ສີສັດຕະນາກ ສະຫຼອງວັນຢຶດອຳນາດ 23 ສິງຫາ

253 29 ສ.ຫ. 2019 ຂ່າວໜ້າ​ໜຶ່ງ
ສີສັດຕະນາກ ສະຫຼອງວັນຢຶດອຳນາດ 23 ສິງຫາ

    ອົງ­ການ​ປົກ­ຄອງ ເມືອງ​ສີ​ສັດ­ຕະ​ນາກ ນະ­ຄອນ­ຫຼວງ​ວຽງ​ຈັນ (ນວ) ໂຮມ​ຊຸມ­ນຸມ​ສະ­ເຫຼີມ­ສະ­ຫຼອງ​ວັນ​ຢຶດ​ອຳ­ນາດ ຄົບ­ຮອບ 44 ປີ (23 ສິງ­ຫາ 1975-23 ສິງ­ຫາ 2019) ຂຶ້ນ​ວັນ 23 ສິງ­ຫາ 2019 ຢູ່​ສວນ 23 ສິງ­ຫາ ໂດຍ​ມີ​ທ່ານ ບຸນ​ເມກ ວິ­ໄລ​ແສງ ຮອງ​ເຈົ້າ­ເມືອງ​ສີ​ສັດ­ຕະ​ນາກ ທ່ານ ສຸດ​ທະ­ນູ ຫຼວງ​ພົນ ປະ­ທານ​ກວດ­ກາ​ພັກ-ລັດ ເມືອງ​ສີ​ສັດ­ຕະ​ນາກ ພ້ອມ​ດ້ວຍ​ຄະ­ນະ​ພັກ ອົງ​ການ­ຈັດ­ຕັ້ງ​ມະ­ຫາ­ຊົນ ອຳ­ນາດ​ການ​ປົກ­ຄອງ ແລະ ປະ­ຊາ­ຊົນ ເຂົ້າ​ຮ່ວມ.

    ທ່ານ ບຸນ​ເມກ ວິ­ໄລ​ແສງ ໄດ້​ຍົກ​ໃຫ້​ເຫັນ​ການ​ລຸກ​ຮື​ຂຶ້ນ​ຕໍ່­ສູ້​ຂອງ​ປະ­ຊາ­ຊົນ​ລາວ​ຜູ້​ຮັກ​ຊາດ ຂະ​ບວນ​ການ​ຕໍ່­ສູ້​ຂອງ​ປະ­ຊາ­ຊົນ​ລາວ​ບັນ­ດາ­ເຜົ່າ ພາຍ​ໃຕ້​ການ​ຊີ້​ນຳ-ນຳ­ພາ​ຂອງ​ພັກ ປະ­ຊາ­ຊົນ ປະ­ຕິ­ວັດ​ລາວ​ແຕ່​ລະ​ໄລ­ຍະ ຕ້ານ​ພວກ​ຈັກ­ກະ­ພັດ​ລ່າ​ເມືອງ​ຂຶ້ນ​ທັງ​ເກົ່າ ແລະ ໃໝ່ ຈົນ​ເຖິງ​ໄລ­ຍະ​ສຳ­ເລັດ​ການ​ປະ­ຕິ­ວັດ​ຊາດ ປະ­ຊາ­ທິ­ປະ­ໄຕ ທົ່ວ​ປະ ເທດ ດ້ວຍ​ກຳ­ລັງ​ແຮງ​ສັງ​ລວມ​ຂອງ​ປວງ​ຊົນ​ລາວ​ທັງ​ຊາດ ແລະ ດຳ­ເນີນ​ໄປ​ໃນ​ເງື່ອນ­ໄຂ​ສັນ­ຕິ­ພາບ ພາຍ​ໃຕ້​ການ ນຳ­ພາ​ຂອງ​ພັກ​ປະ­ຊາ­ຊົນ ປະ­ຕິ­ວັດ​ລາວ ມະ­ຫາ­ຊົນ ຊັ້ນ​ຄົນ​ຕ່າງໆ​ຢູ່​ໃນ​ເຂດ​ສັດ­ຕູ ແລະ ເຂດ​ເປັນ­ກາງ ກຳ​ມະ ກອນ ຊາວ­ນາ ນັກ­ຮຽນ ນັກ​ສຶກ​ສາ ທຸກ​ຊັ້ນ​ຄົນ ໄດ້​ພ້ອມ​ກັນ​ລຸກ​ຮື​ຂຶ້ນ​ດ້ວຍ​ທ່າ​ແຂງ­ແຮງ ໃນ​ທົ່ວ​ປະ­ເທດ.

