ລັດຖະກອນຜູ້ໜຶ່ງ ຕ້ອງເຮັດຫຼາຍໜ້າວຽກ

403 28 ສ.ຫ. 2019 ຂ່າວໜ້າ​ໜຶ່ງ

    ທ່ານ ບຸນ​ໂຈມ ອຸ­ບົນ​ປະ­ເສີດ ຮອງ​ລັດ­ຖະ­ມົນ­ຕີ​ກະ­ຊວງ​ການ​ເງິນ ກ່າວ​ໃນ​ງານ​ສຳ​ມະ​ນາ​ເຜີຍ­ແຜ່​ແລກ­ປ່ຽນ​ບົດ­ຮຽນ ແລະ ລະ­ດົມ​ຄວາມ​ຄິດ​ເຫັນ​ເປີດ​ກວ້າງ ກ່ຽວ​ກັບ​ລະ­ບົບ​ບຳ­ລຸງ​ກໍ່­ສ້າງ​ພະ­ນັກ­ງານ-ລັດ­ຖະ­ກອນ ຂະ­ແໜງ­ການ​ເງິນ ຈັດ​ຂຶ້ນ​ວັນ​ທີ 22 ສິງ­ຫາ 2019 ວ່າ: ໂດຍ​ໄດ້​ແນະ­ນຳ​ໃຫ້​ກົມ​ຈັດ​ຕັ້ງ ແລະ ພະ­ນັກ­ງານ​ຂະ­ແໜງ­ການ​ກ່ຽວ­ຂ້ອງ​ຂອງ​ການ​ເງິນ ແກ້​ໄຂ​ຕົວ​ຊີ້​ວັດ​ກ່ຽວ​ກັບ​ຄຸນ­ຄ່າ​ຂອງ​ຄົນ​ສຳ­ລັບ​ໃຫ້​ໂອ­ກາດ​ຄົນ ແລະ ສຳ­ລັບ​ພັດ­ທະ­ນາ​ຄົນ ເພື່ອ​ແກ້​ໄຂ​ບັນ­ຫາ​ພະ­ນັກ­ງານ​ເຫຼືອ​ບໍ່​ພໍ ແກ້​ໄຂ​ພະ­ນັກ­ງານ​ໃຫ້​ໜ້ອຍ​ລົງ​ແຕ່​ເພີ່ມ​ໜ້າ​ວຽກ ແລະ ພະ­ນັກ­ງານ-ລັດ­ຖະ­ກອນ​ຄົນ​ໜຶ່ງ ຕ້ອງ​ຮັບ­ຜິດ­ຊອບ​ຫຼາຍ​ໜ້າ​ວຽກ ເພື່ອ​ຫຼຸດ­ຜ່ອນ​ການ​ຂໍ​ລັດ­ຖະ­ກອນ​ໃໝ່.

    ພະ­ນັກ­ງານ​ລັດ­ຖະ­ກອນ​ຢູ່​ລາວ​ມີ​ຫຼາຍ​ແຕ່​ທຽບ­ໃສ່​ມາດ­ຕະ­ຖານ​ແລ້ວ ຍັງ​ຕ້ອງ​ໄດ້​ປັບ­ປຸງ​ແກ້​ໄຂ ສຳ​ມະ​ນາ​ຄັ້ງ​ນີ້ ໃຫ້​ເອົາ­ໃຈ­ໃສ່​ໃນ​ການ​ປະ­ກອບ​ຄຳ​ຄິດ​ເຫັນ ເພື່ອ​ແກ້​ໄຂ​ສະ­ພາບ​ພະ­ນັກ­ງານ​ປະ­ຈຳ­ການ ດ້ວຍ​ການ​ຮຽນ​ໄລ­ຍະ​ສັ້ນ ໄລ­ຍະ​ກາງ ການ​ເຝິກ­ອົບ­ຮົມ​ຫົວ­ຂໍ້ ສະ­ເພາະ​ໃຫ້​ພະ­ນັກ­ງານ​ມີ​ຄວາມ​ເຂັ້ມ­ແຂງ ເພື່ອ​ຮອງ​ຮັບ​ບັນ­ຫາ​ທີ່​ຈະ​ປະ​ເຊີນ​ໃນ­ຕໍ່­ໜ້າ ຫັນ​ໄປ​ສູ່​ຄຸນ​ນະ​ພາບ ຫັນ​ການ​ຄຸ້ມ​ຄອງ​ໄປ​ສູ່​ລະ­ບົບ​ບໍ­ລິ­ຫານ​ໃຫ້​ມີ​ປະ​ສິດ­ທິ​ຜົນ ແລະ ນຳ​ໃຊ້​ເຄື່ອງ­ມື​ທີ່​ທັນ​ສະ­ໄໝ ໃນ​ການ​ຄຸ້ມ​ຄອງ​ບໍ­ລິ­ຫານ​ລັດ​ໃນ​ຂະ­ແໜງ­ການ​ເງິນ​ຍົກ​ສູງ​ປະ​ສິດ­ທິ​ຜົນ​ມາດ­ຕະ­ຖານ​ຄຸນ​ນະ​ພາບ​ພະ­ນັກ­ງານ​ປະ­ຈຳ­ການ ເຊິ່ງ​ການ​ປັບ­ປຸງ​ກົງ­ຈັກ ຕິດ​ພັນ​ກັບ​ການ​ປັບ­ປຸງ​ບຸ​ຄະ­ລາ​ກອນ​ເປັນ​ສິ່ງ​ສຳ­ຄັນ ທີ່​ຕ້ອງ​ໄດ້​ປັບ­ປຸງ​ແກ້​ໄຂ ໂດຍ​ສະ­ເພາະ ພະ­ນັກ­ງານ​ປະ­ຈຳ­ການ ຈາກ​ການ​ມີ​ຫຼາຍ​ຄົນ​ເຮັດ​ວຽກ ຕ້ອງ​ປັບ​ໃຫ້​ໜ້ອຍ​ລົງ ແຕ່​ເພີ່ມ​ໜ້າ​ວຽກ​ຫຼາຍ​ຂຶ້ນ ການ​ປັບ­ປຸງ​ກົງ­ຈັກ​ການ­ຈັດ­ຕັ້ງ​ເປັນ​ສິ່ງ​ທີ່​ສຳ­ຄັນ​ຫຼາຍ ປັດ­ຈຸ­ບັນ ຂະ­ແໜງ­ການ​ເງິນ​ພະ­ນັກ­ງານ​ແຕ່​ຂົງ­ເຂດ​ຍັງ​ບໍ່​ມີ​ຄວາມ​ດຸ່ນ​ດ່ຽງ​ກັນ ສ່ວນ​ຫຼາຍ​ແມ່ນ​ຢູ່​ຂະ­ແໜງ​ລາຍ​ຮັບ ແຕ່​ຂາດ​ຢູ່​ຂົງ­ເຂດ​ຄຸ້ມ​ຄອງ​ລາຍ​ຈ່າຍ ແລະ ຂົງ­ເຂດ​ຕິດ­ຕາມ​ກວດ­ກາ ເຮັດ​ໃຫ້­ການ​ບໍ­ລິ­ຫານ​ການ​ເງິນ​ຂາດ​ສະ­ພາບ​ຄ່ອງ.

