ມອບເຄື່ອງຊ່ວຍເຫຼືອຜູ້ປະສົບໄພ

281 30 ສ.ຫ. 2019 ຂ່າວໜ້າ​ໜຶ່ງ
ມອບເຄື່ອງຊ່ວຍເຫຼືອຜູ້ປະສົບໄພ

    ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ (ຮສສ) ໄດ້​ຮັບ​ການ​ອະ­ນຸ­ມັດ​ຈາກ​ລັດ­ຖະ­ບານ​ລາວ ແລະ ຍີ່­ປຸ່ນ ຈັດ​ຕັ້ງ​ປະ­ຕິ­ບັດ​ໂຄງ­ການ​ຄັງ​ແຮ​ເຂົ້າ​ຊ່ວຍ­ເຫຼືອ​ຜູ້​ປະ­ສົບ​ໄພ­ພິ­ບັດ ປີ 2018 ໃນ​ຂອບ​ເຂດ​ທົ່ວ​ປະ­ເທດ ພາຍ​ໃຕ້​ກອງ​ທຶນ​ເພື່ອນ​ຮ່ວມ​ງານ KR1 .

    ວັນ​ທີ 26-28 ສິງ­ຫາ 2019 ທ່ານ ຄຳ​ແພງ ໄຊ​ສົມ​ແພງ ລັດ­ຖະ­ມົນ­ຕີ ກະ­ຊວງ ຮສສ ໄດ້​ຕາງ­ໜ້າ​ລັດ­ຖະ­ບານ​ມອບ​ເຄື່ອງ​ຊ່ວຍ­ເຫຼືອ​ໃຫ້​ປະ­ຊາ­ຊົນ​ຜູ້​ປະ­ສົບ​ໄພ­ພິ­ບັດ​ຢູ່ ແຂວງ​ໄຊ​ຍະ​ບູ​ລີ ແລະ ແຂວງ​ວຽງ​ຈັນ ລວມ​ມູນ​ຄ່າ 2 ຕື້​ກວ່າ​ກີບ ກ່າວ​ຮັບ​ໂດຍ​ທ່ານ​ຮອງ​ເຈົ້າ­ແຂວງ​ທັງ 2 ແຂວງ.

    ສຳ­ລັບ​ເຄື່ອງ​ຊ່ວຍ­ເຫຼືອ​ທີ່​ນຳ​ມາ​ມອບ​ໃຫ້​ປະ­ຊາ­ຊົນ​ຄັ້ງ​ນີ້ ປະ­ກອບ​ມີ: ເຂົ້າ­ສານ​ໜຽວ​ຈາກ​ກອງ​ທຶນ​ເພື່ອນ​ຮ່ວມ​ງານ KR1 ຈຳ­ນວນ 147.876 ກິ​ໂລ ມູນ​ຄ່າ 1 ຕື້​ກວ່າ​ກີບ ເຄື່ອງ­ນຸ່ງ​ຫົ່ມ ແລະ ເກີບ ຈາກ ສ ເກົາ­ຫຼີ 100 ແກັດ ມູນ​ຄ່າ 150 ລ້ານ​ກີບ ແລະ ເງິນ​ເພື່ອ​ຊື້​ສັງ­ກະ­ສີ ແລະ ເຫຼັກ​ຕະ­ປູ 158 ລ້ານ​ກີບ ສ່ວນ​ແຂວງ​ວຽງ​ຈັນ​ໄດ້​ຮັບ​ເຂົ້າ­ສານ​ໜຽວ 141.612 ກິ​ໂລ ມູນ​ຄ່າ 1 ຕື້​ກວ່າ​ກີບ ເຄື່ອງ­ນຸ່ງ​ຫົ່ມ ແລະ ເກີບ 100 ແກັດ ມູນ​ຄ່າ 150 ລ້ານ​ກີບ.

   ໂອ­ກາດ​ນີ້ ທ່ານ ຄຳ​ແພງ ໄຊ​ສົມ​ແພງ ຍັງ​ໄດ້​ເຂົ້າ​ຮ່ວມ​ພິ­ທີ​ມອບ​ໂຄງ­ການ​ກໍ່­ສ້າງ​ອາ­ຄານ​ສູນ​ບໍ­ລິ­ການ​ປະ­ກັນ​ສັງ­ຄົມ​ແຫ່ງ​ຊາດ ແຂວງ​ໄຊ​ຍະ​ບູ​ລີ ແລະ ຢ້ຽມ­ຢາມ​ໂຮງ­ງານ​ລາວ ຊິ​ຊິນ​ຜະ­ລິດ​ເປົາ ແລະ ເມັດ​ຢາງ​ສົ່ງ​ອອກ​ພາຍ​ໃນ ແລະ ຕ່າງ­ປະ­ເທດ​ຢູ່​ແຂວງ​ວຽງ​ຈັນ​ອີກ​ດ້ວຍ.

ຂ່າວທີ່ກ່ຽວຂ້ອງ