ຂ່າວຫຼ້າສຸດ

ນວ-ນະຄອນໂຮ່ຈີມິງ ຕີລາຄາການພົວພັນຮ່ວມມືວຽກງານແນວໂຮມ

319 28 ສ.ຫ. 2019 ຂ່າວໜ້າ​ໜຶ່ງ
ນວ-ນະຄອນໂຮ່ຈີມິງ ຕີລາຄາການພົວພັນຮ່ວມມືວຽກງານແນວໂຮມ

    ພິ­ທີ​ພົບ​ປະ​ແລກ­ປ່ຽນ​ລະ­ຫວ່າງ​ຄະ­ນະ​ກຳ­ມະ­ການ​ແນວ​ລາວ​ສ້າງ​ຊາດ ນະ­ຄອນ­ຫຼວງ​ວຽງ​ຈັນ (ນວ) ແລະ ຄະ­ນະ​ກຳ­ມະ­ການ​ແນວ​ໂຮມ​ແຫ່ງ​ຊາດ​ຫວຽດ­ນາມ ນະ­ຄອນ​ໂຮ່​ຈີ​ມິງ ຈັດ​ຂຶ້ນ​ວັນ​ທີ 26 ສິງ­ຫາ 2019 ທີ່​ຫ້ອງ​ວ່າ­ການ​ປົກ­ຄອງ ນວ ມີ​ທ່ານ ບຸນ​ທ່ຽງ ຂຸນ​ສີ ປະ­ທານ​ແນວ​ລາວ​ສ້າງ​ຊາດ ນວ ທ່ານ ເຈີ່ນ​ຮິ້ວ ເຝືອກ ຮອງ​ປະ­ທານ​ແນວ​ໂຮມ​ແຫ່ງ​ຊາດ​ຫວຽດ­ນາມ ນະ­ຄອນ​ໂຮ່​ຈີ​ມິງ ແລະ ພາກ­ສ່ວນ​ກ່ຽວ ຂ້ອງ​ສອງ​ຝ່າຍ​ເຂົ້າ​ຮ່ວມ.

    ການ​ພົບ​ປະ​ຄັ້ງ​ນີ້ ເປັນ​ການ​ສະ­ຫຼຸບ​ຕີ​ລາ­ຄາ​ໝາກ­ຜົນ​ແຫ່ງ​ການ​ຜັນ​ຂະ­ຫຍາຍ​ປະ­ຕິ­ບັດ​ເນື້ອ​ໃນ ບົດ​ບັນ­ທຶກ​ຊ່ວຍ​ຈຳ​ການ​ຮ່ວມ​ມື ລະ­ຫວ່າງ​ສອງ​ອົງ​ການ­ຈັດ­ຕັ້ງ​ແນວ​ໂຮມ​ຂອງ​ສອງ​ນະ­ຄອນ ແຕ່​ປີ 2016-2019 ແລະ ການ​ຜັນ​ຂະ­ຫຍາຍ​ເນື້ອ​ໃນ​ແຜນ­ການ​ທິດ​ທາງ​ໃນ​ຊຸມ​ປີ​ຕໍ່­ໜ້າ ເພື່ອ​ແນ­ໃສ່​ສືບ­ຕໍ່​ການ​ເພີ່ມ​ພູມ​ຄູນ​ສ້າງ​ສາຍ​ພົວ­ພັນ​ມິດ­ຕະ­ພາບ​ທີ່​ເປັນ​ມູນ­ເຊື້ອ​ການ​ຮ່ວມ​ມື​ແບບ​ພິ­ເສດ ແລະ ຮອບ­ດ້ານ ລະ­ຫວ່າງ​ລາວ-ຫວຽດ­ນາມ ກໍ​ຄື ສອງ​ອົງ​ການ­ຈັດ­ຕັ້ງ​ແນວ​ໂຮມ​ໃນ​ການ​ພົບ​ປະ​ແລກ­ປ່ຽນ​ວຽກ​ງານ​ເຊິ່ງ​ກັນ ແລະ​ກັນ​ໃຫ້​ມີ​ຄວາມ​ແໜ້ນ​ແຟ້ນ​ຍິ່ງ​ຂຶ້ນ.

