ຂ່າວຫຼ້າສຸດ

ລາວ-ມົງໂກລີ ສືບຕໍ່ເພີ່ມທະວີການຮ່ວມມືສອງຝ່າຍ

171 29 ສ.ຫ. 2019 ຂ່າວໜ້າ​ໜຶ່ງ

    ວັນ​ທີ 26-27 ສິງ­ຫາ 2019 ທ່ານ​ນາງ ບັດ​ເຊ​ເຊັກ ຮອງ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ແຫ່ງ ມົງ​ໂກ​ລີ ພ້ອມ​ດ້ວຍ​ຄະ­ນະ ໄດ້​ເດີນ­ທາງ​ມາ​ຢ້ຽມ­ຢາມ​ລາວ ແລະ ເຂົ້າ​ຮ່ວມ​ກອງ​ປະ­ຊຸມ​ປຶກ­ສາ​ຫາ­ລື​ດ້ານ​ການ­ເມືອງ​ຂັ້ນ​ຮອງ​ລັດ­ຖະ­ມົນ­ຕີ​ລະ­ຫວ່າງ ສອງ​ກະ­ຊວງ​ການ​ຕ່າງ­ປະ­ເທດ ລາວ-ມົງ​ໂກ​ລີ ຄັ້ງ​ທີ 5 ທີ່​ນະ­ຄອນ­ຫຼວງ​ວຽງ​ຈັນ.

    ກອງ​ປະ­ຊຸມ​ປຶກ­ສາ​ຫາ­ລື​ດ້ານ​ການ­ເມືອງ​ຂັ້ນ​ຮອງ​ລັດ­ຖະ­ມົນ­ຕີ ລະ­ຫວ່າງ​ສອງ​ກະ­ຊວງ​ການ​ຕ່າງ­ປະ­ເທດ ລາວ-ມົງ​ໂກ​ລີ​ຄັ້ງ​ນີ້ ເປັນ​ກົນ​ໄກ​ການ​ຮ່ວມ​ມື​ລະ­ຫວ່າງ​ສອງ​ກະ­ຊວງ​ການ​ຕ່າງ­ປະ­ເທດ ລາວ-ມົງ​ໂກ​ລີ ທີ່​ເຄີຍ​ໄດ້​ປະ­ຕິ­ບັດ 2 ປີ​ຕໍ່​ຄັ້ງ ຈັດ​ຂຶ້ນ​ວັນ​ທີ 27 ສິງ­ຫາ 2019 ທີ່​ກະ­ຊວງ​ການ​ຕ່າງ­ປະ­ເທດ ໂດຍ​ເປັນ​ປະ­ທານ​ຮ່ວມ​ຂອງ​ທ່ານ​ນາງ ຄຳ​ເພົາ ເອີນ​ທະ​ວັນ ຮອງ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ​ລາວ ແລະ ທ່ານ​ນາງ ບັດ​ເຊ​ເຊັກ ຮອງ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ​ມົງ​ໂກ​ລີ.

