ຈີນຊ່ວຍຍົກລະດັບທາງດ້ານເຕັກນິກ ໃຫ້ໂທລະພາບແຫ່ງຊາດຊ່ອງ 3

358 09 ກ.ຍ. 2019 ຂ່າວໜ້າ​ໜຶ່ງ
ຈີນຊ່ວຍຍົກລະດັບທາງດ້ານເຕັກນິກ ໃຫ້ໂທລະພາບແຫ່ງຊາດຊ່ອງ 3

    ພິ­ທີ​ມອບ-ຮັບ​ໂຄງ­ການ​ຊ່ວຍ­ເຫຼືອ​ປັບ­ປຸງ​ຍົກ​ລະ­ດັບ ໂທລະ­ພາບ​ແຫ່ງ​ຊາດ​ລາວ​ຊ່ອງ 3 ຈາກ​ລັດ­ຖະ­ບານ​ຈີນ ຈັດ​ຂຶ້ນ​ວັນ​ທີ 6 ກັນ­ຍາ 2019 ທີ່​ໂທລະ­ພາບ​ແຫ່ງ​ຊາດ​ລາວ ຕາງ­ໜ້າ​ກ່າວ​ມອບ​ໂດຍ ທ່ານ ຫວັງ​ສີ່​ຫາຍ ປະ­ທານ​ທີ່​ປຶກ­ສາ​ເສດ­ຖະ­ກິດ​ການ​ຄ້າ​ສະ­ຖານ­ທູດ​ຈີນ ປະ­ຈຳ​ລາວ ແລະ ກ່າວ​ຮັບ ໂດຍ​ທ່ານ ບຸນ​ເຈົ້າ ພິ­ຈິດ ຜູ້­ອຳ­ນວຍ­ການ​ໃຫຍ່​ໂທລະ­ພາບ​ແຫ່ງ​ຊາດ​ລາວ ມີ​ທ່ານ ສະ­ຫວັນ​ຄອນ ຣາ​ຊ​ມຸນ­ຕີ ຮອງ​ລັດ­ຖະ­ມົນ­ຕີ​ກະ­ຊວງ ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ທ່ານ ແຄນ​ທອງ ສີ​ສຸ​ວົງ ຮອງ​ປະ­ທານ​ຄະ­ນະ​ກຳ­ມາ​ທິ​ການ​ຮ່ວມ​ມື ລາວ-ຈີນ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ທັງ​ສອງ​ຝ່າຍ​ເຂົ້າ​ຮ່ວມ.

    ທ່ານ ຫວັງ​ສີ່​ຫາຍ ໄດ້​ກ່າວ​ວ່າ: ໂຄງ­ການ​ຍົກ​ລະ­ດັບ​ທາງ​ດ້ານ​ເຕັກ­ນິກ​ໂທລະ­ພາບ​ແຫ່ງ​ຊາດ​ລາວ​ຊ່ອງ 3 ເປັນ​ໂຄງ­ການ​ຊ່ວຍ­ເຫຼືອ​ລ້າ​ຈາກ​ລັດ­ຖະ­ບານ​ຈີນ ມູນ​ຄ່າ 52 ລ້ານ​ຢວນ ຫຼື ປະ­ມານ 63 ຕື້​ກີບ ໂຄງ­ການ​ນີ້​ເປັນ​ໂຄງ­ການ​ໜຶ່ງ ທີ່​ມີ​ຄວາມ​ສຳ­ຄັນ​ຂອງ​ຈີນ​ຊ່ວຍ­ເຫຼືອ​ລາວ ເປັນ​ສັນ­ຍະ­ລັກ​ອີກ​ອັນ​ໜຶ່ງ​ຂອງ​ສາຍ​ພົວ­ພັນ​ການ​ຮ່ວມ​ມື ແລະ ຄວາມ​ຮັກ­ແພງ ລະ­ຫວ່າງ​ສອງ​ຊາດ ຈີນ-ລາວ ແລະ ຍັງ​ໄດ້​ສະ­ແດງ​ໃຫ້​ເຫັນ​ເຖິງ​ແນວ​ຄວາມ​ຄິດ​ການ​ພົວ­ພັນ​ກັບ​ບັນ­ດາ​ປະ­ເທດ​ໃກ້​ຄຽງ​ຂອງ​ຝ່າຍ​ຈີນ ກໍ​ຄື ສະ­ໜິດ­ສະ­ໜົມ​ເອື້ອ­ເຟື້ອ​ອາ­ລີ​ຕ່າງ​ຝ່າຍ​ຕ່າງ​ໄດ້​ຮັບ​ຜົນ​ປະ­ໂຫຍດ ແລະ ສາຍ​ພົວ­ພັນ​ມິດ­ຕະ­ພາບ​ຢ່າງ​ແໜ້ນ​ແຟ້ນ ລະ­ຫວ່າງ ຈີນ-ລາວ ພ້ອມ​ນັ້ນ ໂຄງ­ການ​ນີ້​ຈະ​ເປັນ​ຈຸດ​ເລີ່ມ​ຕົ້ນ ແລະ ຈະ​ເປີດ​ບົດ­ບາດ​ໃໝ່​ໃນ​ການ​ລົງ​ເລິກ​ການ​ຮ່ວມ​ມື​ທາງ​ດ້ານ​ສື່​ມວນ​ຊົນ ສອງ​ຝ່າຍ ຈີນ-ລາວ ແລະ ຫວັງ​ວ່າ​ທັງ​ສອງ​ຝ່າຍ​ໃນ­ຕໍ່­ໜ້າ​ຈະ​ເພີ່ມ​ທະ­ວີ​ການ​ແລກ­ປ່ຽນ​ທາງ​ດ້ານ​ລາຍ­ການ​ຂ່າວ­ສານ ແລະ ລາຍ­ການ​ຮູບ­ເງົາ ເພື່ອ​ປະ­ກອບ­ສ່ວນ​ເຂົ້າ​ໃນ​ມິດ­ຕະ­ພາບ​ທີ່​ເປັນ​ມູນ­ເຊື້ອ ແລະ ສ້າງ​ຄູ່​ຮ່ວມ​ຊາ­ຕາ­ກຳ ຈີນ-ລາວ ຢ່າງ​ຕັ້ງ­ໜ້າ.

