ຈີນ ແລະ ສ ອາເມຣິກາ ເລີ່ມການເກັບພາສີເພີ່ມເຕີມກັບສິນຄ້າຂອງກັນ ແລະ ກັນ

    ຂ່າວສານ Reuters/AFP ລາຍ​ງານ​ວ່າ ວັນ​ທີ 1 ກັນຍາ​ນີ້ ຈີນ​ໄດ້​ເລີ່ມ​ການ​ເກັບ​ພາສີ ເພີ່ມ​ເຕີມ ກັບ​ສິນຄ້າ​ບາງ​ລາຍການ​ຂອງ ສ ອາ​ເມ​ຣິ​ກາ ຊຶ່ງ​ຢູ່​ໃນ​ບັນຊີ​ເປົ້າ​ໝາຍ​ທີ່​ມີ​ມູນ​ຄ່າ 75 ຕື້​ໂດ​ລາ​ສະຫະລັດ ໂດຍ​ມີ​ຜົນ​ບັງຄັບ​ໃຊ້​ນັບ​ແຕ່​ເວລາ 11 ໂມງ 01 ນາທີ ຂອງ​ວັນ​ທີ 1 ກັນຍາ​ນີ້ ເປັນຕົ້ນ​ໄປ.

   ບັນດາ​ລະດັບ​ພາສີ​ເພີ່ມ​ເຕີມ 5% ແລະ  10% ແມ່ນ​ປະຕິບັດ​ກັບ​ສິນຄ້າ 1.717 ລາຍການ ຢູ່​ໃນ​ຜະລິດ​ຕະ​ພັນ​ທັງ​ໝົດ 5.078 ລາຍການ ທີ່​ມີ​ແຫຼ່ງ​ທີ່​ມາ​ຈາກ ສ ອາ​ເມ​ຣິ​ກາ. ໃນ​ຂະນະ​ດຽວ​ກັນ ຈີນ​ຈະ​ເລີ່ມ​ເກັບ​ພາສີ​ເພີ່ມ​ເຕີມ ກັບ​ບັນດາ​ສິນຄ້າ​ທີ່​ຍັງ​ເຫຼືອ ນັບ​ແຕ່​ວັນ​ທີ 15 ກັນຍາ​ນີ້​ເປັນຕົ້ນ​ໄປ.

    ທີ່​ໜ້າ​ໃສ່ໃຈ​ກໍ​ຄື​ວ່າ ຈີນ​ໄດ້​ເລີ່ມ​ເກັບ​ພາສີ 5% ກັບ​ສິນຄ້າ​ປະເພດ​ນ້ຳມັນ​ດິບ​ຂອງ                         ສ ອາ​ເມ​ຣິ​ກາ ນັບ​ແຕ່​ວັນ​ທີ 1 ກັນຍາ​ນີ້​ເປັນຕົ້ນ​ໄປ ນັບ​ວ່າ​ເປັນ​ຂີດ​ໝາຍ​ເທື່ອ​ທຳ​ອິດ ທີ່​ນ້ຳມັນ​ດິບ​ຂອງ ສ ອາ​ເມ​ຣິ​ກາ ກາຍເປັນ​ເປົ້າ​ໝາຍ​ຖືກ​ປິດ​ລ້ອມ ນັບ​ແຕ່ ສ ອາ​ເມ​ຣິ​ກາ ແລະ  ຈີນ ເລີ່ມ​ເຮັດ​ສົງຄາມ ການ​ຄ້າ​ລະຫວ່າງ​ກັນ ເມື່ອ​ກ່ອນ​ໜ້າ​ນີ້ 1 ປີ​ກວ່າ ເປັນຕົ້ນ​ມາ.

   ໃນ​ວັນ​ດຽວ​ກັນ ສ ອາ​ເມ​ຣິ​ກາ ກໍ​ໄດ້​ຊຸກຍູ້​ສະດັບ​ພາສີ ຕໍ່​ບັນດາ​ສິນຄ້າ​ທີ່​ນຳ​ເຂົ້າ​ຈາກ​ຈີນ ທ່າມກາງ​ທີ່ ສ ອາ​ເມ​ຣິ​ກາ ເພີ່ມ​ທະວີ​ການ​ສ້າງ​ຄວາມ​ກົດ​ດັນ​ຢ່າງ​ແຮງ ເພື່ອ​ໃຫ້​ຈີນ​ຕ້ອງ​ລົງ​ນາມ​ຂໍ້​ຕົກລົງ​ການ​ຄ້າ​ສະບັບ​ໜຶ່ງ ແມ້​ກະ​ທັ້ງ​ວ່າ​ມີ​ຄວາມ​ກັງວົນ ກ່ຽວ​ກັບ​ການ​ຫຼຸດ​ຈັງຫວະ​ຄວາມ​ເຕີບ​ໂຕ ເສດຖະກິດ​ຂອງ ສ ອາ​ເມ​ຣິ​ກາ ແລະ  ທົ່ວ​ໂລກ.

    ຫ້ອງການ​ຂອງ​ຜູ້​ແທນ​ການ​ຄ້າ ສ ອາ​ເມ​ຣິ​ກາ ໃຫ້​ຮູ້​ວ່າ ລະດັບ​ພາສີ​ເພີ່ມ​ເຕີມ 15% ກັບ​ສ່ວນ​ໜຶ່ງ​ໃນ​ສິນຄ້າ​ທັງ​ໝົດ​ຂອງ​ຈີນ ເປັນ​ມູນ​ຄ່າ 300 ຕື້​ໂດ​ລາ​ສະຫະລັດ ໄດ້​ມີ​ຜົນ​ບັງຄັບ​ໃຊ້​ໃນ​ເວລາ​ດຽວ​ກັນ ທີ່​ຍົກ​ມາ​ຂ້າງ​ເທິງ​ນັ້ນ (11 ໂມງ 01 ນາທີ ຂອງ​ວັນ​ທີ 1 ກັນຍາ.