ຂ່າວຫຼ້າສຸດ

ແຈ້ງເຝົ້າລະວັງພາຍຸໂພດູ ເຄື່ອນທີ່ເຂົ້າພາກກາງ-ພາກເໜືອ

162 30 ສ.ຫ. 2019 ຂ່າວໜ້າ​ໜຶ່ງ

    ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ (ຮສສ) ໃນ​ນາມ​ປະ­ທານ​ຄະ­ນະ​ກຳ­ມະ­ການ​ປ້ອງ​ກັນ ແລະ ຄວບ​ຄຸມ​ໄພ­ພິ­ບັດ​ແຫ່ງ​ຊາດ ໄດ້​ແຈ້ງ​ການ​ເຕືອນ​ຈະ​ມີ​ພາ­ຍຸ​ໝູນ​ເຂດ​ຮ້ອນ​ໂພ​ດູ (Phodu) ຫົວ­ທີ 12 ປີ 2019 ມີ​ຈຸດ​ສູນ​ກາງ​ຢູ່​ເສັ້ນ​ຂະ­ໜານ​ທີ 17,3 ອົງ­ສາ​ເໜືອ ແລະ ເສັ້ນ​ແວງ​ທີ 117,4 ອົງ­ສາ​ຕາ­ເວັນ​ອອກ ພວມ​ເຄື່ອນ​ທີ່​ຜ່ານ​ພາກ​ກາງ ແລະ ພາກ​ເໜືອ​ຂອງ​ລາວ ໃນ​ວັນ​ທີ 29-31 ສິງ­ຫາ 2019 ເຊິ່ງ​ຈະ​ເຮັດ​ໃຫ້​ມີ​ຝົນ­ຕົກ ຟ້າ­ຮ້ອງ ຟ້າ​ເຫຼື້ອມ ແລະ ລົມ​ພັດ​ແຮງ​ຢູ່​ບັນ­ດາ​ແຂວງ​ພາກ​ເໜືອ ພາກ​ກາງ ແລະ ພາກ​ໃຕ້ ໃນ​ວັນ​ທີ 29 ສິງ­ຫາ ຫາ 1 ກັນ­ຍາ 2019 ໂດຍ​ສະ­ເພາະ ແຂວງ​ຫົວ­ພັນ ຊຽງ​ຂວາງ ອຸ­ດົມ​ໄຊ ຫຼວງ​ພະ​ບາງ ໄຊ​ຍະ​ບູ​ລີ ໄຊ​ສົມ­ບູນ ວຽງ​ຈັນ ບໍ​ລິ​ຄຳ​ໄຊ ຄຳ​ມ່ວນ ສະ­ຫວັນ​ນະ​ເຂດ ນະ­ຄອນ­ຫຼວງ​ວຽງ​ຈັນ ສາ­ລະ​ວັນ ຈຳ­ປາ​ສັກ ເຊ​ກອງ ແລະ ອັດ​ຕະ​ປື ໃຫ້​ມີ​ສະ­ຕິ​ລະ­ວັງ​ຕໍ່​ສະ­ພາບ​ຝົນ­ຕົກ​ຟ້າ­ຮ້ອງ ຟ້າ​ເຫຼື້ອມ ແລະ ລົມ​ພັດ​ແຮງ ທີ່​ອາດ​ເຮັດ​ໃຫ້​ຕົ້ນ­ໄມ້​ຫັກ ເສົາ​ໄຟ­ຟ້າ​ຫັກ​ລົ້ມ ດິນ​ເຈື່ອນ ນ້ຳ​ຖ້ວມ​ສຸ ແລະ ນ້ຳ​ຖ້ວມ​ອັ່ງ.

    ສະ­ນັ້ນ ກະ­ຊວງ ຮສສ ຈຶ່ງ​ຂໍ​ແຈ້ງ​ເຕືອນ​ເຖິງ​ອຳ­ນາດ​ການ​ປົກ­ຄອງ​ທຸກ​ພາກ­ສ່ວນ ໃຫ້​ຕິດ­ຕາມ​ສະ­ພາບ​ຢ່າງ​ໃກ້­ຊິດ ເປັນ­ຕົ້ນ ຈາກ​ກົມ​ອຸ­ຕຸ­ນິ­ຍົມ ແລະ ອຸ​ທົກ​ກະ​ສາດ ໂທລະ­ພາບ ວິ­ທະ­ຍຸ ແລະ ສື່​ອອນ​ລາຍ​ຕ່າງໆ ກຽມ­ພ້ອມ​ດ້ານ​ກຳ­ລັງ​ພາ­ຫະ­ນະ ອຸ­ປະ­ກອນ ເຄື່ອງ​ຊ່ວຍ­ເຫຼືອ​ຕ່າງໆ ພ້ອມ​ຈັດ​ກອງ​ປະ­ຊຸມ​ຄະ­ນະ​ກຳ­ມະ­ການ​ປ້ອງ​ກັນ ແລະ ຄວບ​ຄຸມ​ໄພ­ພິ­ບັດ​ຂັ້ນ​ແຂວງ ຂັ້ນ​ເມືອງ ເພື່ອ​ວາງ​ແຜນ​ຮັບ​ມື​ສຸກ​ເສີນ ແຈ້ງ​ການ​ເຕືອນ​ເຖິງ​ເມືອງ ແລະ ປະ­ຊາ­ຊົນ​ໃຫ້​ຮັບ​ຊາບ ແລະ ມີ​ສະ­ຕິ​ເກັບ​ມ້ຽນ​ສິ່ງ​ຂອງ ສັດ­ລ້ຽງ ກຽມ­ພ້ອມ​ປ້ອງ​ກັນ ແລະ ຮັບ​ມື​ກັບ​ເຫດ­ການ​ໄພ­ພິ­ບັດ​ທີ່​ອາດ​ເກີດ​ຂຶ້ນ​ໃຫ້​ທັນ​ເວ­ລາ ຖ້າ​ຫາກ​ເກີດ​ສະ­ພາບ​ເຫດ­ການ​ໄພ­ພິ­ບັດ​ໃຫ້​ລາຍ​ງານ​ກອງ​ເລ­ຂາ​ຄະ­ນະ​ກຳ­ມະ­ການ​ປ້ອງ​ກັນ ແລະ ຄວບ​ຄຸມ​ໄພ­ພິ­ບັດ​ແຫ່ງ​ຊາດ​ໂດຍ​ດ່ວນ ໂທລະ­ສັບ: 021 219450  020 22225185 020 22219355 020 22727273.

ຂ່າວທີ່ກ່ຽວຂ້ອງ