ອາຊຽນ ຫາລືໂຄງການທາງລົດໄຟ ສິງກະໂປ-ຄຸນໝິງ

269 06 ກ.ຍ. 2019 ຂ່າວໜ້າ​ໜຶ່ງ

    ສປປ ລາວ ໄດ້​ຮັບ​ກຽດ​ເປັນ​ເຈົ້າ­ພາບ​ຈັດ​ກອງ​ປະ­ຊຸມ​ເລ­ຂາ​ໜ່ວຍ​ປະ­ຕິ­ບັດ​ງານ​ໂຄງ­ການ​ເສັ້ນ­ທາງ​ລົດ­ໄຟ ສິງ­ກະ­ໂປ-ຄຸນ​ໝິງ (SWG-SKRL) ຄັ້ງ​ທີ 21 ຂຶ້ນ​ວັນ​ທີ 5-6 ກັນ­ຍາ 2019 ຢູ່​ໂຮງ­ແຮມ​ລາວ​ພຣາ​ຊາ ໂດຍ​ເປັນ​ປະ­ທານ​ຂອງ​ທ່ານ ວຽງ​ສະ​ຫວັດ ສີ​ພັນ​ດອນ ຮອງ​ລັດ­ຖະ­ມົນ­ຕີ​ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ ມີ​ຜູ້­ຕາງ­ໜ້າ​ຈາກ​ປະ­ເທດ​ສະ­ມາ­ຊິກ​ອາ​ຊຽນ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ກອງ​ປະ­ຊຸມ​ຄັ້ງ​ນີ້ ໄດ້​ສືບ­ຕໍ່​ຈາກ​ກອງ​ປະ­ຊຸມ​ເດືອນ​ສິງ­ຫາ 2018 ທີ່​ຈັດ​ຂຶ້ນ​ຢູ່​ປະ­ເທດ​ມາ​ເລ​ເຊຍ ຈຸດ­ປະ­ສົງ​ເພື່ອ​ລາຍ​ງານ​ຄວາມ​ຄືບ​ໜ້າ ແລະ ຂໍ້​ມູນ​ໃໝ່​ຂອງ​ໂຄງ­ການ​ທາງ​ລົດ­ໄຟ ສິງ­ກະ­ໂປ-ຄຸນ​ໝິງ ສປ ຈີນ SKRL ຂອງ​ແຕ່​ລະ​ປະ­ເທດ​ສະ­ມາ­ຊິກ ປືກ​ສາ​ຫາ­ລື​ໂຄງ­ການ​ຕ່າງໆ​ທີ່​ນອນ​ຢູ່​ໃນ​ເສັ້ນ­ທາງ​ໂຄງ ການ​ດັ່ງ­ກ່າວ ແລະ ການ​ວາງ​ແຜນ​ວຽກ​ງານ​ໃນ­ຕໍ່­ໜ້າ ເພື່ອ​ສົ່ງ­ຕໍ່​ການ​ເປັນ​ເຈົ້າ­ພາບ​ຈັດ​ກອງ​ປະ­ຊຸມ SWG-SKRL ຄັ້ງ​ທີ 22 ລະ­ຫວ່າງ ສປປ ລາວ ແລະ ມຽນ​ມາ ໃຫ້​ສຳ­ເລັດ.

    ຜູ້​ເຂົ້າ​ຮ່ວມ​ໄດ້​ຮັບ​ຟັງ​ການ​ສະ­ເໜີ​ບົດ​ກ່ຽວ​ກັບ​ຜົນ​ໄດ້​ຮັບ​ຂອງ​ຮູບ​ແບບ​ການ​ຂົນ­ສົ່ງ​ທາງ​ລົດ­ໄຟ SKRL ການ​ວິ­ເຄາະ​ດ້ານ​ການ​ເງິນ ແລະ ເສດ­ຖະ­ກິດ ດ້ານ​ເສັ້ນ­ທາງ​ທີ່​ເປັນ​ບຸ­ລິ­ມະ­ສິດ​ຂອງ​ລະ­ບົບ​ທາງ​ລົດ­ໄຟ ແລະ ເສັ້ນ­ທາງ​ອື່ນໆ​ທີ່​ເຊື່ອມ​ຈອດ​ກັນ ຄວາມ​ຄືບ​ໜ້າ ແລະ ແຜນ​ພັດ­ທະ­ນາ​ເສັ້ນ­ທາງ​ລົດ­ໄຟ​ແຕ່​ລະ​ປະ­ເທດ​ສະ­ມາ­ຊິກ ຮ່າງ​ລາຍ​ງານ​ສັນ­ຍາ​ຂອບ​ການ​ຂົນ­ສົ່ງ​ທາງ​ລົດ­ໄຟ​ຂ້າມ​ແດນ ແລະ ການ​ສຶກ​ສາ​ຄວາມ​ຕ້ອງ­ການ ລວມ​ທັງ​ຮູບ​ແບບ​ການ​ຂົນ­ສົ່ງ​ທາງ​ລົດ­ໄຟ​ໃນ​ພາກ​ພື້ນ​ແມ່­ນ້ຳ​ຂອງ ເພື່ອ​ກ້າວ​ສູ່​ການ​ຮ່ວມ​ມື ແລະ ການ​ສ້າງ​ເສັ້ນ­ທາງ​ການ​ຄ້າ​ຮ່ວມ​ກັນ​ລະ­ຫວ່າງ​ປະ­ເທດ​ໃຫ້​ຫຼາຍ​ຂຶ້ນ.

ຂ່າວທີ່ກ່ຽວຂ້ອງ