ຂ່າວຫຼ້າສຸດ

ອັງ​ກິດ​​ສະ​ເໜີ​ເງື່ອນ​ໄຂ​ເຈ​ລະ​ຈາ​ກ່ຽວ​ກັບ​ສັນ​ຍາ ຖອນ​ຕົວ​ອອກ​ຈາກ​ສະ​ຫະ​ພາບເອີ​ຣົບ

821 22 ສ.ຫ. 2019 ຂ່າວຕ່າງປະເທດ
ອັງ​ກິດ​​ສະ​ເໜີ​ເງື່ອນ​ໄຂ​ເຈ​ລະ​ຈາ​ກ່ຽວ​ກັບ​ສັນ​ຍາ ຖອນ​ຕົວ​ອອກ​ຈາກ​ສະ​ຫະ​ພາບເອີ​ຣົບ

   ວັນ​ທີ 19 ສິງຫາ​ນີ້ ທ່ານ​ໂບ​ຣິ​​ສ ຈອນ​ສັນ ນາຍົກລັດຖະມົນຕີ​ອັງກິດ ໄດ້​ສົ່ງ​ສານ​ໄປ​ຍັງ​ສະຫະພາບ​ເອີ​ຣົບ (EU)  ໂດຍ​ໄດ້​ສະເໜີ​ເງື່ອນໄຂ​ເຈລະຈາ​ກ່ຽວ​ກັບ​ສັນຍາ ການ​ຖອນ​ຕົວ​ອອກ​ຈາກ​ສະຫະພາບ​ເອີ​ຣົບ (Brexit) ສະບັບ​ໃໝ່​ຕໍ່ EU ຊຶ່ງ​ແມ່ນ​ທ່ານ​ໂບ​ຣິ​​ສ ຈອນ​ສັນ ເປັນ​ເຈົ້າ​ການ​ຕິດຕໍ່​ພົວພັນ​ກັບ EU ເປັນ​ຄັ້ງ​ທຳ​ອິດ​ກ່ຽວ​ກັບ Brexit ພາຍຫຼັງ​ທ່ານ​ຂຶ້ນ​ດຳລົງ​ຕຳແໜ່ງ​ນາຍົກລັດຖະມົນຕີ​ອັງກິດ​ເປັນ​ເວລາ​ເກືອບ​ໜຶ່ງ​ເດືອນ.

    ໃນ​ສານ​ທີ່​ສົ່ງ​ເຖິງ​ທ່ານ ໂດ​ນາ​​ລ ​ທັສ ປະທານ​ສະພາ​ມົນຕີ​ເອີ​ຣົບ ໄດ້​ລະບຸ​ວ່າ ຄວາມ​ບໍ່​ພໍໃຈ​ຂອງ​ອັງກິດ​ຕໍ່​ສັນຍາ Brexit ສະບັບ​ເກົ່າ ຕົ້ນຕໍ​ແມ່ນ​ສຸມ​ໃສ່ “ແຜນ​ສຳຮອງ” ກ່ຽວ​ກັບ​ບັນຫາ​ຊາຍ​ແດນ​ອຽກ​ລັງ​ເໜືອ (ຂຶ້ນ​ກັບ​ອັງກິດ) ກັບ​ສາທາລະນະ​ລັດ ອຽກ​ລັງ ຊຶ່ງ​ຈະ​ມີ​ຄວາມ​ສ່ຽງ​ດ້ານ​ອະທິປະ​ໄຕ​ທີ່​ຄົບ​ຖ້ວນ​ຂອງ​ອັງກິດ ແລະ  “ບໍ່​ເປັນ​ປະຊາທິປະໄຕ”. ສັນຍາ Brexit ສະບັບ​ໃໝ່​ຕ້ອງ​ຍົກເລີກ “ແຜນ​ສຳຮອງ”. ທ່ານ ຈອນ​ສັນ ຮຽກຮ້ອງ​ໃຫ້​ອັງກິດ ແລະ  EU ຊອກ​ຫາ​ແຜນການ​ໃໝ່​ທົດ​ແທນ​ທີ່ “ສອດຄ່ອງ ແລະ  ສ້າງສັນ” ມາ​ແກ້​ໄຂ​ບັນຫາ​ຊາຍ​ແດນ​ອຽກ​ລັງ​ເໜືອ ທີ່​ອາດ​ຈະ​ເກີດ​ຂຶ້ນ​ຍ້ອນ Brexit.

    ອີງ​ຕາມ​ສັນຍາ Brexit ທີ່​ທ່ານ​ນາງ​ເຕ​ເຣ​ຊາ ເມ ອະດີດ​ນາຍົກລັດຖະມົນຕີ​ອັງກິດ ຕົກລົງ​ກັບ EU ລະບຸ​ວ່າ ຖ້າ​ອັງກິດ ແລະ  EU ບໍ່​ສາມາດ​ບັນລຸ​ແຜນການ​ທີ່​ດີ​ກວ່າ​ກ່ຽວ​ກັບ​ການ​ຄ້າ​ໃນ​ເຂດ​ອຽກ​ລັງ​ເໜືອ ໃນ​ໄລຍະ​ຂ້າມ​ຜ່ານ​ຂອງ Brexit ຈະ​ຕ້ອງ​ລິ​ເລີ່ມ​ນຳ​ໃຊ້ “ແຜນ​ສຳຮອງ” ພາຍຫຼັງ​ໄລຍະ​ຂ້າມ​ຜ່ານ​ສິ້ນ​ສຸດ​ລົງ.

ຂ່າວທີ່ກ່ຽວຂ້ອງ