ປູກກາເຟເປັນສິນຄ້າ ພາເສດຖະກິດຄອບຄົວເຂັ້ມແຂງ

2.679 02 ມີ.ນ. 2011 ຫຼຸດຜ່ອນຄວາມທຸກຍາກ

<p style="text-align: justify;"> ໂດຍ​ເຊື່ອມ​ຊຶມ​ແນວ­ທາງ​ປ່ຽນ­ແປງ​ໃໝ່​ຢ່າງ­ຮອບ­ດ້ານ ທີ່​ມີ​ຫຼັກ­ການ ທີ່​ພັກ​ວາງ​ອອກ ເວົ້າ​ສະ­ເພາະ ຕໍ່​ຂົງ­ເຂດ​ເສດ­ຖະ­ກິດ ມີ​ຫຼາຍ​ຄອບ­ຄົວ​ໄດ້​ບຸກ​ບືນ​ສູ້​ຊົນ ເພື່ອ​ພັດ­ທະ­ນາ​ເສດ­ຖະ­ກິດ ແກ້​ໄຂ​ຊີ­ວິດ​ການ​ເປັນ​ຢູ່​ໃນ​ຄອບ­ຄົວ​ໃຫ້​ເຂັ້ມ­ແຂງ ເຊິ່ງ​ແຕ່​ລະ​ຄອບ­ຄົວ​ກໍ​ໄດ້​ອີງ­ໃສ່​ທ່າ­ແຮງ ເງື່ອນ­ໄຂ ສະ­ພາບ​ຈຸດ​ພິ­ເສດ​ຄວາມ​ເໝາະ​ສົມ ແລະ ຄວາມ​ອາດ​ສາ­ມາດ​ຕົວ​ຈິງ​ຂອງ​ແຕ່​ລະ​ບຸກ­ຄົນ-ແຕ່​ລະ​ຄອບ­ຄົວ ດັ່ງ​ຄອບ­ຄົວ ລຸງ​ສະ​ຫວັດ ສາດ​ຕະ­ກຸນ ຢູ່​ບ້ານ​ໂນນ​ສະ­ຫວ່າງ ເມືອງ​ປາກ​ເຊ ແຂວງ​ຈຳ­ປາ​ສັກ ໄດ້​ເລືອກ​ເອົາ​ການ​ປູກ​ກາ­ເຟ​ເປັນ​ທຸ­ລະ​ກິດ ເພື່ອ​ຊອກ​ຫາ​ລາຍ​ຮັບ​ເສີມ​ມາ​ໃຫ້​ແກ່​ຄອບ­ຄົວ.</p> <p style="text-align: justify;"> ລຸງ​ສະ​ຫວັດ ສາດ​ຕະ­ກຸນ ປີ​ນີ້​ມີ​ອາ­ຍຸ 58 ປີ ຊຶ່ງ​ເປັນ​ສະ­ມາ­ຊິກ​ກຳ­ມະ­ບານ ທັງ​ເປັນ​ຮອງ​ຫົວ­ໜ້າ​ບໍ­ລິ­ສັດ​ກໍ່­ສ້າງ ແລະ ຕິດ​ຕັ້ງ​ໄຟ­ຟ້າ ສາ­ຂາ​ພາກ​ໃຕ້ ຮັບ­ຜິດ­ຊອບ​ວຽກ​ງານ​ຈັດ​ຕັ້ງ​ພະ­ນັກ­ງານ​ຂອງ​ບໍ­ລິ­ສັດ ສະ­ມາ­ຊິກ​ໃນ​ຄອບ­ຄົວ ລວມ​ມີ 5 ຄົນ ສ່ວນ​ເມຍ​ຂອງ​ເພິ່ນ​ກໍ​ເປັນ​ພະ­ນັກ­ງານ​ຢູ່​ບໍ­ລິ­ສັດ​ໄຟ­ຟ້າ​ລາວ ສາ­ຂາ​ປາກ​ເຊ ເຖິງ​ວ່າ​ທັງ​ຜົວ ແລະ ເມຍ ຈະ​ເປັນ​ພະ­ນັກ­ງານ​ໃນ​ບໍ­ລິ­ສັດ​ກໍ​ຕາມ ຍ້ອນ​ຄວາມ​ດຸ­ໝັ່ນ​ຂະ­ຫຍັນ​ພຽນ ແລະ ຢາກ​ໃຫ້​ຄອບ­ຄົວ​ມີ​ຢູ່​ມີ​ກິນ ຊີ­ວິດ​ການ​ເປັນ​ຢູ່​ໄດ້​ຮັບ​ການ​ຍົກ​ສູງ​ດີ​ຂຶ້ນ ມາ​ຮອດ​ປີ 2004 ລຸງ​ສະ​ຫວັດ ຈຶ່ງ​ໄດ້​ຊັກ​ຊວນ​ປຸກ­ລະ­ດົມ​ຜູ້​ເປັນ​ເມຍ ພ້ອມ​ທັງ​ຂຶ້ນ​ແຜນ​ຊອກ​ຫາ​ທຶນ­ຮອນ ຊື້​ດິນ​ເພື່ອ​ເຮັດ​ທຸ­ລະ​ກິດ ຊຶ່ງ​ເລັ່ງ​ໃສ່​ການ​ປູກ​ກາ­ເຟ​ເປັນ­ຕົ້ນ​ຕໍ ໂດຍ​ອາ­ໄສ​ເວ­ລາ​ນອກ​ໂມງ​ການ ແລະ ວັນ​ເສົາ ວັນ​ອາ­ທິດ ຜ່ານ​ການ​ປູກ​ກາ­ເຟ​ມາ​ໄດ້​ໄລ­ຍະ​ໜຶ່ງ ເຫັນ​ວ່າ​ໄດ້​ຮັບ​ຜົນ​ດີ​ກ່ວ​າ​ການ​ເຮັດ​ທຸ­ລະ​ກິດ​ອື່ນ ມາ​ເຖິງ​ປີ 2008 ຈຶ່ງ​ໄດ້​ຊື້​ດິນ​ໃນ​ເນື້ອ­ທີ່​ທັງ​ໝົດ 2 ເຮັກ­ຕາ ຢູ່​ບ້ານ​ຫ້ວຍ​ຊັນ ເມືອງ​ປາກ​ຊ່ອງ ໂດຍ​ໄດ້​ອາ­ໄສ​ພີ່­ນ້ອງ​ເປັນ​ແຮງ​ງານ​ເສີມ​ເຂົ້າ​ຕື່ມ ຊຶ່ງ​ມີ­ໜ້າ​ທີ່​ບົວ­ລະ­ບັດ​ຮັກ­ສາ ເສຍ​ຫຍ້າ ໃສ່​ຝຸ່ນ ປັດ­ຈຸ­ບັນ ສວນ​ກາ­ເຟ​ຂອງ​ຄອບ­ຄົວ​ລຸງ​ສະ​ຫວັດ ພວມ​ຂຽວ­ງາມ ແລະ ຈຳ­ນວນ​ໜຶ່ງ​ກໍ​ເລີ່ມ​ເກັບ​ໝາກ-ເກັບ​ຜົນ​ແລ້ວ.</p> <p style="text-align: justify;"> ນອກ­ຈາກ​ເຮັດ​ສວນ​ປູກ​ກາ­ເຟ​ແລ້ວ ລຸງ​ສະ​ຫວັດ ຍັງ​ໄດ້​ນຳ­ພາ​ຄອບ­ຄົວ​ລ້ຽງ­ສັດ​ຫຼາຍ​ປະ­ເພດ ເຊັ່ນ: ລ້ຽງ​ງົວ ປາ ແລະ ສັດ​ປີກ ເພື່ອ​ເປັນ​ອາ­ຫານ​ລ້ຽງ​ຊີບ​ປະ­ຈຳ​ວັນ​ໃນ​ຄອບ­ຄົວ ສ່ວນ​ທີ່​ເຫຼືອ​ກິນ​ໄດ້​ນຳ​ອອກ​ຈຳ­ໜ່າຍ​ຢູ່​ທ້ອງ​ຕະ­ຫຼາດ​ຕື່ມ​ອີກ ປັດ­ຈຸ­ບັນ ຄອບ­ຄົວ​ລຸງ​ສະ​ຫວັດ ນອກ­ຈາກ​ມີ​ລາຍ​ຮັບ​ຈາກ​ເງິນ­ເດືອນ​ຂອງ​ຕົນ​ເອງ ແລະ ຜູ້​ເປັນ​ເມຍ​ແລ້ວ ຍັງ​ມີ​ລາຍ​ຮັບ​ຈາກ​ການ​ຂາຍ​ໝາກ​ກາ­ເຟ ແລະ ສັດ­ລ້ຽງ ບໍ່​ຕ່ຳ​ກ່ວ​າ 80 ລ້ານ​ກີບ​ຕໍ່​ປີ.