ຂ່າວຫຼ້າສຸດ

ຄູ: ຄຸນສົມບັດ ແລະ ຈັນຍາບັນ

4.474 28 ສ.ຫ. 2019 ນານາສາລະ

    ກ່ອນ​ຈະ​ເວົ້າ​ລະ­ອຽດ​ເລື່ອງ​ຄຸນ­ສົມ­ບັດ ແລະ ຈັນ​ຍາ​ບັນ​ຂອງ​ຄູ​ນັ້ນ ຜູ້​ຂຽນ​ຂໍ​ເວົ້າ​ເຖິງ​ບາງ​ດ້ານ​ທີ່​ເປັນ​ປາ­ກົດ­ການ​ຫຍໍ້­ທໍ້​ໃນ​ຂະ­ແໜງ​ສຶກ​ສາ ເຊິ່ງ​ຂໍ້​ອ້າງ​ເຖິງ​ຄຳ​ຄິດ​ເຫັນ​ຂອງ​ທ່ານ ພັນ​ຄຳ ວິ­ພາ​ວັນ ອະ­ດີດ​ລັດ­ຖະ­ມົນ­ຕີ​ກະ­ຊວງ​ສຶກ​ສາ ທີ່​ລາຍ​ງານ​ຕໍ່​ສະ­ພາ​ໃນ​ສະ­ໄໝ​ເພິ່ນ​ເປັນ​ລັດ­ຖະ­ມົນ­ຕີ ວ່າ: ຜູ້​ປົກ­ຄອງ​ບາງ​ຄົນ​ມີ​ລັກ­ສະ­ນະ​ຕາມ­ໃຈ​ລູກ ເສັງ​ບໍ່​ໄດ້​ກໍ​ໄປ​ຂໍ​ໃຫ້​ລູກ ຫຼື ເສັງ​ຈົບ​ບໍ່​ຜ່ານ​ກໍ​ໄປ​ຂໍ​ໃຫ້​ລູກ ຜູ້​ບໍ­ລິ­ຫານ​ການ​ສືກ​ສາ​ຫຼາຍ​ໜ່ວຍ​ງານ​ກໍ​ປະ­ລະ ບໍ່​ເຮັດ​ຫຼ້ອນ​ໜ້າ­ທີ່​ຂອງ​ຕົນ​ໃນ​ການ​ຄຸ້ມ​ຄອງ​ໂຮງ­ຮຽນ ເຊິ່ງ​ບໍ່​ເຂົ້າ­ໃຈ​ແຈ້ງ­ວ່າ​ຕົນ​ເອງ​ຄື​ຜູ້​ຕັດ­ສິນ​ຄວາມ​ກ້າວ­ໜ້າ​ສະ​ຖາ​ບັນ​ຂອງ​ຕົນ.

    ບົດ­ບາດ​ຂອງ​ຄູ​ໃນ​ການ​ຕັດ­ສິນ​ຂອດ​ຄວາມ​ຈະ­ເລີນ​ຂອງ​ການ​ສຶກ​ສາ ຈຶ່ງ​ບໍ່​ຂຶ້ນ​ກັບ​ຄູ​ຝ່າຍ​ດຽວ ເພາະ​ຄູ​ກໍ​ເຮັດ​ໜ້າ­ທີ່​ພັດ­ທະ­ນາ​ຄວາມ​ຮູ້ ຕັ້ງ­ໃຈ​ສອນ ຮັກ­ສາ​ຈັນ​ຍາ​ບັນ ແລະ ຄຸນ­ສົມ­ບັດ ເພື່ອ​ສ້າງ​ຕົນ​ໃຫ້​ເປັນ​ຄູ​ດີ ແລະ ຄູ່​ເກ່ງ​ຂອງ​ສະ​ຖາ​ບັນ ແຕ່​ຈະ​ຂຶ້ນ​ກັບ​ປັດ​ໄຈ​ຂອງ​ຜູ້​ມີ­ໜ້າ​ທີ່​ຊີ້​ນຳ ແລະ ຄຸ້ມ​ຄອງ ພັດ­ທະ­ນາ​ວິ­ຊາ​ການ​ຂອງ​ສະ​ຖາ​ບັນ​ການ​ສຶກ​ສາ​ນຳ​ອີກ ຖ້າ­ວ່າ​ຝ່າຍ​ກ່ຽວ­ຂ້ອງ​ບໍ່​ກວດ­ກາ ກວດ­ແກ້​ເບິ່ງ​ຄຸນ​ນະ​ພາບ​ຂອງ​ຜູ້​ບໍ­ລິ­ຫານ ແຕ່​ລະ­ສະ​ຖາ​ບັນ​ກໍ​ອາດ​ຍັງ​ມີ​ຂໍ້​ບົກ​ຜ່ອງ​ທີ່​ລະ­ເລີຍ ເຊິ່ງ​ຢ່າ​ລືມ​ວ່າ​ບາງ​ປາ­ກົດ­ການ​ຫຍໍ້­ທໍ້​ມັນ​ກໍ​ກົດ​ໜ່ວງ​ຄວາມ​ກ້າວ­ໜ້າ​ໃນ​ໜ່ວຍ​ງານ​ຢ່າງ​ໃຫຍ່​ຫຼວງ.

