ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 27-08-2019

548 27 ສ.ຫ. 2019 ຫົວຂໍ້ຂ່າວອື່ນໆ

    ມື້­ນີ້​ມີ​ເລື່ອງ​ເລົ່າ​ຈາກ ສ ເກົາ­ຫຼີ ກ່ຽວ​ກັບ​ມາດ​ຕະ­ການ​ແກ້​ໄຂ​ໄພ​ຈາກ​ສັງ­ຄົມ​ກົ້ມ​ໜ້າ ແລະ ປິດ​ທ້າຍ​ກັບ​ບັນ­ຫາ​ເດັກ­ນ້ອຍ​ຕິດ​ໜ້າ​ຈໍ​ອິນ​ເຕີ​ເນັດ​ຢູ່​ອິນ​ໂດ​ເນ​ເຊຍ.

    ທີ່ ສ ເກົາ­ຫຼີ: ໃນ​ປັດ­ຈຸ­ບັນ ບັນ­ຫາ​ສັງ­ຄົມ “ກົ້ມ​ໜ້າ” ໄດ້​ກາຍ­ເປັນ​ສິ່ງ​ທ້າ​ທາຍ​ໃໝ່​ໃນ​ຫຼາຍໆ​ປະ­ເທດ ຍ້ອນ​ມັນ​ສ່ຽງ​ພາ­ໃຫ້​ເກີດ​ອຸ­ບັດ­ເຫດ​ເວ­ລາ​ຍ່າງ​ຕາມ​ຖະ­ໜົນ ເວ­ລາ​ຂ້າມ​ທາງ ຫຼື ເວ­ລາ​ຂັບ​ລົດ ສຳ­ລັບ​ຢູ່ ສ ເກົາ­ຫຼີ ນັ້ນ ໄດ້​ມີ​ສະ­ຖິ­ຕິ​ທີ່​ຊີ້​ອອກ​ວ່າ ໃນ​ປີ 2014 ອຸ­ບັດ­ເຫດ​ທີ່​ເກີດ​ຂຶ້ນ​ກັບ​ຜູ້​ທີ່​ມົວ​ແຕ່​ກົ້ມ​ເບິ່ງ​ຈໍ​ໂທລະ­ສັບ​ມື​ຖື​ນັ້ນ ມີ​ຈຳ­ນວນ 1.000 ກວ່າ​ຄົນ ທຽບ​ກັບ 437 ຄົນ​ໃນ​ປີ 2000 ອຸ­ບັດ­ເຫດ​ທີ່​ມັນ​ເກີດ​ຂຶ້ນ​ຫຼາຍ​ນັ້ນ​ລວມ​ມີ​ກໍ­ລະ­ນີ​ຍ່າງ​ຕົກ​ລາງ​ລົດ­ໄຟ ຖືກ​ລົດ​ຕຳ​ເວ­ລາ​ຂ້າມ​ທາງ ຂັດ­ຂວາງ​ການ​ຈາ­ລະ​ຈອນ ເຮັດ​ໃຫ້​ເກີດ​ອຸ­ບັດ­ເຫດ ເພື່ອ​ປ້ອງ​ກັນ​ເຫດ​ຮ້າຍ​ຂອງ​ສັງ­ຄົມ​ກົ້ມ​ໜ້າ ທາງ​ການ ສ ເກົາ­ຫຼີ ໄດ້​ຕິດ​ຕັ້ງ​ປ້າຍ​ເຕືອນ​ສະ­ຕິ​ຄົນ​ຍ່າງ​ກົ້ມ​ໜ້າ​ຈຳ­ນວນ 300 ປ້າຍ (ຂ່າວ​ເດືອນ​ກັນ­ຍາ 2016) ຢູ່ 5 ຈຸດ​ໃນ​ນະ­ຄອນ​ເຊ​ອູນ ໃນ​ບາງ​ຈຸດ​ປ້າຍ​ເຕືອນ​ຖືກ​ຕິດ​ຕັ້ງ​ໄວ້​ຕາມ​ເສົາ​ໄຟ­ຟ້າ​ໃຫ້​ຄົນ​ແນມ​ເຫັນ​ແຕ່​ໄກໆ ຢູ່​ບາງ​ຈຸດ​ຕິດ​ຕັ້ງ​ໄວ້​ເທິງ​ທາງ​ຍ່າງ ຄວາມ​ພະ­ຍາ­ຍາມ​ດັ່ງ­ກ່າວ​ຂອງ​ທາງ​ການ​ນັ້ນ ມີ​ບາງ​ຄົນ​ເຫັນ​ວ່າ​ຄົງ​ຈະ​ບໍ່​ສາ­ມາດ​ດຶງ​ສາຍ­ຕາ​ຄົນ​ກົ້ມ​ໜ້າ​ອອກ​ຈາກ​ໜ້າ​ຈໍ​ໄດ້​ດອກ ແຕ່​ໂດຍ​ລວມ​ແລ້ວ​ກໍ​ຍັງ​ດີ​ກວ່າ​ບໍ່​ມີ​ປ້າຍ​ເຕືອນ​ສະ­ຕິ​ເລີຍ.

