ຣາຊລາວ ແລະ ສູນກາງຊາວໜຸ່ມ ລົງຊຸກຍູ້ຜູ້ທີ່ໄດ້ຮັບທຶນໂຄງການ

316 30 ສ.ຫ. 2019 ຂ່າວໜ້າ​ໜຶ່ງ
ຣາຊລາວ ແລະ ສູນກາງຊາວໜຸ່ມ ລົງຊຸກຍູ້ຜູ້ທີ່ໄດ້ຮັບທຶນໂຄງການ

    ບໍ­ລິ­ສັດ ຣາ​ຊ-ລາວ ບໍ­ລິ­ການ ຈຳ­ກັດ ໄດ້​ດຳ­ເນີນ​ທຸ­ລະ​ກິດ​ໃນ​ລາວ​ເດືອນ​ພຶດ­ສະ­ພາ 2009 ເປັນ​ບໍ­ລິ­ສັດ​ລູກ​ຂອງ​ບໍ­ລິ­ສັດ ຣາ​ຊ​ກຣຸບ ຈຳ­ກັດ (ມະ­ຫາ­ຊົນ) ທີ່​ຖື​ຮຸ້ນ​ໃຫຍ່​ໂດຍ​ການ​ໄຟ­ຟ້າ​ຝ່າຍ​ຜະ­ລິດ​ແຫ່ງ​ປະ­ເທດ​ໄທ ປີ 2012 ບໍ­ລິ­ສັດ​ໄດ້​ຮ່ວມ​ມື​ກັບ​ກົມ​ພັດ­ທະ­ນາ​ວິ­ຊາ​ຊີບ​ຊາວ​ໜຸ່ມ​ສູນ​ກາງ​ຊາວ​ໜຸ່ມ​ປະ­ຊາ­ຊົນ ປະ­ຕິ­ວັດ​ລາວ ພາຍ​ໃຕ້​ໂຄງ­ການ “ກ້າ​ໄມ້​ແຕກ​ໃບ​ສົດ­ໃສ​ຢືນ​ຕົ້ນ​ໃຫຍ່​ງາມ” ໂດຍ​ມີ​ຈຸດ­ປະ­ສົງ​ເພື່ອ​ຊຸກ­ຍູ້​ສົ່ງ­ເສີມ​ຊາວ​ໜຸ່ມ​ທົ່ວ​ປະ­ເທດ ທີ່​ຜ່ານ​ການ​ເຝິກ­ອົບ­ຮົມ​ວິ­ຊາ​ຊີບ​ໃນ​ໄລ­ຍະ 6 ເດືອນ​ຈາກ​ສູນ​ເຝິກ­ອົບ­ຮົມ​ວິ­ຊາ​ຊີບ​ຊາວ​ໜຸ່ມ-ດອນ​ບອສ​ໂກ ພາຍ­ຫຼັງ​ທີ່​ເຝິກ­ອົບ­ຮົມ​ສຳ­ເລັດ​ແລ້ວ ແມ່ນ​ບໍ່​ມີ​ທຶນ​ໃນ​ການ​ປະ­ກອບ​ອາ­ຊີບ ດັ່ງ­ນັ້ນ ໂຄງ­ການ​ໄດ້​ອອກ­ທຶນ​ກູ້​ຢືມ​ບໍ່​ມີ​ດອກ​ເບ້ຍ​ໃຫ້​ຜູ້​ທີ່​ມີ​ຄວາມ​ຕັ້ງ­ໃຈ​ຈະ​ປະ­ກອບ​ອາ­ຊີບ ມີ​ກຳ­ນົດ 3 ປີ ຈາກ​ນັ້ນ ພໍ​ຮອດ​ກຳ­ນົດ​ຜູ້​ທີ່​ຢືມ​ຈະ​ຕ້ອງ​ໄດ້​ສົ່ງ​ທຶນ​ຄືນ ເພື່ອ​ໝູ­ນວຽນ​ໃຫ້​ຊາວ​ໜຸ່ມ​ບຸກ­ຄົນ​ອື່ນ​ທີ່​ມີ​ເງື່ອນ­ໄຂ​ຕໍ່​ໄປ ປັດ­ຈຸ­ບັນ ໂຄງ­ການ​ໄດ້​ດຳ­ເນີນ​ມາ 7 ປີ ໃນ​ນີ້ ໄດ້​ມອບ​ທຶນ​ທັງ​ໝົດ​ໃຫ້​ກັບ​ຊາວ​ໜຸ່ມ​ແຂວງ​ທີ່​ສຳ­ເລັດ​ການ​ເຝິກ­ອົບ­ຮົມ​ໄປ​ແລ້ວ 17 ແຂວງ ແລະ ນະ­ຄອນ­ຫຼວງ​ວຽງ​ຈັນ ມູນ​ຄ່າ​ປະ­ມານ 1 ລ້ານ​ບາດ ຫຼື ປະ­ມານ 284 ຕື້​ກີບ.

