ບັນຫາຊາຍແດນ ລາວ-ກຳປູເຈຍ ບໍ່ມີຄວາມເຄັ່ງຕຶງ

312 28 ສ.ຫ. 2019 ຂ່າວໜ້າ​ໜຶ່ງ
ບັນຫາຊາຍແດນ ລາວ-ກຳປູເຈຍ ບໍ່ມີຄວາມເຄັ່ງຕຶງ

    ເນື່ອງ​ຈາກ​ໃນ​ອາ­ທິດ​ຜ່ານ​ມາ ໄດ້​ມີ​ກະ­ແສ​ຂ່າວ​ປອມ​ທີ່​ແຜ່​ກະ­ຈາຍ​ໃນ​ສື່​ອອນ​ລາຍ ກ່ຽວ​ກັບ​ສະ­ຖາ­ນະ​ການ​ຄວາມ​ບໍ່​ສະ­ຫງົບ​ໃນ​ບໍ­ລິ­ເວນ​ຊາຍ​ແດນ ລາວ-ກຳ­ປູ­ເຈຍ ເຂດ​ຍອດ​ເຊ​ລຳ​ເພົາ ເບື້ອງ​ລາວ​ຂຶ້ນ​ກັບ ເມືອງ​ມູນ​ລະ​ປະ​ໂມກ ແຂວງ​ຈຳ­ປາ​ສັກ ແລະ ເບື້ອງ​ກຳ­ປູ­ເຈຍ​ຂຶ້ນ​ກັບ​ເມືອງ​ແສບ ແຂວງ​ເພຣຍ​ວິ​ເຮຍ ເຮັດ​ໃຫ້​ສັງ­ຄົມ​ໄດ້​ເຂົ້າ­ໃຈ​ຂໍ້​ມູນ​ທີ່​ບໍ່​ຖືກ­ຕ້ອງ.

    ດັ່ງ­ນັ້ນ ເພື່ອ​ສ້າງ​ຄວາມ​ເຂົ້າ­ໃຈ​ຕໍ່​ບັນ­ຫາ​ດັ່ງ­ກ່າວ  ວັນ​ທີ 27 ສິງ­ຫາ 2019 ທ່ານ ອາ​ນຸ​ສິນ ຂັດ­ຕິ­ຍະ­ລາດ ຮອງ​ຫົວ­ໜ້າ​ຫ້ອງ­ການ ຄະ­ນະ​ກຳ­ມະ­ການ​ຊາຍ​ແດນ​ແຫ່ງ​ຊາດ ກະ­ຊວງ​ການ​ຕ່າງ ປະ­ເທດ ໄດ້​ຖະ­ແຫຼງ​ຂ່າວ​ເພື່ອ​ໃຫ້​ສັງ­ຄົມ​ຮັບ​ຊາບ​ວ່າ: ປັດ­ຈຸ­ບັນ ບໍ­ລິ­ເວນ​ດັ່ງ­ກ່າວ​ແມ່ນ​ຢູ່​ໃນ​ສະ­ພາບ​ປົກ­ກະ­ຕິ ບໍ່​ໄດ້​ມີ​ການ​ປະ​ເຊີນ​ໜ້າ​ກັນ ບໍ່​ມີ​ຄວາມ​ເຄັ່ງ​ຕຶງ ບໍ່​ມີ​ບັນ­ຫາ​ຮ້າຍ​ແຮງ ຫຼື ການ​ປະ​ທະ​ກັນ​ດ້ວຍ​ກຳ­ລັງ ແລະ ບໍ່​ມີ​ເຫດ­ການ​ທີ່​ບໍ່​ເພິ່ງ​ປາ­ຖະ­ໜາ​ເກີດ​ຂຶ້ນ​ແຕ່​ປະ­ການ​ໃດ.

    ຢືນ­ຢັນ​ວ່າ ບັນ­ຫາ​ຊາຍ​ແດນ ລາວ-ກຳ­ປູ­ເຈຍ ບໍ່​ໄດ້​ເປັນ​ດັ່ງ​ທີ່​ສື່​ບາງ​ແຫ່ງ​ທັງ​ພາຍ​ໃນ ແລະ ຕ່າງ ປະ­ເທດ​ໄດ້​ອອກ​ຂ່າວ​ຜ່ານ​ທາງ​ສື່​ອອນ​ລາຍ​ໃນ​ໄລ­ຍະ​ຜ່ານ​ມາ ເຊິ່ງ​ເປັນ​ການ​ສ້າງ​ສະ­ຖາ­ນະ​ການ​ເພື່ອ​ເຮັດ​ໃຫ້​ສອງ​ປະ­ເທດ​ລາວ ແລະ ກຳ­ປູ­ເຈຍ ມີ​ຄວາມ​ເຂົ້າ­ໃຈ​ຜິດ​ຕໍ່​ກັນ ທັງ​ເປັນ​ການ​ທຳ­ລາຍ​ພາບ​ພົດ​ທີ່​ດີ​ລະ­ຫວ່າງ​ສອງ​ປະ­ເທດ​ທີ່​ມີ​ຕໍ່​ກັນ​ມາ​ໂດຍ​ຕະ­ຫຼອດ ແລະ ສອງ​ປະ­ເທດ​ຍາມ​ໃດ​ກໍ​ຖື​ວ່າ​ເປັນ​ປະ­ເທດ​ບ້ານ​ແກ່ວ​ເມືອງ​ດອງ ເປັນ​ບ້ານ​ໃກ້​ເຮືອນ​ຄຽງ​ທີ່​ດີ ເຄີຍ​ຮ່ວມ​ທຸກ​ຮ່ວມ​ສຸກ​ນຳ​ກັນ​ມາ ທັງ​ສອງ​ປະ­ເທດ​ແມ່ນ​ໃຫ້​ຄວາມ​ເຄົາ­ລົບ​ຄວາມ​ເປັນ​ເອ­ກະ­ລາດ ອຳ­ນາດ​ອະ­ທິ­ປະ​ໄຕ ແລະ ຜືນ​ແຜ່ນ­ດິນ​ອັນ​ຄົບ​ຖ້ວນ​ຂອງ​ກັນ ແລະ ກັນ.

    ສຳ­ລັບ​ການ​ແກ້​ໄຂ​ບັນ­ຫາ​ຊາຍ​ແດນ​ລະ­ຫວ່າງ ລາວ ແລະ ກຳ­ປູ­ເຈຍ ສອງ​ຝ່າຍ​ແມ່ນ​ຢຶດ​ໝັ້ນ​ຕາມ​ແນວ­ທາງ​ສັນ­ຕິ​ວິ­ທີ​ໂດຍ​ຜ່ານ​ການ​ເຈລະ­ຈາ ເພື່ອ​ເຮັດ​ໃຫ້​ຊາຍ​ແດນ​ຮ່ວມ​ຂອງ​ສອງ​ປະ­ເທດ​ກາຍ­ເປັນ​ຊາຍ​ແດນ​ແຫ່ງ​ສັນ­ຕິ­ພາບ ມິດ­ຕະ­ພາບ ແລະ ການ​ຮ່ວມ​ມື.

ຂ່າວທີ່ກ່ຽວຂ້ອງ