ຂ່າວຫຼ້າສຸດ

ຂະແໜງສາທາຮ່ວມມືກັບ ສ ເກົາຫຼີ ຈັດຕັ້ງປະຕິບັດຫຼາຍໂຄງການ

202 09 ກ.ຍ. 2019 ຂ່າວໜ້າ​ໜຶ່ງ
ຂະແໜງສາທາຮ່ວມມືກັບ ສ ເກົາຫຼີ ຈັດຕັ້ງປະຕິບັດຫຼາຍໂຄງການ

    ພິ­ທີ​ສະ­ເຫຼີມ­ສະ­ຫຼອງ​ການ​ຮ່ວມ​ມື​ລະ­ຫວ່າງ ມະ­ຫາ­ວິ­ທະ­ຍາ­ໄລ​ວິ­ທະ­ຍາ­ສາດ ສຸ­ຂະ­ພາບ ແລະ ໂຄງ­ການ DrLee Jong Wook (Seoul Project)  ຄົບ­ຮອບ 10 ປີ ຈັດ​ຂຶ້ນ​ວັນ​ທີ 6 ກັນ­ຍາ 2019 ທີ່​ໂຮງ­ແຮມ​ຄຣາວ​ພລາ​ຊາ ນະ­ຄອນ­ຫຼວງ​ວຽງ​ຈັນ ມີ​ທ່ານ ບຸນ​ກອງ ສີ​ຫາ​ວົງ ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ທ່ານ Choi won il ຮອງ​ປະ­ທານ​ອົງ­ການ​ມູນ​ນິ­ທິ​ຊ່ວຍ­ເຫຼືອ​ດ້ານ​ການ​ແພດ ສ ເກົາ­ຫຼີ (KOFIH) ທ່ານ Hee Yong Shin ປະ­ທານ​ໂຄງ­ການ DrLee Jong Wook ແລະ ທ່ານ ພູ­ທອນ  ວົງ​ກອນ​ວິ­ໄລ ອະ­ທິ­ການ​ບໍ­ດີ​ມະ­ຫາ­ວິ­ທະ­ຍາ­ໄລ ວິ­ທະ­ຍາ­ສາດ​ສຸ­ຂະ­ພາບ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ໂຄງ­ການ DrLee Jong Wook ໄດ້​ມີ​ການ​ຮ່ວມ​ມື​ກັບ​ມະ­ຫາ­ວິ­ທະ­ຍາ­ໄລ​ວິ­ທະ­ຍາ­ສາດ​ສຸ­ຂະ­ພາບ ກະ­ຊວງ​ສາ­ທາ­ລະ­ນະ​ສຸກ ມາ​ແຕ່​ປີ 2009 ໂດຍ​ໄດ້​ຮັບ​ການ​ສະ­ໜັບ­ສະ­ໜູນ​ດ້ານ​ງົບ­ປະ­ມານ ຈັດ​ຕັ້ງ​ປະ­ຕິ­ບັດ​ໂຄງ­ການ​ຈາກ​ອົງ­ການ KOFIH ຈະ​ສິ້ນ​ສຸດ​ເດືອນ​ກັນ­ຍາ 2019 ແລະ ມະ­ຫາ­ວິ­ທະ­ຍາ­ໄລ​ວິ­ທະ­ຍາ­ສາດ​ສຸ­ຂະ­ພາບ ແລະ ມະ­ຫາ­ວິ­ທະ­ຍາ­ໄລ​ແຫ່ງ​ຊາດ​ເຊ​ອູນ ສ ເກົາ­ຫຼີ ໄດ້​ລົງ​ນາມ​ໃນ​ບົດ​ບັນ­ທຶກ​ຄວາມ​ເຂົ້າ­ໃຈ​ຮ່ວມ​ກັນ 2 ສະ­ບັບ ເປົ້າ​ໝາຍ​ສ້າງ​ຄວາມ​ເຂັ້ມ­ແຂງ​ດ້ານ​ຄວາມ​ຮູ້​ຄວາມ​ສາ­ມາດ​ໃຫ້​ບຸ​ຄະ­ລາ​ກອນ​ສາ­ທາ­ລະ­ນະ​ສຸກ ເປັນ­ຕົ້ນ ພະ­ນັກ­ງານ​ມະ­ຫາ­ວິ­ທະ­ຍາ­ໄລ​ວິ­ທະ­ຍາ­ສາດ​ສຸ­ຂະ­ພາບ 5 ໂຮງ­ໝໍ​ສູນ​ກາງ ສູນ​ສະ​ຖາ​ບັນ ກົມ​ຕ່າງໆ​ຂອງ​ກະ­ຊວງ​ສາ­ທາ­ລະ­ນະ​ສຸກ ເພື່ອ​ນຳ​ເອົາ​ຄວາມ​ຮູ້​ຄວາມ​ສາ­ມາດ​ທີ່​ໄດ້​ນັ້ນ​ມາ​ສິດ­ສອນ​ນັກ​ສຶກ​ສາ​ແພດ ເພື່ອ​ມາ​ຮັບ​ໃຊ້​ການ​ບໍ­ລິ­ການ​ໃນ​ການ​ປິ່ນ­ປົວ ແລະ ຮັກ­ສາ​ສຸ­ຂະ­ພາບ​ຂອງ​ປະ­ຊາ­ຊົນ​ບັນ­ດາ­ເຜົ່າ ແລະ ປັບ­ປຸງ​ລະ­ບົບ​ສາ­ທາ­ລະ­ນະ​ສຸກ​ຂອງ​ລາວ​ໃຫ້​ດີ​ຂຶ້ນ​ກວ່າ​ເກົ່າ.