    ກອງ​ປະ­ຊຸມ​ໄດ້​ແລກ­ປ່ຽນ​ຄຳ​ຄິດ​ເຫັນ ແລະ ຖອດ​ຖອນ​ບົດ­ຮຽນ​ຮ່ວມ​ກັນ​ຢ່າງ​ກົງ​ໄປ​ກົງ​ມາ ທົບ​ທວນ­ຄືນ​ການ​ຮ່ວມ​ມື​ສອງ​ຝ່າຍ​ດ້ານ​ການ­ເມືອງ ກໍ​ຄື ການ​ຮ່ວມ​ມື​ລະ­ຫວ່າງ​ສອງ​ກະ­ຊວງ​ການ​ຕ່າງ­ປະ­ເທດ​ໃນ​ໄລ­ຍະ​ຜ່ານ​ມາ ສອງ​ຝ່າຍ​ໄດ້​ຕີ​ລາ­ຄາ​ສູງ​ຕໍ່​ສາຍ​ພົວ­ພັນ​ມິດ­ຕະ­ພາບ ແລະ ການ​ຮ່ວມ​ມື​ອັນ​ດີ​ລະ­ຫວ່າງ​ສອງ​ປະ­ເທດ ທີ່​ນັບ​ມື້​ໄດ້​ຮັບ​ການ​ເສີມ​ຂະ­ຫຍາຍ​ຂຶ້ນ​ຢ່າງ​ຕໍ່​ເນື່ອງ ພາຍ­ຫຼັງ​ທີ່​ໄດ້​ສ້າງ­ຕັ້ງ​ສາຍ​ພົວ­ພັນ​ການ​ທູດ​ຮ່ວມ​ກັນ ວັນ​ທີ 12 ກັນ­ຍາ 1962 ເປັນ­ຕົ້ນ​ມາ ສອງ​ປະ­ເທດ​ໄດ້​ມີ​ການ​ແລກ­ປ່ຽນ​ການ​ຢ້ຽມ­ຢາມ​ຂອງ​ຄະ­ນະ​ຜູ້​ແທນ​ຂັ້ນ​ສູງ​ຂອງ​ຕົນ​ຢ່າງ​ເປັນ​ປົກ­ກະ­ຕິ ແລະ ຈະ​ສືບ­ຕໍ່​ໃຫ້​ມີ​ການ​ແລກ­ປ່ຽນ​ຢ້ຽມ­ຢາມ​ຫຼາຍ​ຂຶ້ນ​ໃນ​ອະ­ນາ­ຄົດ ສອງ​ຝ່າຍ​ສະ­ເໜີ​ໃຫ້​ພາກ­ສ່ວນ​ກ່ຽວ­ຂ້ອງ​ຂອງ​ຕົນ ສືບ­ຕໍ່​ຊອກ​ຫາ​ຊ່ອງ​ທາງ​ໃນ​ການ​ຮ່ວມ​ມື​ກັນ​ໃຫ້​ຫຼາຍ​ຂຶ້ນ ດ້ານ​ການ​ຄ້າ-ການ​ລົງ­ທຶນ ເປັນ­ຕົ້ນ ການ​ຄ້າ­ຂາຍ​ຜະ­ລິດ​ຕະ​ພັນ​ກາ­ເຟ ເບຍ ສິນ­ຄ້າ​ປະ­ເພດ​ຫັດ­ຖະ­ກຳ ຜະ­ລິດ​ຕະ​ພັນ​ຂົນ​ສັດ ແລະ ອື່ນໆ ການ​ຮ່ວມ​ມື​ດ້ານ​ກະ­ສິ­ກຳ​ເປັນ​ຂະ­ແໜງ­ການ​ທີ່​ພົ້ນ​ເດັ່ນ​ໃນ​ໄລ­ຍະ​ຜ່ານ​ມາ ໂດຍ​ລັດ­ຖະ­ບານ​ມົງ​ໂກ​ລີ​ໄດ້​ມອບ​ແກະ 1.050 ໂຕ ໃຫ້​ລັດ­ຖະ­ບານ​ລາວ​ເດືອນ​ພະ­ຈິກ 2018 ແລະ ໄດ້​ນຳ­ໄປ​ລ້ຽງ​ຢູ່​ແຂວງ​ຊຽງ​ຂວາງ ແລະ ແຂວງ​ຫຼວງ​ພະ​ບາງ ປັດ­ຈຸ­ບັນ ຈຳ­ນວນ​ແກະ​ໄດ້​ແຜ່­ພັນ​ເພີ່ມ​ຂຶ້ນ​ເປັນ 1.400 ໂຕ ໃນ​ຂະ­ນະ​ດຽວ​ກັນ ລັດ­ຖະ­ບານ​ລາວ​ໄດ້​ຕົກ­ລົງ​ເຫັນ​ດີ​ມອບ​ຫຼຽນ​ໄຊ​ມິດ­ຕະ­ພາບ​ໃຫ້​ລັດ­ຖະ­ບານ​ມົງ​ໂກ​ລີ ເພື່ອ​ສະ­ແດງ​ຄວາມ​ຂອບ­ໃຈ​ຕໍ່​ການ​ຊ່ວຍ­ເຫຼືອ ໂດຍ​ຈະ​ຈັດ​ພິ­ທີ​ມອບ-ຮັບ​ໃນ​ໄວໆ​ນີ້ ການ​ຮ່ວມ​ມື​ສອງ​ຝ່າຍ​ດ້ານ​ສາ­ທາ­ລະ­ນະ​ສຸກ ໄດ້​ສົ່ງ​ຊ່ຽວ­ຊານ​ດ້ານ​ການ​ແພດ​ຂອງ​ມົງ​ໂກ​ລີ ມາ​ປະ­ຈຳ​ຢູ່​ໂຮງ­ໝໍ​ມິດ­ຕະ­ພາບ​ລາວ-ມົງ​ໂກ​ລີ ຢູ່​ແຂວງ​ຊຽງ​ແຂວງ ເພື່ອ​ແນ­ໃສ່​ສ້າງ​ຂີດ​ຄວາມ​ສາ­ມາດ​ໃຫ້​ແກ່​ຊ່ຽວ­ຊານ​ຜ່າ­ຕັດ ແລະ ສຸກ​ເສີນ ໂດຍ​ຜ່ານ​ການ​ແລກ­ປ່ຽນ​ວິ­ຊາ​ສະ­ເພາະ ແລະ ຄວາມ​ຊຳ­ນິ​ຊຳ­ນານ ສຳ­ລັບ​ປີ 2018-2020 ສະ­ໜອງ​ທຶນ​ການ​ສຶກ​ສາ​ໃນ​ລະ­ດັບ​ປະ­ລິນ­ຍາ​ຕີ ແລະ ປະ­ລິນ­ຍາ​ໂທ​ໃນ​ສາ­ຂາ​ຕ່າງໆ ເພື່ອ​ຍົກ​ລະ­ດັບ​ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ​ແກ່​ລາວ ນອກ​ນີ້ ສອງ​ຝ່າຍ​ຍັງ​ໄດ້​ແຈ້ງ​ສະ­ພາບ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ສອງ​ປະ­ເທດ​ໃຫ້​ກັນ​ຊາບ ແລກ­ປ່ຽນ​ຄຳ​ຄິດ​ເຫັນ​ຕໍ່​ບັນ­ຫາ​ພາກ​ພື້ນ ແລະ ສາ­ກົນ​ທີ່​ສອງ​ຝ່າຍ​ມີ​ຄວາມ​ສົນ­ໃຈ​ຮ່ວມ​ກັນ.

ຂ່າວທີ່ກ່ຽວຂ້ອງ