ຂ່າວຫຼ້າສຸດ

ນະຄອນຫຼວງ ກຳນົດແຜນການປູກເຂົ້າຈ້າວເປັນສິນຄ້າ ເນື້ອທີ່ເກືອບ 3 ພັນເຮັກຕາ

230 29 ສ.ຫ. 2019 ຂ່າວໜ້າ​ໜຶ່ງ
ນະຄອນຫຼວງ ກຳນົດແຜນການປູກເຂົ້າຈ້າວເປັນສິນຄ້າ ເນື້ອທີ່ເກືອບ 3 ພັນເຮັກຕາ

    ການ­ຈັດ­ຕັ້ງ​ປະ­ຕິ­ບັດ​ໂຄງ­ການ​ປູກ​ເຂົ້າ­ຈ້າວ​ເປັນ​ສິນ­ຄ້າ ໃນ​ນະ­ຄອນ­ຫຼວງ​ວຽງ​ຈັນ (ນວ) ໄດ້​ເລີ່ມ​ປະ­ຕິ­ບັດ ປີ 2003 ເປັນ­ຕົ້ນ​ມາ ໂດຍ​ເລັ່ງ​ໃສ່ 5 ເມືອງ​ເປົ້າ​ໝາຍ ທີ່​ມີ​ເງື່ອນ­ໄຂ​ການ​ຜະ­ລິດ ເຊັ່ນ: ເມືອງ​ຫາດ​ຊາຍ​ຟອງ ໄຊ​ເສດ​ຖາ ໄຊ​ທາ­ນີ ນາ​ຊາຍ​ທອງ ແລະ ເມືອງ​ປາກ​ງື່ມ ກິດ­ຈະ­ກຳ​ຫຼັກ​ທີ່​ຈັດ​ຕັ້ງ​ປະ­ຕິ­ບັດ​ຈັດ​ກອງ​ປະ­ຊຸມ​ເຜີຍ­ແຜ່​ນະ­ໂຍ­ບາຍ​ຂອງ​ໂຄງ­ການ​ເຝິກ ອົບ­ຮົມ​ເຕັກ­ນິກ​ວິ­ຊາ​ການ ສະ­ໜັບ­ສະ­ໜູນ​ແນວ​ພັນ ຊຸກ­ຍູ້​ຜູ້​ປະ­ກອບ​ການ​ໂຮງ­ສີ​ເຂົ້າ​ສົ່ງ­ເສີມ ແລະ ເກັບ​ຊື້​ຜົນ​ຜະ­ລິດ​ເພື່ອ​ສະ­ໜອງ​ໃຫ້​ໂຮງ­ງານ​ເບຍ​ລາວ.

    ທ່ານ ວາດ​ສະ­ໜາ ສີ​ຈະ­ເລີນ ຮອງ​ຫົວ­ໜ້າ​ພະ​ແນກ​ກະ­ສິ­ກຳ ແລະ ປ່າ­ໄມ້ ນວ ໄດ້​ກ່າວ​ເມື່ອ​ບໍ່​ດົນ​ນີ້​ວ່າ: ປີ 2018 ການ​ຊຸກ­ຍູ້​ສົ່ງ­ເສີມ​ການ​ປູກ​ເຂົ້າ­ຈ້າວ​ເປັນ​ສິນ­ຄ້າ​ຢູ່​ໃນ ນວ ໄດ້​ຈັດ​ຕັ້ງ​ປະ­ຕິ­ບັດ​ຢູ່​ເມືອງ​ໄຊ​ທາ­ນີ ແລະ ປາກ​ງື່ມ ເນື້ອ­ທີ່ 60 ເຮັກ­ຕາ ຜົນ​ຜະ­ລິດ 280 ໂຕນ ເມື່ອ​ສົມ​ທຽບ​ຜົນ​ຜະ­ລິດ​ໄດ້​ໃນ ນວ ແລະ ຄວາມ​ຕ້ອງ­ການ​ຂອງ​ບໍ­ລິ­ສັດ​ເບຍ​ລາວ ໄດ້​ພຽງ​ແຕ່ 1,9% ເຫັນ​ວ່າ​ຍັງ​ບໍ່​ທັນ​ພຽງ­ພໍ​ໃນ​ການ​ສະ­ໜອງ​ໃຫ້​ກັບ​ໂຮງ­ງານ​ຜະ­ລິດ​ເບຍ​ລາວ ເມື່ອ​ເປັນ​ແນວ​ນັ້ນ​ເພື່ອ​ຮັບ­ປະ­ກັນ​ໃຫ້​ແກ່​ການ​ສະ­ໜອງ​ເຂົ້າ­ຈ້າວ​ໃຫ້​ກັບ​ບໍ­ລິ­ສັດ​ເບຍ​ລາວ ພຽງ­ພໍ​ກັບ​ຄວາມ​ຕ້ອງ­ການ ຜູ້​ປະ­ກອບ​ການ​ໂຮງ­ສີ​ເຂົ້າ​ທີ່​ໄດ້​ເຊັນ​ສັນ­ຍາ​ສະ­ໜອງ​ເຂົ້າ­ຈ້າວ​ໃຫ້​ໂຮງ­ງານ​ເບຍ​ລາວ ໃນ​ນັ້ນ ມີ​ບໍ­ລິ­ສັດ ພັນ​ເພັດ​ພັດ­ທະ­ນາ​ກະ­ສິ­ກຳ ໂຮງ­ສີ​ເຂົ້າ ນາງ ຈັນ​ເພັງ ໂຮງ­ສີ​ເຂົ້າ​ໂຊກ​ໄຊ ໂຮງ­ສີ​ເຂົ້າ ນາງ ຫຼຽນ​ຄຳ ຈຶ່ງ​ໄດ້​ເກັບ​ຊື້​ຜົນ​ຜະ­ລິດ​ເຂົ້າ­ຈ້າວ​ຈາກ​ຕ່າງ​ແຂວງ ແລະ ນຳ​ເຂົ້າ​ຈາກ​ຕ່າງ­ປະ­ເທດ​ຈຳ­ນວນ​ໜຶ່ງ.

