ຂ່າວຫຼ້າສຸດ

ກອງທັບລະດົມກຳລັງ ແລະ ພາຫະນະ ເຂົ້າຊ່ວຍປະຊາຊົນປະສົບໄພນ້ຳຖ້ວມ

339 06 ກ.ຍ. 2019 ຂ່າວໜ້າ​ໜຶ່ງ

    ຕາມ​ການ​ລາຍ​ງານ​ຈາກ​ທ່ານ ພົນ​ຕີ ຈັນ​ທອງ ສອນ​ຕະ​ອາດ ຮອງ​ຫົວ­ໜ້າ​ກົມ​ໃຫຍ່​ເສ­ນາ​ທິ​ການ​ກອງ­ທັບ ກະ­ຊວງ​ປ້ອງ​ກັນ​ປະ­ເທດ ໃຫ້​ຮູ້​ວັນ​ທີ 4 ກັນ­ຍາ 2019 ວ່າ: ເນື່ອງ​ຈາກ​ພາ­ຍຸ​ໝູນ​ເຂດ​ຮ້ອນ​ໂພ​ດູ ແລະ ລົມ­ພາ­ຍຸ​ດີ​ເປຣ​ຊັນ ທີ່​ພັດ​ເຂົ້າ​ປະ­ເທດ​ລາວ​ໄດ້​ເຮັດ​ໃຫ້​ທຸກ​ພາກ​ຂອງ​ປະ­ເທດ​ມີ​ຝົນ­ຕົກ​ຕິດ­ຕໍ່​ກັນ​ຫຼາຍ​ວັນ ແລະ ເກີດ​ມີ​ໄພ​ນ້ຳ​ຖ້ວມ​ໃນ 6 ແຂວງ ຄື: ຄຳ​ມ່ວນ ສະ­ຫວັນ​ນະ​ເຂດ ສາ­ລະ​ວັນ ຈຳ­ປາ​ສັກ ເຊ​ກອງ ແລະ ອັດ​ຕະ​ປື ເຮັດ​ໃຫ້ 37 ເມືອງ 788 ບ້ານ 54.207 ຄອບ­ຄົວ ໄດ້​ຮັບ​ຜົນ​ກະ­ທົບ ໃນ​ນີ້ ມີ​ຜູ້​ເສຍ​ຊີ­ວິດ 2 ຄົນ ຢູ່​ແຂວງ​ສະ­ຫວັນ​ນະ​ເຂດ ແລະ ຈຳ­ປາ​ສັກ ແລະ ສູນ­ຫາຍ 2 ຄົນ​ຢູ່​ແຂວງ​ຈຳ­ປາ​ສັກ.

