ຂ່າວຫຼ້າສຸດ

ສິນລະທຳບໍ່ກັບມາ ໂລກາຈະວິນາດ

469 02 ກ.ຍ. 2019 ນານາສາລະ

    ຫາກ​ເວົ້າ​ເຖິງ​ລະ­ບົບ​ຄຸ້ມ​ຄອງ​ພະ­ນັກ­ງານ ນອກ­ຈາກ​ລະ­ບຽບ​ວິ­ໄນ​ຂອງ​ໜ່ວຍ​ງານ​ແລ້ວ ຍັງ​ມີ​ການ​ເວົ້າ​ເຖິງ​ຄຸນ­ສົມ­ບັດ ສິນ​ທຳ​ປະ­ຕິ­ວັດ ແຕ່​ຍາມ​ໃດ​ກໍ​ຕາມ ຖ້າ­ວ່າ​ຍັງ​ມີ​ພະ­ນັກ­ງານ​ເສື່ອມ​ທາດ​ຂາດ​ຄຸນ ລະ­ເມີດ​ລະ­ບຽບ​ເຫັນ­ແກ່​ຜົນ​ປະ­ໂຫຍດ ກໍ​ຈະ​ເຮັດ​ໃຫ້​ເກີດ​ຂ່າວ​ລື​ດັ່ງ​ທີ່​ເກີດ​ຂຶ້ນ​ໃນ​ສັງ­ຄົມ ເຫດ​ນັ້ນ ລະ­ບຽບ ແລະ ວິ­ໄນ ຈຶ່ງ​ບໍ່​ແມ່ນ​ຄຳ​ຕອບ​ສຸດ​ທ້າຍ​ທີ່​ຈະ​ຄ້ຳ­ປະ­ກັນ​ວ່າ​ຄົນ​ຈະ​ປະ­ຕິ­ບັດ​ຕາມ​ສະ­ເໝີ​ໄປ ສຳ­ລັບ​ພື້ນ­ຖານ​ສັງ­ຄົມ​ລາວ​ຈຶ່ງ​ຈຳ­ເປັນ​ຕ້ອງ​ມີ​ສິນ​ທຳ.

    ເວົ້າ​ເຖິງ​ສິນ​ທຳ​ຈຶ່ງ​ໜີ​ບໍ່​ມົ້ມ​ວິ­ຊາ​ຄຸນ­ສົມ­ບັດ​ທີ່​ເຮົາ​ຮຽນ​ກັນ​ມາ​ແຕ່​ຍັງ​ນ້ອຍ ​ຈົນ​ເຖິງ​ຂັ້ນ​ລະ­ດັບ​ມະ­ຫາ​ໄລ​ວ່າ​ວິ­ຊາ​ດັ່ງ­ກ່າວ​ຍັງ​ສຳ­ຄັນ ຫຼື ຝ່າຍ​ກ່ຽວ­ຂ້ອງ​ໃຫ້​ຄວາມ​ສຳ­ຄັນ​ຫຼາຍ​ໜ້ອຍ​ພຽງ​ໃດ ເພື່ອ​ຈະ​ໃຫ້​ໝາກ​ຫົວ­ໃຈ​ຂອງ​ຄົນ​ໄດ້​ຊຶມ​ຊັບ​ໃນ​ການ​ຮັກ­ຫອມ​ລະ­ບຽບ​ວິ­ໄນ ແລະ ມີ​ຈິດ​ສຳ­ນຶກ​ໃນ​ບາບ​ບຸນ­ຄຸນ​ໂທດ ບັນ­ຫາ​ໃຫຍ່​ສຳ­ຄັນ​ໃນ​ຫຼາຍ​ໜ່ວຍ​ງານ ລະ­ຫວ່າງ ຫົວ­ໜ້າ​ກັບ​ລູກ​ນ້ອງ​ຈຶ່ງ​ໜີ​ບໍ່​ມົ້ມ​ເລື່ອງ​ອະ­ຄະ­ຕິ 4 ປະ­ການ ເຊິ່ງ​ພະ­ພຸດ­ທະ­ເຈົ້າ​ໄດ້​ສອນ​ຄົນ​ໃຫ້​ຮູ້­ຈັກ​ເຄົາ­ລົບ​ລະ­ບຽບ ແລະ ຮັກ­ສາ​ຄວາມ​ເປັນ​ທຳ ຈຶ່ງ​ບໍ່­ເກີດ​ການ​ຕຳ​ນິ​ວິ­ຈານ​ວ່າ​ຄົນ​ເຈົ້າ​ຄົນ​ຂ້ອຍ.

