...ສົກຮຽນໃໝ່ ຄວນໃສ່ໃຈທັງຜູ້ຮຽນ ແລະ ຜູ້ສອນ...

5.576 06 ກ.ຍ. 2019 ນານາສາລະ

    ຄວາມ​ຈິງ​ຂອດ​ຂອງ​ການ​ສຶກ​ສາ​ທີ່​ຈະ​ກ້າວ­ໜ້າ​ໄປ​ຢ່າງ​ໝັ້ນ­ຄົງ ແລະ ມີ​ຄຸນ​ນະ​ພາບ ບໍ່​ແມ່ນ​ຈະ​ຂຶ້ນ​ຢູ່​ກັບ​ສອງ​ປັດ​ໄຈ ຄື: ຜູ້​ຮຽນ ແລະ ຜູ້​ສອນ​ຢ່າງ​ດຽວ ເຊິ່ງ​ມັນ​ກ່ຽວ­ຂ້ອງ​ພົວ­ພັນ​ກັບ​ສະ­ຖານ​ການ​ສຶກ​ສາ ຜູ້​ບໍ­ລິ­ຫານ​ການ​ສຶກ​ສາ ແລະ ໜັງ­ສື​ຕຳ­ລາ​ຮຽນ​ທີ່​ມີ​ຄຸນ​ນະ​ພາບ ແລະ ສອດ­ຄ່ອງ​ກັບ​ການ​ປ່ຽນ­ແປງ​ຂອງ​ໂລກ ວັນ​ທີ 2 ກັນ­ຍາ ເປັນ​ມື້​ເປີດ​ສົກ­ຮຽນ​ໃໝ່​ຂອງ​ສົກ​ສຶກ​ສາ 2019-2020 ຜູ້​ປົກ­ຄອງ​ຈະ​ຕ້ອງ​ເອົາ­ໃຈ­ໃສ່​ລູກ​ຫຼານ​ຂອງ​ຕົນ​ໃຫ້​ຫຼາຍ​ຂຶ້ນ ເຊິ່ງ​ບໍ່​ຄວນ​ມີ​ຈິດ​ສຳ­ນຶກ​ທີ່​ວ່າ ເຮົາ​ມີ​ເງິນ​ຈ່າຍ​ຄ່າ​ຮຽນ​ຂອງ​ລູກ​ແລ້ວ ປ່ອຍ​ໃຫ້​ເປັນ​ໜ້າ­ທີ່​ຂອງ​ຄູ​ເຂົາ​ສອນ​ໃຫ້​ລູກ​ຕົນ​ເປັນ​ຄຳ​ຕອບ​ສຸດ​ທ້າຍ.

    ຂໍ້​ຜິດ­ພາດ​ຂອງ​ຜູ້​ປົກ­ຄອງ​ນັກ­ຮຽນ​ບາງ​ຄົນ ທີ່​ກາຍ­ເປັນ​ປະ­ເດັນ​ກ່າວ​ຂານ​ໃນ​ວົງ​ນ້ຳ​ຊາ​ກາ­ເຟ ກໍ​ຄື ການ​ຕາມ­ໃຈ​ລູກ ເຊິ່ງ​ມີ​ຫຼາຍ​ກໍ­ລະ­ນີ​ຮັກ​ລູກ​ແຮງ ຈົນ​ຫຼົງ​ປົກ​ປ້ອງ​ລູກ​ໃນ​ທາງ​ບໍ່​ຖືກ­ຕ້ອງ ລູກ​ຮຽນ​ບໍ່​ໄດ້​ກໍ​ຫາ​ວິ­ທີ​ໃຫ້​ລູກ​ໄດ້​ຂຶ້ນ​ຫ້ອງ ຫຼື ເສັງ​ຈົບ​ຊັ້ນ​ໄດ້ ນີ້​ຄື​ບາງ​ປາ­ກົດ­ການ​ຂອງ​ຜູ້​ຮຽນ ແຕ່​ເບື້ອງ​ຜູ້​ສອນ ເຊິ່ງ​ລວມ​ເຖິງ​ຜູ້​ບໍ­ລິ­ຫານ​ການ​ສຶກ​ສາ​ນັ້ນ ເຂົ້າ­ໃຈ​ວ່າ​ຮັບ​ໜ້າ­ທີ່​ໜັກ​ພໍ​ສົມ­ຄວນ ເພາະ​ມີ­ໜ້າ​ທີ່​ໂດຍ​ກົງ​ຂັບ​ເຄື່ອນ​ໃຫ້­ການ​ສຶກ​ສາ​ເກີດ​ມີ​ຄຸນ​ນະ​ພາບ ຍົກ​ຕົວ­ຢ່າງ ໃນ​ແຜນ​ລວມ​ຂອງ​ຍຸດ​ທະ​ສາດ​ການ​ສຶກ​ສາ ແລະ ກີ­ລາ 2025 ຍຸດ​ທະ​ສາດ​ທີ 2 ປັບ­ປຸງ​ຄຸນ​ນະ​ພາບ​ຂອງ​ການ​ກໍ່­ສ້າງ ແລະ ຍົກ​ລະ­ດັບ​ຄູ​ແບບ​ຮອບ­ດ້ານ ເຊິ່ງ​ໃຫ້​ຜູ້​ຮຽນ​ໄດ້​ຮັບ​ການ​ສຶກ​ສາ​ຈາກ​ຄູ​ທີ່​ມີ​ຄຸນ​ນະ​ພາບ ຄູ​ໄດ້​ຮັບ​ການ​ພັດ­ທະ­ນາ​ດ້ານ​ວິ­ຊາ​ຊີບ​ຢ່າງ​ຕໍ່​ເນື່ອງ.

