ຂ່າວຫຼ້າສຸດ

ນະຄອນຫຼວງວຽງຈັນ ສົ່ງເສີມການທ່ອງທ່ຽວທຳມະຊາດ

475 26 ສ.ຫ. 2019 ຂ່າວໜ້າ​ໜຶ່ງ
ນະຄອນຫຼວງວຽງຈັນ ສົ່ງເສີມການທ່ອງທ່ຽວທຳມະຊາດ

    ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນະ­ຄອນ­ຫຼວງ​ວຽງ​ຈັນ (ຖວ​ທ ນວ) ຮ່ວມ​ກັບ​ອົງການ​ປົກ­ຄອງ​ເມືອງ​ໄຊ​ທາ­ນີ ຈັດ​ຄາ​ຣາ​ວານ​ລົດ​ທ່ອງ​ທ່ຽວ​ສູ່​ແຫຼ່ງ​ທ່ອງ​ທ່ຽວ​ທຳ​ມະ​ຊາດ ນ້ຳ­ຕົກ­ຕາດ​ພູ­ເຂົາ​ຄວາຍ ກຸ່ມ​ບ້ານ​ຊ້າງ ຂຶ້ນ​ວັນ​ທີ 23 ສິງ­ຫາ 2019 ໂດຍ​ມີ​ທ່ານ​ນາງ ວິ­ໄລ​ວອນ ຈັນ­ທະ​ລາ­ຕີ ຫົວ­ໜ້າ​ພະ​ແນກ ຖວ​ທ ນວ ທ່ານ ຄຳ​ປະ­ດິດ ເຂັມ​ມາ­ນິດ ເຈົ້າ­ເມືອງ​ໄຊ​ທາ­ນີ ພ້ອມ​ດ້ວຍ​ພາກ­ສ່ວນ​ຕ່າງໆ​ເຂົ້າ​ຮ່ວມ​ເກືອບ 600 ຄົນ ລົດ 100 ກວ່າ​ຄັນ.

    ຈຸດ­ປະ­ສົງ​ເພື່ອ​ສ້າງ​ຂະ​ບວນ​ການ​ຄຳ­ນັບ​ຮັບ​ຕ້ອນ​ກອງ​ປະ­ຊຸມ​ໃຫຍ່ 3 ຂັ້ນ ຖວ​ທ ນວ ເພື່ອ​ສົ່ງ­ເສີມ​ການ­ທ່ອງ­ທ່ຽວ​ລາວ ກໍ​ຄື ນວ ທັງ​ເປັນ​ການ​ລະ­ນຶກ​ວັນ​ຢຶດ​ອຳ­ນາດ 23 ສິງ­ຫາ ຄົບ­ຮອບ 44 ປີ ເປັນ​ການ​ຊອກ​ຫາ​ແຫຼ່ງ​ທ່ອງ​ທ່ຽວ​ພາຍ​ໃນ​ເມືອງ​ໄຊ​ທາ­ນີ​ໃຫ້​ມີ​ລັກ­ສະ­ນະ​ຍືນ​ຍົງ ແລະ ໂຄ­ສະ­ນາ​ສົ່ງ­ເສີມ​ການ­ທ່ອງ­ທ່ຽວ​ຂອງ​ເມືອງ​ໄຊ​ທາ­ນີ ກໍ​ຄື ນວ ເພື່ອ​ຕ້ອນ­ຮັບ​ປີ​ທ່ອງ​ທ່ຽວ ລາວ-ຈີນ 2019 ນອກ​ນີ້ ຍັງ​ເປັນ​ການ​ສົ່ງ­ເສີມ​ການ­ທ່ອງ­ທ່ຽວ​ພາຍ​ໃນ ໂດຍ​ການ​ທ່ຽວ​ຊົມ​ແຫຼ່ງ​ທ່ອງ​ທ່ຽວ​ທຳ​ມະ​ຊາດ ວັດ­ທະ­ນະ­ທຳ ພູ­ຜາ​ປ່າ­ໄມ້ ວັດ­ທະ­ນະ­ທຳ​ຂອງ​ປະ­ຊາ­ຊົນ​ບັນ­ດາ­ເຜົ່າ ແລະ ອື່ນໆ.

