ຂ່າວຫຼ້າສຸດ

ICBC ມອບຄອມພິວເຕີ ໃຫ້ກະຊວງ ສສກ ພະແນກ ສສກ ນວ ແລະ 11 ໂຮງຮຽນ

210 28 ສ.ຫ. 2019 ຂ່າວໜ້າ​ໜຶ່ງ
ICBC ມອບຄອມພິວເຕີ ໃຫ້ກະຊວງ ສສກ ພະແນກ ສສກ ນວ ແລະ 11 ໂຮງຮຽນ

    ທະ­ນາ­ຄານ​ອຸດ­ສາ­ຫະ­ກຳ ແລະ ການ​ຄ້າ ສປ ຈີນ ຈຳ­ກັດ (ICBC) ສາ­ຂາ ນະ­ຄອນ­ຫຼວງ​ວຽງ​ຈັນ (ນວ) ນຳ​ຄອມ​ພິວ​ເຕີ 33 ຊຸດ (ຄອມ​ພິວ​ເຕີ​ຕັ້ງ​ໂຕະ 30 ຊຸດ ໂນດ​ບຸກ 3 ຊຸດ) ມູນ​ຄ່າ 139 ລ້ານ​ກີບ ມາ​ມອບ​ໃຫ້​ຫ້ອງ­ການ​ກະ­ຊວງ​ສຶກ​ສາ​ທິ​ການ ແລະ ກີ­ລາ (ສສກ) ພະ​ແນກ ສສກ ນວ ແລະ 11 ໂຮງ­ຮຽນ​ໃນ ນວ ວັນ​ທີ 27 ສິງ­ຫາ 2019 ຢູ່​ພະ​ແນກ ສສກ ນວ ເຊິ່ງ​ມອບ​ໂດຍ​ທ່ານ Sun FengLei ຜູ້­ອຳ­ນວຍ­ການ​ທະ­ນາ­ຄານ ICBC ສາ­ຂາ ນວ ແລະ ຮັບ​ໂດຍ​ທ່ານ ບົວ​ລານ ສິ­ລິ​ປັນ­ຍາ ຮອງ​ລັດ­ຖະ­ມົນ­ຕີ​ກະ­ຊວງ ສສກ ມີ​ທ່ານ ຊົມ​ພູ ແກ້ວ​ປັນ­ຍາ ຫົວ­ໜ້າ​ພະ​ແນກ ສສກ ນວ ທ່ານ Chen Wenxian ຮອງ​ຜູ້­ອຳ­ນວຍ­ການ​ທະ­ນາ­ຄານ ICBC ສາ­ຂາ ນວ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ຄອມ​ພິວ​ເຕີ​ໂນດ​ບຸກ ທີ່​ນຳ​ມາ​ມອບ​ຄັ້ງ​ນີ້ ໄດ້​ມອບ​ໃຫ້​ຫ້ອງ­ການ​ກະ­ຊວງ ສສກ 1 ຊຸດ ພະ​ແນກ ສສກ ນວ 2 ຊຸດ ສ່ວນ​ຄອມ​ພິວ​ເຕີ​ຕັ້ງ​ໂຕະ​ໄດ້​ມອບ​ໃຫ້​ໂຮງ­ຮຽນ ມສ ໂພນ​ທອງ 7 ຊຸດ ໂຮງ­ຮຽນ ມສ ພວງ​ໄຊ​ໂຮງ­ຮຽນ ມສ ບ້ານ​ໂດນ ໂຮງ­ຮຽນ ມ​ຕົ້ນ ບ້ານ​ພ້າວ ໂຮງ­ຮຽນ ມ​ຕົ້ນ ດອນ​ສ້າງ​ໄຜ່ ໂຮງ­ຮຽນ ມ​ຕົ້ນ ໜອງ​ຍາວ ໂຮງ­ຮຽນ ມ​ຕົ້ນ ຫົວ​ນາ ໂຮງ­ຮຽນ ມສ ທ່າ​ດິນ​ແດງ ໂຮງ­ຮຽນ​ປະ­ຖົມ​ສົມ­ບູນ ສີ​ບຸນ​ເຮືອງ ໂຮງ­ຮຽນ​ລະ 2 ຊຸດ ໂຮງ­ຮຽນ ມສ ໝາກ​ນາວ 3 ຊຸດ ແລະ ໂຮງ­ຮຽນ ມສ ນາ​ຂ່າ 4 ຊຸດ ເພື່ອ​ແນ­ໃສ່​ຕອບ​ສະ­ໜອງ​ຕາມ​ການ​ສະ­ເໜີ​ຂອງ​ບັນ­ດາ​ໂຮງ­ຮຽນ ທີ່​ຍັງ​ຂາດ­ເຂີນ​ດ້ານ​ຄອມ​ພິວ​ເຕີ​ຮັບ​ໃຊ້​ໃນ ການ​ຮຽນ-ການ​ສອນ ເພື່ອ​ສ້າງ​ໃຫ້​ເປັນ​ໂຮງ­ຮຽນ​ຕົວ​ແບບ​ຄຸນ​ນະ​ພາບ ຕາມ​ມາດ­ຖານ​ຕົວ​ຊີ້​ວັດ​ຕ່າງໆ ທີ່​ກະ­ຊວງ ສສກ ກຳ­ນົດ​ໄວ້.

    ທ່ານ Sun FengLei ກ່າວ​ວ່າ: ທະ­ນາ­ຄານ ICBC ສາ­ຂາ​ນະ­ຄອນ­ຫຼວງ​ວຽງ​ຈັນ ສ້າງ­ຕັ້ງ​ຂຶ້ນ​ປີ 2011 ບົນ​ພື້ນ­ຖານ​ການ​ໃຫ້­ການ​ຊ່ວຍ­ເຫຼືອ ແລະ ສະ­ໜັບ­ສະ­ໜູນ​ຈາກ​ສັງ­ຄົມ​ລາວ​ໃນ​ທຸກ​ຂົງ­ເຂດ ທຸ­ລະ​ກຳ​ຫຼາຍໆ​ປະ­ເພດ​ຂອງ​ພວກ​ເຮົາ​ໄດ້​ຂະ­ຫຍາຍ­ຕົວ​ຢ່າງ​ຕໍ່​ເນື່ອງ ທະ­ນາ­ຄານ ICBC ມີ​ຄວາມ​ຕັ້ງ­ໃຈ​ສູງ ທີ່​ຈະ​ເປັນ​ສ່ວນ​ໜຶ່ງ​ໃນ​ການ​ປະ­ກອບ­ສ່ວນ​ໃນ​ວຽກ​ງານ​ພັດ­ທະ­ນາ​ເສດ­ຖະ­ກິດ​ຂອງ​ລາວ ໃຫ້​ເຕີບ​ໃຫຍ່​ຂະ­ຫຍາຍ­ຕົວ.

ຂ່າວທີ່ກ່ຽວຂ້ອງ