    ສິ່ງ​ສຳ­ຄັນ​ຕ້ອງ​ເລີ່ມ​ແກ້​ໄຂ​ທີ່​ພະ­ນັກ­ງານ​ຜູ້​ທີ່​ປະ­ຕິ­ບັດ​ວຽກ​ງານ​ຕົວ​ຈິງ ໂດຍ​ສະ­ເພາະ ຕ້ອງ​ແກ້​ໄຂ​ການ​ກຳ­ນົດ​ຕົວ​ຊີ້​ວັດ ກ່ຽວ​ກັບ​ຄຸນ­ຄ່າ​ຂອງ​ຄົນ​ສຳ­ລັບ​ໃຫ້​ໂອ­ກາດ​ຄົນ ແລະ ສຳ­ລັບ​ພັດ­ທະ­ນາ​ຄົນ ໃນ​ນີ້ ຕ້ອງ​ເນັ້ນ​ໃສ່​ພັດ­ທະ­ນາ​ຄົນ​ໃຫ້​ຮູ້­ຈັກ​ວິ­ທີ​ການ​ແກ້​ໄຂ​ບັນ­ຫາ​ໃນ​ໜ່ວຍ​ງານ ກົມ​ກອງ​ຂອງ​ຕົນ ໂດຍ​ສະ­ເພາະ ບັນ­ຫາ​ຄວາມ​ຫຍຸ້ງ­ຍາກ​ໃນ​ການ­ຈັດ­ຕັ້ງ​ປະ­ຕິ­ບັດ​ງົບ­ປະ­ມານ​ໃນ​ປັດ­ຈຸ­ບັນ ເຊິ່ງ​ເປັນ​ບັນ­ຫາ​ທີ່​ຕ້ອງ​ໄດ້​ແກ້​ໄຂ​ຢ່າງ​ຮີບ​ດ່ວນ ທັງ​ສ້າງ​ຄົນ​ໃຫ້​ມີ​ນ້ຳ­ໃຈ​ຮັບ​ໃຊ້​ຊາດ ຮັບ​ໃຊ້​ປະ­ຊາ­ຊົນ ມີ​ຈັນ​ຍາ​ບັນ​ອົດ­ທົນ​ເອື້ອ​ເຝື້ອ​ເພື່ອ​ແຜ່ ສ້າງ​ຄົນ​ໃຫ້​ຮູ້​ປັບ​ປ່ຽນ​ໄປ​ຕາມ​ສະ­ພາບ​ການ​ທີ່​ປ່ຽນ­ແປງ​ໃໝ່ ສຸມ​ໃສ່​ພ້ອມ​ກັນ​ອັດ​ຊ່ອງ​ວ່າງ​ແກ້​ໄຂ​ການ​ຮົ່ວ​ໄຫຼ​ການ​ເກັບ ແລະ ມອບ​ໃຫ້​ງົບ­ປະ­ມານ​ຢ່າງ​ຄົບ​ຖ້ວນ ສ້າງ​ຄົນ​ໃຫ້​ຮູ້​ພັດ­ທະ­ນາ​ເພື່ອ​ໃຫ້​ເບິ່ງ​ກວ້າງ​ໄກ ມີ​ວິ­ໄສ​ທັດ​ເພື່ອ​ແກ້​ໄຂ​ບັນ­ຫາ​ປັດ­ຈຸ­ບັນ ສະ­ເພາະ​ໜ້າ ແລະ ຍາວ​ນານ ເພື່ອ​ຮອງ​ຮັບ​ສິ່ງ​ທ້າ​ທາຍ​ໃໝ່ ປັບ­ປຸງ​ການ​ຮັບ​ພະ­ນັກ­ງານ ໂດຍ​ເນັ້ນ​ໃສ່​ຄຸນ​ນະ​ພາບ​ການ​ສຶກ​ສາ​ເປັນ​ສຳ­ຄັນ ເພື່ອ​ປະ­ກອບ​ໃສ່​ໜ້າ​ວຽກ​ໃຫ້​ຖືກ­ຕ້ອງ ແລະ ຄວາມ​ສາ­ມາດ​ຢ່າງ​ແທ້​ຈິງ.

ຂ່າວທີ່ກ່ຽວຂ້ອງ