    ຈາກ​ສະ­ພາບ​ດັ່ງ­ກ່າວ ກົມ​ໃຫຍ່​ເສ­ນາ​ທິ​ການ​ກອງ­ທັບ ໄດ້​ຊີ້​ນຳ​ບັນ­ດາ​ກົມ​ກອງ​ທີ່​ຕັ້ງ​ຢູ່​ແຕ່​ລະ​ທ້ອງ­ຖິ່ນ​ຈັດ​ຕັ້ງ​ກຳ­ລັງ ແລະ ນຳ​ໃຊ້​ພາ­ຫະ­ນະ​ອຸ­ປະ­ກອນ​ຂອງ​ບັນ­ດາ​ກົມ​ກອງ​ເຂົ້າ​ໄປ​ກອບ​ກູ້​ຊ່ວຍ­ເຫຼືອ​ຍົກ­ຍ້າຍ​ປະ­ຊາ­ຊົນ​ອອກ​ຈາກ​ບ່ອນ​ທີ່​ໄດ້​ຮັບ​ຜົນ​ກະ­ທົບ​ໄປ​ບ່ອນ​ທີ່​ປອດ​ໄພ​ຢ່າງ​ຮີບ​ດ່ວນ ແລະ ປະ­ກອບ­ສ່ວນ​ຊ່ວຍ­ເຫຼືອ​ປະ­ຊາ­ຊົນ ແກ້​ໄຂ​ຜົນ​ກະ­ທົບ ຄື: ກອງ​ພົນ​ທີ 4 ນຳ​ໃຊ້​ກຳ­ລັງ 9 ຄົນ ເຮືອ​ທ້ອງ​ແບນ 5 ລຳ ລົດ​ຂົນ­ສົ່ງ 5 ຄັນ ໄປ​ຊ່ວຍ​ແຂວງ​ສາ­ລະ​ວັນ ປັດ­ຈຸ­ບັນ ກອງ​ພົນ​ໄດ້​ກະ­ກຽມ​ກຳ­ລັງ​ລໍ­ຖ້າ​ຢູ່​ກອງ­ພັນ​ໃຫຍ່ 401 ຈຳ­ນວນ 300 ຄົນ ແລະ ກະ­ກຽມ 200 ຄົນ ຢູ່​ບັນ­ດາ​ກອງ­ພັນ​ນ້ອຍ ດ້ານ​ພາ­ຫະ­ນະ​ມີ​ລົດ ເຮືອ​ເປ​ເຕ​ແອັດ 2 ຄັນ ເຮືອ​ທ້ອງ​ແບນ 1 ລຳ ກອງ​ພົນ​ທີ 5 ນຳ​ໃຊ້​ກຳ­ລັງ 400 ຄົນ ເຮືອ 6 ລຳ ລົດ​ຂົນ­ສົ່ງ 4 ຄັນ ໄປ​ຊ່ວຍ​ແຂວງ​ຈຳ­ປາ​ສັກ ແລະ ແຂວງ​ສາ­ລະ​ວັນ ກອງ​ບັນ­ຊາ​ການ​ທະ­ຫານ​ແຂວງ​ຄຳ​ມ່ວນ ໄດ້​ນຳ​ໃຊ້​ກຳ­ລັງ​ບັນ­ດາ​ກອງ­ພັນ​ນ້ອຍ ແລະ ກອງ​ບັນ­ຊາ​ການ​ທະ­ຫານ​ເມືອງ 704 ຄົນ ພ້ອມ​ລົດ​ຂົນ­ສົ່ງ 6 ຄັນ ເຮືອ 4 ລຳ ໄປ​ຊ່ວຍ​ປະ­ຊາ­ຊົນ 6 ເມືອງ ພາຍ​ໃນ​ແຂວງ​ຂອງ​ຕົນ​ທີ່​ຖືກ​ນ້ຳ​ຖ້ວມ ກອງ​ບັນ­ຊາ​ການ​ທະ­ຫານ ແຂວງ​ສະ­ຫວັນ​ນະ​ເຂດ ໄດ້​ນຳ​ໃຊ້​ກຳ­ລັງ​ບັນ­ດາ​ກອງ­ພັນ​ນ້ອຍ ແລະ ກອງ​ບັນ­ຊາ​ການ​ທະ­ຫານ​ເມືອງ 400 ຄົນ ພ້ອມ​ລົດ​ຂົນ­ສົ່ງ 12 ຄັນ ໄປ​ຊ່ວຍ​ປະ­ຊາ­ຊົນ 10 ເມືອງ ພາຍ​ໃນ​ແຂວງ​ຂອງ​ຕົນ​ທີ່​ຖືກ​ນ້ຳ​ຖ້ວມ ກອງ​ບັນ­ຊາ​ການ​ທະ­ຫານ​ແຂວງ​ສາ­ລະ​ວັນ ນຳ​ໃຊ້​ກຳ­ລັງ​ບັນ­ດາ​ກອງ­ພັນ​ນ້ອຍ ແລະ ກອງ​ບັນ­ຊາ​ການ​ທະ­ຫານ​ເມືອງ 350 ຄົນ ພ້ອມ​ລົດ​ຂົນ­ສົ່ງ 6 ຄັນ ສົມ­ທົບ​ກອງ​ພົນ​ທີ 4 ແລະ ທີ 4 ໄປ​ຊ່ວຍ​ປະ­ຊາ­ຊົນ 3 ເມືອງ​ທີ່​ຖືກ​ນ້ຳ​ຖ້ວມ ກອງ​ບັນ­ຊາ​ການ​ທະ­ຫານ​ແຂວງ​ຈຳ­ປາ​ສັກ ນຳ​ໃຊ້​ກຳ­ລັງ​ຂອງ​ບັນ­ດາ​ກອງ­ພັນ​ນ້ອຍ ແລະ ກອງ​ບັນ­ຊາ​ການ​ທະ­ຫານ​ເມືອງ 350 ຄົນ ພ້ອມ​ລົດ​ຂົນ­ສົ່ງ 8 ຄັນ ສົມ­ທົບ​ກັບ​ກອງ​ພົນ​ທີ 5 ແລະ ໂຮງ­ຮຽນ​ນາຍ​ສິບ​ເລກ 2 ໄປ​ຊ່ວຍ​ປະ­ຊາ­ຊົນ 10 ເມືອງ​ທີ່​ຖືກ​ນ້ຳ​ຖ້ວມ ກອງ​ບັນ­ຊາ​ການ​ທະ­ຫານ​ແຂວງ​ເຊ​ກອງ ນຳ​ໃຊ້​ກຳ­ລັງ​ບັນ­ດາ​ກອງ­ພັນ​ນ້ອຍ ແລະ ກອງ​ບັນ­ຊາ​ການ​ທະ­ຫານ​ແຂວງ 250 ຄົນ ພ້ອມ​ລົດ​ຂົນ­ສົ່ງ 6 ຄັນ ໄປ​ຊ່ວຍ​ປະ­ຊາ ຊົນ 4 ເມືອງ ທີ່​ຖືກ​ນ້ຳ​ຖ້ວມ ແລະ ກອງ​ບັນ­ຊາ​ການ​ທະ­ຫານ​ແຂວງ​ອັດ​ຕະ​ປື ນຳ​ໃຊ້​ກຳ­ລັງ​ບັນ­ດາ​ກອງ­ພັນ​ນ້ອຍ ແລະ ກອງ​ບັນ­ຊາ​ການ​ທະ­ຫານ​ເມືອງ 150 ຄົນ ພ້ອມ​ລົດ​ຂົນ­ສົ່ງ 4 ຄັນ ໄປ​ຊ່ວຍ​ປະ­ຊາ­ຊົນ 5 ເມືອງ ທີ່​ຖືກ​ນ້ຳ​ຖ້ວມ.

