ຂ່າວຫຼ້າສຸດ

ສວນພຶກສາ ຈະຈັດບຸນກິນຈຽງ ພ້ອມທັງຄັດເລືອກນາງສາວເຜົ່າມົ້ງ

259 30 ສ.ຫ. 2019 ຂ່າວໜ້າ​ໜຶ່ງ
ສວນພຶກສາ ຈະຈັດບຸນກິນຈຽງ ພ້ອມທັງຄັດເລືອກນາງສາວເຜົ່າມົ້ງ

    ພິ­ທີ​ຖະ​ແຫຼ່ງ​ຂ່າວ​ຈັດ​ງານ​ບຸນ​ປະ­ເພ­ນີ​ກິນ​ຈຽງ​ເຜົ່າ​ມົ້ງ ແລະ ຄັດ​ເລືອກ​ນາງ​ສາວ​ເຜົ່າ​ມົ້ງ ນະ­ຄອນ­ຫຼວງ​ວຽງ​ຈັນ (ນວ) ໃນ​ການ​ອະ­ນຸ​ຮັກ ຮັກ­ສາ​ຮີດ­ຄອງ​ປະ­ເພ­ນີ​ອັນ​ດີ­ງາມ​ອັນ​ພົ້ນ​ເດັ່ນ​ຂອງ​ຊົນ­ເຜົ່າ​ດັ່ງ­ກ່າວ ຈັດ​ຂຶ້ນ​ວັນ​ທີ 28 ສິງ­ຫາ 2019 ທີ່​ສວນ​ພຶກ­ສາ ມີ​ທ່ານ​ນາງ ວິ­ໄລ​ວອນ ຈັນ­ທະ​ລາ­ຕີ ຫົວ­ໜ້າ​ພະ​ແນກ​ຖະ​ແຫຼ່ງ​ຂ່າວ​ວັດ­ທະ­ນະ­ທຳ ແລະ ທ່ອງ​ທ່ຽວ ນວ ທ່ານ ພູ​ວົງ ພະ​ມີ​ສິດ ປະ­ທານ​ສວນ​ພຶກ­ສາ ພາກ­ສ່ວນ​ກ່ຽວ­ຂ້ອງ ແລະ ອຳ­ນາດ​ການ​ປົກ­ຄອງ​ບ້ານ​ໃໝ່​ດານ​ຊີ​ເຂົ້າ​ຮ່ວມ.

   ທ່ານ ພູ​ວົງ ພະ​ມີ​ສິດ ໄດ້​ກ່າວ​ວ່າ: ສວນ​ພຶກ­ສາ​ແຫ່ງ​ນີ້ ເປັນ​ສະ­ຖານ­ທີ່​ທ່ອງ​ທ່ຽວ​ທາງ​ດ້ານ​ວັດ­ທະ­ນະ­ທຳ ໂດຍ​ລວບ​ລວມ​ເອົາ​ຫຼາຍ​ຊົນ­ເຜົ່າ​ມາ​ຮ່ວມ​ບ່ອນ​ດຽວ​ກັນ ໃນ​ນັ້ນ ຫຼາຍ​ທີ່​ສຸດ​ແມ່ນ​ຊົນ­ເຜົ່າ​ມົ້ງ ເຜົ່າ​ກຶມ​ມຸ ແລະ ເຜົ່າ​ລາວ ສະ­ນັ້ນ ຈຶ່ງ​ໄດ້​ຈັດ​ບຸນ​ກິນ​ຈຽງ​ເຜົ່າ​ມົ້ງ ເພື່ອ​ຮັກ­ສາ​ຮີດ­ຄອງ​ປະ­ເພ­ນີ​ອັນ​ດີ­ງາມ ສ້າງ​ຄວາມ​ສາ­ມັກ­ຄີ​ໃຫ້​ບັນ­ດາ­ເຜົ່າ​ໄດ້​ມີ​ກິດ­ຈະ­ກຳ​ຮ່ວມ​ກັນ ພ້ອມ​ທັງ​ໄດ້​ສະ­ແດງ​ເຖິງ​ການ​ປົກ​ປັກ​ຮັກ­ສາ​ໃນ​ການ​ນຸ່ງ​ຖື​ຊຸດ​ປະ­ຈຳ​ຊົນ­ເຜົ່າ ທີ່​ໄດ້​ສືບ​ທອດ​ກັນ​ມາ​ຫຼາຍ​ຮຸ່ນ​ຄົນ ແລະ ໄດ້​ສົ່ງ­ເສີມ​ການ­ທ່ອງ­ທ່ຽວ​ໃຫ້ ນວ ງານ​ຈະ​ໄດ້​ຈັດ​ຂຶ້ນ​ວັນ​ທີ 22-44 ພະ­ຈິກ 2019 ທີ່​ສວນ​ພຶກ­ສາ ບ້ານ​ໃໝ່​ດານ​ຊີ ເມືອງ​ນາ​ຊາຍ​ທອງ ມີ​ກິດ­ຈະ­ກຳ​ຫຼາຍ​ຢ່າງ ເຊັ່ນ: ການ­ສະ­ແດງ​ສິ­ລະ​ປະ ຮ້ອງ­ເພງ​ຈາກ​ສິ­ລະ​ປິນ​ທີ່​ມີ​ຊື່​ສຽງ ກິດ­ຈະ­ກຳ​ໂຍນ​ໝາກ​ຄອນ ຕີ​ໝາກ​ຂ່າງ ຍິງ​ໜ້າ​ເກັກ ເຕະ­ບານ ການ​ຂັບ​ລຳ​ເຜົ່າ​ມົ້ງ​ຂອງ​ຜູ້​ບ່າວ-ຜູ້​ສາວ ລວມ​ເຖິງ​ຜູ້​ເຖົ້າ​ຜູ້​ແກ່​ອາ­ວຸ­ໂສ ແລະ ອື່ນໆ ພ້ອມ​ນັ້ນ ຍັງ​ມີ​ເວ­ທີ​ຄັດ​ເລືອກ​ນາງ​ສາວ​ເຜົ່າ​ມົ້ງ ນວ ປະ­ຈຳ​ປີ 2020 ແລະ ຄັດ​ເລືອກ​ນັກ​ຮ້ອງ​ສຽງ​ດີ.

    ບຸນ​ປະ­ເພ­ນີ​ກິນ​ຈຽງ​ໃນ​ສວນ​ພຶກ­ສາ​ປີ​ນີ້ ຈັດ​ຂຶ້ນ​ເປັນ​ຄັ້ງ​ທີ 3 ໃນ​ການ​ສະ­ເຫຼີມ­ສະ­ຫຼອງ​ສົ່ງ​ທ້າຍ​ປີ​ເກົ່າ​ຕ້ອນ­ຮັບ​ປີ​ໃໝ່ ທັງ​ເປັນ​ການ​ສະ­ຫຼຸບ​ຜົນ­ງານ​ໃນ​ການ​ທຳ​ມາ​ຫາ​ກິນ​ຂອງ​ເຜົ່າ​ມົ້ງ ສຳ­ລັບ​ໂຄງ­ການ​ຄັດ​ເລືອກ​ນາງ​ສາວ​ເຜົ່າ​ມົ້ງ​ໄດ້​ເປີດ​ຮັບ​ສະ­ໝັກ​ແຕ່​ມື້­ນີ້​ຈົນ​ຮອດ​ວັນ​ທີ 19 ຕຸ­ລາ 2019 ໂດຍ​ມີ​ເງື່ອນ­ໄຂ​ຕ້ອງ​ເປັນ​ສາວ​ຊົນ­ເຜົ່າ​ມົ້ງ​ຢູ່​ຂອບ​ເຂດ ນວ ຫຼື ນັກ­ຮຽນ​ນັກ​ສຶກ​ສາ​ທີ່­ຢູ່​ຕ່າງ​ແຂວງ​ແຕ່​ມາ​ຮຽນ​ຢູ່​ໃນ ນວ ກໍ​ສາ­ມາດ​ມາ​ຮ່ວມ​ສະ­ໝັກ​ໄດ້​ເຊັ່ນ​ດຽວ​ກັນ ສຳ­ລັບ​ເງິນ​ລາ­ງວັນ​ຜູ້​ຊະ­ນະ​ເລີດ​ຈະ​ໄດ້​ຄອງ​ມົງ​ກຸດ ມູນ​ຄ່າ 50 ກວ່າ​ລ້ານ​ກີບ ຈາກ​ຮ້ານ​ຄຳ​ພູ​ວົງ ແລະ ເງິນ​ລາ­ງວັນ 5 ລ້ານ​ກີບ.

ຂ່າວທີ່ກ່ຽວຂ້ອງ