ນາຍົກຊີ້ນຳໃຫ້ເລັ່ງຊ່ວຍເຫຼືອປະຊາຊົນ ທີ່ປະສົບໄພນ້ຳຖ້ວມຢ່າງຮີບດ່ວນ

545 06 ກ.ຍ. 2019 ຂ່າວໜ້າ​ໜຶ່ງ
ນາຍົກຊີ້ນຳໃຫ້ເລັ່ງຊ່ວຍເຫຼືອປະຊາຊົນ ທີ່ປະສົບໄພນ້ຳຖ້ວມຢ່າງຮີບດ່ວນ

    ວັນ​ທີ 5 ກັນ­ຍາ 2019 ທີ່​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ໄດ້​ມີ​ກອງ​ປະ­ຊຸມ​ດ່ວນ​ເພື່ອ​ປຶກ­ສາ​ຫາ­ລື​ການ​ແກ້​ໄຂ​ໄພ­ພິ­ບັດ​ນ້ຳ​ຖ້ວມ ຢູ່​ບັນ­ດາ​ແຂວງ​ພາກ​ໃຕ້ ແລະ ພາກ​ກາງ​ຈຳ­ນວນ​ໜຶ່ງ ໂດຍ​ເປັນ​ປະ­ທານ​ຂອງ​ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ມີ​ທ່ານ​ຮອງ​ນາ­ຍົກ­ລັດ­ຖະ­ມົນ­ຕີ ບັນ­ດາ​ລັດ­ຖະ­ມົນ­ຕີ ຮອງ​ລັດ­ຖະ­ມົນ­ຕີ​ຈາກ​ກະ­ຊວງ​ທີ່​ກ່ຽວ­ຂ້ອງ​ເຂົ້າ​ຮ່ວມ.

    ກອງ​ປະ­ຊຸມ​ໄດ້​ຮັບ​ຟັງ​ການ​ລາຍ​ງານ​ກ່ຽວ​ກັບ​ສະ­ພາບ​ນ້ຳ​ຖ້ວມ​ເນື່ອງ​ຈາກ​ຝົນ­ຕົກ​ໜັກ​ທີ່​ໄດ້​ຮັບ​ອິດ​ທິ​ພົນ​ຂອງ​ລົມ​ພະ­ຍຸ​ໜຸນ​ເຂດ​ຮ້ອນ​ໂພ​ດູ ແລະ ລົມ​ພະ­ຍຸ​ດີ​ເປຣ​ຊັນ ທີ່​ພັດ​ຜ່ານ​ເຂົ້າ​ມາ ສປປ ລາວ ໃນ​ຊ່ວງ​ທ້າຍ​ເດືອນ​ສິງ­ຫາ ຫາ ຕົ້ນ​ເດືອນ​ກັນ­ຍາ 2019 ສະ­ພາບ​ຜົນ​ກະ­ທົບ ແລະ ການ​ຊ່ວຍ­ເຫຼືອ​ສຸກ​ເສີນ​ຢູ່ 6 ແຂວງ​ທີ່​ໄດ້​ຮັບ​ຜົນ​ກະ­ທົບ​ຄື: ແຂວງ​ຄຳ​ມ່ວນ ສະ­ຫວັນ​ນະ​ເຂດ ອັດ​ຕະ​ປື ສາ­ລະ​ວັນ ຈຳ­ປາ​ສັກ ແລະ ແຂວງ​ເຊ​ກອງ ປັດ­ຈຸ­ບັນ​ໄດ້​ສົ່ງ​ຜົນ​ກະ­ທົບ​ໂດຍ​ກົງ​ຕໍ່​ປະ­ຊາ­ຊົນ​ໃນ 37 ເມືອງ 788 ບ້ານ 54.207 ຄອບ­ຄົວ ເສຍ​ຊີ­ວິດ 2 ຄົນ ສູນ­ຫາຍ 2 ຄົນ ປະ­ຊາ­ຊົນ​ຍົກ­ຍ້າຍ 3.400 