ຂ່າວຫຼ້າສຸດ

ຫຼາຍ​ບໍລິສັດ ຍ້າຍ​ອອກ​ຈາກ​ອັງກິດ ​ໄປ​ຍັງ​ໂຮ​​ນ​ລັງ

417 02 ກ.ຍ. 2019 ຂ່າວຕ່າງປະເທດ
ຫຼາຍ​ບໍລິສັດ ຍ້າຍ​ອອກ​ຈາກ​ອັງກິດ ​ໄປ​ຍັງ​ໂຮ​​ນ​ລັງ

    ອົງການ​ລົງທຶນ​ຕ່າງປະເທດ​ຂອງ​ໂຮນ​ລັງ (NFIA) ແຈ້ງ​ໃຫ້​ຮູ້ເມື່ອ​ວັນ​ທີ 26 ສິງຫາ​ນີ້​ວ່າ ມີ​ເກືອບ 100 ບໍລິສັດ ໄດ້​ຍ້າຍ​ການເຄື່ອນໄຫວ​ອອກ​ຈາກ​ອັງກິດ ໄປ​ຍັງ​ໂຮນ​ລັງ ຫຼື​ບໍ່​ກໍ​ສ້າງຕັ້ງ​ຫ້ອງການ​ຢູ່​ໃນ​ໂຮນ​ລັງ ເພື່ອ​ຮັບປະກັນ​ວ່າ ເຂົາເຈົ້າ​ຍັງ​ຄົງ​ນອນ​ຢູ່​ໃນ​ສະຫະພາບ​ເອີ​ຣົບ (EU) ທ່າມກາງ​ທີ່​ອັງກິດ ພວມ​ຂຶ້ນ​ແຜນ​ຖອນ​ອອກ​ໄປ​ຈາກ EU ຫຼື​ທີ່​ເອີ້ນ​ວ່າ ເບຣ​ຊິດ (Brexit).

    NFIA ຍັງ​ໃຫ້​ຮູ້​ວ່າ​ມີ​ອີກ 325 ບໍລິສັດ ສະແດງ​ຄວາມ​ກັງວົນ​ກ່ຽວ​ກັບ​ການ​ເສຍ​ສິດ​ເຂົ້າ​ຫາ​ຕະຫຼາດ​ເອີ​ຣົບ ແລະ ພວມ​ພິຈາລະນາ​ເຖິງ​ການ​ດຳເນີນ​ການ​ທີ່​ຄ້າຍຄື​ກັນ ກັບ​ບັນດາ​ບໍລິສັດ​ທີ່​ກ່າວ​ມາ​ຂ້າງ​ເທິງ​ນັ້ນ. ບັນດາ​ບໍລິສັດ​ນີ້ ຕົ້ນຕໍ​ແມ່ນ​ເຄື່ອນ​ໄຫວ​ຢູ່​ໃນ​ຂົງເຂດ​ການ​ເງິນ ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ ການ​ສື່ສານ ການ​ໂຄສະນາ ວິທະຍາສາດ​ການ​ດຳລົງ​ຊີວິດ ແລະ ສຸຂະພາບ.

    ທ່ານ ໂບ​ຣິ​​ສ ຈອນ​ສັນ ນາຍົກລັດຖະມົນຕີ​ອັງກິດ ໄດ້​ໃຫ້​ສັນຍາ​ໄວ້​ວ່າ ຈະ​ໃຫ້​ອັງກິດ​ຖອນ​ອອກ​ໄປ​ຈາກ EU ໃນ​ວັນ​ທີ 31 ຕຸລາ​ໜ້າ​ນີ້ ເຖິງ​ວ່າ​ຈະ​ມີ​ຂໍ້​ຕົກລົງ​ສະບັບ​ໜຶ່ງ​ຫຼື​ບໍ່​ກໍ​ຕາມ. ໃນ​ເວລາ​ນີ້ ນາຍົກລັດຖະມົນຕີ ຈອນ​ສັນ ພວມ​ຊອກ​ຫາ​ວິທີ​ເຈລະຈາ​ຄືນໃໝ່​ກ່ຽວ​ກັບ​ຂໍ້​ຕົກລົງ Brexit ທີ່​ໄດ້​ເຫັນ​ດີ​ເປັນ​ເອກະສັນ​ລະຫວ່າງ EU ກັບ​ນາຍົກລັດຖະມົນຕີ​ຄົນ​ກ່ອນ​ຂອງ​ອັງກິດ ຄື​ທ່ານ​ນາງ ເຕ​ເຣ​ຊາ ເມ.

ຂ່າວທີ່ກ່ຽວຂ້ອງ