ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 03-09-2019

406 03 ກ.ຍ. 2019 ຫົວຂໍ້ຂ່າວອື່ນໆ

    ຄໍ​ລຳ​ປະ­ຈຳ​ວັນ​ນີ້ ສະ­ເໜີ 2 ເລື່ອງ ທີ່​ໜ້າ​ສົນ­ໃຈ ຄື: ເລື່ອງ​ຄຳ​ສັ່ງ​ຫ້າມ​ນຳ​ໃຊ້​ສອບ​ລູກ­ປືນ ແລະ ກາບ​ລະ­ເບີດ​ບໍ່​ທັນ​ແຕກ ເຮັດ​ກະ­ແລ່ງ​ຕາມ​ໂຮງ­ຮຽນ​ທີ່​ກຳ­ປູ­ເຈຍ ແລະ ມາດ​ຕະ­ການ​ເພີ່ມ​ໂທດ​ຕໍ່​ຜູ້ ລະ­ເມີດ​ລະ­ບຽບ​ກ່ຽວ​ກັບ​ການ​ຖິ້ມ​ຂີ້​ເຫຍື້ອ​ທີ່ ສປ ຈີນ.

    ທີ່ ກຳ­ປູ­ເຈຍ: ສິ່ງ​ທ້າ​ທາຍ​ໃຫຍ່​ໜຶ່ງ​ທີ່​ກະ­ທົບ​ຕໍ່​ຊີ­ວິດ​ການ​ເປັນ​ຢູ່ ແລະ ການ​ພັດ­ທະ­ນາ​ຂອງ​ກຳ­ປູ­ເຈຍ​ນັ້ນ ກໍ​ຄື​ບັນ­ຫາ​ລະ­ເບີດ​ບໍ່​ທັນ​ແຕກ​ທີ່​ຢັ່ງ­ຢາຍ​ຢູ່​ຕາມ​ພື້ນ​ທີ່​ອັນ​ກວ້າງ​ໃຫຍ່​ໄພ­ສານ​ຂອງ​ປະ­ເທດ​ນີ້ ນັບ​ແຕ່​ປີ 1979 ມາ​ເຖິງ​ປັດ­ຈຸ­ບັນ​ຊາວ​ກຳ­ປູ­ເຈຍ ປະ­ມານ 20.000 ຄົນ​ໄດ້​ເສຍ​ຊີ­ວິດ​ຍ້ອນ​ລະ­ເບີດ​ບໍ່​ທັນ​ແຕກ ແລະ ອີກ​ຫຼາຍ​ສິບ​ພັນ​ຄົນ​ກາຍ­ເປັນ​ຄົນ​ເສຍ​ອົງ­ຄະ ຍ້ອນ​ລະ­ເບີດ​ມໍ­ລະ­ນະ​ເຫຼົ່າ​ນີ້ ໃນ​ນັ້ນ ລວມ​ມີ​ເດັກ­ນ້ອຍ​ທີ່​ໄຮ້​ດຽງ­ສາ ໃນ​ກາງ​ປີ 2018 ທາງ​ການ​ກຳ­ປູ­ເຈຍ​ໄດ້​ມີ​ຄຳ​ສັ່ງ​ຫ້າມ​ໂຮງ­ຮຽນ​ໃນ​ທົ່ວ​ປະ­ເທດ ນຳ​ເອົາ​ກະ­ສອບ​ລູກ­ປືນ​ໃຫຍ່ ແລະ ກາບ​ລະ­ເບີດ​ມາ​ເຮັດ​ກະ­ແລ່ງ ຊຶ່ງ​ນິ­ຍົມ​ກັນ​ເຮັດ​ຢ່າງ​ແຜ່​ຫຼາຍ ຕາມ​ທຳ​ມະ​ດາ​ແລ້ວ ສອບ​ລູກ­ປືນ ຫຼື ລູກ​ລະ­ເບີດ​ທີ່​ນຳ​ມາ​ໃຊ້​ເປັນ​ກະ­ແລ່ງ​ເພື່ອ​ຕີ​ເຂົ້າ ແລະ ເລີກ​ຮຽນ​ນັ້ນ ໄດ້​ເອົາ​ຊະ​ນວນ​ອອກ​ແລ້ວ ແຕ່​ທາງ​ເຈົ້າ​ໜ້າ­ທີ່​ເກັບ​ກູ້​ລະ­ເບີດ​ຍັງ​ເຕືອນ​ວ່າ ກ່ຽວ​ກັບ​ຄວາມ​ສ່ຽງ ຄຳ​ສັ່ງ​ດັ່ງ­ກ່າວ​ນັ້ນ ໄດ້​ຮຽກ­ຮ້ອງ​ໃຫ້​ຫ້ອງ­ການ​ສຶກ​ສາ​ໃນ​ທົ່ວ​ປະ­ເທດ ຫ້າມ​ໂຮງ­ຮຽນ​ຕ່າງໆ​ນຳ​ໃຊ້​ກະ­ສອບ​ລູກ­ປືນ​ໃຫຍ່ ແລະ ລູກ​ລະ­ເບີດ​ບໍ່​ທັນ​ແຕກ​ເຮັດ​ກະ­ແລ່ງ ແນວ­ໃດ​ກໍ​ດີ ຜ່ານ​ມາ​ຍັງ​ບໍ່​ເຄີຍ​ມີ​ເຫດ​ຮ້າຍ​ຈາກ​ການ​ນຳ​ໃຊ້​ລະ­ເບີດ​ບໍ່​ທັນ​ແຕກ​ເປັນ​ກະ­ແລ່ງ ແຕ່​ເຄີຍ​ມີ​ຫຼາຍ​ກໍ­ລະ­ນີ​ທີ່​ລະ­ເບີດ​ບໍ່​ທັນ​ແຕກ​ໃນ​ບໍ­ລິ­ເວນ​ເດີ່ນ​ໂຮງ­ຮຽນ​ແຕກ​ໃສ່​ເດັກ​ນັກ­ຮຽນ​ຈົນ​ເສຍ​ຊີ­ວິດ ແລະ ບາດ­ເຈັບ​ຍ້ອນ​ເດັກໆ​ເຫຼົ່າ­ນັ້ນ​ຫຼິ້ນ​ກັບ​ລູກ​ລະ­ເບີດ ຍ້ອນ​ຄວາມ​ຮູ້​ເທົ່າ​ບໍ່​ເຖິງ​ການ ທ່ານ ເຮັງ ລັດ­ຕະ­ນະ ອຳ­ນວຍ​ການ​ສູນ​ເກັບ​ກູ້​ລະ­ເບີດ​ກຳ­ປູ­ເຈຍ ມີ​ຄຳ​ເຫັນ​ກ່ຽວ​ກັບ​ເລື່ອງ​ນີ້​ວ່າ: ຄຳ​ສັ່ງ​ຫ້າມ​ຂອງ​ກະ­ຊວງ​ສຶກ​ສາ ມີ​ຄວາມ​ສຳ­ຄັນ​ຍິ່ງ​ໃນ​ການ​ປ້ອງ​ກັນ​ໄພ​ອັນ­ຕະ­ລາຍ​ຈາກ​ລະ­ເບີດ​ບໍ່​ທັນ​ແຕກ ເພາະ­ວ່າ ລູກ​ລະ­ເບີດ​ທີ່​ປົດ​ຊະ​ນວນ​ອອກ​ແລ້ວ​ນັ້ນ ອາດ​ຍັງ​ມີ​ຊະ​ນວນ​ໃດ​ໜຶ່ງ​ເຫຼືອ​ຢູ່​ດ້ານ​ໃນ​ເມື່ອ​ຖືກ​ຂອງ​ແຂງ​ຕ່ອຍ​ຕີ ມັນ​ກໍ​ອາດ​ລະ­ເບີດ​ໄດ້ ແຕ່​ສຳ­ຄັນ​ໄປ​ກວ່າ​ນັ້ນ​ກໍ ແມ່ນ​ວ່າ­ການ​ສັ່ງ​ຫ້າມ​ນີ້ ຈະ​ຊ່ວຍ​ລຶ­ບລ້າງ​ຄວາມ​ເຂົ້າ­ໃຈ​ອັນ​ຜິດ­ພາດ​ຂອງ​ເດັກໆ ກ່ຽວ​ກັບ​ລູກ​ລະ­ເບີດ​ບໍ່​ທັນ​ແຕກ​ຖ້າ​ເດັກ­ນ້ອຍ​ລື້ງ​ກັບ​ການ​ຕີ​ກະ­ແລ່ງ ທີ່​ເຮັດ​ດ້ວຍ​ກາບ​ລະ­ເບີດ​ບໍ່​ທັນ​ແຕກ​ແລ້ວ ພວກ​ເຂົາ​ກໍ​ອາດ​ບໍ່​ເຂົ້າ­ໃຈ​ກ່ຽວ​ກັບ​ອັນ­ຕະ­ລາຍ​ຈາກ​ລະ­ເບີດ​ດັ່ງ­ກ່າວ ເມື່ອ​ພວກ​ເຂົາ​ເຫັນ​ລະ­ເບີດ​ບໍ່​ທັນ​ແຕກ​ຢູ່​ບ່ອນ​ໃດ​ໜຶ່ງ ພວກ​ເຂົາ​ກໍ​ອາດ​ເຂົ້າ​ໄປ​ຕ່ອຍ​ຕີ ເໝືອນ​ກັບ​ເຄີຍ​ຕີ​ກະ­ແລ່ງ​ຢູ່​ໂຮງ­ຮຽນ.

