ຮອງເຈົ້າຄອງ ເນັ້ນໂຮງງານຂ້າສັດດອນດູ່ ໃຫ້ບໍລິການວ່ອງໄວ ແລະ ມີຄຸນນະພາບ

833 23 ສ.ຫ. 2019 ຂ່າວໜ້າ​ໜຶ່ງ
ຮອງເຈົ້າຄອງ ເນັ້ນໂຮງງານຂ້າສັດດອນດູ່ ໃຫ້ບໍລິການວ່ອງໄວ ແລະ ມີຄຸນນະພາບ

    ທ່ານ ອາດ​ສະ­ພັງ​ທອງ ສີ​ພັນ​ດອນ ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ (ນວ) ລົງ​ຢ້ຽມ­ຢາມ​ໂຮງ­ງານ​ຂ້າ​ສັດ­ທັນ​ສະ­ໄໝ​ດອນ​ດູ່ ເມືອງ​ຫາດ​ຊາຍ​ຟອງ ນວ ວັນ​ທີ 20 ສິງ­ຫາ 2019 ໂດຍ​ໄດ້​ຮັບ​ການ​ຕ້ອນ­ຮັບ​ຂອງ​ທ່ານ ຄຳ​ຫຼ້າ ແສງ​ດາ​ວົງ ຜູ້­ອຳ­ນວຍ­ການ​ບໍ­ລິ­ສັດ​ວິ​ສາ​ຫະ​ກິດ​ສະ­ບຽງ​ອາ­ຫານ ນວ ຫົວ­ໜ້າ​ໂຮງ­ງານ​ຂ້າ​ສັດ­ທັນ​ສະ­ໄໝ​ດອນ​ດູ່ ແລະ ພາກ­ສ່ວນ​ກ່ຽວ­ຂ້ອງ.

    ທ່ານ ຄຳ​ຫຼ້າ ແສງ​ດາ​ວົງ ກ່າວ​ວ່າ: ໂຮງ­ງານ​ຂ້າ​ສັດ­ທັນ​ສະ­ໄໝ​ດອນ​ດູ່ ໄດ້​ພັດ­ທະ­ນາ​ໃຫ້​ມີ​ຄວາມ​ທັນ​ສະ­ໄໝ​ແຕ່​ທ້າຍ​ປີ 2016 ເປັນ­ຕົ້ນ​ມາ ໂດຍ​ໄດ້​ຢືມ​ທຶນ​ຈາກ​ບໍ­ລິ­ສັດ ຊີ​ພີ​ລາວ ຈຳ­ກັດ 2,12 ຕື້​ກີບ ເພື່ອ​ຊື້​ເຄື່ອງ​ຈັກ​ຈາກ​ຕ່າງ­ປະ­ເທດ ແລະ ຢືມ​ເພີ່ມ​ຕື່ມ​ອີກ ລວມ 3 ຕື້​ກວ່າ​ກີບ ການ​ໃຊ້​ແທນ​ແມ່ນ​ຫັກ 25% ຂອງ​ການ​ມາ​ໃຊ້​ບໍ­ລິ­ການ​ຂ້າ​ຄົວ​ໝູ ໂດຍ​ໄດ້​ຕິດ​ຕັ້ງ​ເຄື່ອງ​ຈັກ​ສຳ­ເລັດ​ທ້າຍ​ປີ 2018 ໄດ້​ແຍກ​ການ​ຜະ­ລິດ​ເປັນ 2 ສາຍ​ຄື: ງົວ-ຄວາຍ ແລະ ໝູ ປັດ­ຈຸ­ບັນ​ກຳ­ລັງ​ສ້າງ​ສາຍ​ການ​ຜະ­ລິດ​ໝູ​ໃຫ້​ໄດ້ 2 ສາຍ ເພື່ອ​ຂ້າ​ຄົວ​ໃຫ້​ໄດ້​ຫຼາຍ​ກວ່າ 500 ໂຕ​ຕໍ່​ວັນ 6 ເດືອນ​ຕົ້ນ​ປີ 2019 ສ້າງ​ລາຍ​ຮັບ​ຈາກ​ຄວາຍ 3.408 ໂຕ ເປັນ​ເງິນ 246 ລ້ານ​ກວ່າ​ກີບ ງົວ 531 ໂຕ ເປັນ​ເງິນ 38 ລ້ານ​ກວ່າ​ກີບ ໝູ 35.602 ໂຕ ເປັນ​ເງິນ 1,4 ຕື້​ກວ່າ​ກີບ ລວມ​ລາຍ​ຮັບ 1,7 ຕື້​ກວ່າ​ກີບ ໃນ​ນີ້ ໄດ້​ມອບ​ພັນ­ທະ​ອາ­ກອນ​ມູນ​ຄ່າ​ເພີ່ມ 173 ລ້ານ​ກວ່າ​ກີບ.

