ມອບ-ຮັບ ສິ່ງເສດເຫຼືອຂອງທະຫານອາເມຣິກາ

379 28 ສ.ຫ. 2019 ຂ່າວໜ້າ​ໜຶ່ງ
ມອບ-ຮັບ ສິ່ງເສດເຫຼືອຂອງທະຫານອາເມຣິກາ

    ວັນ​ທີ 26 ສິງ­ຫາ 2019 ທີ່​ສະ­ໜາມ​ບິນ​ສາ­ກົນ​ວັດ​ໄຕ ນະ­ຄອນ­ຫຼວງ​ວຽງ​ຈັນ ໄດ້​ມີ​ການ​ຈັດ​ພິ­ທີ ມອບ-ຮັບ ສິ່ງ​ເສດ​ເຫຼືອ​ຂອງ​ທະ­ຫານ​ອາ​ເມ​ຣິ​ກາ ທີ່​ຫາຍ​ສາບ​ສູນ​ໃນ​ປາງ​ສົງ­ຄາມ​ຢູ່​ລາວ ຊຶ່ງ​ສິ່ງ​ເສດ​ເຫຼືອ​ດັ່ງ­ກ່າວ​ແມ່ນ​ຜົນ­ສຳ­ເລັດ​ທີ່​ໄດ້​ຮັບ​ຈາກ​ການ​ປະ­ຕິ­ບັດ​ງານ​ຮ່ວມ ຢູ່​ພາກ​ສະ­ໜາມ​ຂອງ​ຄະ­ນະ​ວິ­ຊາ​ການ ລາວ-ອາ​ເມ​ຣິ​ກາ ໃນ​ວຽກ​ງານ​ສຳ​ຫຼວດ ແລະ ຂຸດ​ຄົ້ນ​ເພື່ອ​ຊອກ​ຫາ​ຮ່ອງ­ຮອຍ ແລະ ສິ່ງ​ເສດ​ເຫຼືອ​ຂອງ​ທະ­ຫານ​ອາ​ເມ​ຣິ​ກາ ທີ່​ຫາຍ​ສາບ​ສູນ​ໃນ​ປາງ​ສົງ­ຄາມ​ຢູ່​ລາວ (MIA) ຄັ້ງ​ທີ 5 ປະ­ຈຳ​ປີ 2018-2019 ຢູ່ ເຂດ​ເມືອງ​ວຽງ​ໄຊ ແຂວງ​ຫົວ­ພັນ.

    ການ­ຈັດ­ຕັ້ງ​ພິ­ທີ ມອບ-ຮັບ ສິ່ງ​ເສດ​ເຫຼືອ​ຂຶ້ນ​ໃນ​ຄັ້ງ​ນີ້ ໂດຍ​ຕາງ­ໜ້າ​ໃຫ້​ແກ່​ລັດ­ຖະ­ບານ ແຫ່ງ ສາ­ທາ­ລະ­ນະ​ລັດ ປະ­ຊາ ທິ​ປະ​ໄຕ ປະ­ຊາ­ຊົນ​ລາວ ແມ່ນ​ທ່ານ ແສງ​ເພັດ ຮຸ່ງ​ບຸນ​ຍວງ ຮອງ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ຜູ້​ຊີ້​ນຳ​ວຽກ​ງານ​ສຳ​ຫຼວດ ແລະ ຂຸດ​ຄົ້ນ ເພື່ອ​ຊອກ​ຫາ​ຮ່ອງ­ຮອຍ ແລະ ສິ່ງ​ເສດ​ເຫຼືອ​ຂອງ​ທະ­ຫານ​ອາ​ເມ​ຣິ​ກາ ທີ່​ຫາຍ​ສາບ​ສູນ​ໃນ​ປາງ​ສົງ­ຄາມ​ຢູ່​ລາວ ເປັນ​ກຽດ​ເຂົ້າ​ຮ່ວມ ແລະ ທັງ​ເປັນ​ຜູ້​ກ່າວ​ມອບ ຕາງ­ໜ້າ​ໃຫ້​ແກ່​ລັດ­ຖະ­ບານ ສະ­ຫະ­ລັດ​ອາ​ເມ​ຣິ​ກາ ແມ່ນ​ທ່ານ​ນາງ Rena Bitter ເອກ​ອັກ​ຄະ​ລັດ​ຖະ​ທູດ ສະ­ຫະ­ລັດ​ອາ​ເມ​ຣິ​ກາ ປະ­ຈຳ ສປປ ລາວ  ມີ​ພາກ­ສ່ວນ​ກ່ຽວ­ຂ້ອງ ບັນ­ດາ​ພະ­ນັກ­ງານ​ວິ­ຊາ​ການ​ສອງ​ຝ່າຍ ລາວ-ອາ​ເມ​ຣິ​ກາ ທີ່​ເຮັດ​ວຽກ​ຕົວ​ຈິງ​ໃນ​ພາກ​ສະ­ໜາມ  ການ​ສຳ​ຫຼວດ ແລະ ຂຸດ​ຄົ້ນ​ຄັ້ງ​ນີ້ ໄດ້​ຄົ້ນ​ພົບ​ສິ່ງ​ເສດ​ເຫຼືອ​ຂອງ​ທະ­ຫານ​ອາ​ເມ​ຣິ​ກາ ຢູ່​ໃນ 2 ກໍ­ລະ­ນີ ຢູ່​ເຂດ​ບ້ານ​ນາ​ແທ່ນ ເມືອງ​ວຽງ​ໄຊ ແຂວງ​ຫົວ­ພັນ.

