ຂ່າວຫຼ້າສຸດ

ເຕະບານເຍົາວະຊົນຊີງຂັນ ປະທານສະຫະພັນບານເຕະ ຈັດຂຶ້ນຕົ້ນກັນຍາ

402 02 ກ.ຍ. 2019 ວົງຈອນກີລາ
ເຕະບານເຍົາວະຊົນຊີງຂັນ ປະທານສະຫະພັນບານເຕະ ຈັດຂຶ້ນຕົ້ນກັນຍາ

    ພິ­ທີ​ຖະ­ແຫຼງ​ຂ່າວ ແລະ ຈັບ​ສະ­ຫຼາກ​ການ​ແຂ່ງ­ຂັນ​ກີ­ລາ​ເຕະ­ບານ​ເຍົາ­ວະ​ຊົນ 3 ຮຸ່ນ (11 ປີ 13 ປີ ແລະ 16 ປີ) ຊີງ​ຂັນ​ປະ­ທານ​ສະ­ຫະ­ພັນ​ບານ­ເຕະ​ນະ­ຄອນ­ຫຼວງ​ວຽງ​ຈັນ (ນວ) ປີ 2019 ຈັດ​ຂຶ້ນ​ວັນ​ທີ 28 ສິງ­ຫາ 2019 ຢູ່​ຄະ­ນະ​ກຳ­ມະ­ການ​ໂອ​ແລມ​ປິກ​ລາວ ມີ​ທ່ານ ວຽງ​ສະ­ຫວັນ ແສງ​ຈັນ ປະ­ທານ​ສະ­ຫະ­ພັນ​ບານ­ເຕະ ນວ ຄະ­ນະ​ຮັບ­ຜິດ­ຊອບ​ຈັດ­ການ​ແຂ່ງ­ຂັນ ຄະ­ນະ​ນຳ ຄູ​ເຝິກ ແລະ ຕາງ­ໜ້າ​ນັກ­ກີ­ລາ​ຈາກ 10 ພາກ­ສ່ວນ​ເຂົ້າ​ຮ່ວມ. 

    ທ່ານ ວຽງ​ສະ­ຫວັນ ແສງ​ຈັນ ກ່າວ​ວ່າ: ລາຍ­ການ​ນີ້​ເພື່ອ​ເປັນ​ການ​ສ້າງ​ຂະ​ບວນ​ຕ້ອນ­ຮັບ​ເປີດ​ສົກ­ຮຽນ​ໃໝ່ 2019-2020 ທັງ​ເປັນ​ການ​ຄັດ​ເລືອກ​ນັກ­ກີ­ລາ​ຮຸ່ນ​ສືບ​ທອດ​ຜູ້​ມີ​ພອນ​ສະ­ຫວັນ​ດີ­ເດັ່ນ​ກຽມ​ຕາງ­ໜ້າ ນວ ເຂົ້າ​ຮ່ວມ​ແຂ່ງ­ຂັນ​ລາຍ­ການ​ຕ່າງໆ​ທັງ​ພາຍ​ໃນ ແລະ ຕ່າງ­ປະ­ເທດ ຈະ​ຈັດ​ຂຶ້ນ​ໃນ­ຕໍ່­ໜ້າ ສະ­ນັ້ນ​ເພື່ອ​ເຮັດ​ຂະ​ບວນ​ການ​ແຂ່ງ­ຂັນ​ລາຍ­ການ​ນີ້​ມີ​ຄວາມ​ສົມ­ບູນ​ແບບ​ຮຽກ­ຮ້ອງ​ມາ​ຍັງ​ຄະ­ນະ​ຮັບ​ຜິດ ຊອບ​ຈັດ­ການ​ແຂ່ງ­ຂັນ ຄະ­ນະ​ນຳ ຄູ​ເຝິກ ແລະ ນັກ­ກີ­ລາ​ຈົ່ງ​ພ້ອມ​ກັນ​ປະ­ກອບ­ສ່ວນ​ຢ່າງ​ຕັ້ງ­ໜ້າ​ເຂົ້າ​ຮ່ວມ​ແຂ່ງ­ຂັນ​ຢ່າງ​ສຸດ​ກົກ​ສຸດ​ປາຍ ນອກ​ນັ້ນ​ຍັງ​ຈະ​ສ້າງ​ໃຫ້​ເປັນ​ພື້ນ­ຖານ​ຕາງ­ໜ້າ​ນັກ­ກີ­ລາ​ນັກ­ຮຽນ ນວ ສົ່ງ​ເຂົ້າ​ຮ່ວມ​ແຂ່ງ­ຂັນ​ງານ​ມະ​ຫະ​ກຳ​ກີ­ລາ​ນັກ­ຮຽນ​ທົ່ວ​ປະ­ເທດ​ຈະ​ຈັດ​ຂຶ້ນ​ທີ່​ແຂວງ​ສາ­ລະ​ວັນ​ຮັບ​ກຽດ​ເປັນ​ເຈົ້າ­ພາບ​ປີ 2021. 

    ໃນ​ພິ­ທີ​ຍັງ​ໄດ້​ຈັບ​ສະ­ຫຼາກ​ແບ່ງ​ກຸ່ມ 3 ຮຸ່ນ ສຳ­ລັບ​ຮຸ່ນ​ອາ­ຍຸ 11 ປີ ກຸ່ມ A ມີ ລ໋ອບ ສະ​ເຕ​ດ້ຽມ ວຽງ​ຈັນ ອາ​ຄາ​ເດ​ມີ້ ເອັຟ​ຊີ ແລະ ໄກ່​ປ່າ ກຸ່ມ B ມີ ຕາ­ວັນ ຊີ​ຊີ-55 ປະ­ສານ​ໃຈ ແລະ ນວ ສ່ວນ​ຮຸ່ນ​ອາ­ຍຸ 13 ປີ ກຸ່ມ A ມີ ດີ​ເຄ ວຽງ​ຈັນ ອາ​ຄາ​ເດ​ມີ້ ຕະ​ວັນ ຊີ​ຊີ-55 ກຸ່ມ B ມີ ຈິງ​ໃຈ ນວ ທຣາມ​ຟໍ​ເມ​ຊັນ ແລະ ຮຸ່ນ​ອາ­ຍຸ 16 ປີ ກຸ່ມ A ທະ​ເວັນ​ຕີ​ຊິກ ຈິງ​ໃຈ ນວ ແລະ ກຸ່ມ B ປະ­ສານ​ໃຈ ດີ​ເຄ ແລະ ຈິງ​ໃຈ ການ​ແຂ່ງ­ຂັນ​ຈັດ​ຂຶ້ນ​ວັນ​ທີ 7 ກັນ­ຍາ 2019 ຢູ່​ສະ­ໜາມ​ກີ­ລາ​ເຈົ້າ​ອາ​ນຸ​ວົງ.

ຂ່າວທີ່ກ່ຽວຂ້ອງ