    ທ່ານ ບົວ​ລີ ແກ້ວ​ມະ­ນີ​ວັນ ຫົວ­ໜ້າ​ຫ້ອງ­ການ ຖວ​ທ ເມືອງ​ໄຊ​ທາ­ນີ ກ່າວ​ວ່າ: ຕາດ​ພັກ​ຊອຍ​ວອຍ ແມ່ນ​ສະ­ຖານ­ທີ່​ທ່ອງ​ທ່ຽວ​ທຳ​ມະ​ຊາດ​ທີ່​ນອນ​ຢູ່​ໃນ​ເຂດ​ປ່າ​ສະ­ຫງວນ​ແຫ່ງ​ຊາດ​ພູ­ເຂົາ​ຄວາຍ ຫ່າງ​ຈາກ​ເມືອງ​ໄຊ​ທາ­ນີ 45 ກິ​ໂລ ໄປ​ຕາມ​ເສັ້ນ­ທາງ​ເລກ​ທີ 10 ຕັ້ງ​ຢູ່​ບ້ານ​ນາ​ຄັນ​ທຸງ ກຸ່ມ​ບ້ານ​ຊ້າງ ໄດ້​ປະ­ກາດ​ເປັນ​ສະ­ຖານ­ທີ່​ທ່ອງ​ທ່ຽວ ນວ ໃນ​ວັນ​ທີ 29 ສິງ­ຫາ 2015 ປັດ­ຈຸ­ບັນ ປະ­ຊາ­ຊົນ​ພາຍ​ໃນ​ບ້ານ​ລະ­ດົມ​ທຶນ​ຮ່ວມ​ກັບ​ຜູ້​ສຳ​ປະ­ທານ​ພັດ­ທະ­ນາ​ສະ­ຖານ­ທີ່​ການ​ບໍ­ລິ­ການ​ສະ­ຖານ­ທີ່​ທ່ອງ​ທ່ຽວ ໂດຍ​ການ​ສຳ​ປະ­ທານ​ຈາກ​ບ້ານ​ນາ​ຄັນ​ທຸງ ຮູບ​ການ​ໃຫ້​ບໍ­ລິ­ການ​ແມ່ນ​ລັກ­ສະ­ນະ​ທ່ອງ​ທ່ຽວ​ທຳ​ມະ​ຊາດ ມີ​ຕູບ​ໃຫ້​ບໍ­ລິ­ການ ນ້ຳ­ຕົກ­ຕາດ ສາ­ມາດ​ໃຫ້​ນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງ­ປະ­ເທດ​ໄດ້​ໄປ​ທ່ຽວ​ຊົມ ເພື່ອ​ຊຶມ​ຊັບ​ທຳ​ມະ​ຊາດ​ໄດ້​ຢ່າງ​ເຕັມ­ທີ່ ຕິດ​ກັບ​ຕາດ​ຊອຍ​ວອຍ​ກໍ​ຍັງ​ມີ​ຕາດ​ເທົາ ທີ່​ເປັນ​ສະ­ຖານ­ທີ່​ທ່ອງ​ທ່ຽວ​ໃໝ່​ຍັງ​ບໍ່​ທັນ​ໄດ້​ຮັບ​ການ​ພັດ­ທະ­ນາ ໂດຍ​ຕາດ​ແຫ່ງ​ນີ້​ຈະ​ມີ​ນ້ຳ​ໄຫຼ​ຕະ­ຫຼອດ​ປີ ພ້ອມ​ນີ້ ຍັງ​ເປັນ​ສະ­ຖານ­ທີ່​ຕິດ​ພັນ​ກັບ​ວັດ­ທະ­ນະ­ທຳ ເປັນ­ຕົ້ນ ຮອຍ​ພະ​ພຸດ​ທະ​ບາດ ໄລ­ຍະ​ຜ່ານ​ມາ​ມີ​ພຸດ​ທະ​ສາ​ສະ​ນິ​ກະ​ຊົນ​ພາຍ​ໃນ ແລະ ຕ່າງ­ປະ­ເທດ ເຂົ້າ​ມາ​ສັກ­ກະ​ລະ​ບູ­ຊາ ແລະ ປະ­ຕິ­ບັດ​ກຳ​ມະ​ຖານ​ເປັນ​ຈຳ­ນວນ​ຫຼວງ­ຫຼາຍ ສະ­ເລ່ຍ​ມີ​ນັກ​ທ່ອງ​ທ່ຽວ​ເຂົ້າ​ໄປ​ທ່ຽວ​ຊົມ ປະ­ມານ 4.000 ຄົນ ຕໍ່​ເດືອນ.