    ໃນ​ວັນ​ທີ 27-31 ສິງ­ຫາ 2019 ທ່່ານ ນາ​ລົງ​ວິດ ຄອງ​ສິນ ຜູ້​ຈັດ­ການ​ສ່ວນ​ອົງ​ກອນ​ສຳ­ພັນ ບໍ­ລິ­ສັດ ຣາ​ຊ-ລາວ ບໍ­ລິ­ການ ຈຳ­ກັດ ແລະ ທ່ານ ວົງ​ພຽນ ບານ​ແປ່ມ​ຕິ ຮອງ​ຫົວ­ໜ້າ​ພະ​ແນກ​ສົ່ງ­ເສີມ​ວິ­ຊາ​ຊີບ ກົມ​ພັດ­ທະ­ນາ​ວິ­ຊາ​ຊີບ​ຊາວ  ໜຸ່ມ​ປະ­ຊາ­ຊົນ ປະ­ຕິ­ວັດ​ລາວ ພ້ອມ​ຄະ­ນະ ໄດ້​ລົງ​ເຄື່ອນ​ໄຫວ​ຕິດ­ຕາມ​ຊາວ​ໜຸ່ມ​ຜູ້​ທີ່​ກູ້​ຢືມ​ເງິນ​ຈາກ​ໂຄງ­ການ "ກ້າ​ໄມ້​ແຕກ​ໃບ​ສົດ­ໃສ​ຢືນ​ຕົ້ນ​ໃຫຍ່​ງາມ" ເພື່ອ​ໄປ​ປະ­ກອບ​ອາ­ຊີບ ໂດຍ​ສະ­ເພາະ ທ້າວ ເຈີ​ວາ ບ້ານ​ຫ້ວຍ​ມ້າ ເມືອງ​ຊຳ​ເໜືອ ແຂວງ​ຫົວ­ພັນ ເປັນ​ບຸກ­ຄົນ​ທີ່​ປະ­ສົບ​ຜົນ­ສຳ­ເລັດ ເຊິ່ງ​ສາ­ມາດ​ສົ່ງ​ຕົ້ນ​ທຶນ​ທີ່​ກູ້​ຢືມ​ໄປ​ແລ້ວ​ສຳ­ເລັດ ແລະ ມີ​ຊີ­ວິດ​ການ​ເປັນ​ຢູ່​ທີ່​ດີ​ຂຶ້ນ ສະ­ແດງ​ອອກ​ເດືອນ​ໜຶ່ງ​ສາ­ມາດ​ມີ​ລາຍ​ຮັບ​ຈາກ​ການ​ສ້ອມ­ແປງ​ລົດ­ຈັກ ສະ­ເລ່ຍ 3-4 ລ້ານ​ກີບ (ສະ­ເພາະ​ກຳ­ໄລ) ພ້ອມ​ນີ້​ຍັງ​ຖືກ​ເລືອກ​ໃຫ້​ເປັນ​ຕົວ​ແບບ​ຂອງ​ໂຄງ­ການ​ນຳ​ອີກ ພ້ອມ​ນັ້ນ ຍັງ​ໄດ້​ໄປ​ຕິດ­ຕາມ​ທ້າວ ຊົ່ງ​ຫວ່າງ ບ້ານ​ຫົວ​ຄັງ ເມືອງ​ຊຳເໜືອ ເປັນ​ບຸກ­ຄົນ​ໜຶ່ງ​ທີ່​ໄດ້​ກູ້​ຢືມ​ເງິນ​ຈາກ​ໂຄງ­ການ​ໄປ​ລົງ­ທຶນ​ສ້ອມ­ແປງ​ລົດ­ຈັກ ປັດ­ຈຸ­ບັນ ຍັງ​ກຳ­ລັງ​ດຳ­ເນີນ​ການ ພ້ອມ​ນີ້​ຍັງ​ໄດ້​ໄປ​ມອບ​ທຶນ​ໃຫ້​ຊາວ​ໜຸ່ມ​ຢູ່​ບ້ານ​ວຽງ​ຮັງ ເມືອງ​ສົບ​ເບົາ ແຂວງ​ຫົວ­ພັນ​ຕື່ມ​ອີກ.

ຂ່າວທີ່ກ່ຽວຂ້ອງ