    ສະ­ເພາະ​ຢູ່ ນວ ວັນ​ທີ 23 ສິງ­ຫາ 1975 ຊາວ ນວ 20.000 ກວ່າ​ຄົນ ໄດ້​ໂຮມ​ຊຸມ­ນຸມ​ເພື່ອ​ຕ້ອນ­ຮັບ​ການ​ປະ­ກາດ​ສ້າງ­ຕັ້ງ​ວັນ​ຢຶດ​ອຳ­ນາດ​ການ​ປົກ­ຄອງ​ປະ­ຕິ­ວັດ ມາ​ເຖິງ​ວັນ​ທີ 2 ທັນ­ວາ 1975 ກອງ​ປະ­ຊຸມ​ໃຫຍ່​ຜູ້​ແທນ​ທົ່ວ​ປະ­ເທດ ໄດ້​ໄຂ​ຂຶ້ນ​ຢ່າງ​ສະ­ຫງ່າ​ຜ່າ​ເຜິຍ​ຢູ່ ນວ ຕົກ­ລົງ​ລົບ​ລ້າງ​ລະ­ບອບ​ລາ­ຊາ​ທິ​ປະ​ໄຕ ແລະ ສະ­ຖາ­ປະ­ນາ ເປັນ​ສາ­ທາ­ລະ­ນະ​ລັດ ປະ­ຊາ­ທິ­ປະ­ໄຕ ປະ­ຊາ­ຊົນ​ລາວ ກາຍ­ເປັນ​ໝາກ­ຜົນ​ຂອງ​ການ​ຕໍ່­ສູ້​ປະ­ຕິ­ວັດ ອັນ​ຍືດ​ເຍື້ອ​ຍາວ​ນານ ຂອງ​ປະ­ຊາ­ຊົນ​ລາວ​ບັນ­ດາ­ເຜົ່າ ແມ່ນ​ການ​ນຳ­ພາ​ຂອງ​ພັກ​ປະ­ຊາ­ຊົນ​ປະ­ຕິ­ວັດ​ລາວ ແມ່ນ​ໄຊ­ຊະ­ນະ​ຂອງ​ກຳ­ລັງ​ແຮງ​ສາ­ມັກ­ຄີ ເປັນ​ຈິດ​ໜຶ່ງ​ໃຈ​ດຽວ​ກັນ​ຂອງ​ປະ­ຊາ­ຊົນ​ລາວ​ທັງ​ຊາດ.

    ເພື່ອ​ສືບ­ຕໍ່​ເສີມ​ຂະ­ຫຍາຍ​ມູນ­ເຊື້ອ​ດັ່ງ­ກ່າວ ເຂົ້າ​ໃນ​ການ​ພັດ­ທະ­ນາ​ປະ­ເທດ​ຊາດ ເພີ່ມ​ທະ­ວີ​ສຶກ​ສາ​ອົບ­ຮົມ ສະ­ມາ­ຊິກ​ພັກ ພະ­ນັກ­ງານ ນັກ­ຮົບ ປະ­ຊາ­ຊົນ​ໃຫ້​ມີ​ຄວາມ​ຮູ້-ຄວາມ​ສາ­ມາດ ເຂົ້າ­ໃຈ​ກ່ຽວ​ກັບ​ມູນ­ເຊື້ອ 23 ສິງ­ຫາ ໃຫ້​ກວ້າງ­ຂວາງ ເລິກ­ເຊິ່ງ ເສີມ​ຂະ­ຫຍາຍ​ມູນ­ເຊື້ອ 23 ສິງ­ຫາ ເຂົ້າ​ໃນ​ຂະ​ບວນ​ການ­ເຄື່ອນ­ໄຫວ​ຈັດ​ຕັ້ງ​ປະ­ຕິ­ບັດ ມະ­ຕິ​ກອງ​ປະ­ຊຸມ​ໃຫຍ່​ຂອງ​ພັກ ເພີ່ມ​ທະ­ວີ​ການ​ຄຸ້ມ​ຄອງ​ລັດ-ຄຸ້ມ​ຄອງ​ສັງ­ຄົມ ດ້ວຍ​ກົດ­ໝາຍ​ໃຫ້​ມີ​ຄວາມ​ສັກ­ສິດ ເຊີດ​ຊູ​ນ້ຳ­ໃຈ​ເພິ່ງ​ຕົນ​ເອງ ກຸ້ມ​ຕົນ​ເອງ ແລະ ສ້າງ​ຄວາມ​ເຂັ້ມ­ແຂງ​ດ້ວຍ​ຕົນ​ເອງ ເອົາ­ໃຈ­ໃສ່​ປະ­ຕິ­ບັດ​ນະ­ໂຍ­ບາຍ​ການ​ຕ່າງ­ປະ­ເທດ​ຂອງ​ພັກ ແລະ ລັດ​ວາງ​ອອກ ໃຫ້​ຖືກ­ຕ້ອງ​ສອດ­ຄ່ອງ​ກັບ​ຄວາມ​ເປັນ​ຈິງ ການ​ຮ່ວມ​ມື​ຕ່າງ​ຝ່າຍ​ຕ່າງ​ໄດ້​ຮັບ​ຜົນ​ປະ­ໂຫຍດ.

ຂ່າວທີ່ກ່ຽວຂ້ອງ