    ສຳ­ລັບ​ຕາດ​ຫາດ​ຊາຍ​ຂາວ ກໍ​ມີ​ລັກ­ສະ­ນະ​ຄ້າຍ­ຄື​ຕາດ​ພັກ​ຊອຍ​ວອຍ ໄດ້​ເປີດ​ບໍ­ລິ­ການ​ເປັນ​ແຫຼ່ງ​ທ່ອງ​ທ່ຽວ​ແຕ່​ປີ 2000 ເປັນ­ຕົ້ນ​ມາ 1 ປີ­ຜ່ານ­ມາ ຕາດ​ແຫ່ງ​ນີ້​ໄດ້​ຮັບ​ການ​ຕອບ​ຮັບ​ດີ ໂດຍ​ສະ­ເພາະ​ໂອ­ກາດ​ເທ​ສະ­ການ ວັນ​ສິນ ວັນ​ເສົາ ແລະ ວັນ​ທິດ ມີ​ນັກ​ທ່ຽວ​ເປັນ​ຈຳ­ນວນ​ຫຼາຍ ສະ­ເລ່ຍ​ນັກ​ທ່ອງ​ທ່ຽວ​ເຂົ້າ​ມາ​ໃຊ້​ບໍ­ລິ­ການ​ບໍ່​ຕ່ຳ​ກວ່າ 8.000 ຄົນ​ຕໍ່​ເດືອນ ການ​ທີ່​ເປີດ​ເປັນ​ສະ­ຖານ­ທີ່​ທ່ອງ​ທ່ຽວ​ໄດ້​ສ້າງ​ວຽກ​ເຮັດ​ງານ​ທຳ ສ້າງ​ລາຍ​ຮັບ​ໃຫ້​ປະ­ຊາ­ຊົນ ບາງ​ຈຳ­ນວນ​ກໍ​ໄດ້​ເສຍ​ຄ່າ​ເຊົ່າ​ເພື່ອ​ໄປ​ຂາຍ​ອາ­ຫານ ແລະ ເຄື່ອງ​ດື່ມ​ພາຍ​ໃນ​ສະ­ຖານ­ທີ່​ທ່ອງ​ທ່ຽວ ບາງ​ຈຳ­ນວນ​ກໍ​ຊອກ​ເຄື່ອງ​ປ່າ​ຂອງ​ດົງ ໂດຍ​ສະ­ເພາະ​ໜໍ່­ໄມ້​ມາ​ຂາຍ​ໃຫ້​ນັກ​ທ່ອງ​ທ່ຽວ.

    ພາຍ­ຫຼັງ​ທ່ຽວ​ຊົມ​ພັກ​ຕາດ​ຊອຍ​ວອຍ ແລະ ຕາດ​ຫ້ວຍ​ຊາຍ​ຂາວ​ແລ້ວ ຄາ​ຣາ​ວານ​ລົດ​ທ່ອງ​ທ່ຽວ​ຍັງ​ໄດ້​ໄປ​ທ່ອງ​ທ່ຽວ​ຕາດ​ວັງ​ຫຼວງ ເມືອງ​ປາກ​ງື່ມ ຕື່ມ​ອີກ.

ຂ່າວທີ່ກ່ຽວຂ້ອງ