    ໄລ­ຍະ​ນີ້​ໃກ້​ຈະ​ເປີດ​ພາກ­ຮຽນ ຜູ້​ຂຽນ​ຂໍ​ນຳ​ເອົາ​ຄຸນ­ສົມ­ບັດ ແລະ ຈັນ​ຍາ​ບັນ​ຂອງ​ຄູ​ມາ​ສະ­ເໜີ​ເພື່ອ​ເຕືອນ​ຄວາມ​ຈຳ​ໃນ​ໜ້າ­ທີ່​ຂອງ​ຕົນ​ອີກ​ເທື່ອ​ໜຶ່ງ ຕາມ​ຂໍ້​ຕົກ­ລົງ​ຂອງ​ລັດ­ຖະ­ມົນ­ຕີ​ສຶກ​ສາ ເລກ​ທີ 1728/ສສກ ລົງ​ວັນ​ທີ 6 ພຶດ­ສະ­ພາ 2015 ມີ​ດັ່ງ­ນີ້: ມູນ­ເຊື້ອ​ຄຸນ­ສົມ­ບັດ​ຂອງ​ຄູ: 1. ບໍ່​ສວຍ​ໃຊ້​ໜ້າ­ທີ່​ຕຳ­ແໜ່ງ​ທີ່​ຜິດ​ລະ­ບຽບ​ກົດ­ໝາຍ 2. ບໍ່​ລັກ​ໂລບ ຫຼື ສໍ້​ໂກງ​ໃນ​ການ​ສຶກ​ສາ​ຮ່ຳ­ຮຽນ 3. ບໍ່​ມີ​ທ່າ​ທີ​ແຂງ​ກະ­ດ້າງ ບີບ​ບັງ­ຄັບ​ຜູ້​ຮຽນ​ໃນ​ທຸກ​ຮູບ​ແບບ 4. ບໍ່​ກະ­ທຳ​ສິ່ງ​ທີ່​ແຕະ­ຕ້ອງ​ເຖິງ​ຮ່າງ­ກາຍ-ຈິດ­ໃຈ ແລະ ກຽດ​ສັກ​ສີ​ຂອງ​ຜູ້​ຮຽນ ແລະ ເພື່ອນ​ຮ່ວມ​ງານ ໃນ​ມາດ­ຕາ 6 ໄດ້​ເວົ້າ​ເຖິງ​ແບບ­ແຜນ​ການ​ດຳ­ເນີນ​ຊີ­ວິດ​ຂອງ​ຄູ ດັ່ງ­ນີ້:

   1. ດຳ­ລົງ​ຊີ­ວິດ​ຢ່າງ​ມີ​ອຸ­ດົມ​ການ ມີ​ຈຸດ­ປະ­ສົງ​ເປົ້າ​ໝາຍ ມີ​ມາ­ນະ​ອົດ­ທົນ.

   2. ມີ​ແບບ­ແຜນ​ດຳ­ລົງ​ຊີ­ວິດ​ແບບ​ມະ­ຫາ­ຊົນ

   3. ແບບ­ແຜນ​ເຮັດ​ວຽກ​ວ່ອງ­ໄວ ຫ້າວ­ຫັນ

   4. ນຸ່ງ​ຖື​ສຸ­ພາບ​ຮຽບ​ຮ້ອຍ-ງ່າຍ­ດາຍ ບໍ່​ໂອ້​ອວດ​ຕໍ່​ຜູ້​ຮຽນ.

    ສັງ​ລວມ​ໄດ້​ວ່າ: ການ​ເປັນ​ຄູ​ນັ້ນ ບໍ່​ພຽງ​ແຕ່​ພູມ­ໃຈ​ວ່າ​ຕົນ​ເອງ​ໄດ້​ຖືກ​ບັນ­ຈຸ​ເປັນ​ລັດ­ຖະ­ກອນ​ຄູ ແລ້ວ​ກໍ​ມີ​ແຕ່​ຈະ​ສອນ​ໄປ​ຕາມ​ຕຳ­ລາ ແລະ ໜ້າ­ທີ່​ວ່າ​ພຽງ​ພໍ­ແລ້ວ ເຊິ່ງ​ທີ່​ຈິງ​ຄູ​ຍັງ​ຕ້ອງ​ຊອກ​ຫາ​ຄວາມ​ຮູ້​ອ້ອມ​ຕົວ ຮູ້​ຈັນ​ຍາ​ບັນ ແລະ ໜ້າ­ທີ່​ຕົນ​ເອງ ເຊິ່ງ​ຜູ້​ບໍ­ລິ­ຫານ​ການ​ສຶກ​ສາ​ກໍ​ແມ່ນ​ຂອດ​ປະ­ສານ​ກົມ­ກຽວ​ຂອງ​ຄູ​ໄປ​ນຳ​ກັນ.

​​ດັ້ນ​ກີບ​ເມກ

ຂ່າວທີ່ກ່ຽວຂ້ອງ