    ຕະ­ຫຼອດ​ໄລ­ຍະ​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ ໄດ້​ສະ­ໜັບ­ສະ­ໜູນ​ງົບ­ປະ­ມານ​ເຝິກ­ອົບ­ຮົມ​ດ້ານ​ຕ່າງໆ ໄລ­ຍະ​ສັ້ນ ກາງ ແລະ ຍາວ ທີ່​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ​ເຊ​ອູນ ວິ­ທະ­ຍາ­ໄລ​ແພດ­ສາດ ນອກ​ນັ້ນ ໂຄງ­ການ​ຍັງ​ໄດ້​ສະ­ໜອງ​ອຸ­ປະ­ກອນ​ຮັບ​ໃຊ້​ການ​ຮຽນ-ການ​ສອນ ການ­ບົ່ງ­ມະ­ຕິ​ພະ­ຍາດ ການ​ປິ່ນ­ປົວ​ຄົນ​ເຈັບ ການ​ເຮັດ​ບົດ​ຄົ້ນ­ຄວ້າ​ວິ­ທະ­ຍາ­ສາດ ສ້າງ ແລະ ປັບ­ປຸງ​ຫ້ອງ​ວິ­ເຄາະ ປັບ­ປຸງ​ຫ້ອງ​ຮຽນ ແລະ ສະ­ໜອງ​ສື່ ການ​ຮຽນ-ການ​ສອນ ຕອບ​ສະ­ໜອງ​ອິນ​ເຕີ​ເນັດ ໂດຍ​ສະ­ເພາະ ການ​ສ້າງ​ລາວ​ສະ​ເປັສ (Lao Space) ເພື່ອ​ໃຫ້​ຄູ-ອາ­ຈານ ແລະ ນັກ​ສຶກ​ສາ­ມີ​ຄວາມ​ສະ­ດວກ ແລະ ຄວາມ​ທັນ​ສະ­ໄໝ ໃນ​ການ​ຮຽນ-ການ​ສອນ ແລະ​ອື່ນໆ ລວມ​ມູນ​ຄ່າ​ທັງ​ໝົດ 8.132.230 ໂດ​ລາ​ສະ­ຫະ­ລັດ ຫຼື ປະ­ມານ 71,3 ຕື້​ກີບ.

    ຕອນ​ທ້າຍ​ພິ­ທີ​ໄດ້​ລົງ​ນາມ​ບົດ​ບັນ­ທຶກ​ຄວາມ​ເຂົ້າ­ໃຈ ລະ­ຫວ່າງ​ກະ­ຊວງ​ສາ­ທາ­ລະ­ນະ​ສຸກ​ລາວ ແລະ KOFIH ເຊິ່ງ​ຈະ​ເປັນ​ໂຄງ­ການ​ໃຫ້​ຄຳ​ປຶກ­ສາ​ສຳ­ລັບ​ການ​ບໍ­ລິ­ການ ແລະ ການ​ຄຸ້ມ​ຄອງ​ໂຮງ­ໝໍ​ມະ­ຫາ­ວິ­ທະ­ຍາ­ໄລ​ວິ­ທະ­ຍາ­ສາດ​ສຸ­ຂະ­ພາບ​ຢູ່​ລາວ ອັນ​ເປັນ​ບາດ­ກ້າວ​ໃໝ່​ຂອງ​ການ​ຮ່ວມ​ມື​ສອງ​ຝ່າຍ ພ້ອມ​ນັ້ນ ຍັງ​ລົງ​ນາມ​ບົດ​ບັນ­ທຶກ​ຄວາມ​ເຂົ້າ­ໃຈ​ສາມ​ຝ່າຍ ລະ­ຫວ່າງ​ກະ­ຊວງ​ສາ­ທາ­ລະ­ນະ​ສຸກ​ລາວ ສູນ​ຄວບ​ຄຸມ ແລະ ປ້ອງ​ກັນ​ພະ­ຍາດ​ຕິດ­ຕໍ່ ສ ເກົາ­ຫຼີ ແລະ ອົງ­ການ KOFIH ກ່ຽວ​ກັບ​ໂຄງ­ການ​ສະ­ໜັບ­ສະ­ໜູນ​ສຳ­ລັບ​ການ​ຄວບ​ຄຸມ­ພະ​ຍາດ​ຕິດ­ຕໍ່​ຢູ່​ລາວ ນອກ​ນີ້ ຍັງ​ມີ​ກອງ​ປະ­ຊຸມ​ວິ­ທະ­ຍາ­ສາດ ທີ່​ເຫັນ​ວ່າ​ມີ​ຄວາມ​ສຳ­ຄັນ​ຫຼາຍ ໂດຍ​ສະ­ເພາະ ມີ​ຫຼາຍ​ພາກ­ສ່ວນ​ທີ່​ນຳ​ສະ­ເໜີ​ບົດ​ໂຄງ­ການ​ຕ່າງໆ ແລະ ບົດ​ຄົ້ນ­ຄວ້າ​ວິ­ທະ­ຍາ­ສາດ​ທາງ​ດ້ານ​ການ​ປັບ­ປຸງ​ຄຸນ​ນະ​ພາບ ການ​ຮຽນ-ການ​ສອນ ການ​ປິ່ນ­ປົວ ແລະ ອື່ນໆ.

ຂ່າວທີ່ກ່ຽວຂ້ອງ