</p> <p style="text-align: justify;"> ຜ່ານ​ການ​ປະ​ເມີນ​ຜົນ ຄຸນ​ນະ​ພາບ​ພະ­ນັກ­ງານ ແລະ ການ​ຄັດ​ເລືອກ​ຄອບ­ຄົວ​ຕົວ​ແບບ​ຂອງ​ບໍ­ລິ­ສັດ​ກໍ່­ສ້າງ ແລະ ຕິດ​ຕັ້ງ​ໄຟ­ຟ້າ ສາ­ຂາ​ພາກ​ໃຕ້ ປະ­ຈຳ​ປີ 2010 ລຸງ​ສະ​ຫວັດ ສາດ​ຕະ­ກຸນ ໄດ້​ຖືກ​ໝູ່​ເພື່ອນ ແລະ ການ­ຈັດ­ຕັ້ງ​ຄັດ​ເລືອກ​ເປັນ​ບຸກ­ຄົນ ແລະ ຄອບ­ຄົວ​ດີ­ເດັ່ນ ເປັນ​ແບບ­ຢ່າງ​ໃນ​ດ້ານ​ວຽກ​ງານ​ປູກ­ຝັງ-ລ້ຽງ­ສັດ ໂດຍ​ສະ­ເພາະ​ແມ່ນ​ການ​ປູກ​ກາ­ເຟ​ເປັນ​ສິນ­ຄ້າ ທ່ານ ເພັດ​ສະ​ໜອນ ສອນ​ນະ­ລາດ ຮອງ​ຫົວ­ໜ້າ​ບໍ­ລິ­ສັດ ທັງ​ເປັນ​ປະ­ທານ​ຮາກ​ຖານ​ກຳ­ມະ­ບານ​ຂອງ​ບໍ­ລິ­ສັດ​ກໍ່­ສ້າງ ແລະ ຕິດ​ຕັ້ງ​ໄຟ­ຟ້າ ສາ­ຂາ​ພາກ​ໃຕ້ ໄດ້​ຢືນ­ຢັນ ແລະ ຮັບ­ຮອງ​ວ່າ: ຄອບ­ຄົວ​ລຸງ​ສະ​ຫວັດ ສາດ​ຕະ­ກຸນ ເປັນ​ຄອບ­ຄົວ​ດີ­ເດັ່ນ​ໃນ​ດ້ານ​ວຽກ​ງານ​ສ້າງ​ເສດ­ຖະ­ກິດ ແກ້​ໄຂ​ຊີ­ວິດ​ການ​ເປັນ​ຢູ່ ຊຶ່ງ​ໄດ້​ຮັບ​ການ​ຍອມ­ຮັບ​ຈາກ​ສະ­ມາ­ຊິກ​ກຳ­ມະ­ບານ ຈາກ​ການ­ຈັດ­ຕັ້ງ ກໍ​ຄື​ສັງ­ຄົມ.</p> <p style="text-align: justify;"> ປັດ­ຈຸ­ບັນ ຄອບ­ຄົວ​ລຸງ​ສະ​ຫວັດ ສາດ​ຕະ­ກຸນ ສາ­ມາດ​ຕັ້ງ​ເຮືອນ​ຖາ­ວອນ​ໄດ້ 1 ຫຼັງ ມີ​ລົດ​ເກັງ 1 ຄັນ ມີ​ລົດ​ໄຖ​ນາ​ເດີນ​ຕາມ 3 ຄັນ ມີ​ລົດ­ຈັກ ແລະ ເຄື່ອງ­ໃຊ້​ສອຍ​ໃນ​ຄອບ­ຄົວ​ຢ່າງ​ພຽງ­ພໍ ລູກ​ທັງ​ສາມ​ຄົນ ສາ­ມາດ​ຮຽນ​ຈົບ​ຂັ້ນ​ປະ­ລິນ­ຍາ​ຕີ ແລະ ມີ​ວຽກ​ເຮັດ​ງານ​ທຳ ຄອບ­ຄົວ​ລຸງ​ສະ​ຫວັດ ທີ່​ໄດ້​ຮັບ​ກຽດ​ເປັນ​ຄອບ­ຄົວ​ຕົວ​ແບບ ປັດ​ໄຈ​ສຳ­ຄັນ​ແມ່ນ​ໄດ້​ຮັບ​ການ​ຮ່ວມ​ມື​ຈາກ​ຜູ້​ເປັນ​ເມຍ ພ້ອມ​ກັນ​ຄິດ ພ້ອມ​ກັນ​ສ້າງ ບວກ​ກັບ​ການ​ເຫັນ​ດີ​ເຫັນ​ພ້ອມ​ຂອງ​ລູກ​ທັງ​ສາມ ທີ່​ໄດ້​ພ້ອມ​ກັນ​ເຮັດ​ພ້ອມ​ກັນ​ທຳ.</p> <p style="text-align: justify;"> ສຳ­ລັບ​ທິດ​ທາງ​ແຜນ­ການ​ໃນ​ປີ​ຕໍ່­ໜ້າ ລຸງ​ສະ​ຫວັດ ສາດ​ຕະ­ກຸນ ຈະ​ເອົາ­ໃຈ­ໃສ່​ນຳ­ພາ​ຄອບ­ຄົວ​ສູ້​ຊົນ​ບົວ­ລະ­ບັດ​ຮັກ­ສາ ແລະ ຂະ­ຫຍາຍ​ເນື້ອ­ທີ່​ປູກ​ກາ­ເຟ ລ້ຽງ­ສັດ ຕາມ​ເງື່ອນ­ໄຂ​ຄວາມ​ເໝາະ​ສົມ ແລະ ຄວາມ​ສາ­ມາດ​ຂອງ​ຄອບ­ຄົວ ແນ­ໃສ່​ສ້າງ​ລາຍ​ຮັບ​ໃຫ້​ແກ່​ຄອບ­ຄົວ​ນັບ​ມື້​ຫຼາຍ​ຂຶ້ນ ລຸງ​ສະ​ຫວັດ ສາດ​ຕະ­ກຸນ ຍັງ​ສະ­ແດງ​ຂໍ້​ຄິດ​ເຫັນ​ຕໍ່​ຜູ້​ຂຽນ​ວ່າ: ຖ້າ​ຄອບ­ຄົວ ຫຼື​ບຸກ­ຄົນ​ໃດ ຫາກ​ມີ​ດິນ​ດອນ​ຕອນ​ຫຍ້າ ບໍ່​ຄວນ​ປະ​ໃຫ້​ເປົ່າ​ຫວ່າງ ຄວນ​ສ້າງ​ໃຫ້​ດິນ​ມີ​ຄຸນ­ຄ່າ ດ້ວຍ​ການ​ປູກ­ຝັງ-ລ້ຽງ­ສັດ ຕາມ​ເງື່ອນ­ໄຂ​ຄວາມ​ສາ­ມາດ​ຕົວ​ຈິງ ໃນ​ຄອບ​ຄົບ​ຂອງ​ຕົນ ບໍ່​ໄວ​ກໍ​ຊ້າ ໝາກ­ຜົນ​ກໍ​ຈະ​ຕາມ​ມາ ຂໍ​ພຽງ​ແຕ່​ໃຫ້​ມີ​ຄວາມ​ດຸ­ໝັ່ນ ມີ​ຄວາມ​ອົດ­ທົນ-ພາກ​ພຽນ ແນ່­ນອນ ຈະ​ປະ­ສົບ​ຜົນ­ສຳ­ເລັດ​ທຸກ​ຢ່າງ.</p> <p style="text-align: justify;"> <strong>ໂດຍ: ສ.ສາຍ​ນ້ຳ​ມ່າ</strong></p>

ຂ່າວທີ່ກ່ຽວຂ້ອງ