ຂ່າວຫຼ້າສຸດ

ປະຊາຊົນບ້ານບົວ ຫຼາຍຄອບຄົວໄດ້ໃບຕາດິນຖາວອນ

192 29 ສ.ຫ. 2019 ຂ່າວໜ້າ​ໜຶ່ງ
ປະຊາຊົນບ້ານບົວ ຫຼາຍຄອບຄົວໄດ້ໃບຕາດິນຖາວອນ

    ພິ­ທີ​ມອບ​ໃບ​ຕາ­ດິນ​ຖາ­ວອນ​ໃຫ້​ປະ­ຊາ­ຊົນ​ບ້ານ​ບົວ ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ (ນວ) ຈັດ​ຂຶ້ນ​ວັນ​ທີ 28 ສິງ­ຫາ 2019 ມີ​ທ່ານ ຄຳ​ຕັນ ແກ້ວ​ຫາ​ວົງ ຮອງ​ຫົວ­ໜ້າ​ພະ​ແນກ​ຊັບ​ພະ­ຍາ ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ ນວ ມີ​ທ່ານ ແສງ​ວິ­ໄລ ສີ​ລັດ­ຕະ­ນະ ວ່າ­ການ​ຫົວ­ໜ້າ​ຫ້ອງ­ການ​ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ ເມືອງ​ນາ​ຊາຍ​ທອງ ທ່ານ ສົມ​ພອນ ອຸດ­ຕະ­ມະ​ວັງ​ໂສ ນາຍ­ບ້ານ​ບົວ ພ້ອມ​ດ້ວຍ​ປະ­ຊາ­ຊົນ​ເຂົ້າ​ຮ່ວມ.

    ທ່ານ ຄຳ​ຕັນ ແກ້ວ​ຫາ​ວົງ ກ່າວ​ວ່າ: ໂຄງ­ການ​ອອກ​ທະ­ບຽນ​ໃບ​ຕາ­ດິນ​ຢູ່ ນວ ໄດ້​ເລີ່ມ​ຈັດ​ຕັ້ງ​ປະ­ຕິ­ບັດ ປີ 1995 ຈາກ​ນັ້ນ ໄດ້​ຂະ­ຫຍາຍ​ໄປ​ສູ່​ບັນ­ດາ​ເມືອງ​ຕ່າງໆ​ທົ່ວ ນວ ສະ­ເພາະ​ຢູ່​ເມືອງ​ນາ​ຊາຍ​ທອງ ໄດ້​ເລີ່ມ​ປີ 2003 ເປັນ­ຕົ້ນ​ມາ ແລະ ບ້ານ​ບົວ​ໄດ້​ຜ່ານ​ການ​ວັດ­ແທກ​ໃບ​ຕາ­ດິນ ປີ 2005 ຈາກ​ນັ້ນ ໄດ້​ສືບ­ຕໍ່​ແກ້​ໄຂ​ບັນ­ຫາ​ທີ່​ຍັງ​ຄົງ​ຄ້າງ ຈົນ​ມາ​ຮອດ​ປັດ­ຈຸ­ບັນ​ສາ­ມາດ​ຈັດ​ຕັ້ງ​ປະ­ຕິ­ບັດ​ວຽກ​ທີ່​ຍັງ​ຄົງ​ຄ້າງ​ໄດ້ ໂດຍ​ສະ­ເພາະ ວຽກ​ງານ​ຂຶ້ນ​ທະ­ບຽນ​ໃບ​ຕາ­ດິນ ນອກ​ນັ້ນ ເອ­ກະ­ສານ​ທີ່​ຍັງ​ຕົກ​ຄ້າງ​ຢູ່​ໃນ​ບ້ານ​ບົວ ຫຼື ເມືອງ​ນາ​ຊາຍ​ທອງ ຍັງ​ມີ​ຈຳ­ນວນ​ຫຼາຍ​ທີ່​ຍັງ​ບໍ່​ທັນ​ໄດ້​ຂຶ້ນ​ທະ­ບຽນ​ຕາ­ດິນ ເຊິ່ງ​ຈະ​ສືບ­ຕໍ່​ຈັດ​ຕັ້ງ​ປະ­ຕິ­ບັດ​ໃຫ້​ໄດ້​ຕາມ​ຕົວ​ເລກ​ແຜນ­ການ ໂດຍ​ສະ­ເພາະ ກະ­ຊວງ​ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ​ໄດ້​ມອບ​ຕົວ​ເລກ​ໃຫ້​ພະ​ແນກ​ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ ນວ ປີ 2019 ຈຳ­ນວນ 12.000 ຕອນ ໃຫ້​ຂຶ້ນ​ທະ­ບຽນ​ສຳ­ເລັດ​ຕາມ​ແຜນ­ການ​ວາງ​ໄວ້ ສຳ­ລັບ​ການ​ມອບ​ໃບ​ຕາ­ດິນ​ຖາ­ວອນ​ໃຫ້​ປະ­ຊາ­ຊົນ​ບ້ານ​ບົວ​ຄັ້ງ​ນີ້ 99 ຕອນ ໃນ​ຈຳ­ນວນ​ດິນ​ທັງ​ໝົດ 114 ຕອນ ໃນ​ນີ້ ມີ​ດິນ​ປຸກ​ສ້າງ ແລະ ດິນ​ກະ­ສິ­ກຳ ສ່ວນ​ທີ່​ຍັງ​ເຫຼືອ 14 ຕອນ ຍັງ​ຢູ່​ໃນ​ຂັ້ນ​ຕອນ​ຂຶ້ນ​ທະ­ບຽນ​ໃບ​ຕາ­ດິນ.

    ການ​ສຳ​ຫຼວດ​ວັດ­ແທກ​ຂຶ້ນ​ທະ­ບຽນ​ໃບ​ຕາ­ດິນ ຢູ່​ເມືອງ​ນາ​ຊາຍ​ທອງ ນັບ​ແຕ່​ປີ 2005 ຮອດ​ປັດ­ຈຸ­ບັນ ໄດ້​ພົບ​ຂໍ້​ຫຍຸ້ງ­ຍາກ​ຫຼາຍ​ບັນ­ຫາ ເປັນ­ຕົ້ນ ເນື້ອ­ທີ່​ດິນ​ທີ່​ລົງ​ສຳ​ຫຼວດ​ຕອນ​ໃຫຍ່ ເສັ້ນ­ທາງ​ເຂົ້າ​ບໍ່​ຮອດ ພ້ອມ​ດຽວ​ກັນ​ນີ້ ອຸ­ປະ­ກອນ​ຮັບ​ໃຊ້ ໂດຍ​ສະ­ເພາະ ເຄື່ອງ­ມື​ວັດ­ແທກ​ເນື້ອ­ທີ່​ດິນ ຫຼື ຈີ​ພີ​ເອ​ສ ມີ​ບໍ່​ພຽງ­ພໍ​ອັນ​ເປັນ​ສາ­ເຫດ​ຫຼັກ​ທີ່​ເຮັດ​ໃຫ້​ອອກ​ໃບ​ຕາ­ດິນ​ຊັກ​ຊ້າ.

ຂ່າວທີ່ກ່ຽວຂ້ອງ