ຂ່າວຫຼ້າສຸດ

ເສີມສ້າງການພົວພັນຮ່ວມມື ລາວ-ອາເມຣິກາ ໃຫ້ຂະຫຍາຍຕົວ

216 30 ສ.ຫ. 2019 ຂ່າວໜ້າ​ໜຶ່ງ

    ວັນ​ທີ 20 ສິງ­ຫາ 2019 ທີ່​ກະ­ຊວງ​ການ​ຕ່າງ­ປະ­ເທດ​ອາ​ເມ​ຣິ​ກາ ວໍ​ຊິງ​ຕັນ​ດີ​ຊີ ທ່ານ ແສງ​ເພັດ ຮຸ່ງ​ບຸນ​ຍວງ ຮອງ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ພ້ອມ​ດ້ວຍ​ຄະ­ນະ​ໄດ້​ເຂົ້າ​ຮ່ວມ​ກອງ​ປະ­ຊຸມ​ປຶກ­ສາ​ຫາ­ລື​ລະ­ດັບ​ນະ­ໂຍ­ບາຍ​ສອງ​ຝ່າຍ​ລາວ-ອາ​ເມ​ຣິ​ກາ ໂດຍ​ເປັນ​ປະ­ທານ​ຮ່ວມ​ຂອງ​ທ່ານ ນາງ Dimple Shah ຜູ້​ຊ່ວຍ​ລັດ­ຖະ­ມົນ­ຕີ​ກະ­ຊວງ​ຄວາມ​ໝັ້ນ­ຄົງ​ພາຍ​ໃນ​ອາ​ເມ​ຣິ​ກາ ເພື່ອ​ປຶກ­ສາ​ຫາ­ລື​ກ່ຽວ​ກັບ​ການ​ສົ່ງ​ຄົນ​ເຊື້ອ​ຊາດ​ລາວ​ທີ່​ເຮັດ​ຜິດ​ກົດ­ໝາຍ​ຢູ່​ສະ­ຫະ­ລັດ​ອາ​ເມ​ຣິ​ກາ​ກັບ​ຄືນ​ລາວ.

    ໂອ­ກາດ​ເຂົ້າ​ຮ່ວມ​ກອງ​ປະ­ຊຸມ ຄະ­ນະ​ຜູ້​ແທນ​ສອງ​ຝ່າຍ ລາວ ແລະ ອາ​ເມ​ຣິ​ກາ ໄດ້​ທົບ​ທວນ­ຄືນ​ຄວາມ​ຄືບ​ໜ້າ​ຂອງ​ການ​ຮ່ວມ​ມື​ສອງ​ຝ່າຍ​ດ້ານ​ວຽກ​ງານ​ການ​ສົ່ງ​ຄົນ​ເຊື້ອ​ຊາດ​ລາວ​ກັບ​ຄືນ​ປະ­ເທດ​ໃນ​ໄລ­ຍະ​ທີ່​ຜ່ານ​ມາ ແລະ ແລກ­ປ່ຽນ ຄວາມ​ຄິດ​ຄວາມ​ເຫັນ​ແບບ​ກົງ​ໄປ​ກົງ​ມາ ເພື່ອ​ພ້ອມ​ກັນ​ຊອກ​ຫາ​ວິ­ທີ​ທາງ​ອັນ​ເໝາະ​ສົມ​ໃນ​ການ​ແກ້​ໄຂ​ບັນ­ຫາ​ດັ່ງ­ກ່າວ​ໃຫ້​ມີ​ປະ​ສິດ­ທິ​ຜົນ​ຍິ່ງ​ຂຶ້ນ.

    ສອງ​ຝ່າຍ​ໄດ້​ມີ​ຄຳ​ເຫັນ​ເປັນ​ເອ­ກະ​ພາບ​ກັນ​ວ່າ ກອງ​ປະ­ຊຸມ​ຄັ້ງ​ປະ­ຖົມ​ມະ­ລຶກ​ທີ່​ມີ​ຄວາມ​ໝາຍ​ສຳ­ຄັນ​ຄັ້ງ​ນີ້ ໄດ້​ດຳ­ເນີນ​ໄປ​ພາຍ​ໃຕ້​ບັນ­ຍາ­ກາດ​ອັນ​ສ້າງ­ສັນ ບົນ​ຈິດ­ໃຈ​ແຫ່ງ​ການ​ເປັນ​ຄູ່​ຮ່ວມ​ມື​ແບບ​ກວມ​ລວມ ລະ­ຫວ່າງ​ສອງ​ປະ­ເທດ ແລະ ປະ­ສົບ​ຜົນ­ສຳ­ເລັດ​ຕາມ​ລະ­ດັບ​ຄາດ­ໝາຍ ຄຽງ​ຄູ່​ກັນ​ນັ້ນ​ສອງ​ຝ່າຍ​ຍັງ​ໄດ້​ຕົກ­ລົງ​ເຫັນ​ດີ​ຮ່ວມ​ກັນ ທີ່​ຈະ​ສືບ­ຕໍ່​ການ​ປຶກ­ສາ​ຫາ­ລື​ນີ້​ໃນ­ຕໍ່­ໜ້າ ເພື່ອ​ຊອກ​ຫາ​ວິ­ທີ​ທາງ​ທີ່​ເໝາະ​ສົມ ແລະ ມີ​ປະ​ສິດ­ທິ​ຜົນ​ໃນ​ການ​ແກ້​ໄຂ​ບັນ­ຫາ​ດັ່ງ­ກ່າວ ອັນ​ເປັນ​ການ​ປະ ກອບ​ສ່ວນ​ເຂົ້າ​ໃນ​ການ​ເສີມ​ສ້າງ​ການ​ພົວ­ພັນ​ຮ່ວມ​ມື​ສອງ​ຝ່າຍ ລາວ-ອາ​ເມ​ຣິ​ກາ ໃຫ້​ຂະ­ຫຍາຍ­ຕົວ ແລະ ແຕກ​ດອກ​ອອກ​ຜົນ​ຍິ່ງ​ຂຶ້ນ.

ຂ່າວທີ່ກ່ຽວຂ້ອງ