ກວ່າ​ຄອບ­ຄົວ ສ້າງ​ຄວາມ​ເສຍ​ຫາຍ​ຕໍ່​ຊັບ​ສິນ ແລະ ເນື້ອ­ທີ່​ທຳ​ມາ​ຫາ​ກິນ​ຂອງ​ປະ­ຊາ­ຊົນ ອາ­ຄານ​ສະ­ຖານ­ທີ່ ໂຮງ­ຮຽນ ສຸກ­ສາ­ລາ ຊົນ­ລະ­ປະ­ທານ ຖະ­ໜົນ​ຫົນ­ທາງ ແລະ ອື່ນໆ ເປັນ​ຈຳ­ນວນ​ຫຼວງ­ຫຼາຍ ສຳ­ລັບ​ຄວາມ​ຕ້ອງ­ການ​ຮີບ​ດ່ວນ ລວມ​ມີ ເຄື່ອງ​ອຸ­ປະ­ໂພກ-ບໍ­ລິ­ໂພກ​ເປັນ­ຕົ້ນ ອາ­ຫານ ນ້ຳ​ດື່ມ ເຄື່ອງ­ໃຊ້​ຄົວ​ເຮືອນ ເຄື່ອງ​ນອນ ເຄື່ອງ​ກອງ​ນ້ຳ ເຮືອ ແລະ ງົບ­ປະ­ມານ​ຮັບ​ໃຊ້ ແລະ ອື່ນໆ.

    ກອງ​ປະ­ຊຸມ​ໄດ້​ລົງ​ເລິກ​ປຶກ­ສາ​ຫາ­ລື​ມາດ​ຕະ­ການ​ແກ້​ໄຂ​ສຸກ​ເສີນ ໂດຍ​ສະ­ເພາະ​ການ​ຊ່ວຍ­ເຫຼືອ​ປະ­ຊາ­ຊົນ ທີ່​ຍັງ​ຕິດ​ຄ້າງ​ຢູ່​ບ່ອນ​ນ້ຳ​ຖ້ວມ ແລະ ຄວາມ​ຮັບ­ຜິດ­ຊອບ​ຂອງ​ແຕ່​ລະ​ຂະ­ແໜງ­ການ​ກ່ຽວ­ຂ້ອງ ຫຼັງ​ຈາກ​ນັ້ນ​ທ່ານ ນາ­ຍົກ ລັດ­ຖະ­ມົນ­ຕີ ໄດ້​ຊີ້​ນຳ​ໃຫ້​ຈັດ​ສົ່ງ​ເຮືອ ເຄື່ອງ​ອຸ­ປະ­ໂພກ-ບໍ­ລິ­ໂພກ ແລະ ງົບ­ປະ­ມານ​ຈຳ­ນວນ​ໜຶ່ງ​ໃຫ້​ແກ່​ບັນ­ດາ​ແຂວງ​ທີ່​ໄດ້​ຮັບ​ຜົນ​ກະ­ທົບ​ຢ່າງ​ຮີບ​ດ່ວນ ພ້ອມ​ທັງ​ໄດ້​ຊີ້​ນຳ​ໃຫ້​ບັນ­ດາ​ກະ­ຊວງ​ຮີບ​ຮ້ອນ​ຈັດ​ຕັ້ງ​ປະ­ຕິ­ບັດ​ດັ່ງ­ນີ້: ໃຫ້​ກະ­ຊວງ​ປ້ອງ​ກັນ​ປະ­ເທດ​ສືບ­ຕໍ່​ຊີ້​ນຳ ຈັດ​ຕັ້ງ​ກຳ­ລັງ​ທະ­ຫານ ພາ­ຫະ­ນະ   ໜ່ວຍ​ແພດ​ສຸກ​ເສີນ​ເຂົ້າ​ຊ່ວຍ­ເຫຼືອ​ປະ­ຊາ­ຊົນ​ທີ່​ກຳ­ລັງ​ປະ­ສົບ​ໄພ​ນ້ຳ​ຖ້ວມ​ໃຫ້​ທັນ​ການ ແລະ ທົ່ວ​ເຖິງ ໃຫ້​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ​ວາງ​ແຜນ​ແກ້​ໄຂ ແລະ ຊ່ວຍ­ເຫຼືອ​ໃຫ້​ດີ ແລະ ແທດ​ຕົວ​ຈິງ ໂດຍ​ມີ​ການ­ຈັດ­ຕັ້ງ​ແບ່ງ​ງານ​ກັນ​ລະ­ອຽດ​ຈະ­ແຈ້ງ ໃຫ້​ກະ­ຊວງ​ປ້ອງ​ກັນ​ຄວາມ​ສະ­ຫງົບ​ເອົາ­ໃຈ­ໃສ່​ຕໍ່​ວຽກ​ງານ​ປ້ອງ​ກັນ​ຄວາມ​ສະ­ຫງົບ​ໃຫ້​ດີ ໂດຍ​ສະ­ເພາະ​ການ​ປົກ​ປັກ​ຮັກ­ສາ​ວັດ­ຖຸ​ສິ່ງ​ຂອງ​ຂອງ​ປະ­ຊາ­ຊົນ ໃນ​ພາ­ວະ​ເກີດ​ໄພ­ພິ­ບັດ​ສຸກ​ເສີນ​ຄື​ປະ­ຈຸ​ບັນ ເພື່ອ​ບໍ່​ໃຫ້​ມີ​ການ​ສວຍ­ໂອ­ກາດ​ຂອງ​ຄົນ​ບໍ່​ດີ ໃຫ້​ກະ­ຊວງ​ການ​ເງິນ ແລະ ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ​ສົມ­ທົບ​ກັນ​ຈັດ​ສັນ​ງົບ­ປະ­ມານ ເພື່ອ​ແກ້​ໄຂ​ໄພ­ພິ­ບັດ​ຄັ້ງ​ນີ້ ໃຫ້​ໄດ້​ຮັບ​ຜົນ​ເປັນ​ຢ່າງ​ດີ ໃຫ້​ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ​ເອົາ­ໃຈ­ໃສ່​ເກັບ​ກຳ​ຂໍ້​ມູນ ແລະ ເລັ່ງ​ແກ້​ໄຂ​ບັນ­ຫາ​ເສັ້ນ­ທາງ ຂົວ ແລະ ອື່ນໆ​ທີ່​ເປ່​ເພ​ເສຍ​ຫາຍ ແລະ ບາງ​ເສັ້ນ­ທາງ​ທີ່​ຖືກ​ຕັດ­ຂາດ​ໃຫ້​ສາ­ມາດ​ສັນ­ຈອນ​ໄປ​ມາ​ໄດ້ ພ້ອມ​ນັ້ນ​ກໍ່​ໃຫ້​ຊ່ວຍ­ເຫຼືອ​ແກ່​ຜູ້­ໂດຍ­ສານ​ທີ່​ຍັງ​ຄ້າງ​ຢູ່​ຕາມ​ເຂດ​ນ້ຳ​ຖ້ວມ​ໃຫ້​ສາ­ມາດ​ໄປ​ຮອດ​ຈຸດ­ໝາຍ​ປາຍ­ທາງ.

    ໃຫ້​ກະ­ຊວງ​ສາ­ທາ­ລະ­ນະ​ສຸກ​ສົມ­ທົບ​ກັບ​ກະ­ຊວງ​ປ້ອງ​ກັນ​ປະ­ເທດ ຈັດ​ຕັ້ງ​ພະ­ນັກ­ງານ​ແພດ-ໝໍ ອຸ­ປະ­ກອນ​ການ​ແພດ​ທີ່​ຈຳ­ເປັນ ຢາ​ປ້ອງ​ກັນ ແລະ ປິ່ນ­ປົວ​ພະ­ຍາດ​ໄປ​ຊ່ວຍ­ເຫຼືອ​ປະ­ຊາ­ຊົນ​ຕາມ​ຈຸດ​ເຕົ້າ­ໂຮມ​ຕ່າງໆ​ຂອງ​ແຂວງ​ທີ່​ໄດ້​ຮັບ​ຜົນ​ກະ­ທົບ ໃຫ້​ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ​ອອກ​ຂ່າວ​ແຈ້ງ​ເຕືອນ ແນະ­ນຳ ແລະ ໃຫ້​ຂໍ້​ມູນ​ຕ່າງໆ​ແກ່​ປະ­ຊາ­ຊົນ​ຢ່າງ​ເປັນ​ປະ­ຈຳ ແລະ ທັນ​ການ ພ້ອມ​ນັ້ນ​ກໍ່​ຕ້ອງ​ໄດ້​ເອົາ­ໃຈ­ໃສ່​ແກ້​ໄຂ​ບັນ­ຫາ​ການ​ອອກ​ຂ່າວ​ທີ່​ບໍ່​ມີ​ມູນ​ຄວາມ​ຈິງ ໃສ່​ຮ້າຍ​ປ້າຍ​ສີ ແລະ ອື່ນໆ ຂອງ​ສື່​ສັງ­ຄົມ​ອອນ​ລາຍ​ຈຳ­ນວນ​ໜຶ່ງ​ຢ່າງ​ທັນ​ການ ໃຫ້​ກະ­ຊວງ​ຊັບ­ພະ­ຍາ­ກອນ​ທຳ​ມະ ຊາດ ແລະ ສິ່ງ­ແວ­ດລ້ອມ ເອົາ­ໃຈ­ໃສ່​ຕິດ­ຕາມ​ສະ­ພາບ​ດິນ​ຟ້າ​ອາ­ກາດ ແລະ ອອກ​ຂ່າວ​ໃຫ້​ສັງ­ຄົມ​ຮັບ​ຊາບ​ຜ່ານ​ສື່​ຕ່າງໆ (ໂທລະ­ພາບ ວິ­ທະ­ຍຸ ສື່​ອອນ​ລາຍ ແລະ ໜັງ­ສື­ພິມ) ຢ່າງ​ທັນ​ການ ແລະ ເປັນ​ປົກ­ກະ­ຕິ ເພື່ອ​ໃຫ້​ປະ­ຊາ­ຊົນ​ມີ​ສະ­ຕິ ແລະ ກຽມ­ພ້ອມ​ຮັບ​ມື ພ້ອມ​ນີ້​ໃຫ້​ຫ້ອງ​ວ່າ­ການ​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ອອກ​ແຈ້ງ​ການ​ກ່ຽວ​ກັບ​ສະ­ພາບ​ດິນ​ຟ້າ​ອາ­ກາດ ແລະ ການ​ກະ­ກຽມ​ຮັບ​ມື ແລະ ແກ້​ໄຂ​ຜົນ​ກະ­ທົບ​ຈາກ​ໄພ­ພິ­ບັດ ເພື່ອ​ໃຫ້​ຂະ­ແໜງ­ການ ແລະ ທ້ອງ­ຖິ່ນ​ຮັບ​ຊາບ ແລະ ຈັດ​ຕັ້ງ​ປະ­ຕິ­ບັດ ໃຫ້​ກະ­ຊວງ​ພະ­ລັງ­ງານ ແລະ ບໍ່​ແຮ່ ເອົາ­ໃຈ­ໃສ່​ຊີ້​ນຳ ແລະ ຕິດ­ຕາມ​ກ່ຽວ​ກັບ​ການ​ບໍ­ລິ­ຫານ ແລະ ຈັດ­ການ​ນ້ຳ​ຢູ່​ເຂື່ອນ​ຕ່າງໆ​ໃຫ້​ຮັບ­ປະ­ກັນ​ຄວາມ​ປອດ​ໄພ ແລະ ແກ້​ໄຂ​ຢ່າງ​ທັນ​ການ​ໃຫ້​ກະ­ຊວງ​ກະ­ສິ­ກຳ ແລະ ປ່າ­ໄມ້ ກະ­ກຽມ​ແຜນ​ດ້ານ​ຕ່າງໆ​ເປັນ­ຕົ້ນ ແນວ​ພັນ​ພືດ-ສັດ ຝຸ່ນ-ປຸ໋ຍ ປັດ​ໄຈ​ການ​ຜະ­ລິດ ແລະ ອື່ນໆ ເພື່ອ​ຊ່ວຍ­ເຫຼືອ​ປະ­ຊາ­ຊົນ ພາຍ­ຫຼັງ​ນ້ຳ​ບົກ​ແຫ້ງ.

ຂ່າວທີ່ກ່ຽວຂ້ອງ