    ໂດຍ​ລວມ​ແລ້ວ​ການ​ນຳ​ໃຊ້​ກຳ­ລັງ​ແຕ່​ວັນ​ທີ 29 ສິງ­ຫາ-4 ກັນ­ຍາ 2019 ທັງ​ໝົດ​ທີ່​ລົງ​ຊ່ວຍ​ປະ­ຊາ­ຊົນ 6 ແຂວງ​ມີ​ຈຳ­ນວນ​ພົນ​ຫຼາຍ​ກວ່າ 2.200 ຄົນ ສ່ວນ​ການ​ກຽມ­ພ້ອມ​ທາງ​ດ້ານ​ກຳ­ລັງ​ກຽມ​ໄວ້​ຢູ່​ໃນ 5 ກອງ​ພົນ 17 ແຂວງ 5.000 ຄົນ ພາ­ຫະ­ນະ​ເຮືອ​ທຸກ​ຊະ­ນິດ 40 ລຳ ຢູ່​ສາງ​ຂອງ​ເຫຼົ່າ​ຮົບ​ຊ່າງ​ແສງ (ທ່າ​ງ່ອນ) ລົດ​ຂົນ­ສົ່ງ 50 ຄັນ ຢູ່​ກອງ​ຂົນ­ສົ່ງ 401 402 ແລະ 403 ຍົນ​ຂຶ້ນ​ຊື່ Mi 17 ຈຳ­ນວນ 3 ລຳ ແລະ ຍົນ MA-600 ຈຳ­ນວນ 1 ລຳ ເພື່ອ​ກຽມ​ຄວາມ​ພ້ອມ​ຮັບ​ມື​ກັບ​ໄພ­ພິ­ບັດ.

ຂ່າວທີ່ກ່ຽວຂ້ອງ