລິດ​ພາຍ​ໃນ​ເອົາ​ເອງ​ໄດ້​ເທົ່າ​ນັ້ນ ແຕ່​ຍັງ​ຈະ​ຊ່ວຍ​ໃຫ້​ທຸ­ລະ​ກິດ​ຂອງ​ຊາວ​ກະ­ສິ­ກອນ ປະ­ສົບ​ກັບ​ຜົນ­ສຳ­ເລັດ​ອີກ​ດ້ວຍ.

    ທີ່ ສະ­ຫະ­ລັດ ອາ​ຣັບ ເອ​ເມ​ເຣດ: ໜັງ­ສື­ພິມ​ວຽງ​ຈັນ​ທາມ (20 ຕຸ­ລາ 2018) ໄດ້​ໃຫ້​ຮູ້​ວ່າ ພະ­ນັກ­ງານ​ບໍ­ລິ­ການ​ປະ­ຈຳ​ເຄື່ອງ​ບິນ​ຖືກ​ເຈົ້າ​ໜ້າ­ທີ່​ຕຳ­ຫຼວດ​ຈັບ​ກຸມ ທີ່​ນະ­ຄອນ​ດູ​ບາຍ ສະ­ຫະ­ລັດ ອາ​ຣັບ ເອ​ເມ​ເຣດ ຍ້ອນ​ໄດ້​ຂະ­ໂມຍ​ເງິນ​ຄົນ​ໂດຍ­ສານ​ໃນ​ຖ້ຽວ​ບິນ ບາງ­ກອກ-ດູ​ບາຍ (ຄັ້ງ​ວັນ​ທີ 21 ມິ­ຖຸ­ນາ 2018) ພະ­ນັກ­ງານ​ປະ­ຈຳ​ເຄື່ອງ​ບິນ​ຜູ້​ກໍ່​ເຫດ​ຄົນ​ນີ້ ເປັນ​ຄົນ ເອ​ຢິບ ອາ­ຍຸ 37 ປີ ເລື່ອງ​ມີ​ຢູ່​ວ່າ ໃນ​ບັນ­ດາ​ຜູ້­ໂດຍ­ສານ​ຂອງ​ຖ້ຽວ​ບິນ​ດັ່ງ­ກ່າວ​ນັ້ນ ມີ 3 ອ້າຍ​ນ້ອງ​ຮ່ວມ​ເດີນ­ທາງ ແລະ ຜູ້​ເປັນ​ພໍ່​ອີກ​ຄົນ​ໜຶ່ງ ໃນ​ຂະ­ນະ​ທີ່​ເຄື່ອງ​ບິນ​ພວມ​ເຫີນ​ຟ້າ​ຢູ່​ນັ້ນ ພໍ່​ຂອງ​ສາມ​ອ້າຍ​ນ້ອງ​ເກີດ​ມີ​ອາ­ການ​ຜິດ​ປົກ­ກະ­ຕິ​ແບບ​ກະ­ທັນ­ຫັນ ດັ່ງ­ນັ້ນ 3 ອ້າຍ​ນ້ອງ​ຈຶ່ງ​ລຸກ​ຈາກ​ຕັ່ງ​ໄປ​ເບິ່ງ​ອາ­ການ​ຂອງ​ພໍ່ ໃນ​ເວ­ລາ​ນັ້ນ​ເອງ ພະ­ນັກ­ງານ​ມື​ໄວ​ໃຈ​ຄົດ​ປະ­ຈຳ​ເຄື່ອງ​ບິນ​ຄົນ​ນັ້ນ​ໄດ້​ລັກ​ຈົກ​ເອົາ​ກະ​ແຕ໋ບ ລັກ​ເອົາ​ເງິນ​ທີ່ 3 ອ້າຍ​ນ້ອງ​ປະ​ໄວ້​ບ່ອນ​ນັ່ງ ແລະ ໄດ້​ເງິນ​ໄປ​ຈຳ­ນວນ dh 18,550 (ສະ­ກຸນ​ເງິນ​ຂອງ​ສະ­ຫະ­ລັດ ອາ​ຣັບ ເອ​ເມ​ເຣດ ຊຶ່ງ​ມີ​ມູນ​ຄ່າ​ປະ­ມານ​ກວ່າ 5.000 ໂດ​ລາ​ສະ­ຫະ­ລັດ) ແຕ່​ຍ້ອນ​ຢ້ານ​ໄປ​ບໍ່​ລອດ (ເພາະ​ໃນ​ເຄື່ອງ​ບິນ​ມີ​ກ້ອງ​ວົງ​ຈອນ​ປິດ) ພະ­ນັກ­ງານ​ມື​ໄວ​ຄົນ​ດັ່ງ­ກ່າວ ຈຶ່ງ​ໄດ້​ຕັດ­ສິນ​ໃຈ​ເອົາ​ເງິນ​ທີ່​ຂະ­ໂມຍ​ມາ​ໄປ​ຖິ້ມ​ລົງ​ຊັກ​ໂຄກ ແລ້ວ​ກົດ​ນ້ຳ​ເຊິ​ລົງ ເພື່ອ​ປິດ​ບັງ​ຫຼັກ​ຖານ ແຕ່​ຂ່າວ​ບອກ​ວ່າ ຜູ້­ກ່ຽວ​ຖືກ​ຈັບ​ກຸມ ເລື່ອງ​ນີ້​ຄວນ​ຖື​ເປັນ​ອຸ­ທາ­ຫອນ​ວ່າ ເວ­ລາ​ເດີນ­ທາງ​ນັ້ນ​ຕ້ອງ​ເອົາ­ໃຈ­ໃສ່​ວັດ­ຖຸ​ທີ່​ມີ­ຄ່າ ຄື​ເອົາ​ຕິດ​ໂຕ​ຢູ່​ສະ­ເໝີ ເພາະ​ຄົນ​ເຮົາ​ຕາມ​ທຳ​ມະ​ຊາດ​ແລ້ວ ແລະ ມີ​ຄວາມ “ຢາກ” ປະ­ຈຳ​ໂຕ​ທຸກ​ຄົນ ຕ່າງ​ແຕ່​ວ່າ “ຢາກ” ແນວ​ດີ ຫຼື “ຢາກ” ແນວ​ຊົ່ວ.

ຂ່າວທີ່ກ່ຽວຂ້ອງ