    ສຳ­ລັບ​ການ­ຈັດ­ຕັ້ງ​ປະ­ຕິ­ບັດ​ປູກ​ເຂົ້າ­ຈ້າວ​ເປັນ​ສິນ­ຄ້າ ປີ 2019 ລະ­ດູ­ແລ້ງ​ຈັດ​ຕັ້ງ​ປະ­ຕິ­ບັດ ຢູ່​ເມືອງ​ໄຊ​ທາ­ນີ ແລະ ປາກ ງື່ມ 55 ເຮັກ­ຕາ ຜົນ​ຜະ­ລິດ 258 ໂຕນ ຜົນ​ຜະ­ລິດ​ທັງ​ໝົດ​ໄດ້​ສະ­ໜອງ​ໃຫ້​ໂຮງ­ງານ​ເບຍ​ລາວ ໂດຍ​ແມ່ນ​ຜູ້​ປະ­ກອບ​ການ​ໂຮງ­ສີ​ເຂົ້າ​ເປັນ​ຜູ້​ເກັບ​ຊື້ ແລະ ສະ­ໜອງ ໃນ​ນັ້ນ ມີ​ບໍ­ລິ­ສັດ ພັນ​ເພັດ​ພັດ­ທະ­ນາ​ກະ­ສິ­ກຳ ແລະ ໂຮງ­ສີ​ເຂົ້າ​ນາງ ຈັນ​ເພັງ ໃນ​ໄລ­ຍະ 6 ເດືອນ​ຕົ້ນ​ປີ 2019 ບໍ­ລິ­ສັດ ເບຍ​ລາວ ມີ​ຄວາມ​ຕ້ອງ­ການ​ເຂົ້າ­ຈ້າວ 3.000 ໂຕນ ດັ່ງ­ນັ້ນ ເຫັນ​ວ່າ​ຜົນ​ຜະ­ລິດ​ບໍ່​ສາ­ມາດ​ຕອບ​ສະ­ໜອງ​ຕໍ່​ຄວາມ​ຕ້ອງ­ການ​ຂອງ​ບໍ­ລິ­ສັດ​ເບຍ​ລາວ​ໄດ້ ຈຶ່ງ​ຈຳ­ເປັນ​ຕ້ອງ​ນຳ​ເຂົ້າ​ຈາກ​ຕ່າງ​ແຂວງ ແລະ ຕ່າງ​ປະ ເທດ​ຕື່ມ ສຳ­ລັບ​ການ​ປູກ​ເຂົ້າ­ຈ້າວ​ເປັນ​ສິນ­ຄ້າ​ລະ­ດູ​ນາ­ປີ 2019 ເນື້ອ­ທີ່ 2.828 ເຮັກ­ຕາ ແຜນ​ຕ້ອງ­ການ​ແນວ​ພັນ 226 ໂຕນ ຄາດ​ຄະ­ເນ​ຜະ­ລິດ​ຕະ​ພາບ 4,78 ໂຕນ​ຕໍ່​ເຮັກ­ຕາ ຜົນ​ຜະ­ລິດ 13.536 ໂຕນ ມີ 58 ບ້ານ 4.669 ຄອບ­ຄົວ ກວມ​ເອົາ 5 ເມືອງ​ຫຼັກ ຄື: ເມືອງ​ໄຊ​ທາ­ນີ 550 ເຮັກ­ຕາ ນາ​ຊາຍ​ທອງ 500 ເຮັກ­ຕາ ຫາດ​ຊາຍ​ຟອງ 800 ເຮັກ­ຕາ ໄຊ​ເສດ​ຖາ 128 ເຮັກ­ຕາ ແລະ ເມືອງ​ປາກ​ງື່ມ 850 ເຮັກ­ຕາ ຜ່ານ​ການ­ຈັດ­ຕັ້ງ​ປະ­ຕິ­ບັດ​ຕົວ​ຈິງ ມາ​ຮອດ​ປັດ­ຈຸ­ບັນ​ສາ­ມາດ​ປະ­ຕິ­ບັດ​ເນື້ອ­ທີ່​ແຜນ­ການ​ໄດ້ 350 ເຮັກ­ຕາ ເທົ່າ​ກັບ 12,37% ຢູ່​ເມືອງ​ໄຊ​ທາ­ນີ ເຊິ່ງ​ການ​ກະ­ກຽມ​ໃຫ້​ແກ່​ການ​ປູກ​ເຂົ້າ​ໃນ​ໄລ­ຍະ​ຜ່ານ​ມາ ພະ​ແນກ​ໄດ້​ຈັດ​ກອງ​ປະ­ຊຸມ​ຫຼາຍ​ຫົວ­ຂໍ້​ຮ່ວມ​ກັບ​ພາກ­ສ່ວນ​ກ່ຽວ­ຂ້ອງ ແລະ ຫົວ­ໜ່ວຍ​ທຸ­ລະ​ກິດ ເປັນ­ຕົ້ນ ພະ​ແນກ​ອຸດ­ສາ­ຫະ­ກຳ ແລະ ການ​ຄ້າ ນວ ບໍ­ລິ­ສັດ ເບຍ​ລາວ ໄດ້​ອອກ​ຂໍ້​ຕົກ­ລົງ​ວ້າ​ດ້ວຍ​ການ​ແຕ່ງ­ຕັ້ງ​ຄະ­ນະ​ບໍ­ລິ­ຫານ​ກຸ່ມ​ຜະ­ລິດ ແລະ ຈຳ­ໜ່າຍ​ເຂົ້າ ນວ ປະ­ກອບ​ມີ: ທ່ານ ທອງ​ສະ­ຫວັນ ມີ​ບຸນ ເປັນ​ປະ­ທານ​ກຸ່ມ ທ່ານ ສົມ​ພອນ ບຸດ​ຕະ​ວົງ ແລະ ທ່ານ ນາງ ບຸນ​ຮຽງ ພົມ​ມີ​ໄຊ ເປັນ​ຮອງ ການ​ກຳ­ນົດ​ເຂດ​ສົ່ງ­ເສີມ​ເມືອງ​ປາກ​ງື່ມ ມອບ​ໃຫ້​ໂຮງ­ສີ​ເຂົ້າ​ນາງ ບຸນ​ຮຽງ ພົມ​ມີ​ໄຊ ແລະ ໂຮງ­ສີ​ເຂົ້າ ສຸ­ທັດ ໄຊ​ທາ­ນີ​ມອບ​ໃຫ້​ໂຮງ­ສີ​ເຂົ້າ​ນາງ ຫຼຽນ​ຄຳ ຫາດ​ຊາຍ​ຟອງ​ມອບ​ໃຫ້​ບໍ­ລິ­ສັດ ພັນ​ເພັດ​ພັດ­ທະ­ນາ​ກະ­ສິ­ກຳ ແລະ ໂຮງ­ສີ​ເຂົ້າ​ຄູ​ພັນ ນາ​ຊາຍ​ທອງ​ມອບ​ໃຫ້​ບໍ­ລິ­ສັດ ຄຳ​ແພງ​ເພັດ ແຈ້ງ​ສະ­ຫວ່າງ.