    ພາຍ­ຫຼັງ​ໄດ້​ຮັບ​ແຈ້ງ​ການ​ຂອງ​ກະ­ຊວງ​ກະ­ສິ­ກຳ ແລະ ປ່າ­ໄມ້ ກ່ຽວ​ກັບ​ການ​ລະ­ບາດ​ຂອງ​ພະ­ຍາດ​ໝູ​ອາ​ຟຣິ​ກາ ທາງ​ໂຮງ­ງານ​ໄດ້​ເພີ່ມ​ການ​ກວດ­ກາ​ການ​ເຂົ້າ-ອອກ​ໝູ ແລະ ຕິດ­ຕາມ​ສະ­ພາບ​ຈາກ​ຂະ­ແໜງ­ການ​ລ້ຽງ­ສັດ ແລະ ການ​ປະ­ມົງ​ເປັນ​ປະ­ຈຳ ພ້ອມ​ທັງ​ອອກ​ມາດ​ຕະ­ການ​ເຂັ້ມ​ງວດ​ໃນ​ການ​ນຳ​ເອົາ​ໝູ​ເຂົ້າ​ມາ​ຂ້າ ໂດຍ​ຮູບ​ການ​ປະ­ສານ​ກັບ​ໜ່ວຍ​ງານ​ສັດ­ຕະ­ວະ­ແພດ ກວດ­ກາ​ເອ­ກະ­ສານ​ການ​ເຄື່ອນ​ຍ້າຍ​ສັດ ໂດຍ​ສະ­ເພາະ​ໝູ​ຕ້ອງ​ແຈ້ງ​ລ່ວງ​ໜ້າ 15 ວັນ ກ່ອນ​ຈະ​ນຳ​ໝູ​ເຂົ້າ​ໂຮງ­ງານ​ຂ້າ​ສັດ.

    ໂອ­ກາດ​ນີ້ ກໍ​ຂໍ​ສະ­ເໜີ​ໃຫ້​ຂັ້ນ​ເທິງ​ຊ່ວຍ​ກວດ­ກາ​ມາດ­ຕະ­ຖານ​ໂຮງ­ງານ​ຂ້າ​ສັດ​ໃນ ນວ ແກ້​ໄຂ​ທາງ​ເວັ້ນ​ອ້ອມ​ໂຮງ­ງານ​ຂ້າ​ສັດ​ເພື່ອ​ປ້ອງ​ກັນ​ພະ­ຍາດ ຊ່ວຍ​ພາກ­ສ່ວນ​ກ່ຽວ­ຂ້ອງ​ໃນ​ການ​ອອກ​ໃບ​ຕາ­ດິນ​ໃຫ້​ໂຮງ­ງານ​ຂ້າ​ສັດ ລວມ​ທັງ​ຊອກ​ຫາ​ແຫຼ່ງ​ທຶນ ເພື່ອ​ມາ​ພັດ­ທະ­ນາ​ໃຫ້​ໂຮງ­ງານ​ຂ້າ​ສັດ­ທັນ​ສະ­ໄໝ​ກ່ອນ​ເກົ່າ.