    ທ່ານ ບຸນ​ເຈົ້າ ພິ­ຈິດ ໄດ້​ກ່າວ​ວ່າ: ໂຄງ­ການ​ນີ້​ໄດ້​ປະ­ກອບ­ສ່ວນ​ສຳ­ຄັນ​ໃຫ້​ແກ່​ການ​ຮ່ວມ​ມື​ຂອງ​ສອງ​ປະ­ເທດ ໃນ​ນາມ​ຄະ­ນະ​ອຳ­ນວຍ​ການ ແລະ ພະ­ນັກ­ງານ​ໂທລະ­ພາບ​ແຫ່ງ​ຊາດ​ລາວ ຂໍ​ສະ­ແດງ​ຄວາມ​ຂອບ­ໃຈ ແລະ ພາກ­ພູມ​ໃຈ​ເປັນ​ຢ່າງ​ຍິ່ງ​ຕໍ່​ກັບ​ການ​ຊ່ວຍ­ເຫຼືອ​ອັນ​ລ້ຳ​ຄ່າ​ຈາກ​ລັດ­ຖະ­ບານ​ຈີນ ໃນ​ການ​ຍົກ​ລະ­ດັບ ແລະ ປັບ­ປຸງ​ອຸ­ປະ­ກອນ​ເຕັກ­ນິກ​ຊ່ອງ 3 ຈາກ​ລະ­ບົບ SD ໃຫ້​ເປັນ​ລະ­ບົບ HD ເຊິ່ງ​ເປັນ​ການ​ຍົກ​ລະ­ດັບ​ຄຸນ​ນະ​ພາບ​ໃຫ້​ແກ່​ວຽກ​ງານ​ສື່​ມວນ​ຊົນ​ລາວ ເວົ້າ​ລວມ ເວົ້າ​ສະ­ເພາະ ໃຫ້​ແກ່​ໂທລະ­ພາບ​ແຫ່ງ​ຊາດ​ລາວ ໃນ​ການ​ຍົກ​ລະ­ດັບ​ຄຸນ​ນະ​ພາບ​ທາງ​ດ້ານ​ເຕັກ­ນິກ​ໃຫ້​ດີ​ຂຶ້ນ ແລະ ໃຫ້​ຄຳ​ໝັ້ນ​ສັນ­ຍາ​ວ່າ ຈະ​ນຳ​ໃຊ້​ອຸ­ປະ­ກອນ​ເຕັກ­ນິກ​ໃຫ້​ໄດ້​ຮັບ​ຄຸນ​ປະ­ໂຫຍດ ຮັບ­ປະ­ກັນ​ການ​ນຳ​ໃຊ້​ໃຫ້​ເກີດ​ດອກ​ອອກ​ຜົນ​ສູງ​ສຸດ ແລະ ຈະ​ປົກ​ປັກ­ສາ​ໃຫ້​ນຳ​ໃຊ້​ໄດ້​ຍາວ​ນານ​ທີ່​ສຸດ.

ຂ່າວທີ່ກ່ຽວຂ້ອງ