ຂ່າວຫຼ້າສຸດ

ນະຄອນຫຼວງ-ຣີສອດປາກນ້ຳຄານ ຄອງຂັນບຸນຊ່ວງເຮືອນະຄອນຫຼວງພະບາງ

375 02 ກ.ຍ. 2019 ວົງຈອນກີລາ
ນະຄອນຫຼວງ-ຣີສອດປາກນ້ຳຄານ ຄອງຂັນບຸນຊ່ວງເຮືອນະຄອນຫຼວງພະບາງ

    ງານ​ບຸນ­ຊ່ວງ­ເຮືອ​ປະ­ເພ­ນີ ປະ­ຈຳ​ປີ 2019  ຈັດ​ຂຶ້ນ​ວັນ​ທີ 29 ສິງ­ຫາ 2019 ຢູ່​ນ້ຳ​ຄານ ນະ­ຄອນ­ຫຼວງ​ພະ​ບາງ ແຂວງ​ຫຼວງ​ພະ​ບາງ ໃຫ້​ກຽດ​ເຂົ້າ​ຊົມ​ມີ​ທ່ານ ອາ​ຊາງ ລາວ​ລີ ແລະ ທ່ານ ສົມ​ສະ­ຫວາດ ເລັ່ງ​ສະ​ຫັວດ ທີ່​ປຶກ­ສາ​ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ ພ້ອມ​ດ້ວຍ​ການ​ນຳ​ຂັ້ນ​ແຂວງ ຂັ້ນ​ນະ­ຄອນ ເມືອງ ມວນ​ຊົນ​ທັງ​ພາຍ​ໃນ ແລະ ຕ່າງ­ປະ­ເທດ​ຕາມ​ແຄມ​ຟັ່ງ​ນ້ຳ​ຄານ.

    ທ່ານ ຈັນ​ສຸກ ພັນ​ໂດ​ລັກ ເຈົ້າ​ນະ­ຄອນ­ຫຼວງ​ພະ​ບາງ ກ່າວ​ວ່າ: ເປັນ​ປະ­ຈຳ​ທຸກ​ປີ​ພໍ​ຮອດ​ມື້​ແຮມ 14 ຄ່ຳ​ເດືອນ 9 ທີ່​ຊາວ​ຫຼວງ​ພະ​ບາງ ເມືອງ​ມໍ­ລະ­ດົກ​ໂລກ ໄດ້​ຈັດ​ໃຫ້​ມີ​ການ​ຊ່ວງ​ເຮືອ​ປະ­ເພ­ນີ​ໃນ​ໂອ­ກາດ​ບຸນ​ຫໍ່​ເຂົ້າ­ປະ­ດັບ­ດິນ ອັນ​ເປັນ​ປາງ​ບຸນ​ໜຶ່ງ​ທີ່​ໄດ້​ສືບ​ທອດ​ກັນ​ມາ​ແຕ່​ດຶກ​ດຳ​ບັນ ແລະ ຍັງ​ຄົງ​ຮັກ­ສາ​ໄດ້​ຮີດ­ຄອງ​ປະ­ເພ­ນີ​ທີ່​ເປັນ​ເອ­ກະ­ລັກ​ອັນ​ດັ່ງ​ເດີມ ພິ­ເສດ​ປີ​ນີ້​ໄດ້​ຈັດ​ໃຫ້​ເປັນ​ກິດ­ຈະ­ກຳ​ສົ່ງ­ເສີມ​ການ ທ່ອງ​ທ່ຽວ​ລາວ-ຈີນ ໃນ​ໂອ­ກາດ​ປີ​ທ່ອງ​ທ່ຽວ​ລາວ-ຈີນ 2019 ແລະ ໄດ້​ຮັບ​ການ​ສະ­ໜັບ­ສະ­ໜູນ​ຈາກ​ພາກ­ສ່ວນ​ຕ່າງໆ ໂດຍ​ສະ­ເພາະ ບໍ­ລິ­ສັດ ເບຍ​ລາວ​ຈຳ­ກັດ ທີ່​ສົ່ງ­ເສີມ​ຮີດ­ຄອງ​ປະ­ເພ­ນີ​ບຸນ­ຊ່ວງ­ເຮືອ​ຢູ່​ນະ­ຄອນ­ຫຼວງ​ພະ​ບາງ​ທຸກ​ປີ​ຢ່າງ​ຕໍ່​ເນື່ອງ.

    ບຸນ­ຊ່ວງ­ເຮືອ​ປີ​ນີ້​ມີ​ເຮືອ​ເຂົ້າ​ຮ່ວມ​ແຂ່ງ­ຂັນ​ທັງ​ໝົດ 31 ລຳ ແຂ່ງ­ຂັນ​ໃນ​ຮູບ​ແບບ​ເສຍ​ສອງ​ຄັ້ງ​ແລ້ວ​ຄັດ​ອອກ ຜ່ານ​ການ​ແຂ່ງ­ຂັນ​ຜົນ​ປາ­ກົດ​ວ່າ: ຊະ­ນະ​ເລີດ​ເຮືອ​ນະ­ຄອນ­ຫຼວງ-ຣີ​ສອດ​ປາກ​ນ້ຳ​ຄານ ຮັບ​ຂັນ+ເງິນ­ສົດ 15 ລ້ານ​ກີບ ອັນ​ດັບ 2 ເຮືອ​ຮ້ານ​ຂາຍ​ລົດ​ບ້ານ​ດອນ​ແຊ້ມ​ຮັບ​ຂັນ+ເງິນ­ສົດ 14 ລ້ານ​ກີບ ອັນ​ດັບ 3 ເຮືອ​ກຸ່ມ​ບໍ­ລິ­ສັດ ຊ້າງ​ເພັດ​ຮັບ​ຂັນ+ເງິນ­ສົດ 13 ລ້ານ​ກີບ ແລະ ອັນ​ດັບ 4 ເຮືອ​ແຂວງ​ໄຊ​ຍະ​ບູ​ລີ ໄດ້​ຮັບ​ເງິນ 12 ລ້ານ​ກີບ.

ຂ່າວທີ່ກ່ຽວຂ້ອງ