    ອະ­ຄະ­ຕິ 4 ປະ­ການ​ບໍ່​ແມ່ນ​ຫົວ­ຂໍ້​ຍືດ​ຍາວ​ຈົນ​ຈື່​ບໍ່​ໄດ້ ປະ­ເດັນ​ສຳ­ຄັນ​ຢູ່​ບ່ອນ​ວ່າ​ຄົນ​ເວົ້າ​ຈະ​ຈິງ​ຈັງ​ນຳ​ເອົາ​ມາ​ປະ­ຕິ­ບັດ​ຫຼາຍ​ໜ້ອຍ​ພຽງ​ໃດ ? 1. ລຳ­ອຽງ​ເພາະ​ຮັກ ຄຳ​ວ່າ​ລຳ­ອຽງ​ຄົນ​ລາວ​ເຂົ້າ­ໃຈ​ດີ ເພາະ​ເລື່ອງ​ນີ້​ຄອບ­ຄົວ ຫຼື ໜ່ວຍ​ງານ ກໍ​ປາ­ກົດ​ມີ​ໃຫ້​ລູກ​ຜິດ​ຫວັງ ແລະ ລູກ​ນ້ອງ​ເສຍ​ກຳ­ລັງ​ໃຈ ດັ່ງ­ນັ້ນ ຜູ້​ເປັນ​ຫົວ­ໜ້າ​ຈຶ່ງ​ຄວນ​ມີ​ຄຸນ​ນະ​ທຳ​ຂໍ້​ນີ້ 2. ລຳ­ອຽງ​ເພາະ​ຊັງ ຂໍ້​ນີ້​ກໍ​ອາດ​ເກີດ​ກັບ​ຫຼາຍ​ຄົນ​ມາ​ແລ້ວ ເພາະ​ຄວາມ​ຈິງ​ຖ້າ​ໃນ​ຄອບ­ຄົວ ຫຼື ໜ່ວຍ​ງານ​ຄວນ​ຢຶດ​ກະ­ຕິ​ກາ​ເປັນ​ຫຼັກ ບໍ່​ແມ່ນ​ແອບ​ຫຼອຍ​ເອົາ​ຄວາມ​ມັກ ຄວາມ​ຊັງ​ສ່ວນ​ຕົວ​ເປັນ​ທາງ​ອອກ​ໃນ​ການ​ສະ­ເໜີ​ຜົນ­ງານ 3. ລຳ­ອຽງ​ເພາະ​ຫຼົງ ໝາຍ​ເຖິງ​ໂງ່​ບໍ່​ຮູ້​ແຈ້ງ­ວ່າ​ແຕ່­ລະ­ຄົນ​ມີ​ຈຸດ​ອ່ອນ​ຈຸດ​ແຂງ​ແນວ­ໃດ ຫົວ­ໜ້າ​ບໍ່​ກວດ​ສອບ​ໃຫ້​ດີ ເວົ້າ​ໃຫ້​ສັ້ນ ກໍ​ຄື ບໍ່​ມີ​ປັນ­ຍາ​ຄຸ້ມ​ຄອງ​ໜ້າ​ວຽກ 4. ລຳ­ອຽງ​ເພາະ​ຢ້ານ ຄື: ຢ້ານ​ຜູ້​ມີ​ອຳ­ນາດ​ເໜືອ​ຕົນ ອຳ­ນາດ​ເງິນ ຫຼື ຕຳ­ແໜ່ງ​ສູງ​ກວ່າ​ຕົນ !.

    ເວົ້າ​ເຖິງ​ສິນ​ທຳ ຫຼື ພວກ​ເຮົາ​ມັກ​ເວົ້າ​ກັນ​ວ່າ ຄຸນ­ສົມ­ບັດ​ສິນ​ທຳ​ປະ­ຕິ­ວັດ ຫຼື ຈະ​ເອີ້ນ​ວ່າ ວິ­ຊາ​ຄຸນ­ສົມ­ບັດ​ທີ່​ຮຽນ​ກັນ​ມາ​ແຕ່​ປະ­ຖົມ ຄື: ຈະ​ແມ່ນ​ວິ­ຊາ​ໜຶ່ງ​ທີ່​ຄວນ​ທົບ​ທວນ­ຄືນ​ຢ່າງ​ຈິງ​ຈັງ !.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