ສ້າງຄວາມເຂັ້ມແຂງໃຫ້ຫົວໜ່ວຍທຸລະກິດ

189 29 ສ.ຫ. 2019 ຂ່າວໜ້າ​ໜຶ່ງ

    ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ ຮ່ວມ​ກັບ​ສະ­ມາ­ຄົມ​ສົ່ງ­ເສີມ​ການ​ຮ່ວມ​ມື​ດ້ານ​ວິ­ຊາ​ການ​ແບບ​ຍືນ​ຍົງ​ແຫ່ງ​ປະ­ເທດ​ຍີ່­ປຸ່ນ ແລະ ສະ­ມາ­ຄົມ​ສົ່ງ­ເສີມ​ດ້ານ​ເຕັກ​ໂນ​ໂລ​ຊີ​ແຫ່ງ​ປະ­ເທດ​ໄທ ຈັດ​ເຝິກ­ອົບ­ຮົມ​ໃນ​ຫົວ­ຂໍ້ “ຫຼັກ­ສູດ​ການ​ພັດ­ທະ­ນາ​ບຸ​ຄະ­ລາ​ກອນ​ຢ່າງ​ມື​ອາ­ຊີບ” ຂຶ້ນ​ວັນ​ທີ 26-30 ສິງ­ຫາ 2019 ທີ່​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ ເປັນ​ປະ­ທານ​ຮ່ວມ​ຂອງ​ທ່ານ​ນາງ ຈັນ­ທະ​ຈອນ ວົງ​ໄຊ ຮອງ​ປະ­ທານ​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ ທ່ານ​ນາງ ໂທ​ໂມະ ວາ­ຕາ​ນາ​ເບະ ຜູ້​ປະ­ສານ​ງານ​ສະ­ມາ­ຄົມ​ສົ່ງ­ເສີມ​ການ​ຮ່ວມ​ມື​ດ້ານ​ວິ­ຊາ​ການ​ແບບ​ຍືນ​ຍົງ ແຫ່ງ​ປະ­ເທດ​ຍີ່­ປຸ່ນ​ປະ­ຈຳ​ພາກ​ພື້ນ ແລະ ທ່ານ ຍຸດ​ນະ​ຣົງ ເອື້ອ­ເຟື້ອ ວິ­ທະ­ຍາ­ກອນ​ແຫ່ງ​ສະ­ມາ­ຄົມ​ສົ່ງ­ເສີມ​ດ້ານ​ເຕັກ​ໂນ​ໂລ​ຊີ​ແຫ່ງ​ປະ­ເທດ​ໄທ ແລະ ສຳ​ມະ​ນາ​ກອນ​ທີ່​ມາ​ຈາກ 40 ບໍ­ລິ­ສັດ​ເຂົ້າ​ຮ່ວມ.

    ທ່ານ​ນາງ ຈັນ­ທະ​ຈອນ ວົງ​ໄຊ ກ່າວ​ວ່າ: ການ​ຮ່ວມ​ມື​ຈັດ​ອົບ­ຮົມ​ໃນ​ຫົວ­ຂໍ້ “ຫຼັກ­ສູດ​ການ​ພັດ­ທະ­ນາ​ບຸ​ຄະ­ລາ​ກອນ​ຢ່າງ​ມື​ອາ­ຊີບ” ປີ​ນີ້​ເປັນ​ປີ​ທີ 4 ທີ່​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ ໄດ້​ຮັບ​ການ​ສະ­ໜັບ­ສະ­ໜູນ​ທາງ​ດ້ານ​ງົບ­ປະ­ມານ ໃນ​ການ​ເຝິກ­ອົບ­ຮົມ​ຈາກ​ສະ­ມາ­ຄົມ​ສົ່ງ­ເສີມ​ການ​ຮ່ວມ​ມື​ດ້ານ​ວິ­ຊາ​ການ​ແບບ​ຍືນ​ຍົງ​ແຫ່ງ​ປະ­ເທດ​ຍີ່­ປຸ່ນ ເຊິ່ງ​ໃນ​ຫົວ­ຂໍ້​ດັ່ງ­ກ່າວ​ພວກ​ເຮົາ​ໄດ້​ຮ່ວມ​ກັນ​ຈັດ​ທັງ​ໝົດ 13 ຄັ້ງ ມີ​ຜູ້​ເຂົ້າ​ຮ່ວມ​ປະ­ມານ 500 ຄົນ.

    ເພື່ອ​ເປັນ​ການ​ພັດ­ທະ­ນາ​ບຸ​ຄະ­ລາ​ກອນ​ລາວ ກໍ​ຄື ບັນ­ດາ​ຫົວ­ໜ່ວຍ​ທຸ­ລະ​ກິດ​ໃຫ້​ມີ​ຄວາມ​ເຂັ້ມ­ແຂງ ແລະ ສາ­ມາດ​ບັນ­ລຸ​ຕາມ​ເປົ້າ​ໝາຍ​ຂອງ​ການ​ດຳ­ເນີນ​ທຸ­ລະ​ກິດ ແນ­ໃສ່​ພັດ­ທະ­ນາ​ຂີດ​ຄວາມ​ສາ­ມາດ​ໃຫ້​ພາກ​ທຸ­ລະ​ກິດ ຄຽງ​ຄູ່​ກັບ​ການ​ພັດ­ທະ­ນາ​ບຸ​ຄະ­ລາ​ກອນ​ຂອງ​ບໍ­ລິ­ສັດ ເພື່ອ​ເພີ່ມ​ປະ­ສິດ­ທິ­ພາບ​ຂອງ​ການ​ເຮັດ​ວຽກ​ໃນ​ອົງ​ກອນ​ໃຫ້​ເປັນ​ລະ­ບົບ ເພື່ອ​ໃຫ້​ສາ­ມາດ​ຕອບ​ສະ­ໜອງ​ໄດ້​ກັບ​ຄວາມ​ຮຽກ­ຮ້ອງ​ຕ້ອງ­ການ​ໃນ​ດ້ານ​ການ​ພັດ­ທະ­ນາ​ຢ່າງ​ບໍ່​ຢຸດ​ຢັ້ງ.

ຂ່າວທີ່ກ່ຽວຂ້ອງ