    ຄູ​ທີ່​ຈະ​ໄດ້​ຮັບ​ການ​ພັດ­ທະ­ນາ​ດ້ານ​ວິ­ຊາ​ຊີບ​ຢ່າງ​ຕໍ່​ເນື່ອງ​ນັ້ນ ປັດ​ໄຈ​ໃຫຍ່​ຕ້ອງ​ຂຶ້ນ​ກັບ​ຜູ້​ບໍ­ລິ­ຫານ​ການ​ສຶກ​ສາ​ທີ່​ສາ­ມາດ​ເຫັນ​ຄວາມ​ສຳ­ຄັນ​ຂອງ​ຄູ ແຕ່­ລະ­ຄົນ​ທີ່​ຫ້າວ­ຫັນ​ໃນ​ການ​ສິດ­ສອນ ບໍ່​ແມ່ນ​ໃຫ້​ທຶນ ຫຼື ສົ່ງ­ເສີມ​ແຕ່​ຄູ​ທີ່​ເປັນ​ພັກ​ພວກ​ຂອງ​ຕົນ ຫຼື ບໍ່​ດັ່ງ­ນັ້ນ ຜູ້​ບໍ­ລິ­ຫານ​ການ​ສຶກ​ສາ​ບາງ​ຄົນ​ກໍ​ບໍ່​ເຮັດ​ໜ້າ­ທີ່​ຂອງ​ຕົນ ເພື່ອ​ຢາກ​ສ້າງ​ສະ​ຖາ​ບັນ​ການ​ສຶກ​ສາ​ທີ່​ຕົນ​ຮັບ­ຜິດ­ຊອບ​ໃຫ້​ກ້າວ­ໜ້າ​ເທົ່າ​ທີ່​ຄວນ​ຈະ​ເປັນ ເຊິ່ງ​ມັນ​ຮຽກ­ຮ້ອງ​ພົວ­ພັນ​ໄປ​ເຖິງ​ຜູ້​ກວດ­ກາ​ດ້ານ​ການ​ສຶກ​ສາ ຕ້ອງ​ໄດ້​ລົງ​ຕິດ­ຕາມ​ຊຸກ­ຍູ້​ກວດ­ເບິ່ງ​ຕົວ​ຈິງ ເພາະ​ຖ້າ​ມີ​ຄູ​ເກ່ງ-ຄູ​ໄດ້​ຮັບ​ການ​ສົ່ງ­ເສີມ​ພັດ­ທະ­ນາ​ຢ່າງ​ຍຸດ­ຕິ​ທຳ ພວກ​ເຂົາ​ກໍ​ມີ​ກຳ­ລັງ​ໃຈ​ໃນ​ໜ້າ­ທີ່ ແຕ່​ກົງ­ກັນ­ຂ້າມ ຖ້າ​ຍັງ​ມີ​ການ​ຫຼິ້ນ​ເສັ້ນ​ສາຍ​ພັກ​ພວກ ກໍ​ຈະ​ເກີດ​ປາ­ກົດ­ການ​ຫຍໍ້­ທໍ້​ແບບ​ຝີ​ບົ່ມ​ໜອງ​ທັນ­ທີ.

    ການ​ເປີດ​ສົກ­ຮຽນ​ໃໝ່ 2019-2020 ຈຶ່ງ​ຮຽກ­ຮ້ອງ​ໃຫ້​ຫຼາຍ​ຝ່າຍ​ເຮັດ​ໜ້າ­ທີ່​ກວດ­ກາ​ເບິ່ງ ຝ່າຍ​ຄູ​ຕ້ອງ​ໄດ້​ຫ້າວ­ຫັນ​ພັດ­ທະ­ນາ​ຄວາມ​ຮູ້ ຕະ­ຫຼອດ​ເວ­ລາ ແລະ ຝ່າຍ​ຜູ້​ປົກ­ຄອງ ກໍ​ຕ້ອງ​ຮູ້­ຈັກ​ຟັງ​ເຫດ­ຜົນ​ທາງ​ໂຮງ­ຮຽນ ພ້ອມ​ທັງ​ເອົາ­ໃຈ­ໃສ່​ໃຫ້​ເວ­ລາ​ບອກ­ສອນ​ລູກ​ຫຼານ ເຊັ່ນ​ວ່າ: ໃຫ້​ຮູ້­ຈັກ​ມາ­ລະ­ຍາດ​ໃນ​ການ​ຂັບ​ຂີ່ ບໍ່​ແມ່ນ​ວ່າ ມົ້ມ​ໜ້າ​ພໍ່​ແມ່​ແລ້ວ​ພາ­ກັນ​ຊີ້ງ​ລົດ ມີ​ລະ­ບຽບ​ເລື່ອງ​ການ​ໃຊ້​ໂທລະ­ສັບ ແລະ ອື່ນໆ.

ໂດຍ: ດັ້ນ​ກີບ​ເມກ

ຂ່າວທີ່ກ່ຽວຂ້ອງ