ຂ່າວຫຼ້າສຸດ

ກອນເພັດ ພົບ ດາເອກ ມວຍຄູ່ເອກ 24 ສິງຫາ ຢູ່ບຶງຂະຫຍອງ

742 23 ສ.ຫ. 2019 ວົງຈອນກີລາ
ກອນເພັດ ພົບ ດາເອກ ມວຍຄູ່ເອກ 24 ສິງຫາ ຢູ່ບຶງຂະຫຍອງ

    ກອນ​ເພັດ ຈາກ​ຄ້າຍ​ມວຍ​ສໍ​ສິງ​ຄຳ ຈະ​ຂຶ້ນ​ສັງ­ວຽນ​ປະ​ທະ​ກັບ ດາ​ເອກ ກຽດ​ສົມ​ນຶກ (ໄທ) ມວຍ​ຄູ່​ເອກ ຮຸ່ນ​ນ້ຳ­ໜັກ 52 ກິ​ໂລ ໃນ​ການ​ແຂ່ງ­ຂັນ​ມວຍ​ມິດ­ຕະ­ພາບ 2 ຝັ່ງ​ຂອງ ລາວ-ໄທ ລາຍ­ການ​ມວຍ​ນະຄອນ​ຫຼວງ​ກໍ​ກຽດ​ແດນ​ຈຳ­ປາ​ໄຟ້ ປະ­ຈຳ​ປີ 2019 ໃນ​ວັນ​ທີ 24 ສິງ­ຫາ 2019 ເວ­ລາ 20:00 ໂມງ ເປັນ­ຕົ້ນ​ໄປ ຢູ່​ສັງ­ວຽນ​ມວຍ​ສະ­ຫະ­ພັນ​ມວຍ​ລາວ ສະ­ໂມ­ສອນ​ບຶງ​ຂະ​ຫຍອງ.

    ທ່ານ ຄຳ​ເສັງ ສູນ​ດາ­ລາ ປະ­ທານ​ສະ­ຫະ­ພັນ​ມວຍ​ລາວ ມວຍ​ວູ​ຊູ ມວຍ​ປັນ​ຈັກ​ສີ​ລັດ ແລະ ມວຍ​ສາ­ກົນ ນະ­ຄອນ­ຫຼວງ​ວຽງ​ຈັນ ໃຫ້​ສຳ­ພາດ​ວັນ​ທີ 22 ສິງ­ຫານີ້ວ່າ: ເພື່ອ​ສືບ­ຕໍ່​ໂຄງ­ການ​ຮ່ວມ​ມື​ລະ­ຫວ່າງ​ສະ­ຫະ­ພັນ​ມວຍ​ນະ­ຄອນ­ຫຼວງ ກັບ​ບໍ­ລິ­ສັດ​ກໍ​ກຽດ​ບ໊ອກ​ຊິງ​ກລຸບ​ຈຳ­ກັດ ປະ­ເທດ​ໄທ ຈັດ​ແຂ່ງ ຂັນ​ມວຍ​ມິດ­ຕະ­ພາບ 2 ຝັ່ງ​ຂອງ ເພື່ອ​ເຊື່ອມ​ສາຍ­ສຳ­ພັນ​ທະ​ໄມ­ຕີ ລາວ-ໄທ ເພື່ອ​ສົ່ງ­ເສີມ​ນັກ​ມວຍ​ຮຸ່ນ​ສືບ​ທອດ​ຂອງ 2 ຊາດ ກໍ​ຄື​ນະ­ຄອນ­ຫຼວງ​ວຽງ​ຈັນ ກ້າວ​ສູ່​ການ​ເປັນ​ນັກ​ຊົກ​ອາ­ຊີບ ແລະ ຕິດ​ທີມ​ຊາດ​ໃນ​ອະ­ນາ­ຄົດ ເຊິ່ງ​ການ​ແຂ່ງ­ຂັນ​ລາຍ­ການ​ນີ້​ຂຶ້ນ ແມ່ນ​ເປັນ​ຄັ້ງ​ທີ 3 ໂດຍ​ວັນ​ທີ 24 ສິງ­ຫາ 2019 ມີ 6 ຄູ່ ໃນ​ນີ້​ຮອງ​ຄູ່​ເອກ ຊີ​ອຸ້ຍ ຂຸນ​ວັງ​ຫຼວງ ພົບ ແກ່ນ​ຂາມ ກຽດ​ສົມ​ນຶກ ຮຸ່ນ​ນ້ຳ­ໜັກ 50 ກິ​ໂລ.

    ນອກ​ນີ້​ຍັງ​ມີ​ຄູ່​ອື່ນໆ​ໃນ​ລາຍ­ການ​ອີກ 4 ຄູ່ ມີ ຂຸນ​ເພັດ ເພັດ​ນະ­ຄອນ ພົບ ຕະ­ບອງ​ເພັດ ຂວັນ​ໃຈ​ສີ​ໂຄດ ຮຸ່ນ 55 ກິ​ໂລ ຊີງ​ຊະ­ນະ​ຊົນ ສິດ​ໂຕ້​ພາ​ລຸ້ງ ພົບ ເສດ​ສັນ ອິນ​ຊີ​ມິ​ຕີ ຮຸ່ນ 51 ກິ​ໂລ ຈິງ​ຫຼີດ​ທອງ ສໍ​ຈະ­ເລີນ​ສິງ ພົບ ຂວັນ​ເພັດ ສໍ​ສິງ​ຄຳ ຮຸ່ນ 48 ກິ​ໂລ ປະ­ຊາ­ຊົນ​ນ້ອຍ ສິດ​ໂຕ້​ພາ​ລຸ້ງ ພົບ ລົດ ດຸດ ສິດ​ເຈ້​ຫຼ້າ ຮຸ່ນ 37 ກິ​ໂລ.

ຂ່າວທີ່ກ່ຽວຂ້ອງ