ເພີ່ມທະວີການຫຼຸດຜ່ອນຂໍ້ຂັດແຍ່ງທາງດ້ານທີ່ດິນ

409 29 ສ.ຫ. 2019 ຂ່າວໜ້າ​ໜຶ່ງ
ເພີ່ມທະວີການຫຼຸດຜ່ອນຂໍ້ຂັດແຍ່ງທາງດ້ານທີ່ດິນ

    ກອງ​ປະ­ຊຸມ​ວິ­ທະ­ຍາ­ສາດ​ພາຍ​ໃຕ້​ຫົວ­ຂໍ້ “ເສີມ​ຂະ­ຫຍາຍ​ມູນ­ເຊື້ອ 23 ສິງ­ຫາ ຕິດ​ພັນ​ກັບ​ການ​ແກ້​ໄຂ​ຂໍ້​ຂັດ​ແຍ່ງ​ທີ່​ດິນ” ຈັດ​ຂຶ້ນ​ວັນ​ທີ 28 ສິງ­ຫາ 2019 ທີ່​ສະ­ໂມ­ສອນ ເມືອງ​ໄຊ​ເສດ​ຖາ ເປັນ​ປະ­ທານ​ຂອງ​ທ່ານ ອາດ​ສະ­ພັງ​ທອງ ສີ​ພັນ​ດອນ ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ (ນວ) ມີ​ເຈົ້າ­ເມືອງ​ຮອງ​ເຈົ້າ­ເມືອງ​ໄຊ​ເຊດ​ຖາ ຫົວ­ໜ້າ ຮອງ​ຫົວ­ໜ້າ​ພະ­ແນກ­ການ​ກ່ຽວ­ຂ້ອງ ຫົວ­ໜ້າ​ຫ້ອງ­ການ ພະ­ນັກ­ງານ ແລະ ນາຍ­ບ້ານ​ອ້ອມ​ຂ້າງ​ເມືອງ​ເຂົ້າ​ຮ່ວມ.

    ທ່ານ ອາດ​ສະ­ພັງ​ທອງ ສີ​ພັນ​ດອນ ໄດ້​ກ່າວ​ວ່າ: ການ​ຈັດ​ກອງ​ປະ­ຊຸມ​ວິ­ທະ­ຍາ­ສາດ​ຄັ້ງ​ນີ້  ເປັນ​ການ​ເພີ່ມ​ທະ­ວີ​ການ­ຈັດ­ຕັ້ງ​ປະ­ຕິ­ບັດ​ຄຳ​ຂວັນ 3 ຫຼຸດ 3 ເພີ່ມ ແລະ 3 ຂະ​ບວນ​ການ​ຢູ່ ນວ ໂດຍ​ສະ­ເພາະ ແນ­ໃສ່​ຫຼຸດ­ຜ່ອນ​ຂໍ້​ຂັດ​ແຍ່ງ​ທີ່​ດິນ ອີກ​ດ້ານ​ໜຶ່ງ​ເພື່ອ​ເປັນ​ການ​ເພີ່ມ​ທະ­ວີ​ການ​ຄຸ້ມ​ຄອງ​ລັດ ຄຸ້ມ​ຄອງ​ສັງ­ຄົມ​ດ້ວຍ​ກົດ­ໝາຍ​ໃຫ້​ມີ​ຄວາມ​ສັກ­ສິດ ສ້າງ​ຄວາມ​ຮັບ​ຮູ້ ແລະ ເຂົ້າ­ໃຈ​ວ່າ ທີ່​ດິນ ເຊິ່ງ​ເນື້ອ­ທີ່​ດິນ​ທີ່​ນອນ​ຢູ່​ໃນ​ເຂດ​ແດນ​ຂອງ​ປະ­ເທດ​ລາວ ປະ­ກອບ​ດ້ວຍ​ໜ້າ­ດິນ ພື້ນ​ດິນ ພູ­ຜາ ເກາະ­ດອນ ລວມ​ທັງ​ດິນ​ພື້ນ​ນ້ຳ ນ່ານ​ນ້ຳ ແລະ ນ່ານ​ຟ້າ ທີ່​ດິນ​ແມ່ນ​ຊັບ­ພະ­ຍາ­ກອນ​ຕົ້ນ­ຕໍ​ຂອງ​ຊາດ ທີ່​ເປັນ​ບ່ອນ​ດຳ­ລົງ​ຊີ­ວິດ ບ່ອນ​ທຳ​ມາ​ຫາ​ກິນ​ຂອງ​ພົນ­ລະ­ເມືອງ​ລາວ ເປັນ​ພາ­ຫະ­ນະ​ອັນ​ສຳ­ຄັນ​ແຫ່ງ​ການ​ຜະ­ລິດ ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແລະ ການ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ ທັງ​ເປັນ​ການ​ເພີ່ມ​ທະ­ວີ​ຮັບ­ຜິດ­ຊອບ ແລະ ເປັນ​ເຈົ້າ​ການ​ຂອງ​ຖັນ​ແຖວ​ພະ­ນັກ­ງານ ສະ­ມາ­ຊິກ​ພັກ ແລະ ປະ­ຊາ­ຊົນ​ບັນ­ດາ­ເຜົ່າ ເຂົ້າ​ໃນ​ການ­ຈັດ­ຕັ້ງ​ປະ­ຕິ­ບັດ​ມະ­ຕິ​ກອງ​ປະ­ຊຸມ​ໃຫຍ່ ຄັ້ງ​ທີ X ຂອງ​ພັກ ມະ­ຕິ​ກອງ​ປະ­ຊຸມ​ໃຫຍ່ ຄັ້ງ​ທີ VI ຂອງ​ອົງ­ຄະ​ນະ​ພັກ ນວ ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ 5 ປີ ຄັ້ງ​ທີ VIII ຂອງ​ລັດ ກໍ​ຄື ຂອງ ນວ ແລະ ເປັນ​ການ​ຊຸກ­ຍູ້​ກະ­ກຽມ​ໃສ່​ກອງ​ປະ­ຊຸມ​ໃຫຍ່ 3 ຂັ້ນ​ຂອງ​ພັກ​ທົ່ວ ນວ ໃຫ້​ປາ­ກົດ​ຜົນ​ເປັນ​ຈິງ.

    ໃນ​ຜ່ານ​ມາ ນວ ສາ­ມາດ​ສັງ​ລວມ​ຂໍ້​ຂັດ​ແຍ່ງ​ທີ່​ດິນ​ທີ່​ເກີດ​ຂຶ້ນ ນັບ​ແຕ່​ປີ 2012 ຫາ​ເດືອນ​ພຶດ​ສະ ພາ 2019 ມີ​ຂໍ້​ຂັດ​ແຍ່ງ​ທີ່​ດິນ​ເກີດ​ຈາກ​ສິນ​ສົມ​ສ້າງ 322 ຂໍ້​ຂັດ​ແຍ່ງ ກ່ຽວ​ກັບ​ມໍ­ລະ­ດົກ 281 ຂໍ້​ຂັດ​ແຍ່ງ ການ​ມອບ​ສິດ​ນຳ​ໃຊ້​ທີ່​ດິນ 23 ຂໍ້​ຂັດ​ແຍ່ງ ການ​ຊື້-ຂາຍ 468 ຂໍ້​ຂັດ​ແຍ່ງ ຄ້ຳ­ປະ­ກັນ​ກູ້​ຢືມ​ເງິນ 2.660 ຂໍ້​ຂັດ​ແຍ່ງ ເຂດ​ແດນ 6 ຂໍ້​ຂັດ​ແຍ່ງ ທາງ​ຜ່ານ 33 ຂໍ້​ຂັດ​ແຍ່ງ ຊົດ​ເຊີຍ​ທີ່​ດິນ 29 ຂໍ້​ຂັດ​ແຍ່ງ  ຕັດ­ສິນ​ຢຶດ​ເປັນ​ດິນ​ລັດ 8 ຂໍ້​ຂັດ​ແຍ່ງ  ລວມ​ທັງ​ໝົດ 3.830 ຂໍ້​ຂັດ​ແຍ່ງ ໃນ​ນີ້ ສາ­ມາດ​ແກ້​ໄຂ​ໄດ້ 1.259 ຂໍ້​ຂັດ​ແຍ່ງ ຂໍ້​ຂັດ​ແຍ່ງ​ທີ່​ດິນ ມີ 3 ປະ­ເພດ ຄື: ຂໍ້​ຂັດ​ແຍ່ງ​ລະ­ຫວ່າງ​ບຸກ­ຄົນ​ກັບ​ບຸກ­ຄົນ ຂໍ້​ຂັດ​ແຍ່ງ​ລະ­ຫວ່າງ​ບຸກ­ຄົນ​ກັບ​ນິ­ຕິ­ບຸກ­ຄົນ ຂໍ້​ຂັດ​ແຍ່ງ​ລະ­ຫວ່າງ​ບຸກ­ຄົນ​ກັບ​ການ­ຈັດ­ຕັ້ງ.

ຂ່າວທີ່ກ່ຽວຂ້ອງ