    ທ່ານ ບຸນ​ທ່ຽງ ຂຸນ​ສີ ກ່າວ​ວ່າ: ຜ່ານ​ການ­ຈັດ­ຕັ້ງ​ປະ­ຕິ­ບັດ​ບົດ​ບັນ­ທຶກ​ໃນ 3 ປີ­ຜ່ານ­ມາ ສອງ​ຝ່າຍ​ສາ­ມາດ​ຍາດ​ໄດ້​ຜົນ­ສຳ­ເລັດ​ທີ່​ເປັນ​ພື້ນ­ຖານ ອັນ​ສະ­ແດງ​ເຖິງ​ຂີດ​ໝາຍ​ສຳ­ຄັນ ແລະ ເປັນ​ສັນ­ຍາ​ລັກ​ແຫ່ງ​ການ​ເສີມ​ຂະ­ຫຍາຍ​ສາຍ​ພົວ­ພັນ​ມິດ­ຕະ­ພາບ​ທີ່​ເປັນ​ມູນ­ເຊື້ອ ເຊັ່ນ: ໄດ້​ເຜີຍ­ແຜ່​ເຊື່ອມ​ຊຶມ​ຜັນ​ຂະ­ຫຍາຍ ກ່ຽວ​ກັບ​ການ​ເດີນ­ທາງ​ໄປ​ຮ່ວມ​ພົບ​ປະ​ແລກ­ປ່ຽນ​ບົດ­ຮຽນ​ຢູ່ ນະ­ຄອນ​ໂຮ່​ຈີ​ມິງ ໃຫ້​ຄະ­ນະ​ກຳ­ມະ­ການ​ແນວ​ລາວ​ສ້າງ​ຊາດ ນວ ເມືອງ ບ້ານ ຕະ­ຫຼອດ​ຮອດ​ປະ­ຊາ­ຊົນ​ບັນ­ດາ­ເຜົ່າ​ໄດ້​ຮັບ​ຮູ້ ແລະ ເຂົ້າ­ໃຈ​ເຖິງ​ສາຍ​ພົວ­ພັນ​ແບບ​ພິ­ເສດ ລາວ-ຫວຽດ­ນາມ ແລະ ຫວຽດ­ນາມ-ລາວ ຢ່າງ​ກວ້າງ­ຂວາງ ໄດ້​ຈັດ​ການ­ສະ­ແດງ​ສິ­ລະ​ປະ​ວັນ­ນະ­ຄະ­ດີ​ຂອງ​ລາວ ແລະ ຫວຽດ­ນາມ ເພື່ອ​ເປັນ​ການ​ແລກ­ປ່ຽນ​ດ້ານ​ວັດ­ທະ­ນະ­ທຳ ວາງ­ສະ­ແດງ​ຮູບ​ພາບ​ການ­ເຄື່ອນ­ໄຫວ​ຜ່ານ​ມາ ງານ​ຕະ­ຫຼາດ­ນັດ​ສົ່ງ­ເສີມ​ສິນ­ຄ້າ​ຂອງ​ສອງ​ປະ­ເທດ ແລະ ຈັດ​ກິດ­ຈະ­ກຳ​ຮ່ວມ​ກັນ​ສະ­ເຫຼີມ­ສະ­ຫຼອງ​ວັນ​ສຳ­ຄັນ​ຕ່າງໆ​ຂອງ​ຊາດ ສືບ­ຕໍ່​ແລກ­ປ່ຽນ​ຜູ້​ແທນ​ຂັ້ນ​ສູງ ຊຸກ­ຍູ້​ໃຫ້​ຄະ­ນະ​ວິ­ຊາ​ການ​ຂັ້ນ​ຕ່າງໆ ໃຫ້​ມີ​ການ​ພົບ​ປະ​ແລກ­ປ່ຽນ​ບົດ­ຮຽນ​ເຊິ່ງ​ກັນ ແລະ ກັນ​ຫຼາຍ​ຂຶ້ນ.

   ນອກ​ນັ້ນ ແນວ​ໂຮມ​ນະ­ຄອນ​ໂຮ່​ຈີ​ມິງ ຍັງ​ຊ່ວຍ­ເຫຼືອ​ຄອບ­ຄົວ​ທຸກ​ຍາກ 100 ຄອບ­ຄົວ ຢູ່​ເມືອງ​ສັງ​ທອງ ມູມ​ຄ່າ 100 ລ້ານ​ດົງ ຫຼື ປະ­ມານ 30 ລ້ານ​ກີບ ປັດ­ຈຸ­ບັນ ຄອບ­ຄົວ​ດັ່ງ­ກ່າວ​ໄດ້​ມີ​ຊີ­ວິດ​ການ​ເປັນ​ຢູ່​ດີ​ຂຶ້ນ​ເປັນ​ກ້າວໆ.

ຂ່າວທີ່ກ່ຽວຂ້ອງ