    ທ່ານ ອາດ​ສະ­ພັງ​ທອງ ສີ​ພັນ​ດອນ ໄດ້​ສະ­ແດງ​ຄວາມ​ຊົມ­ເຊີຍ​ຕໍ່​ຜົນ­ງານ​ທີ່​ໂຮງ­ງານ​ຂ້າ​ສັດ­ທັນ​ສະ­ໄໝ​ດອນ​ດູ່ ຍາດ​ມາ​ໄດ້ ພ້ອມ​ທັງ​ໄດ້​ເນັ້ນ​ໃຫ້​ສືບ­ຕໍ່​ຄົ້ນ­ຄວ້າ​ປະ­ຕິ­ບັດ​ຍຸດ​ທະ​ສາດ​ຂອງ​ໂຮງ­ງານ​ໃຫ້​ເປັນ​ຮູບ​ປະ​ທຳ ເນັ້ນ​ບໍ­ລິ­ການ​ວ່ອງ­ໄວ ສະ­ດວກ ແລະ ຮັບ­ປະ­ກັນ​ຄຸນ​ນະ​ພາບ ໃນ​ນີ້ ຄະ­ນະ​ອຳ­ນວຍ​ການ​ຕ້ອງ​ໄດ້​ເອົາ­ໃຈ­ໃສ່​ເບິ່ງ­ແຍງ​ສຸ­ຂະ­ພາບ​ຂອງ​ພະ­ນັກ­ງານ ກຳ­ມະ­ກອນ​ໃຫ້​ມີ​ສຸ­ຂະ­ພາບ​ແຂງ­ແຮງ ແລະ ເຮັດ​ວຽກ​ດ້ວຍ​ຄວາມ​ເອົາ­ໃຈ­ໃສ່ ປະ­ກອບ​ອຸ­ປະ­ກອນ-ເຄື່ອງ­ມື​ທີ່​ທັນ​ສະ­ໄໝ ນອກ​ນີ້ ກໍ​ຕ້ອງ​ໄດ້​ເອົາ­ໃຈ­ໃສ່​ຄົ້ນ­ຄວ້າ​ເຄື່ອງ­ນຸ່ງ​ຫົ່ມ​ໃຫ້​ພະ­ນັກ­ງານ​ໃຫ້​ສະ­ອາດ​ຖືກ­ຕ້ອງ​ຕາມ​ຫຼັກ​ອະ­ນາ­ໄມ ແນ­ໃສ່​ຮັບ­ປະ­ກັນ​ຄວາມ​ປອດ​ໄພ​ຂອງ​ຜູ້​ບໍ­ລິ­ໂພກ ການ​ພັດ­ທະ­ນາ​ຕ້ອງ​ຄົ້ນ­ຄວ້າ​ຫຼາຍ​ຮູບ​ແບບ ເພື່ອ​ໃຫ້​ໄດ້​ຮັບ​ທຶນ​ມາ​ພັດ­ທະ­ນາ​ໃຫ້​ໂຮງ­ງານ​ມີ​ຄວາມ​ທັນ​ສະ­ໄໝ ເພື່ອ​ດຶງ​ດູດ​ເອົາ​ລູກ​ຄ້າ​ມາ​ໃຊ້​ບໍ­ລິ­ການ​ໃຫ້​ນັບ​ມື້​ຫຼາຍ​ຂຶ້ນ ແລະ ເພີ່ມ​ທະ­ວີ​ຄວາມ​ເອົາ­ໃຈ­ໃສ່​ຄຸ້ມ​ຄອງ​ຕິດ­ຕາມ​ກວດ­ກາ​ປ້ອງ​ກັນ​ພະ­ຍາດ​ສັດ.

ຂ່າວທີ່ກ່ຽວຂ້ອງ