    ສ່ວນ​ຂໍ້­ຄົງ­ຄ້າງ​ໃນ​ໄລ­ຍະ​ຜ່ານ​ມາ​ຂອງ​ໂຄງ­ການ ແມ່ນ​ວຽກ​ງານ​ໂຄ­ສະ­ນາ​ເຜີຍ­ແຜ່​ນະ­ໂຍ­ບາຍ​ລົງ​ເຖິງ​ຮາກ​ຖານ​ຜະ­ລິດ​ທີ່​ກວ້າງ­ຂວາງ​ຍັງ​ບໍ່​ທັນ​ທົ່ວ​ເຖິງ ແລະ ເປັນ​ຈຸດ​ສຸມ​ອັນ​ລະ­ອຽດ ບັນ­ດາ​ໂຮງ­ສີ​ເຂົ້າ​ທີ່​ຈະ​ດຳ­ເນີນ​ການ​ຊຸກ­ຍູ້​ສົ່ງ­ເສີມ​ການ​ປູກ​ເຂົ້າ­ຈ້າວ ຍັງ​ມີ​ລັກ­ສະ­ນະ​ເບົາ­ບາງ​ບໍ່​ໜັກ​ແໜ້ນ ຍ້ອນ​ນະ­ໂຍ­ບາຍ​ດ້ານ​ລາ­ຄາ​ເຂົ້າ​ສົ່ງ​ຂາຍ​ໂຮງ­ງານ​ຍັງ​ບໍ່​ທັນ​ແນ່­ນອນ ຊາວ­ນາ​ຍັງ​ມີ​ຄວາມ​ກັງ­ວົນ​ຕໍ່​ນະ­ໂຍ­ບາຍ​ຂອງ​ໂຮງ­ສີ​ເຂົ້າ​ທີ່​ລົງ​ໄປ​ເຮັດ​ການ​ຊຸກ­ຍູ້​ສົ່ງ­ເສີມ ໂດຍ​ສະ­ເພາະ ເວ­ລາ​ເກັບ​ຊື້​ລາ­ຄາ​ເຂົ້າ​ຕົກ­ຕ່ຳ​ບໍ່​ກຸ້ມ​ທຶນ​ຕໍ່​ທຶນ ແລະ ແຮງ​ງານ​ທີ່​ລົງ​ໄປ ການ​ແບ່ງ​ເຂດ​ຊຸກ­ຍູ້​ສົ່ງ­ເສີມ​ຂອງ​ໂຮງ­ສີ​ເຂົ້າ ຍັງ​ບໍ່​ທັນ​ມີ​ລັກ­ສະ­ນະ​ຕັດ­ສິນ​ຍັງ​ມີ​ການ​ທັບ​ຊ້ອນ​ໃນ​ການ​ສົ່ງ­ເສີມ​ບາງ​ຂົງ­ເຂດ.

ຂ່າວທີ່ກ່ຽວຂ້ອງ