ຂ່າວຫຼ້າສຸດ

ກຽມກຳລັງເຂົ້າລະບາຍລົດ 100 ກວ່າຈຸດ ໃນມື້ເປີດສົກຮຽນໃໝ່

183 29 ສ.ຫ. 2019 ຂ່າວໜ້າ​ໜຶ່ງ

    ເພື່ອ​ຮັບ­ປະ­ກັນ​ໃຫ້​ແກ່​ການ​ເປີດ​ສົກ­ຮຽນ​ໃໝ່ 2019-2020 ຂອງ​ກະ­ຊວງ​ສຶກ​ສາ​ທິ​ການ ແລະ ກີ­ລາ ກໍ​ຄື ພະ​ແນກ​ສຶກ​ສາ​ທິ​ການ ແລະ ກີ­ລາ ນະ­ຄອນ­ຫຼວງ​ວຽງ​ຈັນ (ນວ) ມີ​ຄວາມ​ສະ­ຫງົບ​ປອດ​ໄພ ແລະ ເປັນ​ລະ­ບຽບ​ຮຽບ​ຮ້ອຍ​ໃນ​ທຸກ​ດ້ານ ເພື່ອ​ຮັບ­ປະ­ກັນ​ຈຸດ­ປະ­ສົງ ແລະ ຄາດ­ໝາຍ​ຕິດ​ພັນ​ກັບ​ການ​ແກ້​ໄຂ​ຈະ­ລາ­ຈອນ​ແອ​ອັດ ແລະ ຈັດ​ຄວາມ​ເປັນ​ລະ­ບຽບ​ຕາມ​ເສັ້ນ­ທາງ. 

    ວັນ​ທີ 26 ສິງ­ຫາ 2019 ຢູ່​ຫ້ອງ​ຕຳ­ຫຼວດ ປກສ ນວ ໄດ້​ຈັດ​ກອງ​ປະ­ຊຸມ​ວາງ​ແຜນ​ບັນ­ຈຸ​ກຳ­ລັງ​ຂອງ​ພະ​ແນກ​ຕຳ­ຫຼວດ​ຈະ­ລາ­ຈອນ ນວ ລະ­ບາຍ​ການ​ສັນ­ຈອນ ເພື່ອ​ຕ້ອນ­ຮັບ​ການ​ເປີດ​ສົກ­ຮຽນ​ໃໝ່​ເປັນ​ປະ­ທານ​ຂອງ​ທ່ານ ພັທ ເພັງ​ສະ­ຫວັນ ທຳ​ມະ​ບູນ ຫົວ­ໜ້າ​ພະ​ແນກ​ຕຳ­ຫຼວດ​ຈະ­ລາ­ຈອນ ນວ ມີ​ທ່ານ ພັທ ບຸນ​ສອນ ພັນ­ທະ​ວົງ ຮອງ​ຫ້ອງ​ຕຳ­ຫຼວດ ປກສ ນວ ບັນ­ດາ​ຫົວ­ໜ້າ​ກອງ­ຮ້ອຍ​ຕຳ­ຫຼວດ​ຈະ­ລາ­ຈອນ​ເມືອງ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ສຳ­ລັບ​ກຳ­ລັງ​ປ້ອງ​ກັນ ມີ​ທັງ​ໝົດ 348 ຄົນ ມີ​ຈຸດ​ລະ­ບາຍ​ລົດ ທັງ​ໝົດ 119 ຈຸດ ໃນ​ນັ້ນ​ໂຮງ­ຮຽນ​ມີ 45 ຈຸດ ປ້ອມ 46 ປ້ອມ ແລະ ປະ­ຈຳ​ຢູ່​ຕາມ​ສາມ​ແຍກ​ສີ່​ແຍກ ແລະ ວົງ­ວຽນ 28 ຈຸດ ສະ­ນັ້ນ ເພື່ອ​ເຮັດ​ໃຫ້­ການ​ສັນ­ຈອນ​ມີ​ຄວາມ​ສະ­ດວກ ຄ່ອງ​ຕົວ ບໍ່​ແອ​ອັດ ແລະ ຫຼຸດ­ຜ່ອນ​ຈາກ​ການ​ເກີດ​ອຸ­ບັດ­ເຫດ​ໃນ​ໄລ­ຍະ​ເປີດ​ສົກ­ຮຽນ​ໃໝ່ ເຈົ້າ​ໜ້າ­ທີ່​ພະ​ແນກ​ຕຳ­ຫຼວດ​ຈະ­ລາ­ຈອນ ຈຶ່ງ​ໄດ້​ຮຽກ­ຮ້ອງ​ມາ​ຍັງ​ຜູ້​ທີ່​ໃຊ້​ລົດ​ໃຊ້​ຖະ­ໜົນ ຈົ່ງ​ປະ­ຕິ­ບັດ​ກົດ​ລະ­ບຽບ​ການ​ສັນ­ຈອນ​ທີ່​ວາງ​ອອກ​ໃຫ້​ເຂັ້ມ​ງວດ ເປັນ­ຕົ້ນ ໃຫ້​ມີ​ສະ­ຕິ​ທຸກ​ຄັ້ງ​ໃນ​ເວ­ລາ​ຂັບ​ຂີ່​ຄວນ​ໃຫ້​ກຽດ​ເຊິ່ງ​ກັນ ແລະ ກັນ ເມົາ​ແລ້ວ​ບໍ່​ຂັບ ຫ້າມ​ຂັບ​ຂີ່​ລົດ​ໄວ​ເກີນ​ກຳ­ນົດ ແລະ​ອື່ນໆ ເພາະ​ໄລ­ຍະ​ນີ້​ກ້າວ​ເຂົ້າ​ສູ່​ລະ­ດູ­ຝົນ ບາງ​ເສັ້ນ­ທາງ​ມີ​ນ້ຳ​ຖ້ວມ​ຂັງ ເປັນ​ຫຼຸມ ເປັນ​ບໍ່ ອັນ​ໄດ້​ເຮັດ​ໃຫ້­ການ​ສັນ­ຈອນ​ມີ​ຄວາມ​ລຳ­ບາກ ສັບ­ສົນ ແລະ ມັກ​ເກີດ​ອຸ­ບັດ­ເຫດ​ຢູ່​ເລື້ອຍໆ ຖ້າ​ທຸກ​ຄົນ​ຮ່ວມ​ມື​ກັນ​ປະ­ຕິ­ບັດ​ກົດ​ລະ­ບຽບ​ຢ່າງ​ຈິງ​ຈັງ ບັນ­ຫາ​ການ​ເກີດ​ອຸ­ບັດ­ເຫດ​ກໍ​ຈະ​ຫຼຸດ​ລົງ​ເທື່ອ​ລະ​ກ້າວ.

ຂ່າວທີ່ກ່ຽວຂ້ອງ