ສ້າງຄວາມເຂົ້າໃຈ ກົນໄກສະໜອງຄຳຄິດເຫັນຂອງປະຊາຊົນ

424 28 ສ.ຫ. 2019 ຂ່າວໜ້າ​ໜຶ່ງ
ສ້າງຄວາມເຂົ້າໃຈ ກົນໄກສະໜອງຄຳຄິດເຫັນຂອງປະຊາຊົນ

    ກອງ​ປະ­ຊຸມ​ວິ­ຊາ​ການ​ຂອງ​ໜ່ວຍ​ງານ​ດ້ານ​ການ​ປົກ­ຄອງ ຈັດ​ຂຶ້ນ​ວັນ​ທີ 26 ສິງ­ຫາ 2019 ຢູ່​ບໍ­ລິ­ສັດ​ລັດ​ວິ​ສາ​ຫະ​ກິດ​ໄຟ­ຟ້າ​ລາວ ເປັນ​ປະ­ທານ​ຮ່ວມ​ຂອງ​ທ່ານ ນິ­ສິດ ແກ້ວ​ປັນ­ຍາ ຫົວ­ໜ້າ​ກົມ​ແຜນ­ການ ແລະ ການ​ຮ່ວມ​ມື ກະ­ຊວງ​ພາຍ​ໃນ ທ່ານ ບາ​ລາ​ສຸບ​ຣາ​ນຽມ ໂມ​ຣາ​ລີ ຮອງ​ຜູ້­ຕາງ­ໜ້າ​ອົງ­ການ​ສະ­ຫະ​ປະ­ຊາ​ຊາດ​ເພື່ອ​ການ​ພັນ­ທະ​ນາ ແລະ ທ່ານ ນາງ ມິ­ຄາ ຮາ​ຣາ​ຣິ ຫົວ­ໜ້າ​ແຜນ​ງານ​ດ້ານ​ປົກ­ຄອງ ອົງ­ການ​ຮ່ວມ​ມື ດ້ານ​ການ​ພັດ­ທະ­ນາ​ຂອງ​ປະ­ເທດ​ສະ​ວິດ ມີ​ຜູ້­ຕາງ­ໜ້າ​ຈາກ​ສະ­ພາ​ແຫ່ງ​ຊາດ ສະ­ພາ​ປະ­ຊາ­ຊົນ​ແຂວງ ກະ ຊວງ ສະ­ຖານ­ທູດ ອົງ­ການ​ຄູ່​ຮ່ວມ​ພັດ­ທະ­ນາ ແລະ ອົງ​ການ­ຈັດ­ຕັ້ງ​ທາງ​ສັງ­ຄົມ​ເຂົ້າ​ຮ່ວມ.

    ເພື່ອ​ເປັນ​ການ​ປຶກ­ສາ​ຫາ­ລື ແລະ ແລກ­ປ່ຽນ​ຄຳ​ຄິດ​ຄຳ​ເຫັນ​ກ່ຽວ​ກັບ​ບົດ­ບາດ​ຂອງ​ສະ­ພາ​ແຫ່ງ​ຊາດ ແລະ ສະ­ພາ​ປະ­ຊາ­ຊົນ​ຂັ້ນ​ແຂວງ ກ່ຽວ​ກັບ​ການ​ຮັບ​ຟັງ​ຄຳ​ຄິດ​ເຫັນ​ຂອງ​ປະ­ຊາ­ຊົນ ເປັນ­ຕົ້ນ ການ​ສ້າງ​ຄວາມ​ເຂົ້າ­ໃຈ​ກ່ຽວ​ກັບ​ກົນ​ໄກ​ສາຍ​ພົວ­ພັນ ລະ­ຫວ່າງ​ສະ­ພາ​ແຫ່ງ​ຊາດ ສະ­ພາ​ປະ­ຊາ­ຊົນ ແຂວງ ລັດ­ຖະ­ບານ ແລະ ປະ­ຊາ­ຊົນ ເນັ້ນ​ໜັກ​ກົນ​ໄກ​ຕອບ​ສະ­ໜອງ​ຄຳ​ຄິດ​ເຫັນ​ຂອງ​ປະ­ຊາ­ຊົນ​ທີ່​ມີ​ໃນ​ປັດ­ຈຸ­ບັນ (ເຄື່ອງ­ມື​ໃນ​ການ​ສື່­ສານ ເຊັ່ນ: ສາຍ​ດ່ວນ ການ​ຮັບ​ຄຳ​ຮ້ອງ­ທຸກ ແລະ​ອື່ນໆ) ມີ​ຈຸດ​ດີ ຈຸດ​ອ່ອນ ສິ່ງ​ທ້າ​ທາຍ ຄວາມ​ຈຳ­ເປັນ ແລະ ບົດ­ຮຽນ​ທີ່​ຖອດ​ຖອນ​ໄດ້​ແນວ­ໃດ ແລະ ການ​ສ້າງ​ແຜນ​ໃນ­ຕໍ່­ໜ້າ ເພື່ອ​ເຮັດ​ໃຫ້­ການ​ຕອບ​ສະ­ໜອງ​ຄຳ​ຄິດ​ເຫັນ​ຂອງ​ປະ­ຊາ­ຊົນ​ມີ​ປະ­ສິດ­ທິ­ພາບ ແລະ ປະ​ສິດ­ທິ​ຜົນ​ດີ​ກວ່າ​ເກົ່າ.

    ນອກ​ນີ້ ຜູ້​ເຂົ້າ​ຮ່ວມ​ຍັງ​ໄດ້​ສົນ­ທະ­ນາ​ກັບ​ການ​ມີ​ສ່ວນ​ຮ່ວມ​ຂອງ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ຈາກ​ພາກ­ສ່ວນ​ຕ່າງໆ​ໃນ​ສັງ­ຄົມ ເຊິ່ງ​ໄດ້​ແລກ­ປ່ຽນ​ປະ­ສົບ​ການ ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ​ຖະ ກິດ-ສັງ­ຄົມ ຄັ້ງ​ທີ 8 ກ່ຽວ​ກັບ​ການ​ມີ​ສ່ວນ​ຮ່ວມ​ຂອງ​ປະ­ຊາ­ຊົນ ແລະ ຂໍ້​ແນະ­ນຳ​ສຳ­ລັບ​ແຜນ​ຄັ້ງ​ຕໍ່​ໄປ ການ​ສ້າງ​ຄວາມ​ເຂົ້າ­ໃຈ​ກ່ຽວ​ກັບ​ກົນ​ໄກ​ການ​ມີ​ສ່ວນ​ຮ່ວມ​ຈາກ​ທຸກ​ພາກ­ສ່ວນ​ໃນ​ສັງ­ຄົມ ໃນ​ການ​ສ້າງ​ແຜນ​ເສດ​ຖະ ກິດ-ສັງ­ຄົມ ຄັ້ງ​ທີ 9 (2021-2025) ເພື່ອ​ບັນ­ລຸ​ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ ແລະ ບັນ­ລຸ​ບຸ­ລິ​ມະ ສິດ​ກ່ຽວ​ກັບ​ວຽກ​ງານ​ດ້ານ​ການ​ປົກ­ຄອງ​ທີ່​ຈະ​ສະ­ເໜີ​ໃນ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ຄັ້ງ​ທີ 9.

ຂ່າວທີ່ກ່ຽວຂ້ອງ