    ຕະ­ຫຼອດ​ໄລ­ຍະ​ເວ­ລາ 30 ກວ່າ​ປີ ແຫ່ງ​ການ​ຮ່ວມ​ມື​ສອງ​ຝ່າຍ ລາວ-ອາ​ເມ​ຣິ​ກາ ໃນ​ການ​ດຳ­ເນີນ​ວຽກ​ງານ​ສຳ​ຫຼວດ ແລະ ຂຸດ​ຄົ້ນ ເພື່ອ​ຊອກ​ຫາ​ສິ່ງ​ເສດ​ເຫຼືອ​ຂອງ​ທະ­ຫານ​ອາ​ເມ​ຣິ​ກາ ທີ່​ຫາຍ​ສາບ​ສູນ​ໃນ​ປາງ​ສົງ­ຄາມ​ຢູ່​ລາວ ລັດ­ຖະ­ບານ ແຫ່ງ ສປປ ລາວ ກໍ​ຄື ປະ­ຊາ­ຊົນ​ລາວ​ບັນ­ດາ­ເຜົ່າ ໂດຍ​ສະ­ເພາະແມ່ນ​ພໍ່​ແມ່​ປະ­ຊາ­ຊົນ​ໃນ​ຂົງ­ເຂດ​ທີ່​ມີ​ການ​ສຳ​ຫຼວດ ແລະ ຂຸດ​ຄົ້ນ​ຕົວ​ຈິງ ໄດ້​ໃຫ້​ຄວາມ​ເອົາ­ໃຈ­ໃສ່​ຮ່ວມ​ມື​ກັບ​ຝ່າຍ​ອາ​ເມ​ຣິ​ກາ​ຫຼາຍ​ທີ່​ສຸດ ເທົ່າ​ທີ່​ຈະ​ເປັນ​ໄປ​ໄດ້​ຕາມ​ເງື່ອນ­ໄຂ ແລະ ຄວາມ​ອາດ​ສາ­ມາດ​ຕົວ​ຈິງ​ຂອງ​ຕົນ ອັນ​ໄດ້​ເຮັດ​ໃຫ້­ການ​ປະ­ຕິ­ບັດ​ງານ​ຮ່ວມ​ສອງ​ຝ່າຍ (JFAs) ໄດ້​ຮັບ​ຜົນ­ສຳ­ເລັດ​ທີ່​ເປັນ​ໜ້າ​ເພິ່ງ​ພໍ­ໃຈ.

    ນັບ​ແຕ່​ມີ​ການ​ຮ່ວມ​ມື​ກັນ​ເພື່ອ​ດຳ­ເນີນ​ການ​ສຳ​ຫຼວດ ແລະ ຂຸດ​ຄົ້ນ ເພື່ອ​ຊອກ​ຫາ​ສິ່ງ​ເສດ​ເຫຼືອ​ຂອງ​ທະ­ຫານ​ອາ​ເມ​ຣິ​ກາ ທີ່​ຫາຍ​ສາບ​ສູນ​ໃນ​ປາງ​ສົງ­ຄາມ​ຢູ່​ລາວ ຈົນ​ມາ​ຮອດ​ປັດ­ຈຸ­ບັນ ສອງ​ຝ່າຍ​ໄດ້​ຂຸດ​ຄົ້ນ​ພົບ​ສິ່ງ​ເສດ​ເຫຼືອ​ທະ­ຫານ​ອາ​ເມ​ຣິ​ກາ ໄດ້​ຈັດ​ສົ່ງ ແລະ ສັນ​ລະ​ສູດ​ວ່າ ແມ່ນ​ສິ່ງ​ເສດ​ເຫຼືອ​ຂອງ​ທະ­ຫານ​ອາ​ເມ​ຣິ​ກາ​ແທ້ ຈຳ­ນວນ 287 ຄົນ ຫຼື ເທົ່າ​ກັບ 50% ຂອງ​ຈຳ­ນວນ​ທັງ​ໝົດ ແລະ ຍັງ​ອີກ 286 ຄົນ.

ຂ່າວທີ່ກ່ຽວຂ້ອງ