    ທີ່ ອິນ​ໂດ​ເນ​ເຊຍ: ຢູ່​ບ້ານ​ກູ​ຣີ ບາ​ໂຣ (Curee Baroh) ແຂວງ​ອາ​ເຈ ປະ­ເທດ​ອິນ​ໂດ​ເນ​ເຊຍ ກໍ​ມີ​ບັນ­ຫາ​ເລື່ອງ​ໜ້າ​ຈໍ​ເຊັ່ນ​ດຽວ ແຕ່​ບໍ່​ກ່ຽວ​ກັບ​ບັນ­ຫາ​ອຸ­ບັດ­ເຫດ​ຕາມ​ຖະ​ນົນ​ຄື​ຢູ່ ສ ເກົາ­ຫຼີ ດັ່ງ­ກ່າວ​ມາ​ຂ້າງ​ເທິງ​ນີ້ ຂ່າວ​ບອກ​ວ່າ ຢູ່​ບ້ານ​ກູ​ຣີ ບາ​ໂຣ ນັ້ນ ເຫຼົ່າ​ຜູ້­ນຳ​ບ້ານ​ໄດ້​ຖີ້ມ​ໂທດ​ໃສ່​ຮ້ານ​ອາ­ຫານ?ຮ້ານ​ກາ­ເຟ ທີ່​ໃຫ້​ບໍ­ລິ­ການ​ລະ­ບົບ​ວາຍ​ຟາຍ (wi?fi) ໂດຍ​ບໍ່​ເສຍ​ຄ່າ (ຟຼີ) ສຳ­ລັບ​ລູກ​ຄ້າ ວ່າ​ເຮັດ​ໃຫ້​ຊາວ​ໜຸ່ມ​ນັກ­ຮຽນ​ບໍ່​ໄປ​ໂຮງ­ຮຽນ ແລະ ບໍ່​ຮ່ວມ​ສູດ​ຕາມ​ສາ­ສະ­ໜາ​ອິດ​ສະ​ລາມ ຍ້ອນ​ແນວ​ນີ້​ເອງ ເຫຼົ່າ​ຜູ້­ນຳ​ຂອງ​ບ້ານ​ນີ້ ຈຶ່ງ​ອອກ​ຈົດ­ໝາຍ​ວຽນ​ສົ່ງ​ໃຫ້​ຮ້ານ​ອາ­ຫານ?ຮ້ານ​ກາ­ເຟ​ທຸກ​ແຫ່ງ ຢຸດ​ໃຫ້​ບໍ­ລິ­ການ ວາຍ?ຟາຍ ຟຼີ ຈົດ­ໝາຍ​ວຽນ​ດັ່ງ­ກ່າວ​ໄດ້​ອອກ​ມາ​ໃນ​ວັນ​ທີ 13 ພະ­ຈິກ ປີ 2018 (ໜັງ­ສື­ພິມ The Nation 28/11/2018) ທ່ານ ເຮນ ມຽດ​ດີ ມຸກ​ຕາ ຣູ​ດິນ ນາຍ­ບ້ານ ບ້ານ​ກູ​ຣີ ບາ​ໂຣ ແລະ ຜູ້­ນຳ​ບ້ານ​ຄົນ​ອື່ນໆ ໄດ້​ບອກ​ວ່າ ທີ່​ສັ່ງ​ໃຫ້​ຮ້ານ​ອາ­ຫານ?ຮ້ານ​ກາ­ເຟ ຢຸດ​ບໍ­ລິ­ການ​ວາຍ?ຟາຍ ຟຼີ ກໍ​ຍ້ອນ​ວ່າ ເດັກ­ນ້ອຍ​ນັກ­ຮຽນ​ພາ­ກັນ​ໂຢດ​ໄປ​ນັ່ງ​ຢູ່​ຮ້ານ​ເຫຼົ້າ​ນີ້​ໃນ​ໂມງ​ຮຽນ ເພື່ອ​ຊອກ​ເຂົ້າ​ເວັບ​ໄຊ ແລະ ວ່າ​ມີ​ທັງ​ເວັບ​ໄຊ​ຮູບ​ພາບ​ລາ­ມົກ​ໂປ້​ເປືອຍ ນອກ­ຈາກ​ນັ້ນ ເດັກໆ​ເຫຼົ່າ​ນີ້​ຍັງ​ຕິດ​ນິ­ໄສ​ຂີ້​ຕົວະ​ພໍ່​ແມ່​ວ່າ​ໄປ​ໂຮງ­ຮຽນ?ໄປ​ສູດ​ມົນ ແຕ່​ຕົວ​ຈິງ​ຜັດ​ໄປ​ນັ່ງ​ຢູ່​ຮ້ານ ເລື່ອງ​ນີ້​ໄດ້​ສ້າງ​ບັນ­ຫາ​ໜັກ​ຫົວ​ໃຫ້​ຄູ?ອາ­ຈານ ແລະ ຜູ້​ປົກ­ຄອງ ອາ​ເຈ ເປັນ​ແຂວງ​ປົກ­ຄອງ​ຕົວ​ເອງ​ຂອງ​ອິນ​ໂດ​ເນ​ເຊຍ​ນີ້ ຄົນ​ນັບ­ຖື​ສາ­ສະ­ໜາ​ອິດ​ສະ​ລາມ​ຢ່າງ​ເຄັ່ງ​ຄັດ.

ຂ່າວທີ່ກ່ຽວຂ້ອງ