    ທີ່ ສປ ຈີນ: ແຫຼ່ງ​ຂ່າວ​ໜັງ­ສື­ພິມ​ວຽງ​ຈັນ​ທາມ (26/6/2019) ໃຫ້​ຮູ້​ວ່າ: ທາງ​ການ ສປ ຈີນ ໄດ້ ກຳ­ນົດ​ແຜນ​ລົງ­ໂທດ​ໜັກ​ຂຶ້ນ​ສຳ­ລັບ​ຜູ້​ທຳ­ລາຍ​ສະ­ພາບ​ແວດ​ລ້ອມ ດ້ວຍ​ການ​ລະ­ຖິ້ມ​ຂີ້​ເຫຍື້ອ​ປະ­ເພດ​ແຂງ​ຊະ­ຊາຍ ພາຍ­ຫຼັງ​ທີ່​ຜູ້​ກະ­ທຳ​ຜິດ​ດັ່ງ­ກ່າວ ຖືກ​ລົງ­ໂທດ​ທາງ​ເສດ­ຖະ­ກິດ​ມາ​ແລ້ວ ມາດ​ຕະ­ການ​ໂທດ​ເພີ່ມ​ນີ້ ໄດ້​ກຳ­ນົດ​ໄວ້​ຢູ່​ກົດ­ໝາຍ​ຄວບ​ຄຸມ​ມົນ​ລະ​ພິດ​ຈາກ​ຂີ້​ເຫຍື້ອ​ປະ­ເພດ​ແຂງ ທີ່​ຄະ­ນະ​ປະ­ຈຳ​ສະ­ພາ​ປະ­ຊາ­ຊົນ​ແຫ່ງ​ຊາດ​ຈີນ ໄດ້​ພິ­ຈາ­ລະ­ນາ​ໃນ​ວັນ​ທີ 15 ເດືອນ​ມິ­ຖຸ­ນາ ປີ​ນີ້​ເອງ ນອກ­ຈາກ​ນັ້ນ ຮ່າງ​ກົດ­ໝາຍ​ຍັງ​ໄດ້​ກຳ­ນົດ​ວິ­ທີ​ການ​ຄຸ້ມ​ຄອງ​ຂີ້​ເຫຍື້ອ​ຊະ­ນິດ​ທີ່​ເປັນ​ອັນ­ຕະ­ລາຍ​ຮ້າຍ​ແຮງ ພ້ອມ​ທັງ​ໄດ້​ກຳ­ນົດ​ໂທດ​ໜັກ​ຂຶ້ນ ສຳ­ລັບ​ຜູ້​ຂົນ­ສົ່ງ-ເຄື່ອນ​ຍ້າຍ​ຂີ້​ເຫຍື້ອ​ຊະ­ນິດ​ນີ້ ແບບ​ຜິດ​ກົດ­ໝາຍ ຄື: ຈະ​ຖືກ​ກັກ​ຂັງ ແຕ່ 5-15 ວັນ ພາຍ​ໃຕ້​ກົດ­ໝາຍ​ດັ່ງ­ກ່າວ ອຳ­ນາດ​ການ​ປົກ­ຄອງ​ທ້ອງ­ຖິ່ນ​ທັງ​ໝົດ ​ຕ້ອງ​ຂຶ້ນແຜນ​ກຳ­ນົດ​ບ່ອນ​ຖິ້ມ​ຂີ້​ເຫຍື້ອ​ຊະ­ນິດ​ອັນ­ຕະ­ລາຍ​ນີ້​ເປັນ​ສະ­ເພາະ.

ຂ່າວທີ່ກ່ຽວຂ້ອງ